ခရီးသွားအထင်ကရနေရာများ သွားရောက်ခြင်းမှသည် ကိုယ်တိုင်ကိုယ်ကျခံစားနစ်မြုပ်မှုရှိသော အတွေ့အကြုံဆီသို့ - လူငယ်များသည် ခရီးသွားလာမှုတွင် ဒေသရင်းစွဲဆန်ဆန် အတွေ့အကြုံကို ခံစားနေကြ

ယဉ်ကျေးမှုနှင့် ခရီးသွားလာရေးဝန်ကြီးဌာန၏ ကိန်းဂဏန်းများအရ အမျိုးသားနေ့ အားလပ်ရက် ၇ ရက်အတွင်း တစ်နိုင်ငံလုံးအတိုင်းအတာဖြင့် ပြည်တွင်းခရီးသွားလာမှု အကြိမ်ရေ ၈၂၆ သန်း ရှိခဲ့သည်။ လူအင်အား စည်ကားမှုနောက်ကွယ်တွင် ခရီးသွားလာသည့် ပုံစံများလည်း ပြောင်းလဲလာကြသည်။  

​ဒေသခံတစ်ဦးကဲ့သို့ နေထိုင်ခြင်းအနေဖြင့် ပေကျင်းရုံးဝန်ထမ်းလင်းဝမ်သည် ခရီးသွားနေရာအဖြစ် ကွမ်တုန်းပြည်နယ် ကျန်ကျန်းမြို့ကို ရွေးချယ်ခဲ့ပြီး ရောက်ရှိပြီးနောက် ကားငှားကာ ကိုယ်တိုင်မောင်းနှင်၍ သွားချင်ရာသွား ရပ်ချင်ရာရပ် လုပ်ခဲ့သည်။ သူမကို အထူးအဆန်း ဖြစ်စေခဲ့သည်မှာ မတော်တဆ ရောက်ရှိသွားခဲ့သည့် ပင်လယ်ကမ်းစပ် ရွာငယ်လေးတစ်ခု ဖြစ်သည်- "ကျွန်မတို့က ကင်မရာတွေကို ကိုင်ပြီး ဓာတ်ပုံရိုက်နေတုန်း လှည့်ကြည့်လိုက်တော့ ဒေသခံ ရွာသားတွေလည်း ငြိမ်ငြိမ်လေးနဲ့ နေဝင်ချိန် တစ်ခုတည်းကိုပဲ အတူကြည့်နေကြတာကို တွေ့လိုက်ရတယ်။ အဲဒီအချိန်က တကယ်ကို ရင်ထဲမှာ လှိုက်လှိုက်လှဲလှဲ ခံစားရပါတယ်" ဟု သူမက ဆိုသည်။ သူမသည် ဒေသခံ ဟင်းသီးဟင်းရွက်ဈေးနှင့် ပင်လယ်စာဆိပ်ကမ်းများသို့လည်း ဝင်ရောက်ခဲ့ပြီး စစ်မှန်ပြီး နွေးထွေးသော ရှုခင်းများကို ကင်မရာဖြင့် မှတ်တမ်းတင်ခဲ့သည်။ Tuniu ၏ကိန်းဂဏန်းများအရ သက်တောင့်သက်သာ အပန်းဖြ‌ေမှုကို အဓိကထားသည့် ဒေသရင်းစွဲဆန်ဆန် ခရီးသွားလာမှုသည် ထွန်းကားလာခဲ့ပြီး မြို့ငယ်ခရီးသွားလာမှုနှင့် ခရိုင်မြို့များဆီသို့ ပြေးသွားသည့် ခရီးသွားလာမှုတို့သည် ခရီးသွားသုံးစွဲမှု၏ တိုးတက်မှုအချက်အချာအသစ် ဖြစ်လာခဲ့သည်။

​ကြည့်ရှုသူမှသည် ပူးပေါင်းပါဝင်သူအဖြစ်သို့ ပြောင်းလဲလာခြင်းအနေဖြင့် ၂၀၀၀ ခုနှစ်နောက်ပိုင်း မွေးဖွားသော မိန်းကလေးနှင့် သူငယ်ချင်း ၃ ဦးတို့သည် ပေကျင်းမှ ကျန်းရှီပြည်နယ်သို့ လေယာဉ်ဖြင့် ပျံသန်းသွားခဲ့ကြပြီး AI ကိရိယာများကို အသုံးပြုကာ သွားရောက်လိုသော ခရီးသွားနေရာများကို စုစည်း၍ ခရီးစဉ်တိုလေးတစ်ခုကို ဖန်တီးခဲ့ကြသည်။ လူးတောင်ပေါ်တွင် သူမသည် စူရှီ၏ ကဗျာစာသားများထဲရှိ အနှစ်သာရကို အမှန်တကယ် ခံစားသိရှိလိုက်ရသည်- "ကဗျာတွေ ဖြစ်ပျက်ခဲ့တဲ့နေရာကို ရောက်မှပဲ ရှေးခေတ်လူတွေရဲ့ အဲဒီအချိန်က ခံစားချက်ကို တကယ်နားလည်နိုင်ခဲ့တယ်" ဟု ဆိုသည်။ ကိုရှန်ရွာတွင် သူမသည် ရှေးခေတ်ဝတ်စုံသို့ ပြောင်းလဲဝတ်ဆင်ခဲ့ပြီး NPC ဇာတ်ကောင်များနှင့် အပြန်အလှန် ဖလှယ်မှုများ လုပ်ဆောင်ခဲ့ကာ ရရှိလာသော ငွေစက္ကူအတုများဖြင့် ဂိမ်းငယ်များကို ပျော်ရွှင်စွာ ဆော့ကစားခဲ့သည်။ Fliggy ၏ကိန်းဂဏန်းများအရ ဇာတ်ကောင်အပြန်အလှန် ဖလှယ်မှု သို့မဟုတ် ကိုယ်တိုင်ကိုယ်ကျခံစား နစ်မြုပ်မှုရှိသော အတွေ့အကြုံပါရှိသည့် အပန်းဖြေဧရိယာ လက်မှတ်မှာယူမှု ပမာဏသည် ယမန်နှစ်ထက် ၆၀ % တိုးတက်လာခဲ့ပြီး၊ Ctrip ၏ စာရင်းအချက်အလက်များအရ အသက် ၂၀ မှ ၂၅ နှစ်ရှိ ခရီးသွားများ၏ ခရီးသွားနေရာ ကြိုတင်မှာယူမှုများတွင် ယဉ်ကျေးမှုဆိုင်ရာ ခရီးသွားနေရာများက ခန့်မှန်းခြေ ၄၈% ရှိသည်။

​ခရီးသွားလာရင်း လက်မှုပညာတစ်ရပ် သင်ယူခြင်း အနေဖြင့် Meituan ၏ စာရင်းအချက်အလက်များအရ အမျိုးသားနေ့ အားလပ်ရက်၏ ပထမသုံးရက်တွင် ကော်ဖီပြုလုပ်နည်း အတွေ့အကြုံ၏ ရှာဖွေမှု ရေပန်းစားနှုန်းသည် ယမန်ထက် ၆၅ % မြင့်တက်လာခဲ့ပြီး ရွှံ့စေးပန်းပုအနုပညာနှင့်မြေအိုးလုပ်ငန်းသင်တန်း သည် ၈၄ % မြင့်တက်လာခဲ့သည်။ Fliggy ၏ကိန်းဂဏန်းများအရ ဒြပ်မဲ့ယဉ်ကျေးမှုအမွေအနှစ် လက်မှုပညာ အတွေ့အကြုံနှင့် လည်ပတ်ကြည့်ရှုရေးကုန်ပစ္စည်း မှာယူမှု ပမာဏသည် ယမန်နှစ်ထက် တစ်ဆ တိုးတက်လာခဲ့သည်။  

​ငါ ဘယ်နေရာတွေ ရောက်ဖူးလဲ ဆိုသည်မှသည် ငါ တကယ် ဘာတွေ ခံစားခဲ့ရလဲ ဆီသို့ လူငယ်များသည် ၎င်းတို့၏ ကိုယ်ပိုင်နည်းလမ်းဖြင့် ခရီးသွားလာခြင်း၏ အဓိပ္ပာယ်ကို ပြန်လည်သတ်မှတ်နေကြသည်။ ခရီးသွားလာခြင်းနှင့် နေ့စဉ်ဘဝ၏ နယ်နိမိတ်သည် တစ်နေ့တခြား ဝေဝါးလာပြီး ခရိုင်မြို့နယ် ဈေးကွက်သည် ဆက်လက်ကျယ်ပြန့်လာသည်နှင့်အမျှ ယဉ်ကျေးမှုနှင့် ခရီးသွားလာရေး စားသုံးမှု၏ တက်ကြွမှုသည်လည်း ဒေသရင်းစွဲဆန်ဆန်တွေ့ဆုံမှု တစ်ခုချင်းစီတွင် အဆက်မပြတ် ထွက်ပေါ်လာနေသည်။