နိန့်ရှာ၊ ကူးယွမ်တွင် လွန်ခဲ့သော နှစ်ပေါင်း ၂၀၀၀ ကျော် စစ်ပြိုင်ခေတ် ချင်နိုင်ငံ၏ စိုက်ပျိုးသီးနှံအရက်ကို တူးဖော်တွေ့ရှိ

မကြာသေးမီက နိန့်ရှာဟွေးတိုင်းရင်းသားလူမျိုးကိုယ်ပိုင်အုပ်ချုပ်ခွင့်ရဒေသ၊ ရှန်းကျားပူ စစ်ပြိုင်ခေတ် ချင်လူမျိုး သင်္ချိုင်းမြေ၏ ရှေးဟောင်းသုတေသန လုပ်ငန်းတွင်  ကြီးမားသော ကျော်လွန်ထိုးဖောက်မှု ရရှိခဲ့သည်။ သုတေသန အဖွဲ့သည် နည်းပညာရပ်စုံ ပူးပေါင်းစစ်ဆေးမှုမှတစ်ဆင့် လွန်ခဲ့သော နှစ်ပေါင်း ၂၃၀၀ ကျော် စစ်ပြိုင်ခေတ် ချင်နိုင်ငံ၏ စိုက်ပျိုးသီးနှံအရက် လက်ကျန်များကို အောင်မြင်စွာ ခွဲခြားစိစစ်နိုင်ခဲ့ပြီး ၎င်း၏ တိကျသော ကုန်ကြမ်းနှင့် ချက်လုပ်သည့် နည်းပညာများကို ဖော်ထုတ်နိုင်ခဲ့သည်။ သက်ဆိုင်ရာ သုတေသန ရလဒ်များကို Journal of Archaeological Science: Reports တွင် ဖော်ပြခဲ့ပြီးဖြစ်သည်။

ရှန်းကျားပူသင်္ချိုင်းမြေသည် ကူးယွမ်မြို့၊ ယွမ်ကျိုးခရိုင်တွင် တည်ရှိပြီး စစ်ပြိုင်ခေတ် ချင်မဟာတံတိုင်းနှင့် ထိစပ်လျက်ရှိကာ စစ်ပြိုင်ခေတ် သင်္ချိုင်းပေါင်း ၁၈၃ ခုကို တူးဖော်ခဲ့သည်။ ရှေးဟောင်းသုတေသန ပညာရှင်များသည် ချင်ယဉ်ကျေးမှု၏  ဝိသေသလက္ခဏဖြစ်သော ကြေးဝါအိုးတစ်လုံးအတွင်းမှ နှစ်ပေါင်း ၂၀၀၀ ကျော် သက်တမ်းရှိ ရှေးဟောင်းအရည်လက်ကျန် ၃၇၄၀ မီလီလီတာကို ထုတ်ယူနိုင်ခဲ့သည်။ အဆိုပါ ကြေးဝါအိုးသည် အထည်အလိပ် အကန့်နှင့် သဘာဝရွှံ့စေး ပေါင်းစပ်ထားသော နှစ်ထပ်ပိတ်လေလုံစနစ်ကို အသုံးပြုထားသဖြင့် ပြင်ပညစ်ညမ်းမှုကို ကာကွယ်ပေးကာ အရက်ကို အငွေ့ပျံမှုနည်းပါးစွာဖြင့် အပြည့်အဝနီးပါး သိုလှောင်ထားနိုင်ခဲ့ရာ ယခုအချိန်အထိ တရုတ်နိုင်ငံတွင် ထုတ်ပြန်ထားသော ထိန်းသိမ်းမှု အပြည့်စုံဆုံးနှင့် သတင်းအချက်အလက် အကြွယ်ဝဆုံး စစ်ပြိုင်ခေတ် ချင်နိုင်ငံ၏ အရက်ဆိုင်ရာ ရှေးဟောင်းသုတေသန တွေ့ရှိမှု ဖြစ်သည်။

ရှေးဟောင်းအရက်၏ စူတြာနှင့် ချက်လုပ်နည်းကို တိကျစွာ ဖော်ထုတ်ရန်အတွက် နိန့်ရှာဒေသသည် သုတေသနအဖွဲ့များအား ဖိတ်ခေါ်၍ နမူနာများကို ဓာတ်ခွဲစစ်ဆေးမှုများ ပြုလုပ်ခဲ့ရာ အော်ဂန်းနစ်အက်ဆစ်များ၊ အမိုင်နိုအက်ဆစ်များနှင့် ကာဘိုဟိုက်ဒရိုက် စသည့် ဒြပ်ပေါင်း ၂၄ မျိုးကို တွေ့ရှိခဲ့ရသည်။ ထို့အပြင် အော်ဂန်းနစ်အက်ဆစ် ပါဝင်မှု ပုံစံသည် သဘာဝအတိုင်း ရင့်ကျက်အောင် ပြုလုပ်ထားသော အရက်ဝါ နှင့် ထပ်တူညီသဖြင့် အဆိုပါ အရည်မှာ စိုက်ပျိုးသီးနှံအရက် ဖြစ်ကြောင်း အတည်ပြုနိုင်ခဲ့သည်။

ယခု ရှေးဟောင်းသုတေသန ရလဒ်သည် ချင်လူမျိုးများသည် သီးနှံများဖြင့် တဆေးပြုလုပ်၍ အချဉ်ဖောက်သည့် နည်းပညာကို ကျွမ်းကျင်စွာ အသုံးပြုနိုင်ခဲ့ကြောင်း သက်သေပြနေပြီး စစ်ပြိုင်ခေတ် ချင်လူမျိုးများ၏ ချက်လုပ်မှုနည်းပညာ တိုးတက်မှုကို ထင်ဟပ်စေသည်။ ယခုတွေ့ရှိမှုသည် နိန့်ရှာဒေသ၏ စစ်ပြိုင်ခေတ် ချင်ကာလ အရက်ချက်လုပ်မှုဆိုင်ရာ သုတေသန ကွက်လပ်ကို ဖြည့်ဆည်းပေးခဲ့ရုံမျှမက တရုတ်နိုင်ငံ၏ ရှေးကျလှသော သီးနှံအရက်ချက်လုပ်မှု သမိုင်းကြောင်းကို သက်သေထူခဲ့ပြီး ရှေးခေတ် စိုက်ပျိုးရေး တိုးတက်မှု၊ အစားအသောက် ယဉ်ကျေးမှုနှင့် လက်မှုပညာ အပြောင်းအလဲများကို လေ့လာရန်အတွက်လည်း ရုပ်ဝတ္ထုအထောက်အထားသစ်တစ်ခု ဖြစ်လာခဲ့သည်။