ທ່ານສີຈິ້ນຜິງສົນທະນາທາງໂທລະສັບກັບປະທານາທິບໍດີອາເມຣິກາ
ຕອນຄ່ຳວັນທີ 24 ພະຈິກນີ້, ທ່ານສີຈິ້ນຜິງ ປະທານປະເທດແຫ່ງ ສປ ຈີນໄດ້ສົນທະນາທາງໂທລະສັບກັບທ່ານໂດນັນ ທຣຳ ປະທານາທິບໍດີອາເມຣິກາ.
ທ່ານສີຈິ້ນຜິງກ່າວວ່າ: ນັບແຕ່ການພົບປະກັນຢູ່ນະຄອນບູຊານຂອງ ສ.ເກົາຫຼີເປັນຕົ້ນມາ, ການພົວພັນລະຫວ່າງຈີນ-ອາເມຣິກາໂດຍລວມຂະຫຍາຍຕົວໄປສູ່ທິດທາງທີ່ດີຂຶ້ນຢ່າງໜັກແໜ້ນ ແລະ ໄດ້ຮັບການຕອບຮັບຢ່າງກວ້າງຂວາງຈາກສອງປະເທດ ແລະ ປະຊາຄົມໂລກ. ພຶດຕິກຳຕົວຈິງພິສູດໃຫ້ເຫັນອີກເທື່ອໜຶ່ງວ່າ: ຈີນ ແລະ ອາເມຣິກາ “ຮ່ວມມືກັນຈະສ້າງຜົນປະໂຫຍດເຊິ່ງກັນແລະກັນ ແລະ ການຕໍ່ສູ້ກັນຈະທຳລາຍຜົນປະໂຫຍດເຊິ່ງກັນແລະກັນ” ເປັນຄວາມຮູ້ທົ່ວໄປທີ່ຖືກພິສູດມາຫຼາຍເທື່ອແລ້ວ, ຈີນ ແລະ ອາເມຣິກາ “ສ້າງຜົນປະໂຫຍດໃຫ້ແກ່ກັນ ແລະ ຈະເລີນຮຸ່ງເຮືອງຮ່ວມກັນ” ແມ່ນສະພາບຕົວຈິງທີ່ສາມາດເຫັນໄດ້ ແລະ ຈັບຕ້ອງໄດ້. ສອງຝ່າຍຄວນຮັກສາທ່າອຽງດັ່ງກ່າວ, ຍຶດໝັ້ນທິດທາງທີ່ຖືກຕ້ອງ, ປະຕິບັດຕາມທ່າທີທີ່ສະເໝີພາບກັນ, ເຄົາລົບເຊິ່ງກັນແລະກັນ ແລະ ສ້າງຜົນປະໂຫຍດໃຫ້ແກ່ກັນ, ເປີດກວ້າງຂົງເຂດການຮ່ວມມື ແລະ ຫຼຸດຜ່ອນບັນຫາທີ່ຍັງຄົງຄ້າງຢູ່ໃຫ້ໜ້ອຍລົງ, ພະຍາຍາມຍາດເອົາຄວາມຄືບໜ້າທີ່ຕັ້ງໜ້າຫຼາຍກວ່າເກົ່າ, ເປີດພື້ນທີ່ການຮ່ວມມືໃໝ່ໃຫ້ແກ່ການພົວພັນລະຫວ່າງຈີນ-ອາເມຣິກາ ເພື່ອສ້າງຜົນປະໂຫຍດໃຫ້ແກ່ປະຊາຊົນສອງຊາດ ແລະ ປະຊາຊົນທົ່ວໂລກໃຫ້ໄດ້ຫຼາຍກວ່າເກົ່າ.
ທ່ານສີຈິ້ນຜິງໄດ້ບັນຍາຍຫຼັກໝັ້ນຂອງຈີນໃນບັນຫາໄຕ້ຫວັນ ແລະ ກ່າວເນັ້ນໜັກວ່າ: ໄຕ້ຫວັນກັບຄືນສູ່ຈີນແມ່ນເປັນພາກສ່ວນສຳຄັນໃນລະບຽບສາກົນຫຼັງສົງຄາມໂລກຄັ້ງທີ 2. ຈີນ ແລະ ອາເມຣິກາເຄີຍຄຽງບ່າຄຽງໄຫຼ່ຕໍ່ຕ້ານລັດທິຟາດຊິດ ແລະ ລັດທິຂຸນເສິກ. ປັດຈຸບັນ, ສອງຝ່າຍຍິ່ງຄວນຮ່ວມກັນປົກປ້ອງໝາກຜົນແຫ່ງໄຊຊະນະໃນສົງຄາມໂລກຄັ້ງທີ 2 ໃຫ້ດີ.
ທ່ານໂດນັນ ທຣຳກ່າວວ່າ: ການພົບປະກັນລະຫວ່າງຂ້າພະເຈົ້າກັບທ່ານສີຈິ້ນຜິງຢູ່ນະຄອນບູຊານແມ່ນເຕັມໄປດ້ວຍຄວາມມ່ວນຊື່ນ, ຂ້າພະເຈົ້າເຫັນດີເຫັນພ້ອມນຳຄວາມເຫັນຂອງທ່ານທີ່ມີຕໍ່ການພົວພັນລະຫວ່າງສອງປະເທດ. ສອງຝ່າຍຄວນຈັດຕັ້ງປະຕິບັດຄວາມເຫັນທີ່ເປັນເອກະພາບກັນທີສຳຄັນໃນການພົບປະທີ່ນະຄອນບູຊານຢ່າງຮອບດ້ານ. ຈີນໄດ້ເສີມຂະຫຍາຍບົດບາດສຳຄັນໃນການຍາດເອົາໄຊຊະນະໃນສົງຄາມໂລກຄັ້ງທີ 2 ແລະ ອາເມຣິກາເຂົ້າໃຈຄວາມສຳຄັນຂອງບັນຫາໄຕ້ຫວັນທີ່ມີຕໍ່ຈີນ.