တရုတ်နိုင်ငံသည် အမျိုးသားစံပြ လက်သင်္ကေတပြဘာသာနှင့် မျက်မမြင်စာ ဝန်ဆောင်မှုများ ပံ့ပိုး

တရုတ်နိုင်ငံသည် ပညာရေးစာမေးပွဲများ၊ ဆေးဝါးကုသရေး၊ အစိုးရရေးရာ၊ တရားစီရင်ရေး၊ အရေးပေါ်ကယ်ဆယ်ရေး၊ လမ်းပန်းဆက်သွယ်ရေး၊ ကုန်သွယ်ရေး၊ ယဉ်ကျေးမှုနှင့် ခရီးသွားလာရေးစသည့် ပြည်သူ့ဝန်ဆောင်မှု နယ်ပယ်များတွင် အမျိုးသားစံပြ လက်သင်္ကေတပြဘာသာနှင့် အမျိုးသားစံပြ မျက်မမြင်စာဝန်ဆောင်မှုများကို ပံ့ပိုးပေးသွားမည် ဖြစ်သည်။

​ဤသည်မှာ တရုတ်နိုင်ငံ ဌာန ၇ ခုမှ အောက်တိုဘာလ ၉ ရက်နေ့တွင် ထုတ်ပြန်ခဲ့သည့် "တတိယအကြိမ်မြောက် အမျိုးသား လက်သင်္ကေတပြဘာသာနှင့် မျက်မမြင်စာ စံချိန်စံညွှန်းမီစေရေး လုပ်ဆောင်ချက်စီမံကိန်း (၂၀၂၆-၂၀၃၀)" ၌ အတိအလင်း ဖော်ပြထားခြင်းဖြစ်သည်။

​စီမံကိန်းအရ အဓိကကျသော အခမ်းအနားများ ကျင်းပချိန်နှင့် သဘာဝဘေးအန္တရာယ်၊ မတော်တဆထိခိုက်မှု၊ ပြည်သူ့ကျန်းမာရေးနှင့် လူမှုရေးဘေးကင်းလုံခြုံရေးစသည့် အရေးပေါ်ဖြစ်စဉ်ဆိုင်ရာ သတင်းအချက်အလက်များ ထုတ်ပြန်သည့်အခါ အခြေအနေပေးပါက အမျိုးသားစံပြ လက်သင်္ကေတပြဘာသာ ပြန်ဆိုမှုကို တစ်ပြိုင်နက်တည်း စီစဉ်ပေးမည်ဖြစ်ပြီး အမျိုးသားစံပြ မျက်မမြင်စာ အချက်အလက်များကိုလည်း ပံ့ပိုးပေးမည် ဖြစ်သည်။

​လူမှုဘဝတွင် ကျယ်ကျယ်ပြန့်ပြန့် သုံးစွဲရေးကို မြှင့်တင်ရန်အတွက် စီမံကိန်းတွင် အများပြည်သူသို့ ထုတ်ဝေသည့် စာအုပ်များ၊ သတင်းစာနှင့် ဂျာနယ်များ၊ ဆေးဝါးအညွှန်းများနှင့် ရှင်းလင်းချက်များ၌ အမျိုးသားစံပြ မျက်မမြင်စာပေစသည့် မသန်စွမ်းသူများအတွက် အတားအဆီးမဲ့ ပုံစံများကို ထည့်သွင်းပေးရန် တိုက်တွန်းထားသည်။ ထို့အပြင် မသန်စွမ်းသူများအတွက် အဓိက အားကစားပြိုင်ပွဲများ၊ အရေးကြီးသော ယဉ်ကျေးမှုပွဲများတွင် အမျိုးသားစံပြ လက်သင်္ကေတပြဘာသာနှင့် မျက်မမြင်စာ ဝန်ဆောင်မှုပေးရေးကို တွန်းအားပေးရန်၊ မသန်စွမ်းသူများဆိုင်ရာ ဝန်ထမ်းများနှင့် အရေးပေါ်စီမံခန့်ခွဲရေး၊ လူမှုဝန်ဆောင်မှုဆိုင်ရာ ဝန်ထမ်းများအတွက် လက်သင်္ကေတပြဘာသာနှင့် မျက်မမြင်စာ သင်ယူရေး လှုပ်ရှားမှုများကို ဆောင်ရွက်ရန်၊ လက်သင်္ကေတပြဘာသာနှင့် မျက်မမြင်စာတို့၏ စံချိန်စံညွှန်းမီရေး၊ သတင်းအချက်အလက်နည်းပညာ ဖွံ့ဖြိုးတိုးတက်ရေး၊ အရင်းအမြစ် ထောက်ပံ့ရေး၊ လူတော်လူချွန် မွေးထုတ်ရေးနှင့် နိုင်ငံတကာ ဖလှယ်ရေးတို့ကို မြှင့်တင်ရန် ပါဝင်သည်။

​အထူးပညာရေးကျောင်းများတွင် အမျိုးသားစံပြ လက်သင်္ကေတပြဘာသာနှင့် မျက်မမြင်စာတို့ကို စံချိန်စံညွှန်းမီ စနစ်တကျ အသုံးပြုခြင်းကို ကျောင်းစီမံခန့်ခွဲမှု၊ စာသင်ခန်း သင်ကြားရေး၊ သင်ကြားမှုအကဲဖြတ်ရေးနှင့် စစ်ဆေးအကဲဖြတ်ရေး စသည့်အဆင့်တိုင်းတွင် ထည့်သွင်းသွားမည်ဖြစ်ပြီး ဆရာ၊ ဆရာမများ၏ ဘာသာစကားနှင့် စာပေအသုံးပြုမှု အခြေခံလိုအပ်ချက်နှင့် လုပ်ငန်းခွင် စစ်ဆေးအကဲဖြတ်မှု အကြောင်းအရာအဖြစ် သတ်မှတ်ဆောင်ရွက်သွားမည် ဖြစ်သည်။