សម្តេចហ៊ុនសែន ប្រមុខរដ្ឋស្តីទីកម្ពុជាជួបពិភាក្សាការងារជាមួយលោក Wang Yi រដ្ឋមន្ត្រីការបរទេសចិន
CRI|
លោក Wang Yi សមាជិកនៃការិយាល័យនយោបាយនៃគណៈកម្មាធិការមជ្ឈិមបក្សកុម្មុយនីស្តចិន និងជារដ្ឋមន្ត្រីការបរទេសចិន បានជួបពិភាក្សាការងារជាមួយសម្តេចហ៊ុនសែន ប្រមុខរដ្ឋស្តីទីកម្ពុជា និងជាប្រធានព្រឹទ្ធសភាកម្ពុជា នៅរាជធានីភ្នំពេញ កាលពីថ្ងៃទី ២៣ ខែមេសា។
សម្តេច ហ៊ុន សែន បានផ្តាំតាមរយៈលោក Wang Yi ពាំនាំនូវការសួរសុខទុក្ខដ៏ស្មោះជូនចំពោះលោកប្រធានរដ្ឋចិន Xi Jinping និងសម្តែងការអបអរសាទរចំពោះការរៀបចំធ្វើដោយជោគជ័យនូវកិច្ចប្រជុំលើកដំបូងនៃយន្តការកិច្ចសន្ទនាយុទ្ធសាស្ត្រ "២+២" រវាងរដ្ឋមន្ត្រីការបរទេស និងរដ្ឋមន្ត្រីការពារជាតិកម្ពុជា-ចិន ។ សម្តេចហ៊ុនសែនបានបញ្ជាក់ថា ប្រទេសចិនគឺជាមិត្តដ៏ជិតស្និទ្ធ និងគួរឱ្យទុកចិត្តបំផុតរបស់កម្ពុជា។ មិនថាស្ថានការណ៍អន្តរជាតិមានបម្រែបម្រួលយ៉ាងណាក្តី ក៏ប៉ុន្តែការតាំងជ្ញាចិត្តរបស់គណបក្សប្រជាជនកម្ពុជា និងរដ្ឋាភិបាលកម្ពុជាក្នុងការប្រកាន់គោលនយោបាយមិត្ភភាពជាមួយប្រទេសចិនគឺមិនប្រែប្រួលទេ កម្ពុជាប្តេជ្ញាចិត្តយ៉ាងមុតមាំក្នុងការជំរុញកិច្ចសហប្រតិបត្តិការជាមួយប្រទេសចិន។
ជាការឆ្លើយតប លោក Wang Yi បានពាំនាំនូវការសួរសុខទុក្ខយ៉ាងស្និទ្ធស្នាលរបស់លោក Xi Jinping ជូនចំពោះសម្តេចហ៊ុនសែន និងបញ្ជាក់ថា ភាគីទាំងពីរបានឯកភាពគ្នាលើការគាំទ្រគ្នាទៅវិញទៅមកយ៉ាងមុតមាំក្នុងការការពារផលប្រយោជន៍ស្នូលរបស់គូភាគី និងជំរុញយ៉ាងស៊ីជម្រៅនូវកិច្ចសហប្រតិបត្តិការគ្រប់ជ្រុងជ្រោយ ដើម្បីបំពេញបន្ថែមខ្លឹមសារថ្មីសម្រាប់ការកសាងសហគមន៍ជោគវាសនារួមចិន-កម្ពុជាគ្រប់រដូវកាល ក្នុងយុគសម័យថ្មី៕
