លោក Xi Jinping និង លោក Thongloun អគ្គលេខាធិការនៃគណៈកម្មាធិការមជ្ឈិមបក្សប្រជាជនបដិវត្តន៍ឡាវ និងជាប្រធានរដ្ឋឡាវផ្ញើសារលិខិតជូនគ្នាទៅវិញទៅមក ដើម្បីអបអរសាទរខួបលើកទី៦៥នៃការបង្កើតទំនាក់ទំនងការទូតរវាងចិននិងឡាវ
CRI|
នៅថ្ងៃទី ២៥ ខែមេសា លោក Xi Jinping អគ្គលេខាធិការនៃគណៈកម្មាធិការមជ្ឈិមបក្សកុម្មុយនីស្តចិននិងជាប្រធានរដ្ឋចិន និង លោក Thongloun អគ្គលេខាធិការនៃគណៈកម្មាធិការមជ្ឈិមបក្សប្រជាជនបដិវត្តន៍ឡាវនិងជាប្រធានរដ្ឋឡាវបានផ្ញើសារលិខិតជូនគ្នាទៅវិញទៅមក ដើម្បីអបអរសាទរខួបលើកទី៦៥នៃការបង្កើតទំនាក់ទំនងការទូតរវាងចិននិងឡាវ។
ថ្លែងក្នុងសារលិខិត លោក Xi Jinping បានលើកឡើងថា ប្រទេសចិន និងឡាវ មានរបបសង្គម និងមាគ៌ាអភិវឌ្ឍន៍ស្រដៀងគ្នា។ បច្ចុប្បន្ននេះ ភាគីទាំងពីរកំពុងពន្លឿនការកសាងសហគមន៍ជោគវាសនារួមរវាងចិននិងឡាវ ដែលមានស្តង់ដាខ្ពស់ គុណភាពខ្ពស់ និងកម្រិតខ្ពស់ ។ ជានិច្ចកាល គណបក្ស និងរដ្ឋាភិបាលចិនតែងតែចាត់ទុកប្រទេសឡាវជាទិសដៅដ៏សំខាន់មួយនៃការទូតជាមួយប្រទេសជិតខាងរបស់ប្រទេសចិន។ ខ្ញុំរីករាយធ្វើការជាមួយ លោក Thongloun ឆ្លៀតខួបលើកទី ៦៥ នៃការបង្កើតទំនាក់ទំនងការទូតរវាងប្រទេសចិន និងឡាវ និង "ឆ្នាំនៃមិត្តភាពចិន-ឡាវ" ជាឱកាសមួយ ដើម្បីបង្កើនការកសាងទំនុកចិត្តគ្នាជាយុទ្ធសាស្ត្រ ផ្សព្វផ្សាយមិត្តភាពប្រពៃណី និងជំរុញឱ្យកិច្ចសហប្រតិបត្តិការជាក់ស្តែងក្នុងគ្រប់វិស័យទទួលបានផ្លែផ្កាកាន់តែច្រើន ដើម្បីផ្តល់ផលប្រយោជន៍កាន់តែច្រើនសម្រាប់ប្រជាជននៃប្រទេសទាំងពីរ។
លោក Thongloun បានថ្លែងអំណរគុណចំពោះបក្ស រដ្ឋាភិបាល និងប្រជាជនចិន ដែលបានផ្តល់ការគាំទ្រ និងជំនួយដ៏ថ្លៃថ្នូរដល់ប្រទេសឡាវក្នុងរយៈពេលយូរ ។ជានិច្ចកាលប្រទេសឡាវតែងតែប្រកាន់ខ្ជាប់នូវគោលការណ៍ចិនមួយ គាំទ្រប្រទេសចិនក្នុងការការពារផលប្រយោជន៍ស្នូលរបស់ខ្លួន ហើយរីករាយបន្តធ្វើការជាមួយប្រទេសចិន ដើម្បីអនុវត្តផែនការសកម្មភាពរយៈពេលប្រាំឆ្នាំថ្មីសម្រាប់ការកសាងសហគមន៍ជោគវាសនារួមឡាវនិងចិន ដើម្បីធ្វើឱ្យមិត្តភាពប្រពៃណី និងទំនាក់ទំនងភាពជាដៃគូយុទ្ធសាស្ត្រគ្រប់ជ្រុងជ្រោយរវាងឡាវ និងចិនទទួលបានផ្លែផ្កាថ្មីជាបន្តបន្ទាប់។
នៅថ្ងៃដដែល លោក Li Qiang នាយករដ្ឋមន្ត្រីចិន និងលោក Sonexay នាយករដ្ឋមន្ត្រីឡាវ បានផ្ញើសារលិខិតអបអរសាទរជូនគ្នាទៅវិញទៅមក៕
ប្រភពពី：国际新闻
