លោក Xi Jinping ៖ ពង្រីកឧត្តមភាពរបស់ខ្លួន ប្រកាន់ខ្ជាប់ការស្វែងរកការវិវឌ្ឍរីកចម្រើនប្រកបដោយភាពនឹងនរ ដើម្បីជំរុញឱ្យការអភិវឌ្ឍឧស្សាហកម្មអនាគតរបស់ចិនទទួលបានសមិទ្ធផលថ្មីឥតឈប់ឈរ
រសៀលថ្ងៃទី ៣០ ខែមករា ការិយាល័យនយោបាយនៃគណៈកម្មាធិការមជ្ឈិមបក្សកុម្មុយនីស្តចិន បានរៀបចំធ្វើកិច្ចប្រជុំសិក្សាជាក្រុមលើកទី២៤អំពីការរៀបចំចាត់ចែងប្រកបដោយចក្ខុវិស័យវែងឆ្ងាយនិងការអភិវឌ្ឍឧស្សាហកម្មអនាគត ។ ខណៈពេលធ្វើជាអធិបតីក្នុងកិច្ចប្រជុំសិក្សា លោក Xi Jinpingអគ្គលេខាធិការនៃគណៈកម្មាធិការមជ្ឈិមបក្សកុម្មុយនីស្តចិនបានគូសបញ្ជាក់ថា បដិវត្តន៍វិទ្យាសាស្ត្រនិងបច្ចេកវិទ្យានិងការធ្វើនវានុវត្តន៍ខាងឧស្សាហកម្មជុំថ្មីពន្លឿនជំហានទៅមុខ បានលេចចេញបច្ចេកទេសឈានមុខជាបន្តបន្ទាប់ ដែលបានណែនាំនិងគាំទ្រឱ្យឧស្សាហកម្មអនាគតងើបឡើងវិញយ៉ាងឆាប់រហ័ស ។ យើងត្រូវឈរលើមុំនៃយុទ្ធសាស្ត្រស្តីពីការជំរុញកិច្ចកសាងប្រទេសខ្លាំងក្លា និងបុព្វហេតុនៃការស្តារភាពរុងរឿងរបស់ប្រជាជាតិចិន ពឹងផ្អែកលើលក្ខខណ្ឌសត្យានុម័ត ពង្រីកឧត្តមភាពរបស់ខ្លួន ប្រកាន់ខ្ជាប់ការស្វែងរកការវិវឌ្ឍរីកចម្រើនប្រកបដោយភាពនឹងនរ និងការពូនជ្រំជាលំដាប់ ដើម្បីជំរុញឱ្យការអភិវឌ្ឍឧស្សាហកម្មអនាគតរបស់ចិនទទួលបានសមិទ្ធផលថ្មីឥតឈប់ឈរ។
លោក Xi Jinping បានលើកឡើងថា ការពូនជ្រំនិងអភិវឌ្ឍឧស្សាហកម្មអនាគត គឺមានសារសំខាន់ណាស់ចំពោះការចាប់យកចំណុចកំពូលនៃបច្ចេកវិទ្យានិងឧស្សាហកម្មនិងក្តាប់ជាប់សិទ្ធិម្ចាស់ការក្នុងការអភិវឌ្ឍ ការអភិវឌ្ឍកម្លាំងផលិតកម្មគុណភាពថ្មីនិងកសាងប្រព័ន្ធឧស្សាហកម្មទំនើប ក៏ដូចជាការលើកកម្ពស់កម្រិតជីវភាពរស់នៅរបស់ប្រជាជននិងជំរុញការអភិវឌ្ឍដោយគ្រប់ជ្រុងជ្រោយរបស់មនុស្ស និងវឌ្ឍនភាពដោយគ្រប់ជ្រុងជ្រោយរបស់សង្គម ។ ប៉ុន្មានឆ្នាំកន្លងទៅនេះ មជ្ឈិមបក្សកុម្មុយនីស្តចិនយកចិត្តទុកដាក់ខ្ពស់ និងផ្តល់ការគាំទ្រខាងគោលនយោបាយយ៉ាងខ្លាំង ដើម្បីជំរុញឱ្យការអភិវឌ្ឍឧស្សាហកម្មអនាគតមាននិន្នាការដ៏ល្អប្រសើរ ។ កម្មាភិបាលនិងអ្នកដឹកនាំគ្រប់ជាន់ថ្នាក់ត្រូវបង្កើនការសៀនសូត្រចំណេះដឹងអំពីវិទ្យាសាស្ត្រនិងបច្ចេកវិទ្យាឈានមុខ ខិតខំប្រឹងប្រែងដើម្បីយល់ដឹងពីវិទ្យាសាស្ត្រនិងបច្ចេកវិទ្យា យល់ដឹងពីឧស្សាហកម្ម និងប៉ិនប្រសប់ធ្វើសេចក្តីសម្រេចចិត្ត៕