မြန်မာ့ကျောက်မျက်ရတနာပြပွဲနှင့်လေလံပွဲ ယူနန်သို့ ရောက်ရှိလာခဲ့ပြီး တရုတ်-မြန်မာကျောက်မျက်ရတနာစက်မှုလုပ်ငန်း ပူးပေါင်းဆောင်ရွက်မှု အဆင့်သစ်သို့ တက်လှမ်း

ဇူလိုင်လ ၂၂ ရက်နေ့မှ ၂၅ ရက်နေ့အထိ ပထမအကြိမ်မြောက် မြန်မာ့ကျောက်မျက်ရတနာ ပြပွဲနှင့်လေလံပွဲ (တရုတ်-ရွှေလီ) ကို ယူနန်ပြည်နယ် ရွှေလီမြို့ ကျယ်ဂေါင်နယ်စပ်ကုန်သွယ်ရေးဇုန်၌ ကျင်းပခဲ့ပါသည်။ ဤသည်မှာ နှစ်ပေါင်း ၆၀ ကျော် သမိုင်းကြောင်းရှိသည့် မြန်မာအစိုးရ၏ တရားဝင် ကျောက်မျက်ရတနာ ပြပွဲနှင့်လေလံပွဲ တရုတ်နိုင်ငံသို့ ပထမဆုံးအကြိမ် ရောက်ရှိလာခြင်းဖြစ်ပါသည်။

မြန်မာ့ကျောက်မျက်ရတနာပြပွဲနှင့် လေလံပွဲသည် မြန်မာအစိုးရ တရားဝင် စည်းရုံးကျင်းပသော ကျောက်စိမ်းရိုင်းများ တရားဝင်တင်ပို့ရောင်းချသည့် ကုန်သွယ်မှု ပလတ်ဖောင်းတစ်ခု ဖြစ်ပြီး ကမ္ဘာ့အဆင့်မြင့် ကျောက်စိမ်းရိုင်း ၉၀ ရာခိုင်နှုန်းကျော်သည် ယင်းပလတ်ဖောင်းမှတစ်ဆင့် ရောင်းချလျက်ရှိရာ လုပ်ငန်းနယ်ပယ်၏ ဈေးနှုန်းသတ်မှတ်မှု လမ်းညွှန်အဖြစ် တင်စားခေါ်ဝေါ်ကြပါသည်။ ယခုအကြိမ် ပြပွဲနှင့် လေလံပွဲသည် မြန်မာနိုင်ငံ နေပြည်တော်မှ ရွှေလီသို့ ပြောင်းရွှေ့လာခဲ့ခြင်းဖြစ်ပြီး “ဧည့်သည်ကွင်း”မှ“အိမ်ရှင်ကွင်း”ဆီသို့ ကူးပြောင်းမှုကို ဖော်ဆောင်နိုင်ခဲ့ပါသည်။

ရွှေလီတည်ရှိရာ တယ်ဟုန်ပြည်နယ်ခွဲသည် ရှေးယခင်ကတည်းက တရုတ်-မြန်မာ ကျောက်စိမ်းကုန်သွယ်ရေး၏ အရေးပါသော မြို့ကြီးတစ်မြို့ ဖြစ်ခဲ့ပြီး “အရှေ့တိုင်း ကျောက်မျက်ရတနာမြို့တော်”

ဟူသော အမည်ကောင်း ရရှိထားပါသည်။ ဒေသတွင်း၌ ကျောက်စိမ်းရိုင်းတင်သွင်းခြင်း၊ လေလံပွဲများကျင်းပခြင်း၊ ဒီဇိုင်းပုံဖော် ပြုပြင်မွမ်းမံခြင်းနှင့် တိုက်ရိုက်ထုတ်လွှင့်ရောင်းချခြင်းတို့ စုစည်းထားသည့် ပြည့်စုံသော စက်မှုကွင်းဆက်တစ်ခုကို ဖန်တီးထားပြီး မှတ်ပုံတင်ထားသော ကျောက်မျက်ရတနာ လုပ်ငန်းရှင် ၄၅၀၀၀ ကျော်၊ လုပ်ငန်းလုပ်ကိုင်သူ ၁ သိန်း ကျော် ရှိကာ ၂၀၂၅ ခုနှစ်တွင် ကျောက်မျက်ရတနာ တိုက်ရိုက်ထုတ်လွှင့် ရောင်းချမှုပမာဏမှာ တရုတ်ယွမ် ၁၁.၅၉ ဘီလီယံအထိ ရောက်ရှိခဲ့ပါသည်။

ယခုအကြိမ် ပြပွဲနှင့်လေလံပွဲ အလျင်အမြန်စတင်နိုင်ခဲ့ခြင်းမှာ ၂၀၂၆ ခုနှစ် ဖေဖော်ဝါရီလတွင် ယူနန်နှင့် မြန်မာ နှစ်ဖက်စလုံးက ပူးပေါင်းဆောင်ရွက်မှု နားလည်မှုစာချွန်လွှာ လက်မှတ်ရေးထိုးခဲ့ခြင်းကြောင့်ဖြစ်ပြီး လက်မှတ်ရေးထိုးသည့် အချိန်မှ ကျင်းပသည့် အချိန်အထိ ၅ လမျှသာ ကြာမြင့်ခဲ့ပါသည်။ ပြပွဲနှင့်လေလံပွဲတွင် မြန်မာနိုင်ငံမှ တိုက်ရိုက်ရရှိသော ကျောက်စိမ်းရိုင်းများ စုစည်းထားပြီး ပစ္စည်းအမျိုးအစား စုံလင်စွာ ပါဝင်ကာ တရုတ်တစ်နိုင်ငံလုံးရှိ ကျောက်မျက်ရတနာ ကုန်သည် ၄၆၀၀ ကျော် မှတ်ပုံတင်ခဲ့ပြီး လာရောက်ဝယ်ယူသူ ဦးရေ သောင်းကျော် ရှိခဲ့ပါသည်။ ပြပွဲနှင့်လေလံပွဲ တစ်ခုလုံးတွင် တရုတ်ယွမ်ငွေဖြင့်သာ ငွေရှင်းတွက်ချက်ခဲ့ပါသည်။

ထို့ပြင် မကြာသေးမီက ကျောက်မျက်ရတနာ စက်မှုလုပ်ငန်း ရင်းနှီးမြှုပ်နှံမှု ဖိတ်ခေါ်ပွဲနှင့် ပူးပေါင်းဆောင်ရွက်မှုနှီးနှောဖလှယ်ပွဲကိုလည်း ကျင်းပခဲ့ပါသည်။ အနာဂတ်တွင် နယ်စပ်ဖြတ်ကျော် သယ်ယူပို့ဆောင်ရေးလမ်းကြောင်းများကို ပိုမိုကောင်းမွန်အောင် ပြုပြင်ရန်၊ “ပြပွဲနှင့်လေလံပွဲ + နယ်စပ်ဖြတ်ကျော် အီးကောမတ်စ်” ပုံစံကို စမ်းသပ်ရှာဖွေရန်နှင့် ကျောက်မျက်ရတနာ ယဉ်ကျေးမှုပွဲတော်စသည့်လှုပ်ရှားမှုများကို ပုံမှန်ကျင်းပသွားရန် ကျွမ်းကျင်သူများက အကြံပြုထားပြီး ကျောက်မျက်ရတနာ ကုန်သွယ်မှုကို အခြေပြု၍ ရွှေလီ၏ နယ်စပ်စက်မှုလုပ်ငန်း ယှဉ်ပြိုင်စွမ်းအားကို ဘက်ပေါင်းစုံမှ မြှင့်တင်ရန် တွန်းအားပေးသွားမည် ဖြစ်ပါသည်။