ໂຄງການກໍ່ສ້າງສິ່ງອຳນວຍຄວາມສະດວກເພື່ອຫຼຸດຜ່ອນຄວາມທຸກຍາກໃນຊົນນະ ບົດ ໄລຍະທີ 2 ທີ່ຈີນຊ່ວຍເຫຼືອລາວ ສຳເລັດ ແລະ ສົ່ງມອບແລ້ວ— ການຊ່ວຍເຫຼືອທີ່ຂ້າມຜ່ານພູຜາແມ່ນໍ້າ, ການເຮັດວຽກອັນຈິງໃຈ

ຫວ່າງມໍ່ໆມານີ້, ໂຄງການຊ່ວຍເຫຼືອກໍ່ສ້າງສິ່ງອຳນວຍຄວາມສະດວກແກ້ໄຂຄວາມທຸກຍາກຢູ່ຊົນນະບົດລາວໄລຍະທີ 2 ທີ່ກຸ່ມບໍລິສັດກໍ່ສ້າງ ແລະ ລົງທຶນແຂວງຢຸນນານເປັນຜູ້ຮັບເໝົາກໍ່ສ້າງ ແລະ ຈັດຕັ້ງປະຕິບັດໄດ້ສຳເລັດການກໍ່ສ້າງ ແລະ ການມອບ-ຮັບ.

ໂຄງການກໍ່ສ້າງສິ່ງອຳນວຍຄວາມສະດວກເພື່ອຫຼຸດຜ່ອນຄວາມທຸກຍາກໃນເຂດຊົນນະບົດຂອງລາວ ແມ່ນໜຶ່ງໃນ “8 ໂຄງການໃຫຍ່” ທີ່ຈັດຕັ້ງປະຕິບັດໂດຍ ສປ ຈີນ, ແລະ ຍັງເປັນໜຶ່ງໃນໂຄງການຊຸດທຳອິດທີ່ລັດຖະບານຈີນໃຫ້ການສະໜັບສະໜູນດ້ານຊີວິດການເປັນຢູ່ຂອງປະຊາຊົນລາວ, ເຊິ່ງມີຈຸດປະສົງເພື່ອກໍ່ສ້າງສິ່ງອຳນວຍຄວາມສະດວກຕ່າງໆ ເຊັ່ນ: ການສະໜອງນ້ຳ, ການສະໜອງໄຟຟ້າ, ສຸກສາລາຂັ້ນບ້ານ ແລະ ໂທລະພາບດິຈິຕອນ ໃຫ້ແກ່ 100 ບ້ານ ໃນເຂດພູດອຍທີ່ທຸກຍາກ ແລະ ເຂດທຸກຍາກຕາມທາງລົດໄຟລາວ-ຈີນ. ໄລຍະທີສອງຂອງໂຄງການກວມເອົາ 40 ບ້ານ ໃນແຂວງຜົ້ງສາລີ, ຫຼວງນ້ຳທາ, ອຸດົມໄຊ ແລະ ຫົວພັນ ທາງພາກເໜືອຂອງລາວ.

40 ບ້ານກະຈາຍຢູ່ໃນພູຜາປ່າດົງ, ບາງບ່ອນບໍ່ມີເສັ້ນທາງເຂົ້າເຖິງ, ທີມງານກໍ່ສ້າງໄດ້ນຳເອົາໂດຣນ ແລະ GPS ຂ້າມພູຜາປ່າດົງ, ເພື່ອຄັດເລືອກສະຖານທີ່ສຳລັບທໍ່ນ້ຳປະປາ ແລະ ສາຍໄຟຟ້າ, ໃຊ້ເວລາພຽງ 23 ວັນກໍສຳເລັດການສຳຫຼວດທັງໝົດ.

ໃນລະດູຝົນປີ 2024, ພາກເໜືອຂອງລາວໄດ້ປະເຊີນກັບຝົນຕົກໜັກທີ່ບໍ່ເຄີຍມີມາກ່ອນ, ທີມງານໄດ້ຕໍ່ສູ້ກັບຝົນຕົກເປັນເວລາ 36 ຊົ່ວໂມງເພື່ອສ້ອມແປງທໍ່ນ້ຳ; ໃນເດືອນມີນາ 2025, ນ້ຳສະອາດທີ່ໄດ້ຮັບການບຳບັດຄັ້ງທຳອິດໄດ້ໄຫຼເຂົ້າສູ່ອ່າງເກັບນ້ຳສູງຢູ່ທາງເຂົ້າບ້ານກົວໄມ້ຢວນ.

ສາຍສົ່ງໄຟຟ້າ ແລະ ສາຍເຄເບິນຂອງໂຄງການວິສະວະກຳໂທລະພາບດິຈິຕອນຕ້ອງໄດ້ຕັດຜ່ານປ່າດົງດິບ, ທີມງານກໍ່ສ້າງໄດ້ແບກເຄື່ອງມື ແລະ ສາຍເຄເບິນ, ເປີດທາງສັນຈອນໃນປ່າເພື່ອດໍາເນີນການກໍ່ສ້າງ, ເມື່ອພົບກັບເນີນພູສູງຊັນ, ພວກເຂົາໄດ້ໃຊ້ເຊືອກມັດຮ່າງກາຍໄວ້, ແລະ ຄ່ອຍໆຂົນສົ່ງເສົາໄຟຟ້າຂຶ້ນພູ. ສ່ວນທີມງານຕິດຕັ້ງໂທລະພາບດາວທຽມໄດ້ປີນຂຶ້ນໄປເທິງຫຼັງຄາເຮືອນຍົກພື້ນສູງຂອງແຕ່ລະຄອບຄົວ, ເພື່ອປັບແຕ່ງເຄື່ອງຮັບສັນຍານ.

ສູນການແພດຂັ້ນບ້ານ 19 ແຫ່ງທີ່ສ້າງຂຶ້ນນັ້ນໄດ້ກະຈາຍຢູ່ໃນ 4 ແຂວງຂອງລາວ, ທີມງານໂຄງການໄດ້ປັບແຕ່ງແຜນການຕາມຂະໜາດປະຊາກອນ ແລະ ລັກສະນະຂອງພະຍາດທີ່ມັກເກີດຂຶ້ນໃນແຕ່ລະບ້ານ. ໃນເວລາຂົນສົ່ງອຸປະກອນການແພດ, ເພື່ອຫຼີກລ່ຽງເສັ້ນທາງທີ່ເປັນຂີ້ຕົມໃນລະດູຝົນ, ທີມງານໄດ້ນຳໃຊ້ວິທີການທີ່ຄົນແບກ ແລະ ມ້າແບກເພື່ອຂົນສົ່ງອຸປະກອນໜັກເຊັ່ນ: ເຄື່ອງກວດຄື້ນສຽງ (Ultrasound) ແລະ ຕຽງຄົນເຈັບສຸກເສີນ. ເມື່ອສິ່ງກໍ່ສ້າງຫຼັກຂອງສູນການແພດຂອງບ້ານຫ້ວຍເລົາ ແຂວງອຸດົມໄຊ ສໍາເລັດການກໍ່ສ້າງ, ຊາວບ້ານໄດ້ນໍາເອົາເຂົ້າໜຽວ ແລະ ໝາກໄມ້ມາມອບໃຫ້ຜູ້ກໍ່ສ້າງຊາວຈີນດ້ວຍວິທີການແບບດັ້ງເດີມຂອງລາວ.

ວັນທີ 13 ພຶດສະພາ 2025, ໂຄງການກໍ່ສ້າງສິ່ງອໍານວຍຄວາມສະດວກໃນການຫຼຸດຜ່ອນຄວາມທຸກຍາກໃນຊົນນະບົດໄລຍະທີສອງຂອງລາວ ໄດ້ສໍາເລັດລົງຢ່າງເປັນທາງການ ພາຍຫຼັງການຕິດຕັ້ງອຸປະກອນການແພດຢູ່ສູນການແພດແຫ່ງສຸດທ້າຍ.

ຈາກການເດີນທາງຫຼາຍຊົ່ວໂມງເພື່ອໄປຕັກນໍ້າຢູ່ຕາມເສັ້ນທາງພູດອຍທີ່ເຕັມໄປດ້ວຍຂີ້ຕົມ ຈົນເຖິງການເປີດກ໊ອກນໍ້າກໍໄດ້ນໍ້າໃຊ້; ຈາກເຮືອນທີ່ມືດມົວດ້ວຍແສງໄຟນໍ້າມັນ ຈົນເຖິງບ້ານທີ່ສະຫວ່າງໄສດ້ວຍແສງໄຟ, ຈາກເຄື່ອງມືແພດທີ່ລຽບງ່າຍ ຈົນເຖິງສຸກສາລາທີ່ມີອຸປະກອນຄົບຊຸດ ແລະ ສິ່ງອື່ນໆ. ການສົ່ງມອບໂຄງການຊ່ວຍເຫຼືອຈາກຈີນເພື່ອການພັດທະນາຊົນນະບົດ ແລະ ຫຼຸດຜ່ອນຄວາມທຸກຍາກຢູ່ລາວໄລຍະທີ 2 ໄດ້ຍົກລະດັບຄຸນນະພາບຊີວິດການເປັນຢູ່ໃນ 40 ບ້ານຢ່າງຫຼວງຫຼາຍ, ພ້ອມທັງມອບການເປັນຢູ່ທີ່ດີ ແລະ ໂອກາດໃນການພັດທະນາທີ່ເປັນຮູບປະທຳໃຫ້ແກ່ປະຊາຊົນລາວ, ເຊິ່ງເປັນການສະແດງໃຫ້ເຫັນເຖິງສາຍພົວພັນມິດຕະພາບອັນເລິກເຊິ່ງລະຫວ່າງລາວ-ຈີນ. ຜູ້ກໍ່ສ້າງມີຄວາມເຊື່ອໝັ້ນຢ່າງໜັກແໜ້ນວ່າ, ດິນແດນແຫ່ງນີ້ຈະອອກໝາກຜົນຂອງການພັດທະນາຫຼາຍຂຶ້ນ, ຂຽນບົດທີ່ອົບອຸ່ນ ແລະ ສວຍງາມຂອງຄູ່ຮ່ວມຊາຕາກຳລາວ-ຈີນ.

ແຫຼ່ງຂ່າວ: ໜັງສືພິມລາຍວັນຢຸນນານ