တရုတ်နှင့် အာဆီယံ ကုန်သွယ်မှုပမာဏသည် ပထမဆုံးအကြိမ်အဖြစ် အမေရိကန်ဒေါ်လာ ၁ ထရီလီယံကို ကျော်လွန်သွားခဲ့၊ (၂၃) ကြိမ်မြောက် တရုတ်-အာဆီယံ ကုန်စည်ပြပွဲ မကြာမီ စတင်တော့မည်

၂၀၂၅ ခုနှစ်တွင် တရုတ်နှင့် အာဆီယံ နှစ်ဘက်အကြား ကုန်သွယ်မှုပမာဏသည် ပထမဆုံးအကြိမ်အဖြစ် အမေရိကန်ဒေါ်လာ ၁ ထရီလီယံကို ကျော်လွန်ခဲ့ကာ ဒေါ်လာ ၁.၀၅ ထရီလီယံအထိ ရောက်ရှိခဲ့ပြီး ယခင်နှစ်နှင့် နှိုင်းယှဉ်ပါက ၇.၄ ရာခိုင်နှုန်း တိုးတက်လာခဲ့သည်။ တရုတ်နိုင်ငံသည် ၁၇ နှစ်ဆက်တိုက် အာဆီယံ၏ အကြီးမားဆုံး ကုန်သွယ်ဖက်နိုင်ငံအဖြစ် ရပ်တည်ခဲ့ပြီး အာဆီယံသည်လည်း ၆ နှစ်ဆက်တိုက် တရုတ်နိုင်ငံ၏ အကြီးမားဆုံး ကုန်သွယ်ဖက်အဖြစ် ရပ်တည်ခဲ့သည်။ ယခုနှစ် ဇန်နဝါရီလမှ ဇူလိုင်လအထိ နှစ်ဦးနှစ်ဘက် ကုန်သွယ်မှုပမာဏသည် အမေရိကန်ဒေါ်လာ ၇၄၄.၄၁ ဘီလီယံအထိ ရောက်ရှိခဲ့ပြီး ယခင်နှစ်နှင့် နှိုင်းယှဉ်ပါက ၂၄.၇ ရာခိုင်နှုန်း တိုးတက်လာခဲ့ရာ တရုတ်နိုင်ငံ၏ နိုင်ငံခြားကုန်သွယ်မှု စုစုပေါင်းပမာဏ၏ ၂၁.၈ ရာခိုင်နှုန်းအထိ မြင့်တက်လာခဲ့သည်။

စီးပွားရေးနှင့် ကုန်သွယ်ရေး ဆက်ဆံရေးများ တစ်နေ့ထက်တစ်နေ့ ပိုမိုနီးကပ်လာသည့် နောက်ခံအခြေအနေအောက်တွင် (၂၃) ကြိမ်မြောက် တရုတ်-အာဆီယံ ကုန်စည်ပြပွဲနှင့် စီးပွားရေးနှင့် ရင်းနှီးမြှုပ်နှံမှု ထိပ်သီးအစည်းအဝေးကို ကွမ်ရှီးပြည်နယ် နန့်နင်းမြို့၌ ကျင်းပမည်ဖြစ်သည်။ စီးပွားရေးနှင့် ကူးသန်းရောင်းဝယ်ရေးဝန်ကြီးဌာန ဒုတိယဝန်ကြီး ယန်းတုန်း၏ မိတ်ဆက်ပြောကြားချက်အရ ယခုနှစ် ဇူလိုင်လအထိ တရုတ်နှင့် အာဆီယံတို့၏ နှစ်ဦးနှစ်ဖက် စုစုပေါင်း ရင်းနှီးမြှုပ်နှံမှုပမာဏနှင့် အင်ဂျင်နီယာဆိုင်ရာ ကန်ထရိုက်လုပ်ငန်း စုစုပေါင်းပမာဏတို့မှာ အမေရိကန်ဒေါ်လာ ဘီလီယံ ၅၁၅ စီ ကျော်လွန်ခဲ့ကြောင်း သိရသည်။ မလေးရှားနိုင်ငံ၏ အရှေ့ဘက်ကမ်းရိုးတန်း ရထားလမ်းစီမံကိန်း၏ တိုးတက်မှုမှာ ၉၄ ရာခိုင်နှုန်းကျော်ရှိပြီး အင်ဒိုနီးရှားနိုင်ငံ၏ ဂျကာတာ-ဘန်ဒုန်း အမြန်ရထားလမ်းသည် ခရီးသည် စုစုပေါင်း ၁၅ သန်းကျော် ပို့ဆောင်ပေးခဲ့ကာ တရုတ်-လာအို 500kV လျှပ်စစ်ဓာတ်အားလိုင်း ချိတ်ဆက်မှု စီမံကိန်းလည်း တရားဝင် စတင်နိုင်ခဲ့သည်။

တရုတ်-အာဆီယံ လွတ်လပ်သော ကုန်သွယ်ရေးဇုန် Version 3.0 မြှင့်တင်ရေး သဘောတူညီချက်ကို တရားဝင် လက်မှတ်ရေးထိုးခဲ့ပြီး ဖြစ်သဖြင့် ပူးပေါင်းဆောင်ရွက်မှုများကို ဒစ်ဂျစ်တယ်၊ အစိမ်းရောင်၊ ထုတ်လုပ်မှုနှင့် ထောက်ပံ့ပို့ဆောင်ရေး ကွင်းဆက် စသည့်အသစ်ထွက်ပေါ်လာသော နယ်ပယ်များသို့ တိုးချဲ့သွားမည်ဖြစ်သည်။ စီးပွားရေးနှင့် ကူးသန်းရောင်းဝယ်ရေးဝန်ကြီးဌာန အာရှရေးရာဌာနမှ ဌာနမှူး ဝမ်လိဖိန်က အနာဂတ်တွင် အသစ်ထွက်ပေါ်လာသော နယ်ပယ်များ၌ ပူးပေါင်းဆောင်ရွက်မှုကို အားကောင်းစေမည်ဖြစ်ပြီး “နှစ်နိုင်ငံ စက်မှုဇုန်နှစ်ခု” စသည့်အခြေခံများမှတစ်ဆင့် ထုတ်လုပ်မှုနယ်ပယ်များ ချိတ်ဆက်မှုကို မြှင့်တင်ပေးမည်ဖြစ်ကြောင်း၊ ဘက်စုံသယ်ယူပို့ဆောင်ရေး စနစ်ကို ဖွံ့ဖြိုးတိုးတက်စေကာ အပြန်အလှန် ချိတ်ဆက်မှု ထိရောက်မှုကို မြှင့်တင်မည်ဖြစ်ကြောင်း၊ AI နှင့် ဒေတာကြီး စသည့်နည်းပညာများကို အသုံးပြု၍ ထုတ်လုပ်မှုနှင့် ထောက်ပံ့ပို့ဆောင်ရေး ကွင်းဆက်များ၏ ဒစ်ဂျစ်တယ်နှင့် စမတ်အဆင့်ကို မြှင့်တင်သွားမည်ဖြစ်ကြောင်း ပြောကြားခဲ့သည်။  

တရုတ်နိုင်ငံ ကုန်သွယ်မှုမြှင့်တင်ရေးကောင်စီ ဒုတိယဥက္ကဋ္ဌ လင်းဟုန်ဟုန်က ယခုအကြိမ် ထိပ်သီးအစည်းအဝေးကို “3.0 အခွင့်အလမ်းများကို မျှဝေစို့၊ သာယာလှပသော ဘဝကို အတူတကွ ဖန်တီးစို့” ဟူသောဆောင်ပုဒ်ဖြင့် ကျင်းပမည်ဖြစ်ပြီး AI အခင်းအကျင်းဆိုင်ရာ ချိတ်ဆက်မှုလှုပ်ရှားမှုများကို ကျင်းပသွားမည်ဖြစ်ကာ “ကုန်လမ်းနှင့် ပင်လယ်ရေကြောင်းဆိုင်ရာ စမတ်ချိတ်ဆက်မှု၊ တရုတ်-အာဆီယံ AI စမတ် နိုင်ငံတကာ ပူးပေါင်းဆောင်ရွက်မှု ဖြစ်ရပ်မှန်များ စုစည်းမှု (၂၀၂၆)” ကို ထုတ်ပြန်သွားမည်ဖြစ်၍ AI နည်းပညာကို ပြသမှုအဆင့်မှ ထုတ်လုပ်မှုများအတွင်း လက်တွေ့အကောင်အထည်ဖော်မှုအထိ ဖြစ်လာစေရန် တွန်းအားပေးသွားမည်ဖြစ်ကြောင်း ပြောကြားခဲ့သည်။