ທ່າອ່ຽງຂອງລາຄາສິນຄ້າຈີນຢູ່ເວັບໄຊ Amazon ຂອງອາເມຣິກາສູງຂຶ້ນໄວກວ່າອັດຕາໄພເງິນເຟີ້ຍ້ອນຜົນກະທົບຈາກດ່ານພາສີ
ວັນທີ 30 ມິຖຸນາແລ້ວນີ້ຕາມເວລາທ້ອງຖິ່ນ, ຜົນການວິເຄາະຜະລິດຕະພັນທີ່ແຕກຕ່າງກັນ 1.400 ຊະນິດຂອງບໍລິສັດວິເຄາະ DataWeave ສະແດງໃຫ້ເຫັນວ່າ: ທ່າອ່ຽງຂອງລາຄາສິນຄ້າທີ່ຜະລິດໂດຍຈີນທີ່ຈຳໜ່າຍຢູ່ເທິງເວັບໄຊ Amazon ຂອງອາເມຣິກາສູງຂຶ້ນໄວກວ່າອັດຕາໄພເງິນເຟີ້ໂດຍລວມຂອງອາເມຣິກາ ເຊິ່ງນີ້ສະແດງໃຫ້ເຫັນວ່າ: ມາດຕະການເພີ່ມພາສີເລີ່ມສົ່ງຜົນກະທົບໃຫ້ແກ່ຜູ້ບໍລິໂພກໃນອາເມຣິກາ.
ຂ່າວສານຣອຍເຕີຂອງອັງກິດລາຍງານວ່າ: ນັບແຕ່ເດືອນມັງກອນຫາກາງເດືອນມິຖຸນາປີນີ້, ສິນຄ້າຈີນຫຼາຍກວ່າ 1.400 ຊະນິດທີ່ຈຳໜ່າຍໃນລາຄາລະດັບປານກາງຢູ່ເວັບໄຊ Amazon ໄດ້ເພີ່ມຂຶ້ນ 2,6%, ສູງກວ່າອັດຕາໄພເງິນເຟີ້ຂອງສິນຄ້າຫຼັກໃນອາເມຣິການັບມາຮອດເດືອນພຶດສະພາ ແລະ ລາຄາເລັ່ງສູງຂຶ້ນນັບແຕ່ເດືອນພຶດສະພາເປັນຕົ້ນມາ ເຊິ່ງສະແດງໃຫ້ເຫັນວ່າ: ການປະຕິບັດມາດຕະການເພີ່ມພາສີຂອງລັດຖະບານ ໂດນັນ ທຣຳ ພວມສົ່ງຜົນກະທົບແກ່ຜູ້ບໍລິໂພກຊາວອາເມຣິກາ.
ຂ່າວແຈ້ງໃຫ້ຮູ້ຕື່ມວ່າ: ຕົວເລກຂໍ້ມູນຂອງສະຫະລັດອາເມຣິກາ ແລະ ຜົນການຄົ້ນຄວ້າຂອງບໍລິສັດ DataWeave ລ້ວນແຕ່ສະແດງໃຫ້ເຫັນວ່າ: ຄຽງຄູ່ກັບຄວາມກົດດັນຂອງພາສີທີ່ມີຕໍ່ລາຄາສິນຄ້າປະກົດອອກມາ, ຕົ້ນທຶນຂອງສິນຄ້າໃນຫຼາຍເດືອນຜ່ານມາມີທ່າອ່ຽງເພີ່ມສູງຂຶ້ນ.