ຮອງນາຍົກລັດຖະມົນຕີຈີນເຂົ້າຮ່ວມກອງປະຊຸມຄະນະກຳມະການຮ່ວມມືສາກົນດ້ານສິ່ງແວດລ້ອມແລະການພັດທະນາຂອງຈີນ
ວັນທີ 16 ຕຸລານີ້, ທ່ານ ຕີ່ງເສ່ຍຊຽງ ກຳມະການປະຈຳກົມການເມືອງສູນກາງພັກຄອມມູນິດຈີນ, ຮອງນາຍົກລັດຖະມົນຕີຈີນ ປະທານຄະນະກຳມະການຮ່ວມມືສາກົນດ້ານສິ່ງແວດລ້ອມແລະການພັດທະນາຂອງຈີນ ໄດ້ເຂົ້າຮ່ວມກອງປະຊຸມປະຈຳປີ 2025 ຂອງຄະນະກຳມະການດັ່ງກ່າວ.
ໃນໂອກາດຂຶ້ນກ່າວຄຳປາໄສຢູ່ກອງປະຊຸມດັ່ງກ່າວ, ທ່ານ ຕີ່ງເສ່ຍຊຽງ ໄດ້ເນັ້ນໜັກວ່າ: ຈີນຈະເລັ່ງລັດການຫັນປ່ຽນຮູບແບບການພັດທະນາໃຫ້ເປັນສີຂຽວຕື່ມອີກ, ຍິນດີເພີ່ມທະວີຮັດແໜ້ນຄວາມສາມັກຄີແລະການຮ່ວມມືກັບຝ່າຍຕ່າງໆ, ຮ່ວມກັນຊຸກຍູ້ການພັດທະນາແບບສີຂຽວໃນທົ່ວໂລກ, ຮ່ວມກັນສ້າງໂລກທີ່ສະອາດແລະສວຍງາມ. ລັດຖະບານຈີນ ຈະສືບຕໍ່ອອກແຮງສະໜັບສະໜູນການພັດທະນາຂອງຄະນະກຳມະການດັ່ງກ່າວ, ເພື່ອປະກອບສ່ວນສະຕິປັນຍາແລະກຳລັງແຮງຫຼາຍກວ່າເກົ່າ ເຂົ້າໃນການເພີ່ມທະວີການສ້າງອະລິຍະທຳດ້ານນິເວດຈີນ ແລະການຊຸກຍູ້ການພັດທະນາແບບຍືນຍົງຂອງໂລກ.
ຫົວຂໍ້ຂອງກອງປະຊຸມປະຈຳປີນີ້ແມ່ນ “ເດັດດ່ຽວຫັນປ່ຽນຮູບແບບເປັນສີຂຽວຢ່າງຮອບດ້ານ, ຊຸກຍູ້ການຢູ່ຮ່ວມກັນຢ່າງກົມກຽວກັນລະຫວ່າງມະນຸດກັບທຳມະຊາດ”. ໂດຍມີກຳມະການຈີນແລະຕ່າງປະເທດ, ຊ່ຽວຊານຈີນແລະຕ່າງປະເທດ, ຄູ່ຮ່ວມມືແລະອື່ນໆທັງໝົດປະມານ 400 ຄົນເຂົ້າຮ່ວມກອງປະຊຸມຄັ້ງນີ້.