ໄດ້ເລີ່ມລົງມືກໍ່ສ້າງໂຄງການປັບປຸງຊີວິດການເປັນຢູ່ຂອງປະຊາຊົນສໍາລັບໂຄງການເຄືອຂ່າຍໄຟຟ້າລາວ-ຈີນຂະໜາດ 500 ກິໂລໂວນ

ໃນວັນທີ 5 ສິງຫາ, ໄດ້ລົງມືກໍ່ສ້າງໂຮງຮຽນປະຖົມບ້ານນາໝໍ້ໃຕ້ທີ່ເມືອງນາໝໍ້ແຂວງອຸດົມໄຊປະເທດລາວ, ຊຶ່ງເປັນໂຄງການປັບປຸງຊີວິດການເປັນຢູ່ຂອງປະຊາຊົນສໍາລັບໂຄງການປະກອບເປັນຊຸດຂອງໂຄງການເຄືອຂ່າຍໄຟຟ້າລາວ-ຈີນຂະໜາດ 500 ກິໂລໂວນ. ໂຄງການນີ້ຄາດວ່າຈະສໍາເລັດ ແລະ ສົ່ງມອບພາຍໃນເດືອນ ພະຈິກ 2025 ຊຶ່ງຈະຊ່ວຍປັບປຸງສະພາບການສຶກສາຂອງເດັກນ້ອຍໃນເຂດພູເຂົາທີ່ຫ່າງໄກສອກຫຼີກ.

ໂຄງການກໍ່ສ້າງໂຮງຮຽນປະຖົມນາໝໍ້ໃຕ້ໃຊ້ເງິີນລົງທຶນ ເກືອບ 300.000 ໂດລາສະຫະລັດ ແລະ ມີແຜນທີ່ຈະສ້າງຫ້ອງຮຽນໃຫມ່ 6 ຫ້ອງ, 1 ຫ້ອງການ ແລະ ສະຖານທີ່ອໍານວຍຄວາມສະດວກດ້ານກິລາ ແລະ ທີ່ຢູ່ອາໄສ, ຊຶ່ງສາມາດຕອບສະຫນອງຄວາມຕ້ອງການດ້ານການສຶກສາຂອງເດັກນ້ອຍຄົບເກນຮັບການສຶກສາ ຫຼາຍກວ່າ 100 ຄົນ ເຂົ້າໂຮງຮຽນປະຖົມ ແລະ ໂຮງຮຽນອະນຸບານ. ຫຼັງຈາກສໍາເລັດການກໍ່ສ້າງຂອງໂຄງການແລ້ວ, ບໍລິສັດສາຍສົ່ງໄຟຟ້າແຫ່ງຊາດລາວຍັງຈະຈັດຕັ້ງກົນໄກການສະໜັບສະໜູນການສອນເປັນປະຈໍາ ເພື່ອສົ່ງເສີມການແລກປ່ຽນວັດທະນະທໍາລະຫວ່າງສອງປະເທດ.

ທ່ານ ບຸນຄົງ ຫຼ້າຈຽມພອນ ເລຂາຄະນະພັກແຂວງ ແລະ ເຈົ້າແຂວງອຸດົມໄຊກ່າວວ່າ, ການກໍ່ສ້າງໂຮງຮຽນປະຖົມນີ້ຈະປັບປຸງລະດັບໂຄງລ່າງການສຶກສາຂອງທ້ອງຖິ່ນຢ່າງມີປະສິດທິພາບ, ຖືເປັນຂອງຂວັນອັນມີຄ່າທີ່ບໍລິສັດສາຍສົ່ງໄຟຟ້າແຫ່ງຊາດລາວນໍາມາໃຫ້ແກ່ເດັກນ້ອຍໃນທ້ອງຖິ່ນ ແລະ ຫວັງວ່າບໍລິສັດດັ່ງກ່າວນີ້ ຈະສາມາດມີການຮ່ວມມືອັນເລິກເຊິ່ງໃນຂະແຫນງການຕ່າງໆໃນອະນາຄົດ ແລະ ຊຸກຍູ້ສົ່ງເສີມສາຍພົວພັນມິດຕະພາບລາວ-ຈີນມີການພັດທະນາດີຍິ່ງຂຶ້ນ.

ໂຄງການເຄືອຂ່າຍໄຟຟ້າລາວ-ຈີນຂະໜາດ 500 ກິໂລໂວນ ເປັນໂຄງການອັນສຳຄັນຍິ່ງໃຫຍ່ທີ່ໄດ້ຈັດເຂົ້າໃນ ແຜນແມ່ບົດວ່າດ້ວຍການສ້າງຄູ່ຮ່ວມຊາຕາກຳລາວ-ຈີນ, ໂຄງການນີ້ແບ່ງເປັນສອງຕອນ ຄື ຕອນຢູ່ລາວ ແລະ ຕອນຢູ່ຈີນ, ຕ່າງກໍລົງທຶນກໍ່ສ້າງຮ່ວມກັນໂດຍບໍລິສັດສາຍສົ່ງໄຟຟ້າແຫ່ງຊາດລາວ ແລະ ບໍລິສັດຕາຂ່າຍໄຟຟ້າພາກໃຕ້ຈີນ ຈໍາກັດ. ໃນຊຸມປີທີ່ຜ່ານມາ, ບໍລິສັດຕາຂ່າຍໄຟຟ້າພາກໃຕ້ຈີນ ຈໍາກັດ ປະຕິບັດພາລະໜ້າທີ່ທາງສັງຄົມຢ່າງຫ້າວຫັນ, ໃນຂະນະທີ່ຊຸກຍູ້ການຮ່ວມມືດ້ານພະລັງງານໄຟຟ້າ ພ້ອມທັງຍັງໄດ້ດຳເນີນກິດຈະກຳເພື່ອສາທາລະນະປະໂຫຍດ ເຊັ່ນ: ໂຄງການ“ແສງສະຫວ່າງແຫ່ງຄວາມຫວັງ” ເປັນຕົ້ນ, ໄດ້ບໍລິຈາກອຸປະກອນໃຫ້ແກ່ໂຮງຮຽນຊົນນະບົດ ແລະ ອົງການຕ່າງໆສໍາລັບເດັກນ້ອຍທີ່ພິການທາງການຍິນຕາມແນວເສັ້ນທາງ, ແລະ ຜະລິດລາຍການຂ່າວສານພາສາມືຄັ້ງທໍາອິດຂອງລາວ, ຊຶ່ງໄດ້ສົ່ງຜົນປະໂຫຍດໃຫ້ແກ່ຄົນພິການທາງການຍິນໃນຈຳນວນ 80.000 ຄົນພາຍໃນປະເທດລາວ. ຕັ້ງແຕ່ປີ 2011 ເປັນຕົ້ນມາ, ບໍລິສັດນີ້ໄດ້ສະຫນັບສະຫນູນນັກສຶກສາລາວຈໍານວນ 81 ຄົນໄປຮຽນຢູ່ຈີນ, ສືບຕໍ່ສົ່ງເສີມຄວາມສໍາພັນລະຫວ່າງປະເທດລາວ ແລະ ຈີນໃຫ້ສະໜິດສະໜົມຂຶ້ນ.