ព្រឹកថ្ងៃទី ៣០ ខែមេសា លោក Xi Jinping អគ្គលេខាធិការនៃគណៈកម្មាធិការមជ្ឈិមបក្សកុម្មុយនីស្តចិន ប្រធានរដ្ឋចិននិងជាប្រធានគណៈកម្មាធិការយោធាមជ្ឈិមចិនបានអញ្ជើញចូលរួមនិងថ្លែងសុន្ទរកថាគន្លឹះក្នុងពិធីសំណេះសំណាលអំពីការបង្កើនការស្រាវជ្រាវជាមូលដ្ឋាននៅក្រុងសៀងហៃ។ លោកបានគូសបញ្ជាក់ថា ការស្រាវជ្រាវជាមូលដ្ឋានគឺជាប្រភពនៃប្រព័ន្ធវិទ្យាសាស្ត្រទាំងមូល និងជាគន្លឹះនៃរាល់បញ្ហាបច្ចេកទេសទាំងអស់។ ត្រូវធ្វើកិច្ចខិតខំប្រឹងប្រែងកាន់តែខ្លាំងនិងមានវិធានការកាន់តែជាក់ស្តែងក្នុងការបង្កើនការស្រាវជ្រាវជាមូលដ្ឋាន ដើម្បីលើកកម្ពស់សមត្ថភាពច្នៃប្រឌិតថ្មីរបស់ចិន និងពង្រឹងថែមមួយកម្រិតទៀតនូវមូលដ្ឋានគ្រឹះនៃការកសាងប្រទេសខ្លាំងក្លាខាងវិទ្យាសាស្ត្រនិងបច្ចេកវិទ្យា ។
លោក Xi Jinping បានលើកឡើងថា ត្រូវបង្កើនការធានានិងគាំទ្រចំពោះការស្រាវជ្រាវជាមូលដ្ឋាន។ លើកកម្ពស់សមាមាត្រនៃថវិកាសម្រាប់ប្រើក្នុងការស្រាវជ្រាវជាមូលដ្ឋានជាសន្សឹមៗ ដើម្បីបង្កើតជាប្រព័ន្ធវិនិយោគចម្រុះ។ ការរៀបចំជាប្រព័ន្ធនូវគម្រោងកសាងហេដ្ឋារចនាសម្ព័ន្ធវិទ្យាសាស្ត្រនិងបច្ចេកវិទ្យាសំខាន់ៗនិងកសាងវេទិកាសម្រាប់ការស្រាវជ្រាវខាងវិទ្យាសាស្ត្រប្រកបដោយភាពវៃឆ្លាត។ ធ្វើឱ្យប្រព័ន្ធវាយតម្លៃតាមប្រភេទដែលសមស្របនឹងលក្ខណៈពិសេសនៃការស្រាវជ្រាវជាមូលដ្ឋានមានសុក្រឹតភាព កែលម្អលក្ខខណ្ឌការងារនិងជីវភាពរស់នៅរបស់អ្នកស្រាវជ្រាវជាមូលដ្ឋាន បង្កបរិយាកាសច្នៃប្រឌិតថ្មីដែលប្រកបដោយភាពបើកទូលាយ បរិយាប័ន្ន និងមានការយោគយល់ចំពោះការបរាជ័យក្នុងការស្រាវជ្រាវ ៕
