នាពេលថ្មីៗនេះ តាវ មីងស៊ីវ ជាកញ្ញាម្នាក់ដែលមកពីខេត្តយូណាន ត្រូវបានប្រទេសកាហ្សាក់ស្ថានផ្តល់រង្វាន់"មេដាយមិត្តភាពថ្នាក់ទី ២"។ មេដាយនេះគឺជាកិត្តិយសជាតិដែលត្រូវបានផ្តល់ជូនក្នុងនាមប្រមុខរដ្ឋ ហើយលោកស្រី Aida Balaeva ដែលជាឧបនាយករដ្ឋមន្ត្រី និងជារដ្ឋមន្ត្រីក្រសួងវប្បធម៌និងព័ត៌មានរបស់ប្រទេសកាហ្សាក់ស្ថានបានប្រគល់មេដាយនេះដល់កញ្ញា តាវ មីងស៊ីវ។

នាពេលថ្មីៗនេះ សកម្មភាពផ្លាស់ប្តូរយុវជនរវាងទីក្រុងមេត្រីភាពនៅសហរដ្ឋអាមេរិកដែលរៀបចំដោយសមាគមប្រជាជនខេត្តយូណានដើម្បីមិត្តភាពជាមួយបរទេស និងការិយាល័យតំណាងពាណិជ្ជកម្មខេត្តយូណានប្រចាំនៅសហរដ្ឋអាមេរិក (ទីក្រុងញូវយ៉ក) ត្រូវបានធ្វើឡើងនៅសហរដ្ឋអាមេរិក។ គ្រូបង្រៀននិងសិស្សានុសិស្សចំនួន ២៤ នាក់មកពីសាលាTower Hill ក្នុងរដ្ឋ Delaware បានដើរចូលទៅក្នុងស្ថានទូតចិនប្រចាំសហរដ្ឋអាមេរិក ដើម្បីចូលរួមក្នុងសកម្មភាពផ្លាស់ប្តូរក្រោមប្រធានបទ "បទពិសោធន៍យូណាន" ដែលធ្វើឱ្យការយល់ដឹងរបស់ពួកគេអំពីប្រទេសចិននិងខេត្តយូណានកាន់តែស៊ីជម្រៅ។

ក្នុងរយៈពេល ២ ខែដំបូងនៃឆ្នាំនេះ ទំហំពាណិជ្ជកម្មនាំចេញនាំចូលទំនិញរបស់ខេត្តយូណានសម្រេចបាន ៤១,១៣ ប៊ីលានយាន់ កើនឡើង ៨,២% ធៀបនឹងរយៈពេលដូចគ្នាឆ្នាំមុន។ យោងតាមមន្ត្រីនៃគយក្រុងគុនមិញ បានឱ្យដឹងថា ពាណិជ្ជកម្មក្រៅប្រទេសរបស់ខេត្តយូណានបានរក្សាកំណើនក្នុងរយៈពេល ៤ ត្រីមាស ឬ ១១ ខែជាប់ៗគ្នា។ ចាប់តាំងពីដើមឆ្នាំនេះមក ឧត្តមភាពនៃការនាំចេញកសិកម្មលក្ខណៈពិសេសតំបន់ខ្ពង់រាបរបស់ខេត្តយូណាន នៅតែបន្តរក្សាស្ថិរភាពយ៉ាងរឹងមាំ។ ចាប់ពីខែមករា ដល់ខែកុម្ភៈ ការនាំចេញកសិផលទូទាំងខេត្តសម្រេចបាន ៣,១៩ ប៊ីលានយាន់ កើនឡើង ៨,១% ដែលឈរនៅលំដាប់ថ្នាក់លេខ ១ ក្នុងតំបន់ភាគកណ្តាល និងភាគខាងលិចនៃប្រទេសចិន។ ក្នុងនោះ កសិផលជាង ២០ ប្រភេទ រួមមាន កាហ្វេ ផ្កាស្រស់កាត់ទង ប្លូប៊ឺរី និងផ្សិតម៉ាតស៊ុតាកេ (Matsutake) ជាដើម មានតម្លៃនាំចេញឈរនៅលំដាប់ថ្នាក់លេខ ១ ទូទាំងប្រទេសចិន។ ដោយឡែក ការនាំចេញផ្កាស្រស់កាត់ទងមានចំនួន ១៩០ លានទង កើនឡើងដល់ ៨៣,២%។

កាលពីពេលថ្មីៗនេះ វគ្គបណ្តុះបណ្តាលតំបន់ស្តីពី "កិច្ចសហប្រតិបត្តិការ និងការអភិវឌ្ឍថាមពលបៃតងតំបន់ឡានឆាង-មេគង្គ" ត្រូវបានរៀបចំឡើងដោយជោគជ័យនៅក្នុងទីក្រុងគុនមិញ។ តំណាង និងអ្នកជំនាញបច្ចេកទេសក្នុងវិស័យថាមពលមកពីប្រទេសទាំងប្រាំមួយ រួមមាន ប្រទេសចិន កម្ពុជា ឡាវ មីយ៉ាន់ម៉ា ថៃ និងវៀតណាម បានចូលរួមសិក្សា និងផ្លាស់ប្តូរយោបល់គ្នាលើប្រធានបទ "ការសម្រេចបាននូវការអភិវឌ្ឍចីរភាពនៃវិស័យផលិតកម្ម តាមរយៈការជំរុញដោយនវានុវត្តន៍ និងការផ្តល់ថាមពលដោយបច្ចេកវិទ្យាឌីជីថល"។

ការធ្វើពាណិជ្ជកម្មតាមប្រព័ន្ធអេឡិចត្រូនិកឆ្លងដែនដោយម្នាក់ឯង កំពុងក្លាយជានិន្នាការថ្មី។ ប៉ុន្តែតាមពិតទៅ "ក្រុមហ៊ុនដែលមានមនុស្សម្នាក់" (One Person Company) មិនមែនមានន័យថាមានមនុស្សតែម្នាក់គត់នោះទេ ប៉ុន្តែវាសំដៅទៅលើក្រុមហ៊ុនដែលដឹកនាំដោយបុគ្គលស្នូលម្នាក់ ដោយពឹងផ្អែកលើភ្នាក់ងារឆ្លាតវៃ AI (AI Agents) រួមជាមួយបុគ្គលិកជំនួយក្នុងចំនួនតិចតួច និងការជួលសេវាកម្មពីខាងក្រៅដើម្បីដំណើរការអាជីវកម្ម។