တရုတ်နိုင်ငံ၏ အကြီးဆုံး ကုန်းလမ်းအကောက်ခွန်ဂိတ်တွင် ယခုနှစ် ပထမနှစ်ဝက်အတွင်း တရုတ်-ဥရောပ ရထားလိုင်းများ၏ သွင်းကုန်ထုတ်ကုန်ပမာဏ တန်ချိန် ၁၀ သန်းကျော်လွန်

ဇွန်လ ၃၀ ရက်နေ့အထိ စာရင်းများအရ တရုတ်နိုင်ငံ၏ အကြီးဆုံး ကုန်းလမ်းအကောက်ခွန်ဂိတ်ဖြစ်သော မန်ကျိုးလီ (Manzhouli) ဂိတ်၏ သွင်းကုန်ထုတ်ကုန် ကုန်စည်သယ်ယူပို့ဆောင်ရေးပမာဏသည် တန်ချိန် ၁၀ သန်းကျော်လွန်ခဲ့ပြီး တန်ချိန် ၁၁.၃၀၈၆ သန်းအထိ ရောက်ရှိခဲ့ရာ ယခင်နှစ် ကာလတူထက် ၂.၇% တိုးတက်လာကြောင်း သိရသည်။ ဤကုန်စည်သယ်ယူပို့ဆောင်မှုပမာဏသည် တရုတ်နိုင်ငံ ရထားလမ်းအကောက်ခွန်ဂိတ်များအနက် ပထမနေရာတွင် ရပ်တည်နေသည်။ 

ထိရောက်မြန်ဆန်သော အကောက်ခွန်ရှင်းလင်းရေး လုပ်ငန်းစဉ်များ၏ နောက်ကွယ်တွင် ဘက်ပေါင်းစုံ ပူးပေါင်းဆောင်ရွက်ရေး ယန္တရားကို စဉ်ဆက်မပြတ် တိုးတက်ကောင်းမွန်အောင် ဆောင်ရွက်ခဲ့ခြင်းကြောင့် ဖြစ်သည်။ အကောက်ခွန်ဂိတ်သည် ရထားလမ်း၊ အကောက်ခွန်နှင့် လုပ်ငန်းရှင် သုံးပွင့်ဆိုင် ချိတ်ဆက်မှုကို မြှင့်တင်ပေးခဲ့ပြီး နိုင်ငံတကာ ကုန်စည်ပို့ဆောင်ရေး အကျိုးဆောင်လုပ်ငန်းများနှင့် တက်ကြွစွာ ချိတ်ဆက်ဆောင်ရွက်ကာ တရုတ်-ဥရောပ ရထားလိုင်းများ၏ အကောက်ခွန်ရှင်းလင်းရေး လုပ်ငန်းစဉ်အချိန်ကို ၂ နာရီအတွင်းသို့ လျှော့ချပေးနိုင်ခဲ့သဖြင့် နယ်စပ်ဖြတ်ကျော် ထောက်ပံ့ပို့ဆောင်ရေး (Logistics)  ကြာမြင့်ချိန်ကို ထိရောက်စွာ တိုတောင်းစေခဲ့သည်။ 

၂၀၁၃ ခုနှစ်တွင် ပထမဆုံးအကြိမ် ပြေးဆွဲခဲ့သည့် “စူးမန်အို (Suzhou-Manzhouli-Europe)” ရထားလိုင်းမှစ၍ လက်ရှိအချိန်အထိ မန်ကျိုးလီဂိတ်၏ ရထားလိုင်းလမ်းကြောင်းများကို ၂၁ လိုင်းအထိ တိုးချဲ့နိုင်ခဲ့ပြီး တစ်ရက်လျှင် ပျမ်းမျှ ရထားတွဲ ၁၆ တွဲ ဖြတ်သန်းပြေးဆွဲလျက်ရှိသည်။ အခြေခံအဆောက်အအုံဆိုင်ရာ ပြုပြင်မွမ်းမံမှုများနှင့် လုပ်ငန်းစဉ်များကို အကြိမ်ကြိမ် အကောင်းဆုံးဖြစ်အောင် အဆင့်မြှင့်တင်ခဲ့ပြီးနောက် ကွန်တိန်နာများ နေ့စဉ် လဲလှယ်တင်ဆောင်နိုင်မှု ပမာဏသည် နှစ်ဆတိုးလာခဲ့သည်။ ထို့အပြင် အသွားအပြန် ခရီးစဉ်များတွင် ကွန်တိန်နာများ ကုန်အပြည့် တင်ဆောင်နိုင်မှုနှုန်း (Return Load Rate) သည် ၁၀၀% တွင် အမြဲတစေ တည်ငြိမ်စွာ ရှိနေသဖြင့် တရုတ်-ရုရှားနှင့် ဥရောပ-အာရှ ကုန်သွယ်မှု ကူးလူးဆက်ဆံရေးအတွက် အားကောင်းသော မောင်းနှင်အားကို ဆက်လက်ပံ့ပိုးပေးလျက်ရှိသည်။