ເສດຖະກິດຈີນສືບຕໍ່ຮັກສາສະພາບຄວາມໝັ້ນທ່ຽງ ທ່າອ່ຽງກ້າວໄປໜ້າ ແລະ ຄວາມໝັ້ນໜຽວ
ວັນທີ 8 ທັນວານີ້, ຕົວເລກສະຖິຕິທີ່ເຜີຍແຜ່ໂດຍລັດຖະບານຈີນສະແດງເຫັນວ່າ, ໃນ 11 ເດືອນຂອງປີ 2025, ຍອດມູນຄ່າການນຳເຂົ້າ-ສົ່ງອອກສິນຄ້າປະເພດຈັບຕ້ອງໄດ້ຂອງຈີນມີເຖິງ 41.210 ຕື້ຢວນ, ເພີ່ມຂຶ້ນ 3,6% ເມື່ອທຽບໃສ່ໄລຍະດຽວກັນຂອງປີ 2024. ໃນນັ້ນ, ຍອດມູນຄ່າການນຳເຂົ້າ-ສົ່ງອອກສິນຄ້າດັ່ງກ່າວສະເພາະເດືອນພະຈິກໄດ້ເພີ່ມຂຶ້ນ 4,1% ເມື່ອທຽບໃສ່ໄລຍະດຽວກັນຂອງປີ 2024, ເຊິ່ງໄດ້ຮັກສາການເຕີບໂຕເປັນເວລາ 10 ເດືອນລຽນຕິດ ເມື່ອທຽບໃສ່ໄລຍະດຽວກັນຂອງປີ 2024. ນັກວິເຄາະຊີ້ໃຫ້ເຫັນວ່າ, ໂຄງປະກອບການຄ້າກັບຕ່າງປະເທດຂອງຈີນໄດ້ຮັບການປັບປຸງດີຂຶ້ນເລື້ອຍໆ ແລະ ປ່ອຍພະລັງຂັບເຄື່ອນໃໝ່ຢ່າງຕໍ່ເນື່ອງ, ສະແດງໃຫ້ເຫັນເຖິງຄວາມໝັ້ນໜຽວທີ່ເຂັ້ມແຂງ.
ໃນ 11 ເດືອນຂອງປີ 2025, ການນຳເຂົ້າ-ສົ່ງອອກຂອງຈີນຕໍ່ຕະຫຼາດຫຼາຍພາກພື້ນ ເຊັ່ນ: ອາຊຽນ, ສະຫະພາບເອີຣົບ, ອາຟຣິກາ, ອາເມຣິກາລາຕິນ ແລະອື່ນໆລ້ວນແຕ່ມີການເຕີບໂຕເຊິ່ງສະແດງໃຫ້ເຫັນວ່າ, ຈີນມີບົດບາດຢ່າງໝັ້ນທ່ຽງກວ່າເກົ່າໃນການຊຸກຍູ້ຄວາມໝັ້ນຄົງຂອງການຄ້າໂລກ. ເມື່ອສັງເກດເບິ່ງຈາກຫຼາຍດັດຊະນີສຳຄັນດ້ານເສດຖະກິດມະຫາພາກແລ້ວເຫັນວ່າ, ໃນ 3 ໄຕມາດທຳອິດຂອງປີ 2025ນີ້, GDP ຂອງຈີນໄດ້ເພີ່ມຂຶ້ນ 5,2% ເມື່ອທຽບໃສ່ໄລຍະດຽວກັນຂອງປີ 2024, ຢູ່ໃນລະດັບແຖວໜ້າຂອງອົງກອນເສດຖະກິດສຳຄັນຂອງໂລກ.
ໃນ 11 ເດືອນຂອງປີນີ້, ໂຄງປະກອບຜະລິດຕະພັນໃນການຄ້າກັບຕ່າງປະເທດຂອງຈີນໄດ້ຮັບການປັບປຸງດີຂຶ້ນເລື້ອຍໆ, ແຮງຂັບເຄື່ອນໃໝ່ສຳລັບການສົ່ງອອກມີທ່າອ່ຽງເພີ່ມຂຶ້ນທີ່ດີ, ການສົ່ງອອກຜະລິດຕະພັນປະເພດເຄື່ອງໄຟຟ້າ ແລະ ເຄື່ອງຈັກ ເຊິ່ງລວມທັງ “ສິນຄ້າ 3 ຊະນິດໃໝ່ (ລົດໄຟຟ້າ, ຖ່ານລີທຽມ Lithium Cell ແລະ ຖ່ານພະລັງແສງຕາເວັນ)” ແລະ ເຮືອກຳປັ່ນໄດ້ເພີ່ມຂຶ້ນ 8,8%. ພ້ອມກັນນັ້ນ, ການນຳເຂົ້າອຸປະກອນການຜະລິດ ແລະ ເຄື່ອງອາໄຫຼ່ສຳຄັນໄດ້ເພີ່ມຂຶ້ນ, ສະແດງໃຫ້ເຫັນວ່າ ການເຕີບໂຕດ້ານການຄ້າກັບຕ່າງປະເທດຂອງຈີນສ່ວນຫຼາຍແມ່ນມາຈາກການຍົກລະດັບໂຄງປະກອບ ແລະ ຄວາມສາມາດດ້ານການຜະລິດ ແລະ ອັດຕາສ່ວນຂອງເຕັກໂນໂລຊີໃໝ່ໄດ້ເພີ່ມຂຶ້ນຢ່າງບໍ່ຢຸດຢັ້ງ.
ນັບແຕ່ຕົ້ນປີນີ້ມາ, ແຮງຂັບເຄື່ອນການເຕີບໂຕຂອງເສດຖະກິດໂລກຖືກກີດຂວາງຈາກແຮງຂັບເຄື່ອນທີ່ບໍ່ພຽງພໍ ແລະ ລັດທິປົກປ້ອງການຄ້າຟື້ນຊີບຄືນໃໝ່. ພາຍໃຕ້ສະພາບຄືແນວນີ້, ໃນ 11 ເດືອນຂອງປີ 2025, ການຄ້າກັບຕ່າງປະເທດຂອງຈີນໄດ້ເພີ່ມຂຶ້ນແລະສວນທາງກັບທ່າອ່ຽງລວມ, ຍອດມູນຄ່າເສດຖະກິດໃນໄຕມາດທີ 3 ກໍໄດ້ລື່ນກາຍຍອດມູນຄ່າເສດຖະກິດຕະຫຼອດປີ 2024 ຂອງເຢຍລະມັນເຊິ່ງເປັນປະເທດທີ່ມີຂະໜາດເສດຖະກິດໃຫຍ່ອັນດັບ 3 ຂອງໂລກ, ເຊິ່ງກາຍເປັນແຫຼ່ງພະລັງຂັບເຄື່ອນທີ່ໝັ້ນທ່ຽງທີ່ສຸດ ແລະ ໜ້າໄວ້ໃຈທີ່ສຸດສຳລັບການເຕີບໂຕຂອງເສດຖະກິດໂລກ.
ວັນທີ 8 ທັນວານີ້, ກົມການເມືອງສູນກາງພັກຄອມມູນິດຈີນໄດ້ຈັດກອງປະຊຸມ, ໂດຍໄດ້ວິເຄາະ ແລະ ຄົ້ນຄວ້າວຽກງານເສດຖະກິດຂອງປີ 2026, ບັນລຸການເລີ່ມຕົ້ນທີ່ດີໃນການຈັດຕັ້ງປະຕິບັດແຜນພັດທະນາເສດຖະກິດສັງຄົມແຫ່ງຊາດ 5 ປີຄັ້ງທີ 15. ວັນທີ 9 ທັນວານີ້, ຈີນຈັດກອງປະຊຸມສົນທະນາ “1+10” ກັບຫຼາຍອົງການເສດຖະກິດສາກົນເພື່ອຮ່ວມກັນປຶກສາຫາລືກ່ຽວກັບການຄຸ້ມຄອງໂລກ ແລະ ຮ່ວມກັນສະແຫວງຫາການພັດທະນາຂອງໂລກ. ໂລກກຳລັງຄອງຄອຍໂອກາດຈາກຈີນ ແລະ ຫວັງຈະຮ່ວມມືກັບຈີນແບບຕ່າງຝ່າຍຕ່າງໄດ້ຮັບຜົນປະໂຫຍດ.
ທີ່ມາ: CGTN