បរិមាណនៃការនាំចូលផ្លែធុរេនតាមរយៈផ្លូវរថភ្លើងចិន-ឡាវ សម្រាប់ឆ្នាំនេះ បានហក់ឡើងលើសពី ៥ ម៉ឺនតោន

ចាប់ពីថ្ងៃទី ១ ខែមករា ដល់ថ្ងៃទី ២៦ ខែមេសា ផ្លូវរថភ្លើងចិន-ឡាវបានដឹកជញ្ជូនផ្លែធុរេននាំចូលសរុបចំនួន ៥,០៣ ម៉ឺនតោន ដែលកើនឡើង ៩៤,២% បើប្រៀបធៀបនឹងរយៈពេលដូចគ្នាកាលពីឆ្នាំមុន។

តាំងពីដើមឆ្នាំនេះមក តម្រូវការនាំចេញផលិតផលកសិកម្មពិសេសរបស់បណ្តាប្រទេសក្នុងតំបន់អាស៊ីអាគ្នេយ៍  ដូចជា ផ្លែធុរេន និងចេកជាដើម ទៅកាន់ទីផ្សារចិន នៅតែបន្តកើនឡើងយ៉ាងខ្លាំង។ ក្នុងនាមជាចំណុចប្រសព្វស្នូលនៃការដឹកជញ្ជូនអន្តរជាតិតាមផ្លូវរថភ្លើងចិន-ឡាវ ច្រកទ្វារព្រំដែនផ្លូវដែកម៉ូហានបានបន្តពង្រឹងការសម្របសម្រួលជាមួយច្រកទ្វារព្រំដែនផ្លូវដែកប៊ុតទែននៃប្រទេសឡាវ ដោយកែលម្អដំណើរការបោសសំអាតគយ ជំរុញលំហូរដឹកជញ្ជូនឆ្លងព្រំដែន និងខិតខំប្រឹងប្រែងយ៉ាងពេញទំហឹងដើម្បីធានាដល់ការដឹកជញ្ជូនទំនិញស្រស់ៗពីបណ្តាប្រទេសក្នុងតំបន់អាស៊ីអាគ្នេយ៍ឆ្លងកាត់ព្រំដែនយ៉ាងឆាប់រហ័ស។

ដើម្បីធានាថាផ្លែឈើដែលផលិតនៅបណ្តាប្រទេសក្នុងតំបន់អាស៊ីអាគ្នេយ៍ អាចដឹកជញ្ជូនទៅដល់ដៃអ្នកប្រើប្រាស់ចិនប្រកបដោយភាពស្រស់ញញឹម ផ្នែកផ្លូវដែកចិនបានសហការជាមួយគយ និងសហគ្រាសពាក់ព័ន្ធ ដើម្បីបើក "ផ្លូវបៃតង" សម្រាប់ត្រួតពិនិត្យផលិតផលស្រស់ ដោយអនុវត្តការផ្តល់អាទិភាពក្នុងការបញ្ជូនចូល ការត្រួតពិនិត្យ និងការធ្វើតេស្ត ដែលជួយកាត់បន្ថយពេលវេលាស្តុកទុកនិងរង់ចាំរបស់ផ្លែឈើនៅច្រកទ្វារព្រំដែនយ៉ាងច្រើន៕