ယူနန် မြီးရှည် ကုန်ထုတ်လုပ်ငန်းသည် စံချိန်စံညွှန်းခေတ်ကာလသို့ ရောက်ရှိလာခဲ့ပြီး မြီးရှည်အမှတ်တံဆိပ်များ၏ အရည်အသွေး မြှင့်တင်ရေးကို တွန်းအားပေး

​မကြာသေးမီက ယူနန်ပြည်နယ်၏ ဒေသဆိုင်ရာ စံချိန်စံညွှန်းများဖြစ်ကြသော “တံတားကူးမြီးရှည် ဆိုင်များ တည်ဆောက်ခြင်းနှင့် ဝန်ဆောင်မှုဆိုင်ရာ စံချိန်စံညွှန်းများ”၊ “တံတားကူးမြီးရှည် အမှတ်တံဆိပ် စီမံခန့်ခွဲမှုဆိုင်ရာ စံချိန်စံညွှန်းများ” နှင့် အဖွဲ့အစည်းဆိုင်ရာ စံချိန်စံညွှန်းဖြစ်သော “ယူနန် မြီးရှည်ဆိုင်များ အဆင့်ခွဲခြားခြင်းနှင့် အကဲဖြတ်ခြင်းဆိုင်ရာ စံချိန်စံညွှန်းများ”တို့ကို ရေးဆွဲခြင်း၊ စိစစ်ခြင်းနှင့် လက်ခံအတည်ပြုခြင်း လုပ်ငန်းစဉ်များ ဆောင်ရွက်ပြီးစီး၍ စတင်ထုတ်ပြန် ကျင့်သုံးခဲ့ပြီ ဖြစ်သည်။ ဤသည်မှာ ယူနန် မြီးရှည် ကုန်ထုတ်လုပ်ငန်း၏ စံချိန်စံညွှန်းသတ်မှတ်ရေး၊ အမှတ်တံဆိပ်ဖန်တီးဖော်ဆောင်ရေးနှင့် စနစ်တကျရှိရေး လမ်းကြောင်းပေါ်တွင် အရေးပါသော ခြေလှမ်းတစ်ရပ်ကို လှမ်းလျှောက်လိုက်ခြင်းပင် ဖြစ်သည်။  

​“တံတားကူးမြီးရှည်ဆိုင်များ တည်ဆောက်ခြင်းနှင့် ဝန်ဆောင်မှုဆိုင်ရာ စံချိန်စံညွှန်းများ”တွင် ဆိုင်နေရာရွေးချယ်ခြင်း၊ ဆိုင်တွင်းဖွဲ့စည်းတည်ဆောက်ခြင်း၊ မီးဖိုချောင်အပိုင်းခွဲခြင်း၊ စက်ပစ္စည်းများတပ်ဆင်ခြင်း၊ ဝန်ထမ်းစီမံခန့်ခွဲခြင်းနှင့် ဝန်ဆောင်မှုလုပ်ငန်းစဉ် စသည်တို့ကို စနစ်တကျ ပြဋ္ဌာန်းထားပြီး ဆိုင်ခန်းဧရိယာသည် စတုရန်းမီတာ ၁၅၀ ထက် မနည်းရှိရမည်ဖြစ်ပြီး မီးဖိုချောင်ဧရိယာအချိုးသည် ၃၀ % ထက် မနည်းစေရန် သတ်မှတ်ထားရုံမျှမက ဟင်းရည်ချက်ပြုတ်ချိန်နှင့် ပန်းကန်လုံးအပူပေးမှု အပူချိန်ထိန်းချုပ်ခြင်း စသည့်အဓိက အရည်အသွေး ထိန်းချုပ်ရေး အချက်များကိုလည်း ရှင်းလင်းစွာ သတ်မှတ်ပေးထားသည်။  

​“တံတားကူးမြီးရှည် အမှတ်တံဆိပ် စီမံခန့်ခွဲမှုဆိုင်ရာ စံချိန်စံညွှန်းများ”သည် အမှတ်တံဆိပ် ယှဉ်ပြိုင်နိုင်စွမ်းရှိမှု၊ အမှတ်တံဆိပ် ကာကွယ်မှုနှင့် စွန့်စားရမှု စီမံခန့်ခွဲမှု၊ အမှတ်တံဆိပ် စီမံခန့်ခွဲမှုဆိုင်ရာ အကဲဖြတ်ခြင်းနှင့် တိုးတက်ကောင်းမွန်စေခြင်း စသည့်အပိုင်း ၃ ပိုင်းကို တည်ဆောက်ထားပြီး ပြည်တွင်းရှိ တံတားကူးမြီးရှည် အမှတ်တံဆိပ် စီမံခန့်ခွဲမှုဆိုင်ရာ အထူးစံချိန်စံညွှန်း ကွက်လပ်ကို ဖြည့်ဆည်းပေးခဲ့သည်။  

​“ယူနန် မြီးရှည်ဆိုင်များ အဆင့်ခွဲခြားခြင်းနှင့် အကဲဖြတ်ခြင်းဆိုင်ရာ စံချိန်စံညွှန်းများ”တွင် အခြေခံ အဆောက်အအုံ၊ ပတ်ဝန်းကျင်သန့်ရှင်းရေး၊ ဝန်ဆောင်မှုအရည်အသွေး၊ ထုတ်ကုန်စံချိန်စံညွှန်းနှင့် အစားအသောက် ဘေးကင်းလုံခြုံရေး စီမံခန့်ခွဲမှု စသည့်ကဏ္ဍစုံ ပါဝင်သောကြောင့် စားသုံးသူများအတွက် ဆိုင်များ၏ အထွေထွေအရည်အသွေးကို တိုက်ရိုက်သုံးသပ်ဆုံးဖြတ်နိုင်ရန် အထောက်အကူပေးလျက်ရှိသည်။