លំហូរអ្នកដំណើរឆ្លងដែនតាមផ្លូវរថភ្លើង ចិន-ឡាវ បង្កើតកំណត់ត្រាខ្ពស់ថ្មី ក្នុងខែដំបូងនៃរដូវកាលដឹកជញ្ជូនរដូវក្តៅ

នៅក្នុងរដូវក្តៅឆ្នាំនេះ ទេសចរណ៍ឆ្លងដែនតាមផ្លូវរថភ្លើង ចិន-ឡាវ កំពុងបន្តមានសន្ទុះកើនឡើងយ៉ាងខ្លាំង ហើយលំហូរអ្នកដំណើរនៅច្រកទ្វារព្រំដែនផ្លូវដែកម៉ូហាន រក្សាកម្រិតខ្ពស់ជាប្រចាំ។ ចាប់ពីថ្ងៃទី ១ ដល់ថ្ងៃទី ៣១ ខែកក្កដា ស្ថានីយត្រួតពិនិត្យព្រំដែនច្រកចេញចូលម៉ូហាន បានត្រួតពិនិត្យអ្នកដំណើរចេញចូលសរុបជាង ២៧,០០០ នាក់ មកពី ៥៩ ប្រទេសនិងតំបន់ជុំវិញពិភពលោក ដែលកើនឡើងជាង ៣៨% បើធៀបនឹងរយៈពេលដូចគ្នាកាលពីឆ្នាំមុន។ ចំនួនអ្នកដំណើរឆ្លងកាត់ច្រកទ្វារក្នុងមួយថ្ងៃខ្ពស់បំផុតបានលើសពី ១,០០០ នាក ដែលជាការបង្កើតកំណត់ត្រាថ្មីក្នុងប្រវត្តិសាស្ត្រ។

ចាប់តាំងពីការដឹកជញ្ជូនតាមផ្លូវរថភ្លើងក្នុងរដូវក្តៅត្រូវបានចាប់ផ្តើមនៅថ្ងៃទី ១ ខែកក្កដាមក រថភ្លើងដឹកអ្នកដំណើរអន្តរជាតិនៃផ្លូវរថភ្លើង ចិន-ឡាវ បានបើកបរ ចំនួន ៤ ជើងក្នុងមួយថ្ងៃ (ទៅមក) ដោយចំនួនកៅអីសម្រាប់អ្នកដំណើរឆ្លងដែនក្នុងមួយជើងត្រូវបានពង្រីកដល់ ៤២០ កៅអី ដែលធ្វើឱ្យការធ្វើដំណើរពីទីក្រុងគុនមីញទៅទីក្រុងវៀងច័ន្ទអាចចេញដំណើរនៅពេលព្រឹក និងទៅដល់នៅពេលល្ងាច។ ផ្លូវរថភ្លើងនេះបានភ្ជាប់ទីតាំងទេសចរណ៍និងវប្បធម៌ជាង ៥៦០ កន្លែងនៅតាមបណ្តោយផ្លូវ ហើយការជិះរថភ្លើងកម្សាន្តតាមតំបន់ឡានឆាង-មេគង្គ កំពុងក្លាយជាជម្រើសដ៏ពេញនិយមសម្រាប់ភ្ញៀវទេសចរជាតិនិងអន្តរជាតិ។

ដើម្បីឆ្លើយតបនឹងសម្ពាធនៃលំហូរអ្នកដំណើរជាសិស្សនិស្សិត លំហូរអ្នកទេសចរ និងលំហូរអ្នកធ្វើដំណើរទៅសួរសុខទុក្ខសាច់ញាតិ ដែលកើតឡើងក្នុងពេលដំណាលគ្នាក្នុងរដូវក្តៅនេះ ស្ថានីយត្រួតពិនិត្យព្រំដែនច្រកចេញចូលម៉ូហាន បានកែសម្រួលការរៀបចំកម្លាំងបំពេញភារកិច្ចយ៉ាងសកម្ម ដោយបានបើកច្រកពិសេសសម្រាប់សិស្សនិស្សិតបរទេស និងច្រកពិសេសសម្រាប់ក្រុមទេសចរ។ ជាមួយគ្នានេះដែរ ស្ថានីយបានដាក់ចេញនូវវិធានការសម្រួលភាពងាយស្រួលជាង ១០ ចំណុច រួមមាន៖ ការបែងចែកនិងតម្រង់ទិសអ្នកដំណើរតាមប្រភេទ ការកក់ការឆ្លងដែនជាមុនសម្រាប់ក្រុមទេសចរ ការបង្កើតច្រកពិសេសសម្រាប់ការលើកលែងទិដ្ឋាការឆ្លងកាត់រយៈពេល ២៤០ ម៉ោង និងការបង្កើតទីតាំងបំពេញប័ណ្ណចូលប្រទេសសម្រាប់ជនបរទេសនៅផ្នែកខាងមុខជាដើម។ ទន្ទឹមនឹងនេះ ស្ថានីយបានដាក់ឱ្យប្រើប្រាស់នូវឧបករណ៍បច្ចេកវិទ្យាទំនើបៗ ដូចជា តុផ្ទៀងផ្ទាត់ឆ្លាតវៃ និងម៉ាស៊ីនបកប្រែផ្ទាល់មាត់ពហុភាសា។ វិធានការទាំងនេះ បានកាត់បន្ថយរយៈពេលត្រួតពិនិត្យ និងអនុញ្ញាតឱ្យឆ្លងដែនរបស់សមត្ថកិច្ចព្រំដែនលើសពី ៣០% ហើយអត្រានៃការអនុញ្ញាតឱ្យឆ្លងដែនសម្រាប់អ្នកធ្វើដំណើរញឹកញាប់ ឈានដល់ ១០០%។

លោកស្រី ចាង មកពីក្រុងឆេងឌូ ខេត្តស៊ីឈួន បាននាំគ្រួសារសមាជិក ៤ នាក់ជិះរថភ្លើង ចិន-ឡាវ ធ្វើដំណើរទេសចរណ៍ឆ្លងដែន។ នាពេលរសៀល ថ្ងៃទី ៦ ខែសីហា នៅសាលច្រកទ្វារព្រំដែនផ្លូវដែកម៉ូហាន លោកស្រី ចាង មិនអាចលាក់បាំងអារម្មណ៍រំភើបចិត្តបានឡើយ៖ "ឆ្លៀតឱកាសវិស្សមកាលរដូវក្តៅ ខ្ញុំបាននាំកូនៗជិះរថភ្លើង ចិន-ឡាវ ទៅកម្សាន្តនៅប្រទេសឡាវ ការឆ្លងកាត់ច្រកទ្វារគឺលឿននិងងាយស្រួលណាស់ ហើយការកម្សាន្តតាមផ្លូវគឺសប្បាយរីករាយខ្លាំងណាស់"។

ក្នុងរយៈពេលប៉ុន្មានឆ្នាំចុងក្រោយនេះ ជាមួយនឹងប្រតិបត្តិការប្រកបដោយប្រសិទ្ធភាពខ្ពស់នៃផ្លូវរថភ្លើង ចិន-ឡាវ រួមផ្សំជាមួយនឹងការដាក់ឱ្យអនុវត្តគោលនយោបាយបន្ថែមជាបន្តបន្ទាប់ ដូចជា ការលើកលែងទិដ្ឋាការទៅវិញទៅមករវាងប្រទេសចិននិងប្រទេសពាក់ព័ន្ធ ការលើកលែងទិដ្ឋាការឯកតោភាគី ការលើកលែងទិដ្ឋាការឆ្លងកាត់ ២៤០ ម៉ោង និងការលើកលែងទិដ្ឋាការ ១៤៤ ម៉ោងសម្រាប់ក្រុមទេសចរអាស៊ានដែលចូលមកកាន់ មណ្ឌលស្វយ័តជនជាតិតៃ ស៊ីសាំងប៉ានណា ខេត្តយូនណាន កម្រិតនៃការសម្រួលទេសចរណ៍ចូលប្រទេសត្រូវបានលើកកម្ពស់យ៉ាងខ្លាំង។ ផលិតផលទេសចរណ៍ដូចជា បទពិសោធន៍វប្បធម៌ប្រពៃណី ការទស្សនាកម្សាន្តបើកបរយានយន្តដោយខ្លួនឯង និងការទេសចរណ៍ស៊ីជម្រៅស្វែងយល់ពីទំនៀមទម្លាប់ប្រពៃណីបន្តមានប្រជាប្រិយភាព ហើយប្រទេសចិនបានក្លាយជា "គោលដៅត្រូវតែទៅឱ្យបាន" នៅក្នុងចិត្តរបស់ភ្ញៀវទេសចរបរទេសកាន់តែច្រើនឡើងៗ។

"ការលើកលែងទិដ្ឋាការបូកផ្សំជាមួយនឹងការឆ្លងកាត់ច្រកទ្វារប្រកបដោយប្រសិទ្ធភាពខ្ពស់ ធ្វើឱ្យការធ្វើដំណើរឆ្លងដែនក្លាយជារឿងងាយស្រួលនិងរីករាយ។ ព្រៃភ្លៀងតំបន់ក្តៅ និងបរិយាកាសភូមិភាគព្រំដែននៅមណ្ឌលស្វយ័តជនជាតិតៃ ស៊ីសាំងប៉ានណា គឺពិតជាធ្វើឱ្យយើងចងចាំមិនអាចបំភ្លេចបាន"។ បន្ទាប់ពីបានឆ្លងដែនចូលប្រទេសចិនតាមផ្លូវរថភ្លើង ចិន-ឡាវ អ្នកទេសចរថៃឈ្មោះ លីនដា បានចាប់ផ្តើមដំណើរទេសចរណ៍ទទួលយកបទពិសោធន៍ស៊ីជម្រៅរយៈពេល ៤ ថ្ងៃនៅមណ្ឌលស្វយ័តជនជាតិតៃ ស៊ីសាំងប៉ានណា៕