တရုတ်နိုင်ငံ အသီးသီးတွင် ဆောင်းဦးအစ (Li Qiu) ရာသီချိန်ကို ကြိုဆို - ရိုးရာဓလေ့ ပွဲလမ်းသဘင်များက သီးနှံရိတ်သိမ်းချိန် မျှော်လင့်ချက်များကို လက်ဆင့်ကမ်း

၂၀၂၆ ခုနှစ် ဩဂုတ်လ ၇ ရက်နေ့တွင် တရုတ်နိုင်ငံသည် ၂၄ ရာသီချိန်စနစ်မှ ၁၃ ခုမြောက် ရာသီဥတုဖြစ်သော “ဆောင်းဦးအစ”(Li Qiu) သို့ ရောက်ရှိခဲ့ရာ၊ ဤသည်မှာ ဆောင်းဦးရာသီ၏ ပထမဆုံးသော ရာသီချိန်ဖြစ်ပြီး အရာခပ်သိမ်းတို့သည် စိမ်းလန်းစိုပြည်စွာ ကြီးထွားရာမှ ရင့်မှည့်ရိတ်သိမ်းရာဆီသို့ ကူးပြောင်းကြောင်း အမှတ်အသားပြုလိုက်ခြင်းဖြစ်ပါသည်။

သို့သော်လည်း “ဆောင်းဦးအစ”ရောက်ရှိခြင်းသည် ရာသီဥတုချက်ချင်း အေးမြသွားမည်ဟု မဆိုလိုပါ။ မိုးလေဝသစံနှုန်းများအရ ၅ ရက်ဆက်တိုက် ပျမ်းမျှအပူချိန် ၂၂ ဒီဂရီစင်တီဂရိတ်အောက် ရောက်ရှိမှသာ စစ်မှန်သော ဆောင်းဦးသို့ ရောက်ရှိသည်ဟု သတ်မှတ်သဖြင့် တရုတ်နိုင်ငံ ဒေသအများစုတွင် ပူပြင်းနေဆဲဖြစ်ရာ ပြည်သူများက အဆိုပါကာလကို “ဆောင်းဦးကျား” ပူပြင်းမှု မပြယ်သေးသည့် ကာလဟု တင်စား ခေါ်ဝေါ်ကြပါသည်။

“ဆောင်းဦးအစ”ကာလဝန်းကျင်တွင် တရုတ်နိုင်ငံအသီးသီး၌ ရိုးရာဓလေ့ထုံးစံများစွာ ရှိကြပါသည်။ တောင်ပိုင်းဒေသ အများအပြားတွင် “ဆောင်းဦးကို ကြိုဆိုခြင်း”ဆိုသည့် ဓလေ့ရှိကြပါသည်။ ဤဓလေ့၏ အဓိပ္ပာယ်မှာ နွေရာသီ၏ ကြွင်းကျန်သော ပူပြင်းခြောက်သွေ့မှုကို “ကိုက်ဖမ်းထားခြင်း”ဟူသော သင်္ကေတကို ဆောင်ပြီး ဖရဲသီး စားသုံးခြင်းဖြင့် နွေရာသီ၏ ပူပြင်းမှုကို နှုတ်ဆက်လိုက်ခြင်း ဖြစ်ပါသည်။ မြောက်ပိုင်းဒေသများတွင်မူ “ဆောင်းဦးအဆီပြင်ဖြည့်ခြင်း”အဖြစ် အသားပြုတ်နှင့် အခြားအရသာရှိသော အစားအစာများကို စားသုံးကြပြီး နွေရာသီတွင် ကုန်ခမ်းသွားသော ခန္ဓာကိုယ်စွမ်းအားများကို ဖြည့်ဆည်းကြပါသည်။ ဟူနန်၊ ကျန်းရှီး၊ အန်းဟွေး အစရှိသော တောင်တန်းဒေသများရှိ ရွာသူရွာသားများသည် ပြောင်းဖူး၊ ငရုတ်သီးစသော စိုက်ပျိုးသီးနှံများကို အိမ်ခေါင်မိုးများနှင့် ပြတင်းပေါက်များတွင် လှန်းထားကြရာ ရောင်စုံလင်းလက်သော သီးနှံရိတ်သိမ်းမှု ရှုခင်းများကို ဖြစ်ပေါ်စေပြီး ခရီးသွားအများအပြားကို လာရောက်ကြည့်ရှုရန် ဆွဲဆောင်လျက်ရှိပါသည်။

တောင်သူလယ်သမားများအတွက်မူ “ဆောင်းဦးအစ”သည် သီးနှံများ ကြီးထွားရန်အတွက် အလွန်အရေးကြီးသော ကာလဖြစ်ပြီး သင့်တော်သော မိုးရေချိန်သည် သီးနှံထွက်ရှိမှုကို တိုးတက်စေရန် ကူညီပေးပါသည်။“ဆောင်းဦးအစ”သည် သဘာဝတရားနှင့်အညီ ယှဉ်တွဲနေထိုင်ပြီး သီးနှံများအထွက်တိုးရန် မျှော်လင့်သည့် တရုတ်လူမျိုးတို့၏ လူနေမှု ရိုးရာဓလေ့များကို ဖော်ကျူးလျက်ရှိပါသည်။