វត្ថុបុរាណរបស់ប្រទេសកម្ពុជាទម្ងន់ ៣០ តោន បានដឹកជញ្ជូនទៅដល់ទីក្រុងណានជីង

កាលពីថ្ងៃទី ២៤ ខែឧសភា វេលាម៉ោង ៥ និង ៥០ នាទីទៀបភ្លឺ យន្តហោះដឹកទំនិញធុនធំប្រភេទ B777 របស់ក្រុមហ៊ុនអាកាសចរណ៍ Jinpeng Airlines បានចុះចតដោយរលូននៅព្រលានយន្តហោះអន្តរជាតិ Lukou ទីក្រុងណានជីង ជាមួយគ្នានេះដែរ វត្ថុបុរាណដ៏មានតម្លៃទម្ងន់ ៣០ តោន របស់សារមន្ទីរជាតិកម្ពុជា រួមមាន៖ ចម្លាក់ថ្ម វត្ថុធ្វើពីសំរឹទ្ធ និងវត្ថុធ្វើពីដីដុតជាដើម ត្រូវបានដឹកជញ្ជូនទៅដល់ទីក្រុងណានជីងដោយសុវត្ថិភាព។

វត្ថុបុរាណដែលបានដឹកទៅដល់ទីក្រុងណានជីងលើកនេះ គឺសុទ្ធសឹងតែមកពីសារមន្ទីរជាតិកម្ពុជា ដែលជាកេរដំណែលស្នូលនៃអារ្យធម៌សម័យអង្គរ រួមមានប្រភេទវត្ថុមានតម្លៃជាច្រើនដូចជា៖ ព្រះពុទ្ធបដិមា ចម្លាក់ថ្មដ៏ប្រណិត និងគ្រឿងបង្គុំស្ថាបត្យកម្មបុរាណជាដើម ហើយវត្ថុបុរាណកម្រិតរតនសម្បត្តិជាតិមួយចំនួន ត្រូវបាននាំយកមកដាក់តាំងពិព័រណ៍នៅក្នុងប្រទេសចិនជាលើកដំបូង។ វត្ថុបុរាណមួយបណ្តុំនេះ នឹងត្រូវដឹកជញ្ជូនបន្តទៅកាន់សារមន្ទីរខេត្តសានស៊ី ដើម្បីដាក់តាំងបង្ហាញនៅក្នុងពិព័រណ៍ពិសេសក្រោមប្រធានបទ «អង្គរ៖ រតនសម្បត្តិរាប់ពាន់ឆ្នាំនៃអាណាចក្រខ្មែរបុរាណ» ដែលនឹងប្រព្រឹត្តទៅចាប់ពីថ្ងៃទី ៥ ខែមិថុនា ដល់ថ្ងៃទី ៧ ខែតុលា ឆ្នាំ ២០២៦ ដើម្បីបង្ហាញយ៉ាងពេញលេញនូវអារ្យធម៌ដ៏រុងរឿងនៃអាណាចក្រខ្មែរ ចន្លោះសតវត្សរ៍ទី ៩ ដល់ទី ១៤៕