រយៈពេល ៤ ខែដំបូងនៃឆ្នាំនេះ បរិមាណអ្នកដំណើរតាមផ្លូវអាកាសរបស់ប្រទេសកម្ពុជា មានចំនួនសរុប ជាង ២,៤ លាននាក់

ក្នុងរយៈពេល ៤ ខែដំបូងនៃឆ្នាំ ២០២៦ ព្រលានយន្តហោះអន្តរជាតិទាំងបីរបស់ប្រទេសកម្ពុជា បានទទួលស្វាគមន៍អ្នកដំណើរតាមផ្លូវអាកាសសរុបជាង ២,៤ លាននាក់ ខណៈបច្ចុប្បន្នមានក្រុមហ៊ុនអាកាសចរណ៍ជាតិ និងអន្តរជាតិជាង ៣០ ក្រុមហ៊ុន កំពុងប្រតិបត្តិការអាជីវកម្មនៅក្នុងប្រទេសកម្ពុជា។

យោងតាមទិន្នន័យបានបង្ហាញថា ចាប់ពីខែមករា ដល់ខែមេសា ឆ្នាំនេះ ចំនួនជើងហោះហើរចេញ-ចូលសរុបនៅអាកាសយានដ្ឋានអន្តរជាតិតេជោភ្នំពេញ អាកាសយានដ្ឋានអន្តរជាតិសៀមរាបអង្គរ និងអាកាសយានដ្ឋានអន្តរជាតិព្រះសីហនុ មានចំនួនសរុបជាង ២,៣ ម៉ឺនជើងហោះហើរ ដែលកើនឡើង ២% បើប្រៀបធៀបនឹងរយៈពេលដូចគ្នាកាលពីឆ្នាំមុន ព្រមទាំងមានបរិមាណអ្នកដំណើរឆ្លងកាត់មានចំនួន ២,៤២៨ លាននាក់។ ទន្ទឹមនឹងនេះដែរ បរិមាណដឹកជញ្ជូនទំនិញតាមផ្លូវអាកាសចេញ-ចូល មានចំនួនសរុបជាង ៣ ម៉ឺនតោន ដែលកើនឡើង ៣៦% បើប្រៀបធៀបនឹងរយៈពេលដូចគ្នាកាលពីឆ្នាំមុន។

បច្ចុប្បន្ននេះ មានក្រុមហ៊ុនអាកាសចរណ៍ជាតិ និងអន្តរជាតិសរុបចំនួន ៣៣ ក្រុមហ៊ុន កំពុងដំណើរការអាជីវកម្មនៅក្នុងប្រទេសកម្ពុជា ក្នុងនោះរួមមាន ក្រុមហ៊ុនអាកាសចរណ៍ក្នុងស្រុកចំនួន ៤ និងក្រុមហ៊ុនអាកាសចរណ៍អន្តរជាតិចំនួន ២៩។ ក្នុងមួយសប្តាហ៍ អាកាសយានដ្ឋានអន្តរជាតិតេជោភ្នំពេញ មានជើងហោះហើរប្រតិបត្តិការចំនួន ៧០៨ ជើង អាកាសយានដ្ឋានអន្តរជាតិសៀមរាបអង្គរ មានចំនួន ២២៤ ជើង និងអាកាសយានដ្ឋានអន្តរជាតិព្រះសីហនុ មានចំនួន ៥០ ជើង។

ចំពោះជើងហោះហើរចម្ងាយឆ្ងាយ បច្ចុប្បន្នមានជើងហោះហើរទៅ-មកសរុបចំនួន ៥២ ជើងក្នុងមួយសប្តាហ៍ រវាងប្រទេសកម្ពុជា និងមជ្ឈមណ្ឌលអាកាសចរណ៍អន្តរជាតិ។ ជើងហោះហើរទាំងនេះ គឺជាច្រកឆ្លងកាត់ដ៏សំខាន់សម្រាប់អ្នកដំណើរមកពីប្រទេសកម្ពុជា ដើម្បីបន្តដំណើរទៅកាន់តំបន់អឺរ៉ុប អាមេរិកខាងជើង អាហ្វ្រិក និងមជ្ឈិមបូព៌ា៕