中文 English {{ activeLangText || 'Languages' }} {{ item.text }}
សេចក្តីប្រកាសនៃកិច្ចប្រជុំពេញអង្គលើកទី ៥ នៃគណៈកម្មាធិការមជ្ឈិមបក្សកុម្មុយនីស្តចិនអាណត្តិទី ២០
News Focus > ខ្លឹមសារ

សេចក្តីប្រកាសនៃកិច្ចប្រជុំពេញអង្គលើកទី ៥ នៃគណៈកម្មាធិការមជ្ឈិមបក្សកុម្មុយនីស្តចិនអាណត្តិទី ២០

CRI|
分享到Facebook

(ត្រូវបានអនុម័តនៅក្នុងកិច្ច​ប្រជុំពេញអង្គលើកទី ៥ នៃគណៈកម្មាធិការមជ្ឈិមបក្សកុម្មុយនីស្តចិនអាណត្តិទី ២០ នៅថ្ងៃទី ២៩ ខែតុលា ឆ្នាំ ២០២៦)

កិច្ច​ប្រជុំពេញអង្គលើកទី ៥ នៃគណៈកម្មាធិការមជ្ឈិមបក្សកុម្មុយនីស្តចិនអាណត្តិទី ២០ បានបើកធ្វើ​នៅទីក្រុងប៉េកាំង ចាប់ពីថ្ងៃទី ២៦ ដល់ថ្ងៃទី ២៩ ខែតុលា ឆ្នាំ ២០២៦។

នៅក្នុងកិច្ច​ប្រជុំពេញអង្គនេះ មានការចូលរួមពីសំណាក់​សមាជិកគណៈកម្មាធិការមជ្ឈិមបក្សចំនួន ១៦២ រូប និងសមាជិកបម្រុងនៃគណៈកម្មាធិការមជ្ឈិមបក្សចំនួន ១១៧ រូប។ សមាជិកនៃគណៈកម្មការត្រួតពិនិត្យវិន័យមជ្ឈិមបក្ស​ និងថ្នាក់ដឹកនាំមកពីស្ថាប័នពាក់ព័ន្ធនានា តំណាងមកពីមូលដ្ឋាន អ្នកជំនាញ និងបញ្ញវន្ត​មួយ​ចំនួន​ដែលបាន​ចូលរួម​សមាជបក្ស​កុម្មុយនីស្តចិនលើកទី​២០ ក៏បានចូលរួមកិច្ច​ប្រជុំ​​ដែរ។

កិច្ច​ប្រជុំពេញអង្គនេះ បើកធ្វើ​ក្រោម​អធិបតីភាព​របស់ថ្នាក់​ដឹកនាំ​​​នៃការិយាល័យនយោបាយនៃគណៈកម្មាធិការមជ្ឈិមបក្ស។ លោក Xi Jinping អគ្គលេខាធិការនៃគណៈកម្មាធិការមជ្ឈិមបក្ស បានថ្លែងសុន្ទរកថាគន្លឹះ​​។

កិច្ចប្រជុំពេញអង្គបានស្ដាប់ និងពិភាក្សាអំពី​របាយការណ៍ការងាររបស់​ការិយាល័យនយោបាយនៃគណៈកម្មាធិការមជ្ឈិមដែល​ធ្វើ​ឡើង​ដោយ​លោក Xi Jinping ព្រមទាំងបានពិភាក្សា និងអនុម័ត«ការសម្រេចចិត្តរបស់គណៈកម្មាធិការមជ្ឈិមបក្សកុម្មុយនីស្តចិនអំពីបញ្ហាសំខាន់មួយចំនួនស្តីពីការប្រកាន់ខ្ជាប់ការជំរុញការគ្រប់គ្រងបក្សដោយតឹងរ៉ឹងគ្រប់ជ្រុងជ្រោយ»។

លោក Xi Jinping បានធ្វើការអធិប្បាយ​អំពី «ការ​សម្រេច​ចិត្ត​» នេះ​ជូន​ចំពោះ​កិច្ចប្រជុំពេញអង្គ។

កិច្ចប្រជុំពេញអង្គបានវាយតម្លៃខ្ពស់ ចំពោះការងាររបស់ការិយាល័យនយោបាយនៃគណៈកម្មាធិការមជ្ឈិមបក្សចាប់តាំងពីកិច្ចប្រជុំពេញអង្គលើកទី ៤ នៃគណៈកម្មាធិការមជ្ឈិមបក្សអាណត្តិទី ២០ មក​។ កិច្ចប្រជុំបានឯកភាពគ្នាជាឯកច្ឆន្ទថា ការិយាល័យនយោបាយបានអនុវត្តយ៉ាងម៉ឺងម៉ាត់នូវស្មារតីនៃសមាជបក្ស​លើកទី ២០ និងកិច្ចប្រជុំពេញអង្គនានានៃ​គណៈកម្មាធិការមជ្ឈិមបក្សកុម្មុយនីស្តចិនអាណត្តិទី ២០ ប្រកាន់ខ្ជាប់នូវគោលការណ៍ទូទៅនៃការស្វែងរកវឌ្ឍនភាពក្នុង​ភាព​នឹងនរ​ អនុវត្តយ៉ាងពេញលេញនិងត្រឹមត្រូវនូវចក្ខុវិស័យអភិវឌ្ឍន៍ថ្មី ធ្វើ​​ផែនការរួមនិង​ជំរុញ​ «ការអភិវឌ្ឍ​វិស័យទាំង ៥ ដោយ​​រួមបញ្ចូលគ្នា» និង «យុទ្ធសាស្ត្រគ្រប់ជ្រុងជ្រោយទាំង ៤» គ្រោងផែនការ​ស្រប​តាម​លក្ខខណ្ឌ​ជាតិ​និង​អន្តរជាតិ​​ គ្រោងផែនការ​អភិវឌ្ឍន៍​និងសន្តិសុខ ជំរុញការអភិវឌ្ឍសេដ្ឋកិច្ចប្រកបដោយគុណភាពខ្ពស់ កសាងនីតិរដ្ឋ​និង​ប្រជាធិបតេយ្យ​សង្គមនិយម និង​ធ្វើ​ការងារផ្សព្វផ្សាយមនោគមវិជ្ជា និងវប្បធម៌ឱ្យបាន​ល្អ​។ ផ្តល់​ការ​ធានាដល់​ជីវភាពរស់នៅ​របស់​ប្រជាជន​និង​ធ្វើ​ការកសាង​អរិយធម៌​អេកូឡូស៊ី គាំពារ​សន្តិសុខ​ជាតិ និងស្ថិរភាពសង្គម ជំរុញការ​គ្រប់គ្រង​បក្ស​ដោយ​តឹងរ៉ឹង​គ្រប់​ជ្រុងជ្រោយ​ បង្កើន​ការការពារ​ជាតិ​និង​ការ​កសាង​កងទ័ព​ទំនើប​ ធ្វើ​ការ​ងារ​ពាក់ព័ន្ធហុងកុង​ ម៉ាកាវ​និង​តៃវ៉ាន់​ឱ្យ​បាន​ល្អ ជំរុញកិច្ច​ការទូតរបស់ប្រទេស​ធំ​ដែលមានលក្ខណៈពិសេសចិន​។ ​ផែនការ​អភិវឌ្ឍ​ន៍ ៥ ឆ្នាំទី​ ១៤ បានសម្រេចដោយ​ជោគជ័យ​  ផែនការ​អភិវឌ្ឍ​ន៍ ៥ ឆ្នាំទី ​១៥ មានការចាប់​ផ្តើម​ដ៏ល្អប្រសើរ​​ កិច្ច​ការ​បក្ស និងរដ្ឋ​ទទួលបាន​វឌ្ឍនភាពថ្មី និងសមិទ្ធផល​ថ្មី។ លើសពីនេះ ក៏បានធ្វើ​ការ​អប់​រំស្តីពីការ​​បង្កើត ​និង​អនុវត្ត​គំនិត​យល់​ដឹង​ត្រឹមត្រូវស្តីពីការធ្វើ​អភិបាលកិច្ច​ បានរៀបចំពិធីអបអរសាទរដើម្បី​រំលឹក​ខួបលើកទី ១០៥ នៃការបង្កើតបក្សកុម្មុយនីស្តចិន ដែល​បានប្រមូល​ផ្តុំកម្លាំងដ៏ខ្លាំង​ក្លា​របស់បក្សនិងប្រជាជនគ្រប់ជនជាតិទូទាំងប្រទេស ឱ្យរួបរួមគ្នាបន្តបោះ​ជំហាន​ទៅមុខ​។

កិច្ចប្រជុំពេញអង្គបានរំលឹក​ឡើងវិញនូវដំណើរនៃការតស៊ូ របស់បក្សក្នុងរយៈពេលជាងមួយសតវត្សរ៍កន្លងមកនេះ។ កិច្ចប្រជុំបានលើក​ឡើង​ថា មូលហេតុដែលបក្សកុម្មុយនីស្តចិនអាចទទួលបានជ័យជម្នះជាបន្តបន្ទាប់នោះ គឺដោយសារការប្រកាន់ខ្ជាប់នូវឧត្តមគតិដ៏ខ្ពង់ខ្ពស់នៃលទ្ធិកុម្មុយនីស្ត និងការលះបង់ដើម្បីបុព្វហេតុដ៏អស្ចារ្យ​របស់ប្រជាជាតិចិន។ បក្សបានខិតខំប្រឹងប្រែងឥតឈប់ឈរដើម្បីធានានូវសុខុមាលភាពរបស់ប្រជាជនចិន និងការស្តារភាពរុងរឿងរបស់ប្រជាជាតិចិនឡើងវិញ​។ ក្នុង​ប្រវត្តិសាស្ត្រ​ បក្សកុម្មុយនីស្តចិនតែងតែយកចិត្ត​ទុកដាក់​ខ្ពស់​ចំពោះ​​ការគ្រប់គ្រងបក្ស​​ មានភាពក្លាហានក្នុងការការពារសច្ចធម៌ និងកែតម្រូវកំហុស ព្រមទាំងពង្រឹង​ខ្លួនឱ្យ​កាន់តែខ្លាំង​ក្លាឡើង​​​តាមរយៈការ​ដោះស្រាយបញ្ហារបស់ខ្លួនដោយ​ពឹងផ្អែកលើកម្លាំងផ្ទាល់ខ្លួន និងការគាំទ្រពីប្រជាជន ហើយ​ទីបំផុត បានក្លាយជាភាពដឹកនាំជាស្នូល​ដ៏រឹងមាំនៃ​​បុព្វហេតុរបស់បក្ស និងប្រជាជន។ នៅក្នុងដំណើរការនៃការបដិវត្ត ការអភិវឌ្ឍ និងកំណែទម្រង់ បក្សកុម្មុយនីស្តចិនបានចាត់ទុកការកសាងបក្ស ជា «គម្រោងដ៏អស្ចារ្យ​» និង ​«គម្រោងដ៏អស្ចារ្យ​ថ្មី»។ ចាប់តាំងពីសមាជបក្សកុម្មុយនីស្តចិនលើកទី ១៨ មក បក្សទាំងមូល​បានជំរុញយ៉ាងសកម្មនូវគម្រោងដ៏អស្ចារ្យថ្មីនៃ​ការ​កសាង​បក្ស​​យុគសម័យថ្មី​ ដែល​បាន​រកឃើញ​ចម្លើយ​ចំនួន​ពីរ​គឺ​ «ការឱ្យប្រជាជនឃ្លាំមើលរដ្ឋាភិបាល» និង «ការធ្វើស្វ័យ​បដិវត្ត​ន៍»។ នេះ​ជា​វិធីច្នៃប្រឌិត​ដ៏​ពិសេស​របស់​បក្ស​កុម្មុយនីស្ត​ចិន​ ដែល​នឹងត្រូវ​កត់ត្រា​ក្នុងប្រវត្តិសាស្ត្រនៃការកសាងបក្សនយោបាយតាមបែបម៉ាក្សនិយមជារៀងរហូត។

កិច្ចប្រជុំពេញអង្គបានវាយតម្លៃខ្ពស់ចំពោះសមិទ្ធផលដ៏​អស្ចារ្យ​ នៃការ​គ្រប់គ្រងបក្សដោយ​តឹង​រ៉ឹង​គ្រប់ជ្រុងជ្រោយ​ក្នុងយុគសម័យថ្មី។ កិច្ច​ប្រជុំ​បាន​ឯកភាពគ្នាថា គណៈកម្មាធិការមជ្ឈិមបក្ស ដែលមានលោក​ Xi Jinping ជា​ប្រមុខស្នូល​ បានបង្ហាញនូវភាពក្លាហានខាងនយោបាយដ៏អស្ចារ្យ​ និងមាន​ទំនួល​ខុសត្រូវ​​ខ្ពស់ ដោយបានប្រឈមមុខនឹងសភាពការណ៍ដ៏ធ្ងន់ធ្ងរដែលបានកើតឡើង ដូចជា៖ ការចុះខ្សោយនៃ​កម្លាំង​​ដឹកនាំរបស់បក្ស ការ​គ្រប់​គ្រងបក្សមិន​តឹងរ៉ឹង​និង​គ្មានប្រសិទ្ធភាព​ ព្រមទាំងបញ្ហាគួរឱ្យភ្ញាក់ផ្អើលមួយ​ចំនួន​ដែល​កើត​ឡើង​នៅផ្ទៃក្នុង​បក្ស។ ឆ្លង​តាមរយៈការ​ប្រកាន់ខ្ជាប់​នូ​វការ​​គ្រប់គ្រង​បក្ស​ដោយ​តឹងរ៉ឹង​គ្រប់ជ្រុងជ្រោយ​ ធ្វើកំណែទម្រង់ផ្ទៃក្នុង និង​ចាត់វិធានការយ៉ាងតឹងរ៉ឹង​ ដើម្បី​ដោះស្រាយបញ្ហាសំខាន់ៗជាបន្តបន្ទាប់ គណៈកម្មាធិការមជ្ឈិមបក្សបានផ្លាស់ប្តូរពី​ឬសគល់នូវ​សភាពធូររលុង ភាពទន់ខ្សោយនៃ​ការគ្រប់គ្រងបក្ស ផ្លាស់ប្តូរ​បរិយាកាសមិន​ល្អដែល​កើត​មាន​​រយៈពេល​យូរ​នៅ​ផ្ទៃក្នុងបក្ស​ និងដោះស្រាយ​បញ្ហាធ្ងន់ធ្ងរនិង​រ៉ាំរ៉ៃដែលមិនអាចដោះស្រាយបានក្នុង​រយៈពេលជាច្រើនឆ្នាំមក​ ព្រម​ទាំង​​បាន​លុបបំបាត់​គ្រោះថ្នាក់លាក់កំបាំងធ្ងន់ធ្ងរនៅផ្ទៃ​ក្នុងបក្ស រដ្ឋ និងកងទ័ព។ ដំណើរការទាំងនេះបានធ្វើឱ្យបក្សកាន់តែរឹងមាំ តាមរយៈការលត់ដំបែប​​​បដិវត្តន៍។ នៅក្នុងយុគសម័យថ្មីនេះ ការគ្រប់គ្រងបក្សដោយ​តឹង​រ៉ឹង​គ្រប់ជ្រុងជ្រោយ​ បានបើកទំព័រថ្មីនៃ​ការធ្វើស្វ័យ​បដិវត្តន៍​នៃ​គណបក្សនយោបាយដែលមានអាយុកាលមួយសតវត្សរ៍នេះ​ បានជំរុញបុព្វហេតុរបស់បក្ស និងរដ្ឋ​ ឱ្យទទួលបានជោគជ័យជាប្រវត្តិសាស្ត្រ និងឆ្លងកាត់ការផ្លាស់ប្តូរជាប្រវត្តិសាស្ត្រ ដែលធ្វើ​ឱ្យបក្ស និងប្រជាជន ទទួលបានបុរេសកម្មជាប្រវត្តិសាស្ត្រ ក្នុងការកសាងបក្សនិង​រដ្ឋ​ដ៏​ខ្លាំងក្លា។

កិច្ចប្រជុំពេញអង្គ​បាន​ចង្អុលបង្ហាញថា​ នៅក្នុង​ការអនុវត្ត​ដ៏​អស្ចារ្យ​​នៃ​ការ​​គ្រប់គ្រង​បក្ស ​និង​ពង្រឹង​បក្ស​នៅក្នុងយុគសម័យថ្មី ​គណៈកម្មាធិការមជ្ឈិមបក្ស​ដែល​មាន​លោក​ Xi Jinping ជាប្រមុខស្នូល ​បានលើកឡើងនូវ​យុទ្ធសាស្ត្រ​ថ្មី​ ​គំនិតថ្មី ​និង​ទស្សនៈថ្មី​ជាច្រើន​​ស្តីពី​បញ្ហាក្នុងយុគសម័យថ្មី​ ​តើគួរ​កសាង​បក្សបែប​ម៉ាក្សនិយម​ប្រភេទណាមួយ​ដែលអាច​កាន់​អំណាច​ក្នុងរយៈពេលវែង ​ធ្វើ​យ៉ាង​ណាទើប​អាច​កសាងបក្សកាន់​អំណាច​ក្នុងរយៈពេល​វែង ​ហើយការលើកឡើងខាងលើ​បានក្លាយផ្នត់​គំនិត​របស់​លោក​ Xi Jinping ស្តីពីការកសាងបក្ស។ ផ្នត់គំនិត​ទាំង​នេះ​បាន​ធ្វើ​ឱ្យ​មាន​ភាព​សម្បូរបែប​ និងការ​អភិវឌ្ឍ​ទ្រឹស្តីម៉ាក្សនិយម​ស្តីពី​ការកសាង​បក្ស ​គឺជាសមិទ្ធផល​សំខាន់ដែល​ជំរុញ​​​នវានុវត្តន៍ទ្រឹស្តីរបស់បក្ស ​ដោយ​បាន​រួមបញ្ចូល​គ្នា​រវាង​គោលការណ៍គ្រឹះនៃលទ្ធិម៉ាក្សនិយម ​តថភាពជាក់ស្តែងរបស់ប្រទេសចិន ​និង​វប្បធម៌ប្រពៃណីដ៏ល្អផូផង់របស់ប្រទេសចិន។ នេះគឺសម្រិតសម្រាំងឧត្តមានុវត្តន៍ ​និង​ប្រាជ្ញាជារួមរបស់បក្ស និងប្រជាជន ហើយក៏ជា​ផ្នែកដ៏សំខាន់មួយនៃ​ផ្នត់គំនិត​របស់​លោក ​Xi Jinping​ ក្នុង​យុគសម័យ​ថ្មី​ស្តីពី​សង្គមនិយម​ដែលមានលក្ខណៈពិសេស​ចិន ​ព្រមទាំង​បាន​ផ្តល់នូវ មូលដ្ឋាន ​និង​ផែនទីចង្អុលបង្ហាញផ្លូវ​សម្រាប់​ការអនុវត្ត ​សម្រាប់ជំរុញដោយ​ស៊ីជម្រៅនូវ​បុព្វហេតុដ៏​អស្ចារ្យ​នៃ​ការកសាងបក្សនៅក្នុងយុគសម័យថ្មី។

កិច្ចប្រជុំពេញអង្គបាន​សង្កត់ធ្ងន់ថា ការ​គ្រប់គ្រងបក្សដោយតឹងរ៉ឹងគ្រប់ជ្រុងជ្រោយ​មាន​ល័ក្ខខ័ណ្ឌ​អំណោយផល​ជាច្រើន​ ​ទន្ទឹមនឹងនេះក៏​បាន​ប្រឈមមុខនឹង​ស្ថានភាពថ្មី​ និង​បញ្ហា​ថ្មីៗជា​ច្រើនផងដែរ​។ ទន្ទឹមនឹង​សភាពការរណ៍ពិភពលោក​ សភាពការណ៍​ជាតិ​ និង​សភាពការណ៍​បក្ស​បាន​ប្រែប្រួល​យ៉ាង​​ស៊ីជម្រៅ​ ​បេសកកម្ម​ដែលបក្ស​ដឹកនាំ​ប្រជាជន​ដើម្បី​ការពារអធិបតេយ្យ​ភាពជាតិ សន្តិសុខ ​និង​ផលប្រយោជន៍នៃការអភិវឌ្ឍ​កាន់តែ​ខ្លាំង​ឡើង​ ​បេសកកម្ម​ដែល​បក្សដឹកនាំ​ប្រជាជន​ដើម្បី​ជំរុញកំណែទម្រង់ ​និងការអភិវឌ្ឍ គាំពារ​ភាពសុខដុមរមនា ​និង​ស្ថិរភាពសង្គមកាន់តែ​ខ្លាំង​ឡើង ​ហើយបេសកកម្ម​ដែល​បក្ស​រក្សាភាព​ឈានមុខ​ និង​ភាពបរិសុទ្ធ​​កាន់តែខ្លាំងឡើង។ កត្តាទាំងនេះ​បាន​នាំមក​បញ្ហា​ប្រឈមធំៗ​ចំពោះ​សមត្ថភាពកាន់​អំណាច កម្រិតនៃការដឹកនាំ ​គុណភាព​បុគ្គលិក​ ​ការប្រឆាំងនឹងអំពើពុករលួយ​ក្នុងសភាពការណ៍ថ្មី។ “ការសាកល្បងធំៗទាំងបួន”និង “គ្រោះថ្នាក់​ទាំងបួន​ប្រភេទ”​ដែលបក្ស​បាន​និង​កំពុង​ប្រឈមមុខនោះ​គឺ​មាន​លក្ខណៈ​យូរអង្វែង ស្មុគស្មាញ ​និងធ្ងន់ធ្ងរ។​ បក្សទាំងមូល​ត្រូវ​យល់ដឹង​ឱ្យ​បានស៊ីជម្រៅ​អំពី​សារៈសំខាន់​នៃ​ការ​ជំរុញ​ការ​គ្រប់គ្រងបក្ស​ដោយ​តឹងរ៉ឹងគ្រប់ជ្រុងជ្រោយ ​ដោយឈរលើ​ទស្សនវិស័យជាយុទ្ធសាស្ត្រនៃការពង្រឹង​ឋានៈ​នៃការ​កាន់​អំណាច​ក្នុង​រយៈពេល​វែង​របស់គណបក្ស និងការសម្រេច​បាននូវ​ការស្តារ​ភាពរុងរឿងដ៏​អស្ចារ្យ​របស់​ប្រជាជាតិចិន​ឡើងវិញ​ ​រក្សាទំនុកចិត្ត ​និងភាពនឹងនរ ​ដោយផ្អែកលើស្តង់ដារកាន់តែខ្ពស់ ​និង​វិធានការ​មានភាព​កាន់តែជាក់លាក់ ​រក្សា​និង​ប្រើប្រាស់​ឱ្យ​បានល្អ​នូវ​បទពិសោធ​ដ៏​មានតម្លៃ​ ដែលទទួល​បានពី​ការគ្រប់គ្រងបក្សដោយ​តឹងរ៉ឹង​គ្រប់ជ្រុងជ្រោយ​ក្នុងយុគសម័យថ្មី ​ព្រម​ទាំង​ដោះស្រាយ​ឱ្យ​បាន​ល្អ​នូវ​​បញ្ហា​ប្រឈមសំខាន់ៗ​នានា ​ដែលកើតមាន​ក្នុងការកសាងបក្ស ព្រមទាំង​ពង្រឹង​និង​អភិវឌ្ឍ​ឱ្យ​បានល្អ​នូវ​សភាពការណ៍​នយោបាយ​ដ៏​ល្អ​ប្រសើរ​ ដែល​សម្រេចបាន​តាមរយៈ​កិច្ចខិតខំប្រឹងប្រែង​ក្នុងការដឹកនាំ ​និងគ្រប់គ្រងបក្ស។

កិច្ចប្រជុំពេញអង្គបានចង្អុលបង្ហាញថា ​ដើម្បីជំរុញការគ្រប់គ្រងបក្សដោយ​តឹងរ៉ឹង​គ្រប់ជ្រុងជ្រោយ ចាំបាច់​​ត្រូវប្រកាន់ខ្ជាប់នូវ​លទ្ធិម៉ាក្ស-លេនីន ផ្នត់គំនិត​ម៉ៅ សេទុង ​ទ្រឹស្តីតេង ស៊ាវពីង ​ផ្នត់គំនិតសំខាន់ៗស្តីពី “តំណាងទាំងបី”​និងទស្សនៈវិទ្យាសាស្ត្រ​ស្តីពី​ការអភិវឌ្ឍ។ គួរតែ​អនុវត្តដោយ​គ្រប់ជ្រុងជ្រោយ​នូវ​គំនិតរបស់លោក ​Xi ​Jinping ក្នុង​យុគសម័យថ្មី​​ស្តីពី​សង្គមនិយម​ដែល​មានលក្ខណៈពិសេស​ចិន​ សិក្សា​និង​អនុវត្ត​ដោយ​ស៊ីជម្រៅ​នូវ “ផ្នត់គំនិតរបស់​លោក Xi Jinping​ ស្តីពី​ការកសាងបក្ស។ ​ដើម្បី​សម្រេចបេសកកម្ម ​និង​ភារកិច្ចរបស់បក្ស ​អនុវត្តតម្រូវការទូទៅ​សម្រាប់​ការ​កសាងបក្ស​ក្នុងយុគសម័យថ្មី ​ដោយយកលក្ខន្តិកៈបក្ស​ជាមូលដ្ឋាន ​រក្សាឱ្យបាននូវលក្ខណៈឈានមុខរបស់បក្ស ​ព្រមទាំងប្រកាន់ខ្ជាប់នូវការដឹកនាំ​ដោយ​គ្រប់​ជ្រុងជ្រោយ​របស់បក្ស ​និង​ការដឹកនាំ​ជាសមូហភាព​របស់គណៈកម្មាធិការមជ្ឈិមបក្ស ​ផ្តោតសំខាន់​ទៅលើ ​ការ​លើកកម្ពស់​សមត្ថភាព​កាន់​អំណាច​ក្នុង​រយៈពេលវែងរបស់បក្ស ​រក្សាបាននូវលក្ខណៈឆឈានមុខ ​ភាពបរិសុទ្ធរបស់បក្ស ​និងរក្សាទំនាក់ទំនងជិតស្និទ្ធ​របស់បក្សជាមួយប្រជាជន។ យើងត្រូវប្រកាន់ខ្ជាប់យ៉ាងមុតមាំនូវគោលការណ៍ដ៏តឹងរ៉ឹង ​កែលម្អប្រព័ន្ធគ្រប់គ្រងបក្សដោយ​តឹងរ៉ឹង​គ្រប់ជ្រុងជ្រោយ​ដែល​យកការកសាង​នយោបាយ​របស់​បក្ស​ជា​គោលការណ៍ណែនាំ ​ដើម្បី​ជំរុញ​ការ​កសាងរបស់​បក្ស​​លើ​​គ្រប់ជវិស័យ​​។ បញ្ចេញ​ឱ្យអស់ពីលទ្ធភាពនូវភាពសកម្ម ​និងភាពច្នៃប្រឌិត​របស់បក្សទាំងមូល ​ព្រមទាំងសម្រេចបានជាបន្តបន្ទាប់នូវការឆ្លុះកញ្ចក់លាងខ្លួន  ​ការកែលម្អខ្លួនឯង ​ការច្នៃប្រឌិតថ្មី​ដោយខ្លួនឯង ​និងការលើកកម្ពស់ខ្លួនឯងរបស់គណបក្ស។ពង្រឹង​ជាបន្តបន្ទាប់​នូវការដឹកនាំ​នយោបាយ ​ការណែនាំជាផ្នត់​គំនិត ​ការរៀបចំចាត់តាំង​ប្រជាជន​និង​ការអូសទាញក្នុងសង្គមរបស់គណបក្ស ​ដើម្បីធានាថាបក្សតែងតែរក្សា​បាននូវ​ភាពរស់រវើកក្នុងនាមជាគណបក្សកាន់អំណាចបែបម៉ាក្សនិយម ដែលឈានមុខគេជាប់ជានិច្ច ​ស្របទៅតាម​សម័យកាល ​ទទួលបាន​ការគាំទ្រយ៉ាងស្មោះស្ម័គ្រ​ពីសំណាក់​ប្រជាជន ​អាចឆ្លងកាត់ការសាកល្បង និង​បញ្ហាប្រឈមនានា  និងជានិច្ចកាលក្លាយជាស្នូលនៃការដឹកនាំដ៏រឹងមាំសម្រាប់បុព្វហេតុសង្គមនិយមដែលមានលក្ខណៈពិសេសចិន។

កិច្ចប្រជុំពេញអង្គបានសង្កត់ធ្ងន់ថា ​គោលការណ៍​ដែល​​ជំរុញឥតឈប់ឈរលើការគ្រប់គ្រងបក្សដោយ​តឹងរ៉ឹង​គ្រប់ជ្រុងជ្រោយ​ រួមមាន៖​ ប្រកាន់​ខ្ជាប់​បេសកកម្ម ​​និង​ភារកិច្ច​បម្រើ ​ ប្រកាន់ខ្ជាប់​យក​ការ​កសាង​នយោបាយ​របស់បក្សជាស្នូលដឹកនាំ ប្រកាន់​ខ្ជាប់​រក្សា​ភាពតឹងរ៉ឹង​គ្រប់ជ្រុងជ្រោយ  ប្រកាន់ខ្ជាប់ការតម្រង់ទិសដៅលើបញ្ហា ប្រកាន់ខ្ជាប់ការរក្សាភាពទៀងទាត់ និងនវានុវត្តន៍ ​ប្រកាន់ខ្ជាប់ថ្នាក់ដឹកនាំធ្វើជាគំរូដល់អ្នកក្រោមឱវាទ និងប្រកាន់ខ្ជាប់ការគ្រប់គ្រងបក្សតាមបទប្បញ្ញត្តិ។

កិច្ចប្រជុំពេញអង្គ​បានរៀបចំ​ផែនការជាប្រព័ន្ធ​ ចំពោះ​ការ​ជំរុញការ​គ្រប់គ្រង​បក្សដោយ​តឹង​រ៉ឹង​គ្រប់​ជ្រុងជ្រោយ​ ដោយសង្កត់ធ្ងន់លើការ​ពង្រឹង​បុគ្គលិកលក្ខណៈបក្ស​របស់​សមាជិកបក្ស ​ការ​អនុវត្តរបបនមជ្ឈការបែបប្រជាធិបតេយ្យឱ្យបានតឹងរ៉ឹង ​និង​ការកសាងក្រុមមន្ត្រី​ដែល​មានគុណវុឌ្ឍខ្ពស់ ​និង​មាន​សមត្ថភាព​ទទួលខុស​ត្រូវ​លើ​បេសកកម្មដ៏​សំខាន់នៃ​ការស្តា​ភាព​រុងរឿង​ឡើងវិញ​របស់ប្រជាជាតិ។ កសាងប្រព័ន្ធ​អង្គការ​ដ៏​ម៉ឺងម៉ាត់​ដែល​មានការតភ្ជាប់រចនាសម្ព័ន្ធគ្រប់ជាន់ថ្នាក់ពីក្រោមដល់លើ​និងមានប្រសិទ្ធភាពខ្ពស់ក្នុងការអនុវត្ត ​កែតម្រូវ​ឥរិយាបថ ​និង​ពង្រឹង​វិន័យដោយឥតឈប់ឈរ ​បន្ត​ជំរុញយ៉ាងមុតមាំឥតងាករេ នូវ​អភិក្រម មិនហ៊ាន មិនអាច ​និង​មិនចង់ប្រព្រឹត្តអំពើពុករលួយ ​ប្រកាន់ខ្ជាប់នូវ​ការ​គ្រប់គ្រងបក្ស​តាមរយៈរបប ​និងបទប្បញ្ញត្តិនានា ​កែលម្អ​ប្រព័ន្ធ​ត្រួតពិនិត្យ​សម្រាប់បក្ស​និង​រដ្ឋ ​ព្រមទាំងធ្វើ​ឱ្យ​ទំនួលខុសត្រូវ​នៃការ​គ្រប់គ្រង​បក្ស​ដោយមាន​ភាព​តឹងរ៉ឹង​។

កិច្ចប្រជុំពេញអង្គបានលើកឡើងថា ការបង្កើនបុគ្គលិកលក្ខណៈរបស់បក្សជាភារកិច្ចជាឫសគល់សម្រាប់ការគ្រប់គ្រងបក្សដោយតឹងរឹងគ្រប់ជ្រុងជ្រោយ។ ចាំបាច់ត្រូវតែជំរុញឱ្យសមាជិកបក្សនិងកម្មាភិបាលទាំងឡាយប្រកាន់ខ្ជាប់នូវបុគ្គលិកលក្ខណៈ និងកម្មវត្ថុរបស់បក្ស​ បង្កើនមនសិការអំពីបក្ស មនសិការរបស់សមាជិកបក្ស មនសិការរបស់ក្រុមឈានមុខ និងចាត់ទុកការបង្កើនការយល់ដឹងអំពីបុគ្គលិកលក្ខណៈបក្សជាការងារត្រូវធ្វើពេញមួយជីវិត។ ត្រូវធ្វើកិច្ចខិតខំប្រឹងប្រែងដើម្បីពង្រឹងជំនឿនិងឧត្តមគតិ ពង្រឹងភក្តីភាពចំពោះបក្ស បង្កើនមនោសញ្ចេតនាចំពោះប្រជាជន ប្រកាន់ខ្ជាប់នូវការអនុវត្តតាមស្ថានភាពពិត ធ្វើឱ្យគុណធម៌និងអត្តចរិតមានភាពបរិសុទ្ធ និងរក្សាភាពស្អាតស្អំជាដើម សំដៅរក្សាខ្ជាប់នូវមុខមាត់នយោបាយដ៏ស្មោះត្រង់ ស្អាតស្អំនិងមានទំនួលខុសត្រូវរបស់សមាជិកបក្ស។ ត្រូវពង្រឹងការអប់រំអំពីភក្តីភាពចំពោះបក្ស ប្រកាន់ខ្ជាប់នូវការបណ្តុះបណ្តាលសមាជិកបក្សដោយទ្រឹស្តីច្នៃប្រឌិតថ្មីរបស់បក្ស ពូនជ្រំលបុគ្គលិកលក្ខណៈបក្សតាមរយៈវប្បធម៌ប្រណៃណីចិនដ៏ល្អផូរផង់ និងលត់ដំបុគ្គលិកលក្ខណៈបក្សតាមរយៈការអនុវត្តជាក់ស្តែង ក៏ដូចជាបង្កើនការវិនិច្ឆ័យចំពោះវា។

កិច្ចប្រជុំពេញអង្គបានលើកឡើងថា​​ មជ្ឈការបែបប្រជាធិបតេយ្យគឺជាគោលការណ៍រៀបចំ និងប្រព័ន្ធដឹកនាំជាមូលដ្ឋានរបស់បក្ស ហើយការអនុវត្តរបស់វាគឺជាតម្រូវការផ្ទៃក្នុងសម្រាប់ការគ្រប់គ្រងបក្សដោយតឹងរ៉ឹងគ្រប់ជ្រុងជ្រោយ។ វាជាការចាំបាច់ក្នុងការកែលម្អ និងអនុវត្តប្រព័ន្ធគ្រប់ផ្នែកនៃមជ្ឈការបែបប្រជាធិបតេយ្យ លើកកម្ពស់លទ្ធិប្រជាធិបតេយ្យក្នុងបក្សឲ្យបានពេញលេញ អនុវត្តមជ្ឈការដ៏ត្រឹមត្រូវប្រកបដោយប្រសិទ្ធភាព និងដើរតួនាទីនៃឧត្តមភាពផ្នែកនយោបាយ ស្ថាប័ន ប្រព័ន្ធរបបនិងការងារនៃមជ្ឈការបែបប្រជាធិបតេយ្យឲ្យបានកាន់តែប្រសើរឡើង។ វាជាការចាំបាច់ក្នុងការរក្សា និងពង្រឹងការដឹកនាំដោយសមូហភាពនិងឯកភាពរបស់គណៈកម្មាធិការមជ្ឈិមបក្ស កែលម្អគុណភាពនៃលទ្ធិប្រជាធិបតេយ្យក្នុងបក្ស អនុវត្តយ៉ាងតឹងរ៉ឹងនូវការកំណត់នៃការធ្វើសេចក្តីសម្រេចចិត្តនិងពិភាក្សាការងាររបស់ក្រុមថ្នាក់ដឹកនាំ និងធ្វើឱ្យមានបទដ្ឋាននូវការបំពេញភារកិច្ច និងការប្រើប្រាស់អំណាចរបស់ថ្នាក់ដឹកនាំ។

កិច្ចប្រជុំពេញអង្គបានលើកឡើងថា​​ គន្លឹះនៃការគ្រប់គ្រងបក្សដោយតឹងរ៉ឹងគ្រប់ជ្រុងជ្រោយ គឺស្ថិតនៅលើការគ្រប់គ្រងកម្មាភិបាលយ៉ាងតឹងរ៉ឹង។ វាជាការចាំបាច់ក្នុងការអនុវត្តគោលការណ៍ចាត់តាំងរបស់បក្សក្នុងយុគសម័យថ្មី គ្រប់គ្រងយ៉ាងតឹងរ៉ឹងលើការអប់រំ ការបណ្តុះបណ្តាល ការជ្រើសរើស ការតែងតាំង ការគ្រប់គ្រង និងការត្រួតពិនិត្យកម្មាភិបាលដើម្បីកសាងក្រុមកម្មាភិបាលប្រកបដោយគុណវុឌ្ឍខ្ពស់ ដែលមានមនសិការនយោបាយខ្ពស់ មានសមត្ថភាពខ្លាំង មានឥរិយាបថល្អប្រសើរ និងមានវិន័យយ៉ាងតឹងរ៉ឹង។ ចាំបាច់ត្រូវប្រកាន់ខ្ជាប់នូវទិសដៅត្រឹមត្រូវក្នុងការជ្រើសរើសបុគ្គលិក ជ្រើសរើស និងតែងតាំងបុគ្គលិកឱ្យបានត្រឹមត្រូវ និងតាមបែបវិទ្យាសាស្ត្រ ជំរុញកម្មាភិបាលឱ្យបង្កើត និងអនុវត្តទស្សនៈត្រឹមត្រូវអំពីអភិបាលកិច្ច បង្កើនសមត្ថភាពរបស់កម្មាភិបាលក្នុងការបំពេញភារកិច្ច និងបង្កើតអាជីព កែលម្អគុណភាពនៃការបណ្តុះបណ្តាល និងជ្រើសរើសកម្មាភិបាលវ័យក្មេងដ៏ឆ្នើម ពង្រឹងការគ្រប់គ្រង និងត្រួតពិនិត្យលើកម្មាភិបាល ក៏ដូចជាបណ្តុះបណ្តាល ស្រូបទាញ និងប្រើប្រាស់ធនធានមនុស្សឱ្យបានទូលំទូលាយ។

កិច្ចប្រជុំពេញអង្គបានលើកឡើងថា​​ អង្គការបក្សគ្រប់លំដាប់ថ្នាក់គឺជាតួអង្គសំខាន់សម្រាប់ការគ្រប់គ្រងបក្សដោយតឹងរ៉ឹងគ្រប់ជ្រុងជ្រោយ។ ចាំបាច់ត្រូវជំរុញជាប្រព័ន្ធនូវការកសាងអង្គការបក្សគ្រប់លំដាប់ថ្នាក់ និងគ្រប់វិស័យ ពង្រឹងមុខងារទាំងផ្នែកនយោបាយ និងអង្គការរបស់បក្ស ដើម្បីធានាបាននូវការសម្របសម្រួលនិងសហការរវាងថ្នាក់លើនិងក្រោម​​ និងធានាបាននូវភាពចំគោលដៅនិងប្រសិទ្ធភាពខ្ពស់។ ត្រូវដើរតួនាទីដឹកនាំរបស់អង្គការបក្សនៃ​ស្ថាប័ន​មជ្ឈិមនិងរដ្ឋ ពង្រឹងមុខងាររបស់គណៈកម្មការបក្សមូលដ្ឋាន គ្រោងផែនការជំរុញការកសាងអង្គការបក្សមូលដ្ឋានក្នុងគ្រប់វិស័យ ធ្វើការងារកសាងបក្សនៅក្នុងវិស័យងើបឡើងថ្មី និងបង្កើនការកសាងក្រុមសមាជិកបក្ស ក៏ដូចជាធ្វើឱ្យមានសុក្រឹតភាពនូវយន្តការសម្រាប់តភ្ជាប់អង្គការបក្សគ្រប់ជាន់ថ្នាក់។

កិច្ចប្រជុំពេញអង្គបានលើកឡើងថា​​ ការពង្រឹងឥរិយាបថ និងវិន័យគឺជាវិធានការដ៏មានប្រសិទ្ធភាពសម្រាប់ការគ្រប់គ្រងបក្សដោយតឹងរ៉ឹងគ្រប់ជ្រុងជ្រោយ។ ត្រូវតែប្រកាន់ខ្ជាប់នូវការពង្រឹងបុគ្គលិកលក្ខណៈបក្ស ឥរិយាបថបក្ស និងវិន័យបក្សក្នុងពេលដំណាលគ្នា ត្រូវធ្វើការពង្រឹងឥរិយាបថនិងវិន័យ​ និងការប្រយុទ្ធប្រឆាំងនឹងអំពើពុករលួយក្នុងពេលដំណាលគ្នា។ ត្រូវប្រើប្រាស់ដោយស៊ីជម្រៅនូវបទពិសោធនៃការជំរុញការគ្រប់គ្រងបក្សដោយតឹងរ៉ឹងគ្រប់ជ្រុងជ្រោយតាមរយៈការកែលម្អឥរិយាបថ ដើម្បីប្រមូលផ្តុំកម្លាំងកាយចិត្តតាមរយៈរូបភាពដ៏ល្អប្រសើរ។ ត្រូវដើរតាមមាគ៌ាមហាជនរបស់បក្សនៅក្នុងយុគសម័យថ្មី អនុវត្តយ៉ាងខ្ជាប់ខ្ជួននូវស្មារតីនៃការកំណត់ទាំងប្រាំបីចំណុចរបស់មជ្ឈិមបក្ស ជំរុញការកសាងឥរិយាបថជាប្រចាំនិងមានប្រសិទ្ធភាពរយៈពេលវែង​ ពង្រឹងការអនុវត្តវិន័យយ៉ាងតឹងរ៉ឹង ដើរតួនាទីចម្រុះនៃការដាក់កំហិត​ ធានា និងការលើកទឹកចិត្ត ការអប់រំវិន័យ។

កិច្ចប្រជុំពេញអង្គបានលើកឡើងថា ការជំរុញដោយរួមបញ្ចូលគ្នានូវការ "មិនហ៊ានពុករលួយ មិនអាចពុករលួយ និងមិនចង់ពុករលួយ" គឺជាយុទ្ធសាស្ត្រសំខាន់មួយសម្រាប់ការគ្រប់គ្រងបក្សដោយតឹងរ៉ឹងគ្រប់ជ្រុងជ្រោយ និងជាគោលការណ៍ជាមូលដ្ឋាននៃការប្រយុទ្ធប្រឆាំងនឹងអំពើពុករលួយ។ ចាំបាច់ត្រូវតែចងចាំយ៉ាងមុតមាំថា បក្សមិនមានផលប្រយោជន៍ពិសេសផ្ទាល់ខ្លួនក្រៅពីផលប្រយោជន៍របស់វណ្ណៈកម្មករ និងប្រជាជនទូទៅនោះទេ ហើយបក្សប្រឆាំងយ៉ាងដាច់ខាតចំពោះអំពើពុករលួយ។ ចាំបាច់ត្រូវតែដើរតាមមាគ៌ាប្រឆាំងអំពើពុករលួយ ដែលមានលក្ខណៈពិសេសចិន បង្កើនការដឹកនាំជាសមូហភាព និងឯកភាពរបស់មជ្ឈិមបក្សលើការងារប្រឆាំងអំពើពុករលួយ យកចិត្តទុកដាក់បន្ថែមទៀតចំពោះការដោះស្រាយបញ្ហាពីឫសគល់ និងអនុវត្តវិធានការជាប្រព័ន្ធ។ ត្រូវតែប្រកាន់ខ្ជាប់នូវការដាក់ទណ្ឌកម្មយ៉ាងតឹងរ៉ឹង ការគ្រប់គ្រងដោយចំគោលដៅ ការបង្ការប្រកបដោយប្រសិទ្ធភាព និងវិធីសាស្រ្តរួមបញ្ចូលគ្នា ដើម្បីធ្វើការប្រយុទ្ធប្រឆាំងអំពើពុករលួយរហូតដល់ទីបញ្ចប់។ ត្រូវតែរក្សាការដាក់ទណ្ឌកម្មលើអំពើពុករលួយយ៉ាងតឹងរ៉ឹង ពង្រឹងការរឹតបន្តឹង និងការត្រួតពិនិត្យចំពោះការប្រើប្រាស់អំណាច ពង្រឹងមូលដ្ឋានគ្រឹះខាងមនោគមវិជ្ជានៃការគោរពភាពស្អាតស្អំ និងការបដិសេធអំពើពុករលួយ ក៏ដូចជាបង្កើនប្រសិទ្ធភាពចម្រុះនៃការជំរុញដោយរួមបញ្ចូលគ្នានូវការ "មិនហ៊ានពុករលួយ មិនអាចពុករលួយ និងមិនចង់ពុករលួយ"។

កិច្ចប្រជុំពេញអង្គបានលើកឡើងថា ការពង្រឹងការកសាងច្បាប់ និងប្រព័ន្ធរបស់គណបក្ស គឺជាគោលនយោបាយជាមូលដ្ឋាននិង​​រយៈ​ពេលវែងសម្រាប់​ការគ្រប់គ្រងបក្សដោយតឹងរ៉ឹងគ្រប់ជ្រុងជ្រោយ។ ​ត្រូវ​តម្គល់ទុកលក្ខន្ដិកៈរបស់បក្ស​ជាបទដ្ឋានជាមូលដ្ឋានគ្រឹះសម្រាប់គណបក្សទាំងមូល ធ្វើឱ្យ​ស៊ីជម្រៅ​នូវការកំណែទម្រង់របបស្ថាបនារបស់បក្ស ​ជំរុញ​ឱ្យការគ្រប់គ្រង​ប្រទេស​ជាតិ​ស្រប​តាម​ច្បាប់ និងការគ្រប់គ្រង​បក្សស្របតាមបទប្បញ្ញត្តិមានឯកភាពជាសមូហភាព ដើម្បី​ផ្តល់​ការ​ធានាខាងប្រព័ន្ធរបប​ដ៏​រឹងមាំ​សម្រាប់​ការជំរុញ​ការគ្រប់គ្រងបក្សដោយតឹងរ៉ឹងគ្រប់ជ្រុងជ្រោយ​។ ត្រូវកែលម្អប្រព័ន្ធបទប្បញ្ញត្តិ និងប្រព័ន្ធផ្ទៃក្នុងបក្ស ពង្រឹងការអនុវត្តប្រព័ន្ធទាំងនេះ និង​លុប​បំបាត់ប្រព័ន្ធអន្តរាគមន៍។

កិច្ចប្រជុំពេញអង្គបានលើកឡើងទៀតថា ​ការជំរុញឥតឈប់ឈរលើ​ការគ្រប់គ្រងបក្សដោយតឹងរ៉ឹង​គ្រប់​ជ្រុងជ្រោយ ​ត្រូវកែលម្អ​ប្រព័ន្ធត្រួតពិនិត្យ​របស់បក្ស និងរដ្ឋ​បន្ថែមទៀត។​ ត្រូវ​តែ​ពង្រឹង​ការ​ត្រួតពិនិត្យ​ដោយគ្រប់ជ្រុងជ្រោយចំពោះគណៈកម្មាធិការបក្ស (ក្រុមបក្ស) កែលម្អ​ប្រព័ន្ធ​ដឹកនាំ​ទ្វេភាគី​សម្រាប់ការងារត្រួតពិនិត្យវិន័យ និងអធិការកិច្ច ជំរុញ​ការ​ធ្វើ​សមាហរ​ណ​កម្មដោយ​ស៊ីជម្រៅ និងការតភ្ជាប់ប្រកបដោយប្រសិទ្ធភាពរវាងការត្រួតពិនិត្យផ្ទៃក្នុងបក្ស និង​ការ​ត្រួត​ពិនិត្យ​​​ពីគ្រប់ភាគី ដើម្បីផ្តល់​តួនាទី​នៃ​ការត្រួតពិនិត្យ​ជាអាវុធមុតស្រួ​ច​។

កិច្ចប្រជុំពេញអង្គបានគូសបញ្ជាក់ថា ការជំរុញ​ការគ្រប់គ្រងបក្សដោយតឹងរ៉ឹង​គ្រប់​ជ្រុងជ្រោយជាការទទួលខុសត្រូវនយោបាយរួមរបស់គណបក្សទាំងមូល ។ ត្រូវតែប្រកាន់ខ្ជាប់នូវប្រព័ន្ធទទួលខុសត្រូវ​នៃការអភិបាលកិច្ច​បក្ស កែលម្អ​ប្រព័ន្ធ​ទទួល​ខុស​ត្រូវ​ដោយ​ឡែក​ពីគ្នា ​​និងសម្របសម្រួល កែលម្អ​​យន្តការ​វាយតម្លៃសនៃ​ការអនុវត្តការទទួលខុសត្រូវ និងត្រូវដាក់ទោសលើការអភិបាលកិច្ចបក្ស​មិនល្អ ឬមានបញ្ហាធ្ងន់ធ្ងរ។

កិច្ចប្រជុំពេញអង្គបានលើកឡើងទៀតថា ​ ការសិក្សានិង​អនុវត្ត​ឲ្យ​បាន​ហ្មត់ចត់​នូវ​ស្មារតី​នៃកិច្ចប្រជុំពេញអង្គ គឺជា​ភារកិច្ចនយោបាយដ៏​សំខាន់​សម្រាប់​គណបក្ស​ទាំងមូល ​ទាំងក្នុងពេលបច្ចុប្បន្ន និងពេលអនាគត។ ត្រូវតែសិក្សាស្រាវជ្រាវ និង​ស្វែង​យល់​ពីស្មារតីនៃកិច្ចប្រជុំពេញអង្គឲ្យបានស៊ីជម្រៅ ពង្រឹងការចាត់តាំងនិងការដឹកនាំ ​ខិតខំ​ប្រឹង​ប្រែង​ក្នុងការដោះស្រាយបញ្ហាលេចធ្លោ ដើម្បីជំរុញឲ្យ «សេចក្តីសម្រេចចិត្ត» ទទួលបានការអនុវត្តជាក់ស្តែង។

កិច្ចប្រជុំពេញអង្គបានសង្កត់ធ្ងន់ថា ត្រូវធ្វើការងារឱ្យបានល្អនៅចុងឆ្នាំនិងដើមឆ្នាំថ្មី។ ​ ប្រកាន់ខ្ជាប់​នូវ​គោលការណ៍ទូទៅនៃ​ការស្វែងរកវឌ្ឍនភាព ខណៈពេលមាន​ស្ថិរភាព អនុវ​ត្ត​ជាក់ស្តែងនូវគោលគំនិតអភិវឌ្ឍន៍ថ្មីយ៉ាងពេញលេញ និងត្រឹមត្រូវ ព្រមទាំង​ពន្លឿន​ការកសាង​និម្មាបនកម្មអភិវឌ្ឍន៍​ថ្មី​ ត្រូវប្រើប្រាស់គោលនយោបាយម៉ាក្រូសេដ្ឋកិច្ចឲ្យបានពេញលេញ ទាញ​យក​សក្តានុពលនៃតម្រូវការក្នុងស្រុក ធ្វើឱ្យស៊ីជម្រៅនូវកំណែទម្រង់ និងការបើកទូលាយ ជំរុញ​ការ​អភិវឌ្ឍសេដ្ឋកិច្ចប្រកបដោយចីរភាពនិងឆ្ពោះទៅរកទិសដៅថ្មី ដើម្បី​ធានា​ឲ្យបានការ​សម្រេច​បាននូវគោលដៅ និងភារកិច្ចអភិវឌ្ឍន៍សេដ្ឋកិច្ចនិងសង្គមសំខាន់ៗប្រចាំឆ្នាំ ២០២៦ នេះ និងសម្រេច​បាននូវ​ការចាប់ផ្តើមដ៏ល្អនៃ «ផែនការប្រាំឆ្នាំទី១៥»។ ​ត្រូវ​សម្របសម្រួល​ការអភិវឌ្ឍ និងសុវត្ថិភាពភាព ព្រម​ទាំង​ពង្រឹង​ការ​កសាង​គម្រោង​ជីវភាពរស់​នៅ​ដែល​មាន​លក្ខណៈផ្តលផលប្រយោជន៍ជាមូលដ្ឋាន។ ​ត្រូវ​ធ្វើ​ការ​ងារ​ឱ្យ​បាន​ល្អ​ក្នុង​សុវត្ថិភាព​ផលិតកម្ម​ ការបង្ការ បន្ថយនិងជួយសង្គ្រោះគ្រោះមហន្តរាយ  សុវត្ថិភាព​​​ចំណីអាហារ ឱសថ និងស្ថិរភាព សង្គម។ ​​ ត្រូវពង្រឹង និងពង្រីកសមិទ្ធផលនៃការសិក្សា និងការអប់រំស្តីពីការបង្កើត និងការអនុវត្តទស្សនៈសមិទ្ធផលការងារដ៏ត្រឹមត្រូវ ព្រមទាំងបញ្ចូលគ្នានូវការបណ្តុះបណ្តាលសមាជិកដែលទើបទទួលបានការតែងតាំងថ្មីនៃក្រុមថ្នាក់ដឹកនាំ ជាពិសេស ត្រូវបណ្តុះបណ្តាល“អ្នកទទួលខុសត្រូវ”លើទស្សនៈ អប់រំ និងណែនាំពួកគេឱ្យប្រកាន់ខ្ជាប់នូវគោលការណ៍នៃការបម្រើបក្ស និងផលប្រយោជន៍ប្រជាជន ការធ្វើការសម្រេចចិត្តតាមបែបវិទ្យាសាស្ត្រ និងការខិតខំប្រឹងប្រែងជាក់ស្តែង ដើម្បីសម្រេចបានលទ្ធផលជាក់ស្តែងជូនប្រជាជន។

កិច្ចប្រជុំពេញអង្គបានសម្រេចចិត្តថា សមាជជាតិលើកទី ២១ នៃបក្សកុម្មុយនី​ស្ត​ចិន​នឹង​ប្រព្រឹត្តិទៅ នៅទីក្រុងប៉េកាំង នៅឆមាសទីពីរនៃឆ្នាំ ២០២៧។ កិច្ចប្រជុំពេញអង្គសម្គាល់​ឃើញ​​ថា សមាជជាតិលើកទី ២១ នៃបក្សកុម្មុយនីស្តចិន គឺជាសមាជដ៏សំខាន់មួយ ដែល​បាន​ប្រារព្ធធ្វើឡើងនៅពេលវេលាដ៏សំខាន់ នៅ​ពេល​ដែល​បក្ស​និង​រដ្ឋ​កំពុង​សម្រេច​បាន​នូវ​ទំនើបកម្មសង្គមនិយម និងចាប់ផ្តើមដំណើរថ្មីមួយឆ្ពោះទៅរកគោលដៅទី ២ នៃសតវត្សរ៍ ក៏ជាព្រឹត្តិការណ៍ដ៏សំខាន់មួយនៅក្នុងជីវភាពរស់នៅនយោបាយរបស់បក្ស និងប្រទេសជាតិ។ គណបក្សទាំងមូលត្រូវតែរួបរួមគ្នា និង​ដឹកនាំ​ប្រជាជន​គ្រប់​ក្រុម​ជនជាតិ​នៅ​ទូទាំងប្រទេសចិន ​ឲ្យធ្វើការរួមសាមគី្គគ្នាជាធ្លុងមួយខិតខំ​ប្រឹងប្រែងដើម្បីសម្រេច​បាន​នូវ​ទំនើបកម្មសង្គមនិយមជាមូលដ្ឋាន  បង្កើតជាបន្តបន្ទាប់នូវនិម្មាបនកម្មថ្មីនៃការជំរុញកសាងប្រទេសឱ្យក្លាយជាប្រទេសខ្លាំង និងបុព្វហេតុដ៏អស្ចារ្យនៃការស្តារប្រជាជាតិឡើងវិញនូ តាមរយៈទំនើបកម្មបែបផែនចិន ដើម្បីអបអរស្វាគមន៍កិច្ចប្រជុំសមាជជាតិលើកទី ២១ នៃបក្សកុម្មុយនីស្តចិនដោយជោគជ័យតាមរយៈសកម្មភាពជាក់ស្តែង។

កិច្ចប្រជុំពេញអង្គបានសម្រេចជ្រើសរើសលោក Zhang Shengmin ជាសមាជិក​ការិយាល័យ​នយោបាយ​នៃ​គណៈកម្មាធិការមជ្ឈិមបក្សកុម្មុយនីស្តចិន។

យោងតាម​ការ​កំណត់​នៃ​លក្ខន្តិកៈ​  ​កិច្ចប្រជុំពេញអង្គ​​បាន​​សម្រេចចិត្ត បន្ថែមលោក Lu Dongliang លោក Bao Gang , ​លោកស្រី Xing Shanping , ​លោកស្រី Qu Yingpu , លោក  Lv Jun , លោក Zhu Tianshu, លោក Zhu Guoxian , លោក Liu Jun ,  លោក​  Liu Jie  ​និង​លោក Liu Qiang  ពី​​សមាជិក​បម្រុង​មក​ជា​សមាជិក​ផ្លូវការ​នៃ​គណៈកម្មាធិការ​មជ្ឈិម​បក្ស​។​

កិច្ចប្រជុំពេញអង្គបាន​ពិភាក្សា​ និង​អនុម័ត​របាយការណ៍​ត្រួតពិនិត្យ​ស្តីពី​បញ្ហា​ល្មើស​​វិន័យ​និង​ ល្មើសច្បាប់​​ធ្ងន់ធ្ងរ​នៃ​គណៈកម្មាធិការ​ត្រួត​ពិនិត្យ​​វិន័យ​មជ្ឈិមបក្ស​ចំពោះ​​ឈ្មោះ Ma Xingrui, Lan Tianli, Liu Jianchao, Wang Lixia, Jin​ Zhuanglong, Lei Fanpei, Yi Huiman, Wang Xiangxi, Sun Shaocheng, Li Yunze, Fei Dongbin, Wu Shenghua, Yu Jianfeng, Yuan Jie, Zhang Zhongyang, Wen Gang, Jin Donghan, Fang Hongwei។​   កិច្ចប្រជុំពេញអង្គ​បាន​ពិភាក្សា​និង​អនុម័ត​របាយការណ៍​ត្រួតពិនិត្យ​ស្តីពី​បញ្ហា​ល្មើស​​វិន័យ​ និង​ល្មើសច្បាប់​​ធ្ងន់ធ្ងរ​នៃ​គណៈកម្មាធិការ​យោធា​មជ្ឈិម​ចំពោះ​​ឈ្មោះ Zhang Youxia, Liu Zhenli, Wang Renhua, Liu Qingsong, Huang Ming, Li Qiaoming, Li Wei, Zhang Hongbing, Wang Haijiang, Zhang Lin,  Wang Peng, Liu Faqing, Yang Cheng, Zhong Shaojun, Zhao Xiaozhe, Fang Yongxiang។​    កិច្ចប្រជុំពេញអង្គ​​បាន​កំណត់​បញ្ជាក់​ពី​​ការសម្រេចចិត្ត​របស់​​ការិយាល័យនយោបាយនៃគណៈកម្មាធិការមជ្ឈិម​បក្ស​​​ស្តីពី​ការបណ្តេញឈ្មោះ ​   Ma Xingrui, Zhang Youxia, Liu Zhenli,​ Lan Tianli, Liu Jianchao, Wang Lixia, Jin  Zhuanglong, Lei Fanpei, Yi Huiman , Wang Xiangxi, Sun Shaocheng, Wang Renhua, Liu Qingsong, Huang Ming, Li Qiaoming, Li Wei, Zhang Hongbing, Wang Haijiang, Zhang Lin, Wang Peng, Liu Faqing, Yang Cheng, Zhong Shaojun, Zhao Xiaozhe, Fei Dongbin, Wu Shenghua, Yu Jianfeng, Yuan Jie, Zhang Zhongyang, Wen Gang,  Jin Donghan,  Fang Hongwei, Fang Yongxiang ​ចេញពីបក្ស ​ចំណែក​ឈ្មោះ Li Yunze  ​ត្រូវ​បាន​​ដកហូត​តួនាទីក្នុងបក្ស។​​​

កិច្ចប្រជុំពេញអង្គ​បាន​អំពាវនាវថា ​បក្ស​ទាំងមូល​ត្រូវ​រួម​​សាមគ្គី​គ្នា​កាន់តែ​ខ្លាំងឡើង​​នៅជុំវិញ​មជ្ឈិមបក្ស​ដែល​​មាន​លោក Xi Jinping ​ជាប្រមុខ​ស្នូល​​  ​អនុវត្ត​ដោយ​គ្រប់ជ្រុងជ្រោយ​នូវ​​​គំនិត​​​លោក Xi Jinping​ ស្តីពី​​សង្គមនិយម​មាន​លក្ខណៈពិសេស​ចិន​ក្នុងយុគសម័យថ្មី  ​ខិតខំប្រឹងប្រែង​ធ្វើ​អភិបាលកិច្ច​ឱ្យ​កាន់តែល្អ​  ​តស៊ូយ៉ាងអង់អាច​ឈានទៅរក​ភាពខ្លាំងក្លា  ​​​ ​បន្ត​ផ្តោត​លើ​ការគ្រប់គ្រងបក្ស​ដោយ​​តឹងរ៉ឹង​​គ្រប់ជ្រុងជ្រោយ បន្ត​បង្កើត​និម្មាបនកម្ម​ថ្មី​នៃ​ការ​គ្រប់គ្រង​បក្ស​ក្នុង​យុគសម័យថ្មី  ​ ​​កសាង​និង​ពង្រឹងបក្ស​ឱ្យ​ខ្លាំងក្លា  ​រួម​សាមគ្គី​និង​ដឹកនាំ​ប្រជាជន​គ្រប់ជនជាតិ​ទូទាំងប្រទេស​ឱ្យ​តស៊ូ​​ប្រឹងប្រែង​​ក្នុងដំណើរការ​កសាង​ប្រទេស​សង្គមនិយមដ៏​ខ្លាំងក្លា​ ​និង​​ជំរុញ​ការ​​ស្តារ​ភាព​រុងរឿង​របស់​ប្រជាជាត​ចិន​​ឡើងវិញ​តាមរយៈ​ការធ្វើ​ទំនើបកម្ម​តាម​បែបផែនចិន៕​​​