មិត្តភាពពន្លឺព្រះចន្ទចែងចាំងលើទន្លេឡានឆាង-មេគង្គ យកទេសភាពជាស្ពានដើម្បីផ្សារភ្ជាប់មិត្តភាព

នាយប់ថ្ងៃទី ២៣ ខែកញ្ញា "មិត្តភាពពន្លឺព្រះចន្ទចែងចាំងលើទន្លេឡានឆាង-មេគង្គ" ពិព័រណ៍អរិយធម៌ពិធីបុណ្យសែនព្រះខែ "រោងសិប្បកម្មសុភមង្គលយូណាន" ត្រូវបានរៀបចំឡើងនៅរាជធានីភ្នំពេញ ប្រទេសកម្ពុជា។ ឯកឧត្តម ឯក សំអុល ឧត្តមប្រឹក្សាផ្ទាល់ព្រះមហាក្សត្រ និងជាប្រធានសមាគមមិត្តភាពកម្ពុជា-ចិន បានអញ្ជើញចូលរួមទស្សនាពិព័រណ៍នេះ ហើយបានសរសេរនៅស្តង់ "ឮសំឡេងរបស់ពិភពលោក" ថា៖ "ខ្ញុំសូមកោតសរសើរយ៉ាងខ្លាំងចំពោះប្រជាជនចិន ដែលបានកសាងប្រទេសជាតិយ៉ាងស្រស់ស្អាត។ សូមជូនពរឱ្យមិត្តភាពកម្ពុជា-ចិន ស្ថិតស្ថេរចីរកាលជារៀងរហូត"។

ថ្ងៃនោះត្រូវនឹងថ្ងៃនៃទិវាបុណ្យប្រមូលផលកសិករចិនផងដែរ។ នៅស្តង់ "ឮសំឡេងរបស់ពិភពលោក" សំឡេងដើមធម្មជាតិដែលថតចេញពីភូមិតាមព្រំដែនខេត្តយូណាន និងប្រទេសកម្ពុជា ត្រូវបានផលិតជាសំឡេងបែបផ្សារភ្ជាប់អារម្មណ៍។ អ្នកបកប្រែទ្វេភាសាកម្ពុជា-ចិន ឈ្មោះ វេ សិត បាននិយាយថា រដូវប្រមូលផលរបស់ប្រទេសកម្ពុជា ជាទូទៅគឺនៅខែវិច្ឆិកា និងខែធ្នូ ហើយបទភ្លេងដែលធ្លាប់ស្គាល់មួយបទនេះ បានធ្វើឱ្យលោកនឹកឃើញដល់រដូវស្រូវទុំ។ បន្ទាប់ពីប្រមូលផលស្រូវថ្មីនៅក្នុងស្រុកហើយ ប្រជាជនតែងតែធ្វើពិធីបួងសួងសុំសិរីសួស្តីមុនគេ បន្ទាប់មកទើបនាំយកទៅលក់។ "ខ្ញុំក៏ទន្ទឹងរង់ចាំរដូវប្រមូលផលរបស់ប្រទេសកម្ពុជាយ៉ាងខ្លាំងផងដែរ"។

នៅតំបន់ថតរូប "ការបង្កើតភាពសុខដុមរមនារួមជាមួយរាជធានីភ្នំពេញ" លោក វិសាល ភ្ញៀវកិត្តិយសជនជាតិកម្ពុជា បានបញ្ឈប់ដំណើរ រួចបិទស្លាក "ចូលចិត្ត" លើហាងម្ហូប "អាម៉ុកខ្មែរ" និង "តែភូអឺ"៖ "ខ្ញុំចូលចិត្តរសជាតិទាំងពីរនេះ"។ លោកបានញញឹម ហើយពោលថា អាម៉ុកត្រីគឺជារសជាតិដែលធ្លាប់ស្កាល់នៅលើតុអាហាររបស់ជនជាតិខ្មែរ ចំណែកឯតែភូអឺវិញ ធ្វើឱ្យលោកនឹកឃើញដល់រសជាតិឈ្ងុយឆ្ងាញ់ដិតដាមនៅចន្លោះជួរភ្នំនៃខេត្តយូណាន "មួយមកពីបឹងទន្លេសាប មួយទៀតមកពីច្រាំងទន្លេឡានឆាង ថ្ងៃនេះបានមកជួបគ្នានៅភ្នំពេញ"។

នៅក្នុងពិព័រណ៍នេះ មានបេតិកភណ្ឌពិភពលោកពីរបាន "ជួបគ្នា" ក្រោមជក់របស់កុមារៗ។ នៅក្នុងតំបន់ផាត់ពណ៌គំនូរព្រាងនៃសកម្មភាព"គូរគំនូរជាមួយគ្នា 'ផែនការដើរកម្សាន្តនៅបេតិកភណ្ឌពិភពលោក'" តួសម្តែងតូចៗកម្ពុជាចំនួន ៤ រូប កំពុងអង្គុយផាត់ពណ៌យ៉ាងផ្ចិតផ្ចង់នៅមុខផ្ទាំងក្រណាត់គំនូរ ដែលមានរចនារូបភាពទេសភាពភ្នំជីងម៉ៃ និងអង្គរវត្ត។ តួសម្តែងតូចម្នាក់ក្នុងចំណោមនោះបាននិយាយដោយរំភើបថា "ខ្ញុំមិនទាន់ដែលបានទៅប្រទេសចិនទេ មើលតាមរូបភាព ភ្នំជីងម៉ៃស្អាតខ្លាំងណាស់។ នៅថ្ងៃខាងមុខ​ ពេលទៅកម្សាន្តនៅប្រទេសចិន ខ្ញុំចង់បន្ថែមភ្នំជីងម៉ៃចូលទៅក្នុងបញ្ជីផ្លូវទស្សនាចរណ៍របស់ខ្ញុំ"។ នៅក្បែរផ្ទាំងក្រណាត់គំនូរ គឺជាពិព័រណ៍រូបភាព "បេតិកភណ្ឌពិភពលោកជួបជុំគ្នាដោយផ្ទាល់ អរិយធម៌ឆ្លុះបញ្ចាំងគ្នាតាមរយៈមិត្តភាពយូណាន-កម្ពុជា" រូបភាពស្នាដៃបេតិកភណ្ឌពិភពលោកនៃខេត្តយូនណាន ប្រទេសចិន និងប្រទេសកម្ពុជាដែលបានដាក់បង្ហាញ បានតភ្ជាប់ផ្ទាំងទស្សនីយភាពព្រៃភ្នំ និងទន្លេនៃកន្លែងទាំងពីរ ព្រមទាំងមនោសញ្ចេតនាខ្សែទឹកតែមួយ។

នៅខាងមុខស្តង់ពិព័រណ៍តម្បាញពិសេសរបស់ជនជាតិវ៉ា អ្នកបន្តវេនតំណាងថ្នាក់ក្រុងនៃបេតិកភណ្ឌវប្បធម៌អរូបីថ្នាក់ជាតិ លោកស្រី Li Xianlan បានលើកផ្ទាំងតម្បាញមួយផ្ទាំងឡើង ហើយរៀបរាប់យ៉ាងល្អិតល្អន់ជូនភ្ញៀវកិត្តិយសអំពីក្បាច់រចនា និងសិប្បកម្មតម្បាញ។ សិប្បកម្មតម្បាញពិសេសរបស់ជនជាតិវ៉ា ត្រូវបានដាក់បញ្ចូលក្នុងបញ្ជីបេតិកភណ្ឌវប្បធម៌អរូបីជាតិលើកទី ៥ នៃប្រទេសចិន ក្នុងឆ្នាំ ២០២១ ដែលភាគច្រើនប្រមូលផ្តុំនៅក្នុងស្រុកស្វយ័តជនជាតិវ៉ា​ស៊ីម៉េង ក្រុងភូអឺ ខេត្តយូណាន។ លោកស្រី Li Xianlan បានមានប្រសាសន៍ថា "ខ្ញុំមានកិត្តិយសណាស់ដែលបាននាំយកសិប្បកម្មតម្បាញពិសេសរបស់ជនជាតិវ៉ា មកកាន់ប្រទេសកម្ពុជា ដើម្បីឱ្យមនុស្សកាន់តែច្រើនបានយល់ដឹងពីសិប្បកម្មបេតិកភណ្ឌវប្បធម៌អរូបីរបស់យើង។ ក្នុងរយៈពេលប៉ុន្មានឆ្នាំនេះ ខ្ញុំតែងតែដឹកនាំស្រ្តីនៅក្នុងភូមិស្រុកមកធ្វើការងារតម្បាញរួមគ្នា ដើម្បីឱ្យពួកគាត់មានប្រាក់ចំណូលបន្ថែមមួយផ្នែកទៀត។ លើកនេះ ខ្ញុំក៏សង្ឃឹមយ៉ាងមុតមាំថានឹងបានផ្លាស់ប្តូរ និងរៀនសូត្រជាមួយសិប្បករកម្ពុជា អ្នកទាំងអស់គ្នាត្រូវខិតខំប្រឹងប្រែងរួមគ្នា ដើម្បីឱ្យជីវភាពរស់នៅកាន់តែល្អប្រសើរឡើងពីមួយថ្ងៃទៅមួយថ្ងៃ"។

ចាប់តាំងពីសំឡេង រហូតដល់រសជាតិ ចាប់តាំងពីរូបភាព រហូតដល់ចុងម្រាមដៃ នៅរាត្រីនេះ ផ្លូវផ្លាស់ប្តូរអរិយធម៌មួយខ្សែ ដែលអាចស្តាប់បាន មើលឃើញបាន ធុំក្លិនបាន​ ​ភ្លក់រសជាតិបាន និងប៉ះពាល់បាន កំពុងតែលាតសន្ធឹងយ៉ាងស្រស់ស្អាតនៅក្នុងរាជធានីភ្នំពេញ។ នេះមិនត្រឹមតែជាជំហានច្នៃប្រឌិតថ្មីមួយនៃការអនុវត្តជាក់ស្តែងនៃអរិយធម៌ក្នុងយុគសម័យថ្មី "ការជំរុញវិបុលភាពខេត្តយូណាន និងភាពចម្រុះពណ៌នៃតំបន់ព្រំដែន" ចេញទៅក្រៅប្រទេសចិនប៉ុណ្ណោះទេ ប៉ុន្តែថែមទាំងជារូបភាពឆ្លុះបញ្ចាំងយ៉ាងរស់រវើកនៃការផ្លាស់ប្តូរ និងការរៀនសូត្រពីគ្នាទៅវិញទៅមករវាងអរិយធម៌ចិន និងកម្ពុជាផងដែរ៕

អ្នកយកព័ត៌មាន៖ Li Zha, Li Mengli