ມີຊາວບ້ານໃໝ່ມາພັກເຊົາຢູ່ບ້ານເຮົາ
ໃນຊຸມປີຜ່ານມາ, ຄຳສັບທີ່ວ່າ “ພັກເຊົາຢູ່ຢຸນນານ” ໄດ້ຮັບຄວາມນິຍົມຊົມຊອບຈາກນັກທ່ອງທ່ຽວຈີນເປັນພິເສດ. ບ້ານຖູກວາຊົງ ຄຸ້ມຢາງກວນຖຽນ ເມືອງມາລົງ ແຂວງຢຸນນານ ມີຊື່ສຽງໃນທາງອິນເຕີເນັດ ຍ້ອນ “ການພັກເຊົາຢູ່ຊົນນະບົດ” ເຊິ່ງໄດ້ດຶງດູດ “ຊາວບ້ານໃໝ່” ມາພັກເຊົາຢູ່ບ້ານນີ້ເປັນຈຳນວນຫຼວງຫຼາຍ ໄດ້ກາຍເປັນສະຖານທີ່ພັກຜ່ອນຢ່ອນໃຈ ແລະ ສຳຜັດຊີວິດຊົນນະບົດໃຫ້ແກ່ນັກທ່ອງທ່ຽວທັງຫຼາຍ. ມີ “ຊາວບ້ານໃໝ່” ມາພັກເຊົາຢູ່ໃນບ້ານ, ບ້ານຖູກວາຊົງ ທີ່ມີຊາວບ້ານນັບມື້ນັບໜ້ອຍລົງໃນອະດີດ ໄດ້ເກີດມີການປ່ຽນແປງໃໝ່ຫຍັງແດ່?
ບ້ານທີ່ມີຊາວບ້ານນັບມື້ນັບໜ້ອຍໄດ້ຕ້ອນຮັບຊາວບ້ານໃໝ່
ເມື່ອຍ່າງເຂົ້າບ້ານຖູກວາຊົງ, ເຮືອຊານຊາວບ້ານສະຫຼັບສັບຊ້ອນ ແລະ ມີຕົ້ນໄມ້ຮົ່ມເຢັນບໍ່ໜ້ອຍ ເຊິ່ງເຕັມໄປດ້ວຍຄວາມມີສະເໜ່ຂອງຊົນນະບົດ ແລະ ບັນຍາກາດທີ່ງຽບສະຫງົບດີ, ເຮັດໃຫ້ຄົນທັງຫຼາຍມີຄວາມຮູ້ສຶກບໍລິສຸດຜຸດຜ່ອງ. ໃນຮ້ານກາເຟທີ່ໄດ້ມີການຕົບແຕ່ງຕາມເຮືອນເກົ່າຂອງຊາວບ້ານ, ມີບາງຄົນຖ່າຍພາບເພື່ອເປັນທີ່ລະນຶກ ແລະ ມີບາງຄົນລົມກັນແບບສະບາຍສະບາຍ. ບັນຍາກາດທີ່ທຳມະຊາດແບບນີ້ ໄດ້ດຶງດູດນັກທ່ອງທ່ຽວຈາກແຂວງເສສວນ, ນະຄອນຈົງກິ່ງ, ນະຄອນຫຼວງປັກກິ່ງ, ນະຄອນຊຽງໄຮ້ ຈົນເຮັດໃຫ້ນັກທ່ອງທ່ຽວຕ່າງປະເທດພາກັນມາພັກເຊົາໃນບ້ານນີ້.
ພໍ່ເຖົ້າສີເຈິ້ງຈຸ່ງ ປີນີ້ອາຍຸ 79 ປີ, ພໍ່ເຖົ້າໄດ້ດັດແປງໜ້າເຮືອນເກົ່າຂອງຕົນເປັນສວນພືດໃຫ້ຊົມທີ່ຂຽວອຸ່ມທຸ່ມ. ພໍ່ເຖົ້າ ກ່າວວ່າ: “ມີນັກທ່ອງທ່ຽວຕ່າງແຂວງມາພັກເຊົາໃນບ້ານ, ມີຄວາມ ຄຶກຄື້ນດີ.” ໃນສອງສາມປີມານີ້, ຫຼານ ແລະ ຫຼານໄພ້ຂອງພໍ່ເຖົ້າ ໄດ້ກັບມາເປີດຮ້ານອາຫານຢູ່ໃນບ້ານ.
ທ່ານ ຈ່າງຈ້ຽນຢົງ ປີນີ້ອາຍຸ 65 ປີ, ທ່ານ ໄດ້ດຳລົງຊີວິດຢູ່ນະຄອນຈ້າວຊິ້ງແຂວງກວາງຕຸ້ງມາໂດຍຕະຫຼອດ. ໃນລະດູຮ້ອນປີນີ້, ທ່ານ ແລະ ເມຍ ໄດ້ເຊັນສັນຍາເຊົ່າເຮືອນເປັນ ເວລາ 1 ປີກັບບ້ານຖູກວາຊົງ ແລະ ໄດ້ມາພັກເຊົາຢູ່ໃນບ້ານຊົນນະບົດແຫ່ງນີ້. ທ່ານ ກ່າວວ່າ: “ອາກາດໃນບ້ານສົດຊື່ນດີ, ຊີວິດສະບາຍທີ່ສຸດ.” ທຸກມື້, ທ່ານ ຕື່ນຂຶ້ນມາຈະໄປຍ່າງເລາະ ໃນປ່າຂ້າງບ້ານແລ້ວ ຈະນັ່ງດື່ມນ້ຳຊາຢູ່ເດີ່ນໜ້າບ້ານ ຫຼື ປູກຜັກໃນສວນຜັກຂອງຕົນ, ມີຄວາມສະຫວາດສະເຫວີຍທີ່ສຸດ.
ຍ້ອນໄດ້ຮູ້ວ່າ: ນັກທ່ອງທ່ຽວທັງຫຼາຍມັກມາພັກເຊົາຢູ່ບ້ານຖູກວາຊົງເປັນໄລຍະໜຶ່ງ, ນາງ ຢວນຢຸນທີ່ມາຈາກເມືອງມາລົງ ໄດ້ລາອອກຈາກວຽກ ແລ້ວມາເປີດຮ້ານເຂົ້າຈີ່ຢູ່ບ້ານຖູກວາຊົງ. ນາງ ກ່າວວ່າ: “ທຳອິດ, ຢາກເປີດແຕ່ຮ້ານນ້ຳຊາເທົ່ານັ້ນ ເພື່ອເປັນສະຖານທີ່ໃຫ້ແກ່ຜູ້ມັກອ່ານປຶ້ມ, ແຕ້ມຮູບ ຫຼື ຂຽນ ໜັງສືເທົ່ານັ້ນ ເພື່ອໃຫ້ຊາວໜຸ່ມທັງຫຼາຍມາພັກຜ່ອນຢ່ອນໃຈຢູ່ໃນຮ້ານ.” ພາຍຫຼັງມາ, ເມື່ອໄດ້ເປີດຮ້ານເປັນເວລາເຄິ່ງປີປາຍ, ຮ້ານຂອງນາງ ກໍເລີ່ມມີຊື່ສຽງຂຶ້ນໃນທາງອິນເຕີເນັດ, ນາງ ກຽມຈະຂາຍຜະລິດຕະພັນກະສິກຳບ້ານຖູກວາຊົງທາງອອນລາຍ.
ທ່ານ ຈ່າງຈ້ຽນຢົງ ແລະ ນາງ ຢວນຢຸນ ເປັນພຽງສ່ວນໜຶ່ງຂອງຊາວບ້ານໃໝ່ຂອງບ້ານຖູກວາຊົງ ເທົ່ານັ້ນ. ນັບແຕ່ເດືອນມິຖຸນາປີ 2024 ເປັນຕົ້ນມາ, ບ້ານຖູກວາຊົງ ໄດ້ຕ້ອນຮັບນັກທ່ອງທ່ຽວທັງໝົດ 5 ໝື່ນກວ່າເທື່ອຄົນ ແລະ ດຶງດູດຊາວບ້ານໃໝ່ຫຼາຍສິບຄົນ. ຊາວບ້ານໃໝ່ເຫຼົ່ານີ້ ມີນັກສຶກສາທີ່ຫາກໍ່ຮຽນຈົບຈາກມະຫາວິທະຍາໄລ, ມີສິລະປິນ, ມີນັກທຸລະກິດ, ມີພະນັກງານທີ່ອອກກິນເບ້ຍບຳນານ ແລະ ມີຊາວຕ່າງປະເທດ.
ຊາວບ້ານບ້ານຖູກວາຊົງ ໄດ້ເປີດຮ້ານອາຫານ, ຮ້ານຊັບພະສິນຄ້າ ແລະ ຮ້ານອື່ນໆ ເພື່ອຕ້ອນຮັບນັກທ່ອງທ່ຽວ, ບວກກັບຄ່າເຊົ່າເຮືອນ, ຄ່າເຊົ່າດິນ ແລະ ລາຍຮັບຈາກການອອກແຮງງານໃນວິສາຫະກິດຕ່າງໆ, ສະເລ່ຍແລ້ວ, ໄດ້ສ້າງລາຍຮັບເພີ່ມຂຶ້ນ 2 ໝື່ນກວ່າຢວນຕໍ່ປີຕໍ່ຄອບຄົວ.
ຊາວບ້ານໃໝ່ໄດ້ເຮັດໃຫ້ເກີດມີການປ່ຽນແປງໃໝ່
ແຕ່ກ່ອນ, ບ້ານຖູກວາຊົງ ຕົ້ນຕໍຈະມີແຕ່ການປູກຝັງແບບດັ້ງເດີມ, ຊາວບ້ານໜຸ່ມສ່ວນຫຼາຍ ຈະໄປອອກແຮງງານຢູ່ຕ່າງແຂວງ, ຊາວບ້ານນັບມື້ນັບໜ້ອຍລົງ, ເຮືອນເກົ່າ 120 ກວ່າຫຼັງ ແລະ ດິນຮວມໝູ່ຂອງບ້ານໄດ້ “ເສຍຄຸນຄ່າ” ຂອງຕົນ.
ນັບແຕ່ປີ 2021 ເປັນຕົ້ນມາ, ບ້ານຖູກວາຊົງ ເລີ່ມສ້ອມແປງເສັ້ນທາງໃນບ້ານ, ບໍາບັດນ້ຳເປື້ອນ ແລະ ປັບປຸງສະພາບແວດລ້ອມຂອງບ້ານໃຫ້ດີຂຶ້ນ. ປີ 2024, ບ້ານຖູກວາຊົງໄດ້ດຶງດູດການລົງທຶນຂອງວິສາຫະກິດ 4 ລ້ານກວ່າຢວນ, ໄດ້ເຊົ່າ, ປັບປຸງ ແລະ ທຸລະກິດເຮືອນເກົ່າທັງໝົດ 77 ຫຼັງ ຢ່າງເປັນເອກະພາບກັນ, ໄດ້ເຊົ່າດິນຊາວບ້ານ 67 ເຮັກຕາ ເພື່ອປູກດອກເກັກຮ່ວຍ, ດອກໝາກບານແຊ່ວ ແລະ ພັດທະນາລາຍການບັນເທີງຕ່າງໆ ພ້ອມທັງໄດ້ເປີດຮ້ານອາຫານ, ຣີສອດ, ຮ້ານເຂົ້າຈີ່ ແລະ ອື່ນໆ. “ບ້ານທ່ອງທ່ຽວ” ເລີ່ມເປັນຮູບເປັນຮ່າງຂຶ້ນ.
ທ່ານ ຫຼີປິ່ງ ຫົວໜ້າຄຸ້ມຢາງກວນຖຽນ ກ່າວວ່າ: “ຊັບສິນຮວມໝູ່ຂອງບ້ານໄດ້ແບ່ງປັນຜົນກຳໄລ, ຊາວບ້ານ ຍັງສາມາດສ້າງລາຍຮັບດ້ວຍການເຊົ່າດິນ, ເຊົ່າເຮືອນ, ອອກແຮງງານ ແລະ ເປີດຮ້ານ, ວິສາຫະກິດ ກໍສາມາດສ້າງຜົນກຳໄລດ້ວຍທຸລະກິດ.” ທ່ານ ກ່າວຕື່ມວ່າ: ຮູບແບບການປັບປຸງ ແລະພັດທະນາບ້ານຖູກວາຊົງ ໄດ້ສ້າງຜົນປະໂຫຍດໃຫ້ແກ່ບ້ານ, ວິສາຫະກິດ ແລະ ຊາວບ້ານ.
ນອກຈາກໂຄງການເຊົ່າເຮືອນໃຫ້ແກ່ນັກທ່ອງທ່ຽວເປັນທີ່ພັກເຊົາຂອງບ້ານຖູກວາຊົງແລ້ວ, ບ້ານຕ່າງໆເຊັ່ນ: ບ້ານຈູຈືຊ້າງ, ບ້ານສຸຍຈິງ ແລະ ອື່ນໆ ຂອງເມືອງມາລົງ ກໍໄດ້ພັດທະນາຊົນນະບົດດ້ວຍອຸດສາຫະກຳເຊົ່າເຮືອນໃຫ້ນັກທ່ອງທ່ຽວເປັນທີ່ພັກເຊົາ. ບ້ານສຸຍຈິງ ມີສາຍພູຢູ່ຫຼັງບ້ານ ແລະ ນ້ຳຫ້ວຍໄຫຼຜ່ານ ກາງບ້ານ. ເດືອນພຶດສະພາ ປີ 2023, ບ້ານດັ່ງກ່າວ ໄດ້ສ້າງເຮືອນໃໝ່ 24 ຫ້ອງ ທີ່ເປັນ 12 ຊຸດຢູ່ຕາມສະຖານທີ່ກໍ່ສ້າງເຮືອນເກົ່າ.
ເດືອນມີນາປີ 2024, ນາງ ຢາງອາລິງ ຜູ້ ຜະລິດຍີ່ຫໍ້ຊາຕິງຈີສຽງ ໄດ້ເດີນທາງມາເຖິງບ້ານສຸຍຈິງ ແລະ ກາຍເປັນຊາວບ້ານໃໝ່ຊຸດທຳອິດຂອງບ້ານດັ່ງກ່າວ. ນາງ ກ່າວວ່າ: “ຂ້າພະເຈົ້າໄດ້ບອກເພື່ອນຂ້າພະເຈົ້າວ່າ, ເມືອງມາລົງ ເປັນເມືອງທີ່ສວຍງາມ, ເໝາະສຳລັບການພັກຜ່ອນຢ່ອນໃຈ!” ນາງ ຢາງອາລິງ ໄດ້ໂຄສະນາເຜີຍແຜ່ບ້ານສຸຍຈິງ ໃຫ້ຄົນທັງຫຼາຍ ຮັບຮູ້ ດ້ວຍຮູບການໄລສົດ.
ບ້ານຈູຈືຊ້າງ ກໍໄດ້ສ້ອມແປງ ເຮືອນເກົ່າຂອງຊາວບ້ານເຊັ່ນດຽວກັນ ເຊິ່ງໄດ້ດຶງດູດຊາວບ້ານໃໝ່ 30 ກວ່າຄົນ, ຊາວບ້ານໃໝ່ເຫຼົ່ານີ້ ລ້ວນແຕ່ໄດ້ພັກເຊົາຢູ່ໃນບ້ານເປັນເວລາຫຼາຍກວ່າ 1 ປີ ແລະ ໄລຍະເຊົ່າດົນທີ່ສຸດມີເຖິງ 10 ປີ.
ຢູ່ແຂວງຢຸນນານ, ບ້ານທີ່ຄ້າຍຄືກັນກັບບ້ານຖູກວາຊົງ ແລະ ບ້ານສຸຍຈິງ ທີ່ໄດ້ພັດທະນາອຸດສາຫະກຳທ່ອງທ່ຽວ ດ້ວຍການເຊົ່າເຮືອນໃຫ້ແກ່ນັກທ່ອງທ່ຽວເປັນທີ່ພັກເຊົາຍັງມີບໍ່ໜ້ອຍ. ບ້ານທີ່ມີຊາວບ້ານນັບມື້ນັບໜ້ອຍລົງໃນອະດີດ ໄດ້ກາຍເປັນບ້ານແບບຢ່າງ ໃນການພັດທະນາຂະແໜງການທ່ອງທ່ຽວ ແລະ ເຮືອນຮ້າງເຮືອນເກົ່າໃນອະດີດ ກໍໄດ້ກາຍເປັນ “ສະຖານທີ່ພັກເຊົາແຫ່ງຄວາມສຸກ” ສຳລັບນັກທ່ອງທ່ຽວທັງພາຍໃນ ແລະ ຕ່າງປະເທດ.