ຝາກເວລາໄວ້ກັບ ''ທະນາຄານ''
ຖ້າມີ “ທະນາຄານ” ແຫ່ງໜຶ່ງ, ໃນເວລາທ່ານຝາກເວລາໄວ້ກັບທະນາຄານໃນຕອນທ່ານເປັນໄວໜຸ່ມ, ທ່ານສາມາດແລກປ່ຽນການບໍລິການລ້ຽງດູໃນເວລາທ່ານເຖົ້າແລ້ວ, ທ່ານຈະເຫັນດີບໍ?
ໃນຊຸມປີຜ່ານມາ, ຢູ່ຫຼາຍຕົວເມືອງຂອງຈີນ ເຊັ່ນ: ນະຄອນຫຼວງປັກກິ່ງ, ນະຄອນານກິງ (Nanjing), ນະຄອນຊິງຕາວ (Chengdu) ແລະ ນະຄອນເສິງຕູ່ ເປັນຕົ້ນ ໄດ້ພາກັນຕັ້ງໜ້າຄົ້ນຄວ້າຮູບການບໍລິການລ້ຽງດູຜູ້ເຖົ້າແບບຊ່ວຍເຫຼືອເຊິ່ງກັນ ແລະ ກັນ, ນັ້ນກໍຄື: ການສະສົມເວລາໃນໄລຍະອາຍຸຍັງໜຸ່ມ ແລະ ຮັບການບໍລິການໃນໄລຍະອາຍຸສູງ. ໃນການຄົ້ນຄວ້າຂອງຕົວເມືອງຕ່າງໆ, ຮູບການ “ທະນາຄານເວລາ” ໃໝ່ໄດ້ປະກົດຕົວຂຶ້ນເລື້ອຍໆ, ເນື້ອໃນການບໍລິການກໍໄດ້ຈາກ “ຜູ້ເຖົ້າອາຍຸຕ່ຳ ບໍລິການຜູ້ເຖົ້າອາຍຸສູງ” ຂະຫຍາຍໄປເຖິງການລ້ຽງດູຜູ້ເຖົ້າທີ່ມີ “ທຸກຄົນຄົນເຂົ້າຮ່ວມ” ແລະ ການບໍລິການອາສາສະໝັກໃນຄຸ້ມຊຸມຊົນ.
ແລກປ່ຽນການບໍລິການໃນອະນາຄົດດ້ວຍເວລາປັດຈຸບັນ
ວັນທີ 11 ກຸມພາຜ່ານມານີ້, ໃນຫ້ອງກິດຈະກຳຂອງຄຸ້ມຊຸມຊົນຊຽງຮວາສຽວ ເຂດຖະໜົນຊິນຮວາລູເມືອງສາງໜິງ ນະຄອນຊຽງໄຮ້, ພາຍໃຕ້ການຊ່ວຍເຫຼືອຂອງ ສຽວວາງ ອາສາສະໝັກ, “ເດັກເຖົ້າ” 5 ຄົນ ໄດ້ພັບໂຄມໄຟເຈ້ຍຢ່າງເອົາຈິງເອົາຈັງ. ໃນທີ່ສຸດ, ແຕ່ລະຄົນໄດ້ເຮັດໂຄມໄຟເຈ້ຍມີສີ 2 ອັນ, ພວກເພິ່ນໄດ້ແຊກັນ, ມີບັນຍາກາດມ່ວນຊື່ນເປັນພິເສດ.
ສຽວວາງ ແມ່ນແມ່ເຖົ້າວາງລິງຊິວ (Wang Lingqiu), ປີນີ້ອາຍຸ 57 ປີ, ບ້ານຂອງລາວ ຕັ້ງຢູ່ໃນຄຸ້ມຊຸມຊົນຊຽງຮວາສຽວ. ພາຍຫຼັງແມ່ເຖົ້າໄດ້ອອກກິນເບ້ຍບຳນານ ຈາກການບໍລິການຜູ້ເຖົ້າໃນເວລາແມ່ເຖົ້າມີອາຍຸ 55 ປີ, ພໍດີແມ່ເຖົ້າ ມີໂອກາດມາເປັນອາສາສະໝັກໃນສູນບໍລິການຈື້ຄາງເມືອງສາງໜິງ ແລະ ເລີ່ມເຂົ້າຮ່ວມໂຄງການ “ທະນາຄານເວລາ” ຂອງເມືອງສາງໜິງ ນັບແຕ່ເດືອນສິງຫາປີຜ່ານມາ.
ເມື່ອກົດເຂົ້າແອັບ “ທະນາຄານເວລາ” ໃນໂທລະສັບມືຖືຂອງແມ່ເຖົ້າ ວາງລິງຊິວ, ໃນບັນຊີຂອງແມ່ເຖົ້າ ໄດ້ບັນທຶກວ່າ: ນັບແຕ່ເດືອນສິງຫາປີຜ່ານມາຫາເດືອນມັງກອນປີນີ້, ໄດ້ສະສົມຫຼຽນເວລາ 238 ຫຼຽນ ນັ້ນໝາຍຄວາມວ່າ ແມ່ເຖົ້າວາງລິງຊິວ ໄດ້ໃຫ້ບໍລິການ 238 ຊົ່ວໂມງ ແກ່ຜູ້ເຖົ້າອາຍຸສູງທີ່ຢູ່ຜູ້ດຽວໃນຄຸ້ມຊຸມຊົນຊຽງຮວາສຽວ ແລະ ເຂດໃກ້ຄຽງ.
ຕາມທຳມະດາແລ້ວ, ເວລາບໍລິການຂອງແມ່ເຖົ້າວາງລິງຊິວ ແມ່ນ 5 ຫາ 8 ຊົ່ວໂມງຕໍ່ມື້ ແລະ ບໍລິການໃຫ້ 5 ຫາ 6 ຄອບຄົວ. ຕອນຄ່ຳຂອງມື້ກ່ອນ, ແມ່ເຖົ້າຈະຕິດຕໍ່ຫາຜູ້ເຖົ້າທັງຫຼາຍ ໂດຍຜ່ານໂທລະສັບ ຫຼື ວິແຊັດ ເພື່ອຊອກຮູ້ຄວາມຕ້ອງການຂອງຜູ້ເຖົ້າທັງຫຼາຍ.
“ຫຼຽນເວລາ” ຈະຄິດໄລ່ຕໍ່ເດືອນ, ທຸກເທື່ອທີ່ແມ່ເຖົ້າເບິ່ງໂຕເລກໃນບັນຊີຂອງຕົນ, ກໍຮູ້ສຶກດີໃຈ ແລະ ພູມໃຈຫຼາຍ. ແມ່ເຖົ້າ ວາງລິງຊິວ ກ່າວວ່າ: ທຸກຄົນຈະຕ້ອງເຖົ້າ, ມີຄວາມຮັບປະກັນໃນເວລາເຖົ້າ, ຈະຮູ້ສຶກໝັ້ນໃຈກວ່າ.
ມີການຊ່ວຍເຫຼືອທາງດ້ານວັດຖຸ ແລະ ກໍມີການແລກປ່ຽນທາງດ້ານຈິດໃຈ
ຮູບການບໍລິການລ້ຽງດູຜູ້ເຖົ້າ ແບບຊ່ວຍເຫຼືອເຊິ່ງກັນ ແລະ ກັນ ທີ່ເອີ້ນວ່າ: “ທະນາຄານເວລາ” ບໍ່ພຽງແຕ່ໄດ້ຫຼຸດຄວາມກົດດັນຂອງລູກຫຼານໃນການລ້ຽງດູຜູ້ເຖົ້າໃຫ້ຕ່ຳລົງເທົ່ານັ້ນ, ຫາກຍັງສາມາດຍົກຄຸນນະພາບຊີວິດຂອງຜູ້ເຖົ້າໃຫ້ສູງຂຶ້ນ ແລະ ເຮັດໃຫ້ຄອບຄົວມີຄວາມສຸກຫຼາຍກວ່າເກົ່າອີກດ້ວຍ. ລາວລິນ ທີ່ອາໃສຢູ່ນະຄອນຝູຕິງ (Fuding) ແຂວງຝູຈ້ຽນ ກໍເປັນຜູ້ໄດ້ຮັບຜົນປະໂຫຍດ ຈາກການບໍລິການລ້ຽງດູຜູ້ເຖົ້າແບບຊ່ວຍເຫຼືອເຊິ່ງກັນ ແລະ ກັນ.
ພໍ່ແມ່ຂອງລາວລິນ ມີອາຍຸສູງແລ້ວ, ຕ້ອງມີຄົນເບິ່ງແຍງດູແລ. ແຕ່ວ່າ ລາວລິນ ຄົນດຽວເບິ່ງແຍງພໍ່ແມ່ 2 ຄົນຍາກຫຼາຍ,ໂດຍສະເພາະ ແມ່ນໃນເວລາ ລາວລິນ ພາພໍ່ໄປໂຮງໝໍ, ຈະບໍ່ມີຄົນເບິ່ງແຍງແມ່ຢູ່ເຮືອນ.
ໃນຄັ້ງໜຶ່ງ,ເຈົ້າໜ້າທີ່ທີ່ກ່ຽວຂ້ອງໄດ້ແນະນຳ “ທະນາຄານເວລາ” ໃຫ້ແກ່ລາວ ທັງກ່າວວ່າ: ຄຸ້ມຊຸມຊົນຂອງລາວລິນ ກໍມີການບໍລິການດັ່ງກ່າວ. ລາວລິນເລີຍໄດ້ທົດລອງສັ່ງຈອງການບໍລິການເບິ່ງແຍງແມ່ ໂດຍຜ່ານທາງຄຸ້ມຊຸມຊົນ. 8 ໂມງເຊົ້າຂອງມື້ທີ 2, ລາວລິນ ໄດ້ພົບເອື້ອຍວາງ ທີ່ເປັນອາສາສະໝັກໃນຄັ້ງນີ້. ພາຍຫຼັງຍ່າງເຂົ້າເຮືອນ, ເອື້ອຍວາງ ໄດ້ທັກທາຍສະບາຍດີນຳພໍ່ແມ່ຂອງລາວລິນ ແລະ ກ່າວວ່າ: ຈະພະຍາຍາມເບິ່ງແຍງດູແລແມ່ ຂອງລາວລິນ ໃຫ້ດີ. ລາວລິນ ເລີຍພາພໍ່ໄປໂຮງໝໍ.
ຕອນທ່ຽງ, ພາຍຫຼັງລາວລິນ ກັບມາແລ້ວ, ເຫັນເອື້ອຍວາງ ແລະ ແມ່ຂອງຕົນ ໄດ້ເບິ່ງຮູບຖ່າຍເກົ່ານຳກັນ ແລະ ລົມກັນເປັນຢ່າງດີ. ພາຍຫຼັງການບໍລິການເບິ່ງແຍງສິ້ນສຸດລົງແລ້ວ, ລາວລິນ ແລະ ເອື້ອຍວາງ ໄດ້ຢືນຢັນເວລາການບໍລິການ ແລະ ສົ່ງຂໍ້ມູນຄືນໃຫ້ຄຸ້ມຊຸມຊົນ. ຕາມຂ່າວແຈ້ງວ່າ: ນະຄອນຝູຕິງ ຍັງມີຫຼາຍຄຸ້ມຊຸມຊົນ ໄດ້ມີການບໍລິການລ້ຽງດູຜູ້ເຖົ້າແບບຊ່ວຍເຫຼືອເຊິ່ງກັນ ແລະ ກັນ ແບບນີ້ຫຼາຍແຫ່ງ.
ຄຽງຄູ່ກັບ “ທະນາຄານເວລາ” ໄດ້ຂະຫຍາຍຕົວລົງສູ່ລວງເລິກ, ຜູ້ເຖົ້າທັງຫຼາຍ ຈະບໍ່ພຽງແຕ່ຕ້ອງການຄວາມຊ່ວຍເຫຼືອທາງດ້ານວັດຖຸແບບງ່າຍດາຍເທົ່ານັ້ນ, ຫາກຍັງຕ້ອງການເບິ່ງແຍງດູແລທາງດ້ານຈິດໃຈອີກດ້ວຍ ເຊັ່ນ: ຫາຄູ່ຫຼິ້ນລູກໝາກເສິກນຳກັນ, ຫຼິ້ນໄພ້ນົກກະຈອກນຳກັນ ຫຼື ໄປເບິ່ງຮູບເງົານຳກັນເປັນຕົ້ນ. ຍັງມີບາງຄົນຫວັງວ່າ: ຈະຈັດວາງເສັ້ນທາງທ່ອງທ່ຽວເປັນການສະເພາະ. ນາງ ສືຊິ້ວລຽນ ຜູ້ຮັບຜິດຊອບ “ທະນາຄານເວລາ” ຂອງນະຄອນນານກິງ ເວົ້າວ່າ: “ຄວາມສຸກທີ່ແທ້ຈິງ ບໍ່ພຽງແຕ່ຕອບສະໜອງຄວາມຕ້ອງການດ້ານວັດຖຸເທົ່ານັ້ນ, ການຕອບສະໜອງຄວາມຕ້ອງການທາງດ້ານຈິດໃຈຈະສຳຄັນກວ່າ.”
“ທະນາຄານເວລາ” ຍັງມີໜ້າທີ່ໜັກໜາໃນອະນາຄົດ
ເອື້ອຍຫຼີ ຢູ່ນະຄອນນານກິງ ໃກ້ຈະມີອາຍຸ 60 ປີແລ້ວ, ບັນຊີເວລາຊ່ວຍເຫຼືອເຊິ່ງກັນແລະ ກັນ ຂອງເອື້ອຍຫຼີ ໄດ້ສະສົມເວລາບໍລິການຫຼາຍຮ້ອຍຊົ່ວໂມງແລ້ວ. ອີງຕາມລະບຽບການທີ່ກ່ຽວຂ້ອງຂອງນະຄອນນານກິງ, ເອື້ອຍ ສາມາດໂອນເວລາບໍລິການໃຫ້ຍາດພີ່ນ້ອງຄີງໄດ້, ແຕ່ຍ້ອນວ່າພໍ່ແມ່ຂອງເອື້ອຍ ບໍ່ຢູ່ນະຄອນນານກິງ, ຈະໂອນເວລາໃຫ້ພໍ່ແມ່ບໍ່ໄດ້. ປັດຈຸບັນ, ຈີນຍັງບໍ່ທັນໄດ້ສ້າງເປັນ “ທະນາຄານເວລາ” ທີ່ເປັນເອກະພາບກັນ.
ທ່ານ ເສິນກຸ່ງ (Chen Gong) ຫົວໜ້າສະຖາບັນຄົ້ນຄວ້າປະຊາກອນມະຫາວິທະຍາໄລປັກກິ່ງ ທັງເປັນຫົວໜ້າສະຖາບັນຄົ້ນຄວ້າຜູ້ເຖົ້າ ກ່າວວ່າ: “ທະນາຄານເວລາ” ເປັນຮູບການຊ່ວຍເຫຼືອເຊິ່ງກັນແລະກັນ ໃນຄຸ້ມຊຸມຊົນ ທີ່ແລກປ່ຽນເວລາ ແລະ ສ້າງຜົນປະໂຫຍດເຊິ່ງກັນ ແລະ ກັນ ລະຫວ່າງ ອາສາສະໝັກ, ຕ້ອງອີງໃສ່ຄວາມໄວ້ເນື້ອເຊື່ອໃຈກັນ ແລະ ການຮ່ວມມືກັນ ລະຫວ່າງສະມາຊິກຄຸ້ມຊຸມຊົນ. ນອກນີ້, ການຮັບປະກັນຄຸນນະພາບຂອງການບໍລິການ ແມ່ນບັນຫາສຳຄັນທີ່ເປັນຂໍກະແຈ ທີ່ເຮັດໃຫ້ “ທະນາຄານເວລາ” ພັດທະນາເປັນແບບສະບັບແລະ ໄປຕາມທິດທາງມືອາຊີບ.ເພື່ອເລື່ອງນີ້, ທ່ານ ເສິນກຸ່ງ ໄດ້ວາງຂໍ້ສະເໜີ 5 ຂໍ້ຄື: ໜຶ່ງ,ມ້າງກຳແພງດ້ານຊັບພະຍາກອນ ເພື່ອຄົ້ນຄວ້າສະຫະພັນທະນາຄານເວລາ ລັກສະນະທົ່ວປະເທດ. ສອງ, ແມ່ນກຳນົດພາລະບົດບາດ ແລະ ເພີ່ມທະວີການໂຄສະນາເຜີຍແຜ່ຄຸນຄ່າຂອງທະນາຄານເວລາ. ສາມ, ປັບປຸງກົດໝາຍກົດລະບຽບທີ່ກ່ຽວຂ້ອງ ໃຫ້ສົມບູນຂຶ້ນ ເພື່ອວາງນະໂຍບາຍຊຸກຍູ້ການພັດທະນາ. ສີ່, ເຮັດໃຫ້ກົນໄກປະຕິບັດງານເປັນແບບສະບັບກວ່າເກົ່າ ແລະ ຊຸກຍູ້ການພັດທະນາແບບມາດຕະຖານ. ຫ້າ, ເພີ່ມທະວີການນຳໃຊ້ເຕັກນິກທີ່ກ່ຽວຂ້ອງ ເພື່ອຍົກປະສິດທິພາບໃນການຈັດສັນຊັບພະຍາກອນໃຫ້ສູງຂຶ້ນ.
ປັດຈຸບັນ, ຫຼາຍທ້ອງຖິ່ນຂອງຈີນ ພວມຄົ້ນຄວ້າ “ທະນາຄານເວລາ” ລ້ຽງດູຜູ້ເຖົ້າ. ນະຄອນນານກິງ ແລະ ນະຄອນຊິງຕາວ ຈະສະສົມເວລາຢູ່ຕາມບັດຊາວເມືອງ ຫຼື ບັດປະກັນສັງຄົມ; ນະຄອນຫຼວງປັກກິ່ງ, ນະຄອນຊຽໄຮ້ ແລະ ນະຄອນເສິງຕູ່ ຈະສະສົມເວລາ 1 ຊົ່ວໂມງ ເປັນຫຼຽນເວລາ 1 ຫຼຽນ; ນະຄອນຈ່າງເຈ່ຍກາງ ຈະສາມາດແລກປ່ຽນເອົາຫຼຽນເວລາທີ່ຕ່າງກັນຕໍ່ທຸກຊົ່ວໂມງ ໂດຍອີງຕາມລັກສະນະການບໍລິການ; ນະຄອນສາງໂຈ່ວ ໄດ້ສະສົມເວລາເປັນຄະແນນ… ທ້ອງຖິ່ນຕ່າງໆຂອງຈີນ ໄດ້ຜ່ານຈາກຮູບແບບຕ່າງໆເຊັ່ນ: ອົງການປົກຄອງທ້ອງຖິ່ນຊີ້ນຳ-ນຳພາ,ໃຊ້ວິທີທາງເຕັກນິກ, ປະຕິບັດກົນໄກປະກັນໄພ ແລະ ໃຫ້ທາງຄຸ້ມຊຸມຊົນເຂົ້າຮ່ວມເປັນຕົ້ນເພື່ອເຮັດໃຫ້ການບໍລິການເປັນແບບສະບັບກວ່າເກົ່າ ແລະ ມີຄວາມໄວ້ເນື້ອເຊື່ອໃຈກວ່າເກົ່າເຊິ່ງໄດ້ເປັນສິ່ງຄ້ຳປະກັນທີ່ແຂງແຮງໃຫ້ແກ່ການພັດທະນາແບບຍືນຍົງຂອງ “ທະນາຄານເວລາ”.