លោក Xi Jinping ប្រធានរដ្ឋចិនជួបសន្ទនាជាមួយលោក Putin ប្រធានាធិបតីរុស្ស៊ី
ព្រឹកថ្ងៃទី ២០ ខែឧសភា លោក Xi Jinping ប្រធានរដ្ឋចិនបានជួបពិភាក្សាការងារជាមួយលោក Putin ប្រធានាធិបតីរុស្ស៊ីនៅទីក្រុងប៉េកាំង។ ប្រមុខរដ្ឋទាំងពីរបានឈានដល់គំនិតឯកភាពគ្នាស្តីពីការពន្យារ «សន្ធិសញ្ញាស្តីពីភាពជាអ្នកជិតខាងល្អនិងកិច្ចសហប្រតិបត្តិការមិត្តភាពរវាងចិននិងរុស្ស៊ី»។
លោក Xi Jinping បានលើកឡើងថា មូលហេតុដែលទំនាក់ទំនងរវាងចិននិងរុស្ស៊ីអាចឈានដល់កម្រិតខ្ពស់ដូចសព្វថ្ងៃគឺ ដោយសារតែយើងបានមានភាពក្លាហានក្នុងការពង្រឹងទំនុកចិត្តខាងនយោបាយទៅវិញទៅមកនិងធ្វើកិច្ចសម្របសម្រួលនិងសហការជាយុទ្ធសាស្ត្រ ព្រមទាំងគាំពារសច្ចយុត្តិធម៌។ បច្ចុប្បន្នស្ថានការណ៍អន្តរជាតិពោរពេញដោយភាពរង្គោះរង្កើនិងការច្របូកច្របល់ អនុត្តរភាពនិយមនិងឯកតោភាគីនិយមកំពុងរីករាលដាល ប៉ុន្តែការស្វែងរកសន្តិភាព ការអភិវឌ្ឍនិងការជំរុញកិច្ចសហប្រតិបត្តិការនៅតែជាឆន្ទៈរបស់ប្រជាជននិងជានិន្នាការទូទៅ។ ក្នុងនាមជាសមាជិកអចិន្ត្រៃយ៍នៃក្រុមប្រឹក្សាសន្តិសុខអង្គការសហប្រជាជាតិនិងជាប្រទេសធំនៅលើពិភពលោក ប្រទេសចិននិងរុស្ស៊ីគួរតែធ្វើកិច្ចសម្របសម្រួលនិងសហការជាយុទ្ធសាស្ត្រគ្រប់ជ្រុងជ្រោយដែលប្រកបដោយគុណភាពកាន់តែខ្ពស់ ដើម្បីជំរុញការអភិវឌ្ឍនិងការស្តារភាពរុងរឿងរៀងៗខ្លួន ព្រមទាំងជំរុញការកសាងប្រព័ន្ធអភិបាលកិច្ចសកលដែលកាន់តែយុត្តិធម៌និងសមហេតុផល ។
លោក Xi Jinping បានលើកឡើងថា ស្ថានការណ៍នៅមជ្ឈិមបូព៌ានិងតំបន់ឈូងសមុទ្រកំពុងស្ថិតក្នុងដំណាក់កាលគន្លឹះដែលផ្លាស់ប្តូរពីសង្គ្រាមទៅជាសន្តិភាព។ ការបញ្ចប់សង្គ្រាមទាំងស្រុងគឺជារឿងបន្ទាន់ ការធ្វើសង្គ្រាមឡើងវិញគឺមិនអាចទទួលយកបានទេ ហើយការប្រកាន់ខ្ជាប់នូវការចរចាគឺមានសារៈសំខាន់បំផុត។
ថ្លែងក្នុងកិច្ចជំនួប លោក Xi Jinping បានលើកឡើងថា ប៉ុន្មានឆ្នាំចុងក្រោយនេះ ប្រឈមមុខនឹងសភាពការណ៍អន្តរជាតិដ៏រង្គោះរង្គើ ចិននិងរុស្ស៊ីបានជំរុញការអភិវឌ្ឍទំនាក់ទំនងភាពជាដៃគូសម្របសម្រួលនិងសហការជាយុទ្ធសាស្ត្រគ្រប់ជ្រុងជ្រោយក្នុងយុគសម័យថ្មីជាបន្តបន្ទាប់ ទំនុកចិត្តខាងនយោបាយរវាងគ្នានិងគ្នាកាន់តែស៊ីជម្រៅ សហប្រតិបត្តិការក្នុងវិស័យសេដ្ឋកិច្ចនិងពាណិជ្ជកម្ម វិនិយោគ ថាមពល បច្ចេកវិទ្យា វប្បធម៌និងប្រជាជនជាដើម វិវឌ្ឍរីកចម្រើនជាបន្តបន្ទាប់ ការតភ្ជាប់គ្នារវាងប្រជាជននិងប្រជាជនក៏កាន់តែរឹងមាំ។ទំនាក់ទំនងចិននិងរុស្ស៊ីឈានដល់ដំណាក់កាលថ្មីដែលមានសមិទ្ធផលកាន់តែច្រើននិងការអភិវឌ្ឍកាន់តែលឿន។
លោក Xi Jinping បានគូសបញ្ជាក់បន្តថា ភាគីទាំងពីរគួរគាំពារយ៉ាងម៉ឺងម៉ាត់ចំពោះសណ្តាប់ធ្នាប់អន្តរជាតិក្រោយសង្គ្រាមលោកលើកទីពីរនិងកិត្យានុភាពនៃច្បាប់អន្តរជាតិ រួមសាមគ្គីជាមួយប្រទេសសកលខាងត្បូង ដើម្បីដឹកនាំការធ្វើកំណែទម្រង់ប្រព័ន្ធអភិបាលកិច្ចសកលឱ្យឆ្ពោះទៅរកទិសដៅត្រឹមត្រូវ។
ជាការឆ្លើយតប លោកPutin បានថ្លែងថា កិច្ចសហប្រតិបត្តិការរវាងរុស្ស៊ីនិងចិនជាកត្តាស្ថិរភាពដ៏សំខាន់ក្នុងបរិបទដែលស្ថានការណ៍អន្តរជាតិមានភាពរង្គោះរង្គើ។ ភាគីរុស្ស៊ីមានឆន្ទៈបន្តបង្កើនការសម្របសម្រួលនិងកិច្ចសហការពហុភាគីជាមួយចិន គាំទ្រចិនរៀបចំកិច្ចប្រជុំក្រៅផ្លូវការនៃមេដឹកនាំអង្គការ APEC រួមគ្នាគាំពារកិត្យានុភាពនៃអង្គការសហប្រជាជាតិ ផ្តួចផ្តើមនូវពិពិធកម្មអរិយធម៌ ដើម្បីជំរុញឱ្យសណ្តាប់ធ្នាប់អន្តរជាតិមានភាពកាន់តែយុត្តិធម៌ និងសមហេតុផល។
បន្ទាប់ពីកិច្ចជំនួប ប្រមុខរដ្ឋនៃប្រទេសទាំងពីរចិននិងរុស្ស៊ីបានអញ្ជើញជាសក្ខីភាពក្នុងពិធីចុះហត្ថលេខាលើឯកសារសហប្រតិបត្តិការចិន-រុស្ស៊ី និងជួបជាមួយអ្នកកាសែតជាតិនិងអន្តរជាតិ៕
