ຈີນໃຊ້ຫຼາຍມາດຕະການຕອບໂຕ້ “ສົງຄາມພາສີ” ຂອງອາເມຣິກາ
ວັນທີ 2 ເມສານີ້, ລັດຖະບານອາເມຣິກາໄດ້ປະກາດເກັບ “ພາສີສະເໝີກັນ” ຕໍ່ຄູ່ການຄ້າທັງໝົດ, ຫຼັງຈາກນັ້ນມື້ໜຶ່ງ, ຈີນໄດ້ນຳໃຊ້ມາດຕະການຕອບໂຕ້ຕ່າງໆ ເຊັ່ນ: ຂຶ້ນພາສີ 34% ຕໍ່ສິນຄ້ານຳເຂົ້າທັງໝົດທີ່ຜະລິດຢູ່ອາເມຣິກາ, ກ່າວຟ້ອງການກະທຳທີ່ກ່ຽວຂ້ອງຂອງອາເມຣິກາພາຍໃຕ້ກົນໄກແກ້ໄຂຄວາມຂັດແຍ້ງຂອງອົງການການຄ້າໂລກ, ເພີ່ມຫົວໜ່ວຍທຸລະກິດຫຼາຍແຫ່ງຂອງອາເມຣິກາເຂົ້າໃນບັນຊີຄວບຄຸມການສົ່ງອອກ ແລະອື່ນໆ. ຫຼັງຈາກປ່າວຂ່າວດັ່ງກ່າວ, ລາຄາສິນຄ້າທີ່ຊື້ຂາຍລ່ວງໜ້າໃນຕະຫຼາດຫຼັກຊັບອາເມຣິກາໄດ້ຫຼຸດລົງຢ່າງຫຼວງຫຼາຍ, ສິນຄ້າທີ່ຊື້ຂາຍລ່ວງໜ້າຂອງຕົວຊີ້ວັດໂດວຈອນສ, ສິນຄ້າທີ່ຊື້ຂາຍລ່ວງໜ້າຂອງຕົວຊີ້ວັດນາສດັກ 100, ສິນຄ້າທີ່ຊື້ຂາຍລ່ວງໜ້າຂອງຕົວຊີ້ວັດ S&P 500 ລ້ວນແຕ່ໄດ້ຫຼຸດລົງຫຼາຍກວ່າ 3%.
ກ່ຽວກັບສົງຄາມການຄ້າ ແລະ ສົງຄາມພາສີ, ຈີນເຄີຍໄດ້ຊີ້ແຈງຢ່າງຈະແຈ້ງມາແຕ່ດົນແລ້ວວ່າ: ຈີນບໍ່ຢາກປະທະກັນ ແຕ່ກໍບໍ່ຢ້ານການປະທະກັນ, ໃນກໍລະນີທີ່ຈຳເປັນຕ້ອງຕອບໂຕ້ຄືນ. ຝ່າຍອາເມຣິກາອ້າງວ່າ ຕົນເອງເສຍປຽບໃນດ້ານການຄ້າສາກົນ, ອ້າງຕາມເຫດຜົນທີ່ເອີ້ນວ່າ “ສະເໝີພາບກັນ” ໂດຍປະກາດເກັບ “ພາສີສະເໝີກັນ” ເປັນຈຳນວນ 34% ຕໍ່ຈີນ ເຊິ່ງໄດ້ລະເມີດຫຼັກການໃນນະໂຍບາຍສຳລັບປະເທດທີ່ມີສິດທິພິເສດທີ່ສຸດໃນອົງການການຄ້າໂລກ, ໄດ້ທຳລາຍສິດດດ້ານການພັດທະນາທີ່ຊອບທຳຂອງຈີນ ແລະເປັນການກະທຳແບບຂົ່ມເຫັງພຽງລຳພັງແຕ່ຝ່າຍດຽວ.
ການທີ່ອາເມຣິກາຂຶ້ນພາສີບໍ່ພຽງແຕ່ບໍ່ສາມາດແກ້ໄຂບັນຫາຄວາມບໍ່ສົມດຸນດ້ານການຄ້າເທົ່ານັ້ນ, ແຕ່ຍັງຈະສ້າງຜົນກະທົບຕື່ມອີກຕໍ່ເສດຖະກິດຈາກປະເທດຕົນ. ອີງຕາມຂໍ້ມູນຂອງກະຊວງການຄ້າອາເມຣິກາສະແດງໃຫ້ເຫັນວ່າ, ປີ 2024 ການຂາດດຸນການຄ້າຂອງອາເມຣິກາມີເຖິງ 1.210 ຕື້ໂດລາ, ເພີ່ມຂຶ້ນ 50% ເມື່ອທຽບໃສ່ກ່ອນລັດຖະບານອາເມຣິກາກໍ່ສົງຄາມພາສີຕໍ່ທົ່ວໂລກເມື່ອປີ 2017. ນັບແຕ່ປີ 2018-2024, ຄວາມໄດ້ປຽບດຸນການຄ້າຂອງຈີນຕໍ່ອາເມຣິກາໄດ້ເພີ່ມຂຶ້ນ ຈາກ 323,33 ຕື້ໂດລາເປັນ 361 ຕື້ໂດລາ. ນີ້ໄດ້ສະແດງໃຫ້ເຫັນຢ່າງຈະແຈ້ງວ່າ, ການສ້າງກຳແພງພາສີບໍ່ສາມາດແກ້ໄຂບັນຫາທີ່ອາເມຣິກາເປັນຫ່ວງເປັນໃຍ, ແລະການຮ່ວມມືແບບຕ່າງຝ່າຍຕ່າງໄດ້ຮັບຜົນປະໂຫຍດຈຶ່ງເປັນຄວາມປາດຖະໜາຮ່ວມຂອງປະຊາຊົນທຸກປະເທດ.
ໃນໂລກປັດຈຸບັນນີ້, ການຫັນເປັນຫຼາຍຂົ້ວ ແລະ ເສດຖະກິດໂລກາພິວັດໄດ້ພັດທະນາລົງສູ່ລວງເລິກ, ລັດທິຝ່າຍດຽວ ແລະ ລັດທິປົກປ້ອງການຄ້າທີ່ຖິ້ມຜົນກະທົບໃສ່ປະເທດອື່ນນັ້ນບໍ່ສອດຄ່ອງກັບຈິດໃຈຂອງຊາວໂລກ. ອາເມຣິກາຄວນ ແກ້ໄຂການກະທຳທີ່ຜິດພາດໃນທັນທີ, ຍຸດຕິການນຳໃຊ້ພາສີເປັນເຄື່ອງມືທີ່ຂົ່ມເຫັງປະເທດອື່ນ. ປະເທດຕ່າງໆໃນໂລກກໍຄວນສາມັກຄີກັນ ຮ່ວມກັນຕອບໂຕ້ການຂົ່ມເຫັງພຽງລຳພັງແຕ່ຝ່າຍດຽວຂອງອາເມຣິກາ, ປົກປ້ອງໂຄງປະກອບການຄ້າຫຼາຍຝ່າຍ. ສົງຄາມພາສີ ແລະ ສົງຄາມການຄ້າຈະບໍ່ມີຜູ້ຊະນະ ເຊິ່ງເປັນສັດຈະທຳທີ່ຈະບໍ່ມີອັນໃດມາເຮັດໃຫ້ຫວັ່ນໄຫວຄອນແຄນໄດ້.