ເລື່ອງລາວຂອງທ່ານສີຈິ້ນຜິງກ່ຽວກັບກອງປະຊຸມສອງສະພາ: “ການພັດທະນາກະສິກຳຕ້ອງພັດທະນາອຸດສາຫະກຳແນວພັນພືດໃຫ້ດີ”
“ມື້ນີ້ໄດ້ຂຶ້ນໜ້າຈໍໂທລະພາບແລ້ວເນາະ! ຂ້າພະເຈົ້າຈື່ຊື່ຂອງສະຫາຍແລ້ວ.”
ໃນໄລຍະກອງປະຊຸມສອງສະພາຂອງຈີນປີ2026ນີ້, ມື້ໜຶ່ງ, ຢູ່ຫ້ອງປະຊຸມການພິຈາລະນາຂອງຄະນະຜູ້ແທນແຂວງຈ່ຽງຊູໃນກອງປະຊຸມຄັ້ງທີ 4 ຂອງສະພາປະຊາຊົນແຫ່ງຊາດຈີນຊຸດທີ 14, ທ່ານ ກ່າວເຕີຢົງ ຜູ້ແທນປະຊາຊົນທີ່ມາຈາກສະຖາບັນຄົ້ນຄວ້າວິທະຍາສາດກະສິກຳເຂດຫຼີເຊ້ຍເຫີ ແຂວງຈ່ຽງຊູ ພໍເອີ່ຍປາກຈະປະກອບຄຳເຫັນ, ທ່ານ ສີຈິ້ນຜິງ ປະທານປະເທດຈີນກໍໄດ້ຈື່ລາວທັນທີ ເລີຍຖາມດ້ວຍຮອຍຍີ້ມແບບນັ້ນ.
ໃນການໃຫ້ສຳພາດລວມໝູ່ຂອງຜູ້ແທນປະຊາຊານຄັ້ງທຳອິດ ທີ່ຈັດຂຶ້ນໃນຕອນເຊົ້າມື້ດຽວກັນ, ທ່ານ ກ່າວເຕີຢົງ ໄດ້ແບ່ງປັນເລື່ອງລາວຂອງຕົນກ່ຽວກັບການຜ່ານຜ່າຂອດຍາກເພື່ອເພາະພັນເຂົ້າຫວີດໃນຕະຫຼອດໄລຍະ 30 ກວ່າປີຜ່ານມາ. ລາວເວົ້າວ່າ: “ການປັບປຸງແນວພັນພືດໃຫ້ມີຄຸນນະພາບດີຂຶ້ນແມ່ນດຳເນີນຕະຫຼອດໄປ, ເປົ້າໝາຍຂອງພວກເຮົາບໍ່ພຽງແຕ່ຢາກ ‘ກິນອີ່ມ’ ເທົ່ານັ້ນ, ຍິ່ງຢາກ ‘ກິນແນວດີ’ ແລະ ຍັງຢາກໃຫ້ຊາວນາປູກເຂົ້າມີຄວາມຫວັງນຳອີກ.”
ຢູ່ທີ່ປະຊຸມການພິຈາລະນາຂອງຄະນະຜູ້ແທນແຂວງຈ່ຽງຊູ, ທ່ານ ກ່າວເຕີຢົງ ໄດ້ລາຍງານໃຫ້ທ່ານ ສີຈິ້ນຜິງ ຊາບເຖິງຄວາມຄືບໜ້າດ້ານການບົ່ມເພາະແນວພັນ ທີ່ມີຜົນຜະລິດສູງ ແລະ ຕ້ານສັດຕູພືດ. ທ່ານ ສີຈິ້ນຜິງ ຟັງການລາຍງານແລ້ວໄດ້ຊີ້ນຳວ່າ: “ອຸດສາຫະກຳແນວພັນພືດແມ່ນສຳຄັນທີ່ສຸດ, ການພັດທະນາກະສິກຳຕ້ອງພັດທະນາອຸດສາຫະກຳແນວພັນພືດໃຫ້ດີ.”
ຄວາມໝັ້ນຄົງດ້ານສະບຽງອາຫານເປັນສິ່ງສຳຄັນຂອງຊາດຈີນ, ແນວພັນພືດແມ່ນພົວພັນເຖິງຄວາມໝັ້ນຄົງດ້ານສະບຽງອາຫານຂອງຄົນຈີນ. ທ່ານ ສີຈິ້ນຜິງ ເຄີຍເນັ້ນໜັກວ່າ: “ຄວາມທັນສະໄໝດ້ານກະສິກຳ, ແນວພັນພືດເປັນພື້ນຖານ, ຕ້ອງພັດທະນາອຸດສາຫະກຳແນວພັນພືດຂອງຊາດໃຫ້ດີ, ຍົກລະດັບຄວາມໝັ້ນຄົງດ້ານແຫຼ່ງແນວພັນພືດຂຶ້ນເປັນຍຸດທະສາດທີ່ຕິດພັນກັບຄວາມໝັ້ນຄົງຂອງຊາດ.”
ໃນເວລາເຂົ້າຮ່ວມການປະຊຸມຫາລືຮ່ວມຂອງສະມາຊິກວົງການຕ່າງໆ ຂອງສະພາປຶກສາການເມືອງປະຊາຊົນແຫ່ງຊາດຈີນ ໃນກອງປະຊຸມສອງສະພາ ປີ 2022, ທ່ານ ສີຈິ້ນຜິງ ໄດ້ຊີ້ໃຫ້ເຫັນວ່າ: “ທາງອອກພື້ນຖານໃນການແກ້ໄຂບັນຫາເຂົ້າກິນແມ່ນຢູ່ນຳວິທະຍາສາດເຕັກໂນໂລຊີ. ຄວາມໝັ້ນຄົງດ້ານແຫຼ່ງແນວພັນພືດພົວພັນເຖິງຄວາມໝັ້ນຄົງແຫ່ງຊາດ, ຕ້ອງຕັດສິນໃຈຢ່າງເດັດດ່ຽວພັດທະນາອຸດສາຫະກຳແນວພັນພືດຂອງປະເທດເຮົາໃຫ້ດີ, ບັນລຸການເພິ່ງຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງທາງດ້ານວິທະຍາສາດເຕັກໂນໂລຊີ ຂອງອຸດສາຫະກຳແນວພັນພືດ, ມີແຫຼ່ງແນວພັນພືດທີ່ເປັນເຈົ້າຕົນເອງ ແລະ ສາມາດຄວບຄຸມໄດ້.”
ຫຼັງຈາກນັ້ນເດືອນປາຍ, ທ່ານ ສີຈິ້ນຜິງ ໄດ້ເດີນທາງໄປເຄື່ອນໄຫວຢ້ຽມຢາມຢູ່ແຂວງໄຫຫຼຳ, ບ່ອນທຳອິດ ເພິ່ນໄດ້ເດີນທາງໄປເຖິງຫ້ອງທົດລອງແນວພັນພືດອ່າວຢາໂຈ່ວ ທີ່ຕັ້ງຢູ່ເຂດນິຄົມວິທະຍາສາດເຕັກໂນໂລຊີອ່າວຢາໂຈ່ວ ຂອງນະຄອນຊ່ານຢ້າ. ທ່ານກ່າວວ່າ: “ຂ້າພະເຈົ້າໄດ້ເອົາໃຈໃສ່ຕິດຕາມສູນຄົ້ນຄວ້າວິທະຍາສາດດ້ານການບົ່ມເພາະແນວພັນພືດນານຟານແຫ່ງຊາດມາໂດຍຕະຫຼອດ, ຕ້ອງເລັ່ງຊຸກຍູ້ການວາງແຜນຕາມຫຼັກວິທະຍາສາດ ເພື່ອສ້າງສູນຄົ້ນຄວ້າວິທະຍາສາດແຫ່ງນີ້ໃຫ້ເປັນ “ເຂດນິຄົມເຕັກນິກສູງ ຫຼື Silicon Valley ນານຟານ” ເພື່ອຮັບໃຊ້ທົ່ວປະເທດ.” “ສິ່ງນີ້ມີຄວາມໝາຍຍຸດທະສາດຕໍ່ການຫຼໍ່ລ້ຽງປະຊາຊາດຈີນ.”
ຈີນມີປະຊາກອນຫຼາຍກວ່າ 1,4 ຕື້ຄົນ, ຄວາມໝັ້ນຄົງດ້ານສະບຽງອາຫານຕ້ອງຮັບປະກັນດ້ວຍຕົນເອງ, ຖ້ວຍເຂົ້າຂອງຄົນຈີນຄວນໃສ່ສະບຽງອາຫານທີ່ຈີນຜະລິດເອງ. ທ່ານ ສີຈິ້ນຜິງ ໄດ້ຊີ້ໃຫ້ເຫັນຢ່າງເລິກເຊິ່ງວ່າ: “ມີພຽງແຕ່ກຳເອົາແນວພັນພືດຈີນໄວ້ໃນມືຂອງຕົນໃຫ້ແໜ້ນ, ຈີນຈິ່ງຈະສາມາດຈັບຖ້ວຍເຂົ້າໃຫ້ແໜ້ນໄດ້, ຈິ່ງຈະສາມາດບັນລຸຄວາມໝັ້ນຄົງດ້ານສະບຽງອາຫານໄດ້.”
ປີ 2024, ພາຍຫຼັງກອງປະຊຸມສອງສະພາຂອງຈີນຫາກໍ່ອັດລົງບໍ່ດົນ, ທ່ານ ສີຈິ້ນຜິງ ໄດ້ເດີນທາງໄປຢ້ຽມຢາມແຂວງຫູໜານ ໂດຍໄດ້ໄປເຖິງເຂດສາທິດກວມລວມການຜະລິດທັນຍາຫານຕາແສງເຊ້ເຈ່ຍພູ້ ນະຄອນສາງເຕີ ທີ່ກວມເນື້ອທີ່ປະມານ 700 ເຮັກຕາ ເພື່ອຮັບຮູ້ສະພາບການຊຸກຍູ້ການຫັນເປັນທັນສະໄໝດ້ານກະສິກຳຢ່າງມີຄຸນນະພາບສູງຂອງທ້ອງຖິ່ນດັ່ງກ່າວ ພ້ອມທັງປຶກສາຫາລືກັບຊາວກະສິກອນຜູ້ປູກເຂົ້າລາຍໃຫຍ່, ນັກວິຊາການເຕັກນິກກະສິກຳ ແລະ ພະນັກງານຂັ້ນຮາກຖານ ກ່ຽວກັບຕົ້ນທຶນ ແລະ ຜົນຜະລິດທັນຍາຫານ.
ທ່ານ ສີຈິ້ນຜິງ ເນັ້ນໜັກວ່າ: “ຕ້ອງສ້າງດິນນາທີ່ມີມາດຕະຖານສູງ, ຊຸກຍູ້ການດຳເນີນທຸລະກິດໃນຂະໜາດອັນເໝາະສົມ, ເພີ່ມທະວີການສະໜັບສະໜູນດ້ານນະໂຍບາຍແລະ ການນຳພາດ້ວຍການສາທິດ, ເພີ່ມຄວາມແຮງໃນການເຜີຍແຜ່ແນວພັນດີ, ກົນຈັກກະສິກຳທີ່ທັນສະໄໝ ແລະ ວິທີການປູກຝັງຕາມລັກວິທະຍາສາດ, ສຸມຄວາມພະຍາຍາມເຂົ້າໃນການປູກຝັງຢ່າງລະອຽດ, ຍົກສູງສະມັດຕະພາບ ແລະ ຄຸນນະພາບຂອງພືດພັນທັນຍາຫານຕື່ມອີກ, ເຮັດໃຫ້ການປູກພືດພັນທັນຍາຫານ ກໍສາມາດສ້າງຄວາມຮັ່ງມີໄດ້ເຊັ່ນກັນ, ເພື່ອດຶງດູດໃຫ້ຊາວກະສິກອນມີສ່ວນຮ່ວມ ໃນການພັດທະນາກະສິກຳທັນສະໄໝໃຫ້ຫຼາຍຂຶ້ນ, ເດີນຕາມເສັ້ນທາງຫັນເປັນທັນສະໄໝດ້ານກະສິກຳ ທີ່ມີສີສັນພິເສດຂອງຈີນຢ່າງໜັກແໜ້ນ”.
ໃນໄລຍະປະຕິບັດແຜນພັດທະນາເສດຖະກິດສັງຄົມແຫ່ງຊາດ 5 ປີ ຄັ້ງທີ 14, ຈີນໄດ້ຊຸກຍູ້ຂະບວນການຍົກສູງຂີດຄວາມສາມາດການຜະລິດສະບຽງອາຫານ 50 ລ້ານໂຕນຮອບໃໝ່ຢ່າງໜັກແໜ້ນ, ອອກແຮງຊຸກຍູ້ການສ້າງດິນນາທີ່ມີມາດຕະຖານສູງ, ລົງເລິກປະຕິບັດການເຄື່ອນໄຫວ ພັດທະນາອຸດສາຫະກຳແນວພັນພືດໃຫ້ຈະເລີນຮຸ່ງເຮືອງ, ຍົກສູງຄວາມສາມາດສັງລວມແຫ່ງການຜະລິດສະບຽງອາຫານຢ່າງຕໍ່ເນື່ອງ. ປີ 2025 ຜົນຜະລິດພັນຍາຫານຂອງທົ່ວປະເທດຈີນ ໄດ້ສ້າງສະຖິຕິສູງອີກຄັ້ງເປັນປະຫວັດສາດ ໂດຍສາມາດບັນລຸຫຼາຍກວ່າ 700 ລ້ານໂຕນຢ່າງໝັ້ນທ່ຽງ ເປັນເວລາສອງປີຕິດຕໍ່ກັນ. ຈີນໄດ້ສຳເລັດການສຳຫຼວດຊັບພະຍາກອນພັນທຸກຳຂອງຂະແໜງກະສິກຳໃນທົ່ວປະເທດ ທີ່ມີຂະໜາດໃຫຍ່ທີ່ສຸດ ແລະ ປົກຄຸມຂອບເຂດກວ້າງຂວາງທີ່ສຸດ ນັບແຕ່ປະເທດຈີນໃໝ່ສະຖາປະນາຂຶ້ນເປັນຕົ້ນມາ, ພ້ອມທັງໄດ້ສ້າງຄັງຊັບພະຍາກອນພັນທຸກຳແຫ່ງຊາດ ລະດັບແຖວໜ້າໃນສາກົນຈຳນວນສາມແຫ່ງຄື ພືດກະສິກຳ, ສັດລ້ຽງ ແລະ ຂະແໜງການປະມົງທາງທະເລ, ຍອດປະລິມານສະສົມຊັບພະຍາກອນພັນທຸກຳ ໄດ້ຂຶ້ນຄອງອັນດັບໜຶ່ງຂອງໂລກ.
ປີ 2026 ເປັນປີທຳອິດຂອງການປະຕິບັດແຜນພັດທະນາເສດຖະກິດສັງຄົມແຫ່ງຊາດ5 ປີ ຄັ້ງທີ 15 (2026-2030) ຂອງຈີນ, ການພັດທະນາວຽກງານກ່ຽວກັບຊົນນະບົດ ກະສິກຳ ແລະ ຊາວກະສິກອນໃຫ້ດີ ແມ່ນມີຄວາມສຳຄັນຫຼາຍທີ່ສຸດ. ເອກະສານໝາຍເລກໜຶ່ງຂອງສູນກາງຈີນປີນີ້ໄດ້ກຳນົດຢ່າງຈະແຈ້ງວ່າ: ລົງເລິກປະຕິບັດຂະບວນການພັດທະນາອຸດສາຫະກຳແນວພັນພືດໃຫ້ຈະເລີນຮຸ່ງເຮືອງ, ເລັ່ງຄັດເລືອກ, ບົ່ມເພາະ ແລະ ເຜີຍແຜ່ແນວພັນພືດທີ່ມີລັກສະນະບຸກທະລຸ, ຊຸກຍູ້ການບົ່ມເພາະແນວພັນຊີວະພາບໃຫ້ຫັນເປັນອຸດສາຫະກຳ.
ຄືດັ່ງທີ່ທ່ານ ສີຈິ້ນຜິງ ໄດ້ເນັ້ນໜັກວ່າ: “ມີພຽງແຕ່ກຳເອົາແນວພັນພືດຈີນໄວ້ໃນມືຂອງຕົນໃຫ້ແໜ້ນ, ຈີນຈິ່ງຈະສາມາດຈັບຖ້ວຍເຂົ້າໃຫ້ແໜ້ນໄດ້, ຈິ່ງຈະສາມາດບັນລຸຄວາມໝັ້ນຄົງດ້ານສະບຽງອາຫານໄດ້.”
ແຫຼ່ງຂ່າວຈາກ: CGTN