ທ່ານ ສີຈິ້ນຜິງ ໃຫ້ຄຳຊີ້ນຳສຳຄັນຕໍ່ວຽກງານການປົກຄອງປະເທດຕາມກົດໝາຍຢ່າງຮອບດ້ານ
ກອງປະຊຸມວຽກງານການປົກຄອງປະເທດຕາມກົດໝາຍຢ່າງຮອບດ້ານຂອງສູນກາງພັກຄອມມູນິດຈີນໄດ້ຈັດຂຶ້ນຢູ່ນະຄອນຫຼວງປັກກິ່ງໃນລະຫວ່າງວັນທີ 17 ຫາ 18 ພະຈິກນີ້.
ຫວ່າງມໍ່ໆມານີ້, ທ່ານ ສີຈິ້ນຜິງ, ເລຂາທິການໃຫຍ່ຄະນະກຳມະການສູນກາງພັກຄອມມູນິດຈີນ, ປະທານປະເທດ, ປະທານຄະນະກຳມະການການທະຫານສູນກາງຈີນໄດ້ໃຫ້ຄຳຊີ້ນຳສຳຄັນຕໍ່ວຽກງານການປົກຄອງປະເທດຕາມກົດໝາຍຢ່າງຮອບດ້ານໂດຍລະບຸວ່າ: ນັບແຕ່ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 18 ຂອງພັກຄອມມູນິດຈີນເປັນຕົ້ນມາ, ສູນກາງພັກຄອມມູນິດຈີນໄດ້ຖືເອົາການປົກຄອງປະເທດຕາມກົດໝາຍຢ່າງຮອບດ້ານຈັດເຂົ້າໃນການວາງແຜນຍຸດທະສາດ “4 ຮອບດ້ານ” ແລະອອກແຮງຊຸກຍູ້ຢ່າງແຂງແຮງ, ໄດ້ສ້າງສະພາບການລວມແຫ່ງການປົກຄອງປະເທດຕາມກົດໝາຍຢ່າງຮອບດ້ານໂດຍຂັ້ນພື້ນຖານ, ລະບົບການປົກຄອງຕາມກົດໝາຍສັງຄົມນິຍົມທີ່ມີສີສັນພິເສດຂອງຈີນໄດ້ຮັບການປັບປຸງໃຫ້ສົມບູນຂຶ້ນຢ່າງບໍ່ຢຸດຢັ້ງ.
ທ່ານ ສີຈິ້ນຜິງ ເນັ້ນໜັກວ່າ: ໃນຂະບວນການໃໝ່, ຕ້ອງສ້າງລະບົບການປົກຄອງຕາມກົດໝາຍຂອງສັງຄົມນິຍົມທີ່ມີສີສັນພິເສດຂອງຈີນໃຫ້ສົມບູນກວ່າເກົ່າ, ສ້າງປະເທດສັງຄົມນິຍົມທີ່ປົກຄອງຕາມກົດໝາຍໃນລະດັບສູງກວ່າເກົ່າ, ຊຸກຍູ້ວຽກງານການປົກຄອງປະເທດຕາມກົດໝາຍໃນທຸກດ້ານຂອງປະເທດຢ່າງຮອບດ້ານ, ເພື່ອສະໜອງການຮັບປະກັນດ້ານການປົກຄອງຕາມກົດໝາຍທີ່ເຂັ້ມແຂງໃຫ້ແກ່ການຊຸກຍູ້ການສ້າງພາລະກິດອັນຍິ່ງໃຫຍ່ໃນການສ້າງປະເທດໃຫ້ເຂັ້ມແຂວງ ແລະ ການຟື້ນຟູຄວາມຈະເລີນຮຸ່ງເຮືອງຂອງປະຊາຊາດຈີນຢ່າງຮອບດ້ານດ້ວຍຄວາມທັນສະໄໝແບບຈີນ.