ໝາກໄມ້ປ່ຽນຊີວິດ ແລະ ຕິດພັນກັບການປະຕິວັດຊາດ
ເດືອນຕຸລາ ປີ 2022, ພາຍຫຼັງກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 20 ຂອງພັກຄອມມູນິດຈີນສຳເລັດລົງແລ້ວ, ທ່ານ ສີຈິ້ນຜິງ ເລຂາທິການໃຫຍ່ຄະນະກຳມະການສູນກາງພັກຄອມມູນິດຈີນ ໄດ້ເດີນທາງອອກຈາກນະຄອນຫຼວງປັກກິ່ງເປັນຄັ້ງທຳອິດ ເພື່ອໄປເຄື່ອນໄຫວຢ້ຽມຢາມ ແລະ ເຮັດວຽກຢູ່ນະຄອນຢຽນອ່ານ ແຂວງສ້ານຊີ. ເພິ່ນໄດ້ຍ່າງເຂົ້າໄປໃນສວນໝາກໂປ້ມຂອງບ້ານນານໂກ່ວ ຕາແສງກ່າວສຽວ ແລະ ເດັດໝາກໂປ້ມສຸກແດງໃຫຍ່ໜ່ວຍໜຶ່ງ ທັງຍົກໃຫ້ເຫັນວ່າ: “ການອອກແຮງພັດທະນາຂະແໜງການປູກໝາກໂປ້ມ ສາມາດເວົ້າໄດ້ວ່າແມ່ນມີເງື່ອນໄຂເອື້ອອຳນວຍໃນດ້ານດິນຟ້າອາກາດ, ດິນ ແລະ ຄວາມສັດທາຂອງປະຊາຊົນ.”
ຢຽນອ່ານເໝາະແກ່ການປູກໝາກໂປ້ມ. ເວົ້າເລື່ອງເງື່ອນໄຂດິນຟ້າອາກາດແລ້ວ, ທີ່ແຫ່ງນີ້ເປັນໜຶ່ງໃນເຂດແຄວ້ນດີທີ່ສຸດສຳລັບການປູກໝາກໂປ້ມໃນທົ່ວໂລກ ເຊິ່ງໄດ້ຮັບການຢືນຢັນຈາກອົງການສະຫະປະຊາຊາດ; ເວົ້າໃນເງື່ອນໄຂດ້ານດິນແລ້ວ, ດິນເຫຼືອງມີລັກສະນະພຸຜຸ່ຍ ດູດຊຶມນ້ຳ ແລະ ອາກາດລຸລ່ວງໄດ້ງ່າຍ, ຍັງມີຈຸລະສານຫຼາຍຢ່າງ; ເວົ້າເລື່ອງຄວາມສັດທາຂອງປະຊາຊົນ, ຢຽນອ່ານເລີ່ມປູກໝາກໂປ້ມແມ່ນປາສະຈາກມະຫາຂະບວນການຜະລິດໃນສະໄໝປະຕິວັດບໍ່ໄດ້ ເຊິ່ງຄ້ຳຊູດ້ວຍນ້ຳໃຈສູ້ຊົນດ້ວຍຄວາມທໍລະຫົດອົດທົນ.
ຢຽນອ່ານເລີ່ມປູກໝາກໂປ້ມມາຕັ້ງແຕ່ສະໄໝປະຕິວັດ ຄືແຕ່ສະໄໝທີ່ສູນກາງພັກຄອມມູນິດຈີນຕັ້ງສຳນັກງານຢູ່ຢຽນອ່ານ. ປີ1940, ສະຖາບັນວິທະຍາສາດທຳມະຊາດຢຽນອ່ານຂອງເຂດຊາຍແດນສ້ານຊີ່-ກ້ານຊູ່-ນິງເຊ້ຍ ເຊິ່ງເປັນຖານທີ່ໝັ້ນຂອງການປະຕິວັດໃນເວລານັ້ນ ໄດ້ນຳເອົາເບັ້ຍໝາກໂປ້ມມາທົດລອງປູກຢູ່ນິຄົມກະສິກຳກວ່າງຮວາ. ປີ1947, ຊາວກະສິກອນໜຸ່ມຜູ້ໜຶ່ງຂອງບ້ານອ່າຊື້ ເມືອງລົ້ວຊວນ ໄດ້ໃຊ້ລວາຕ່າງເອົາເບັ້ຍໝາກໂປ້ມ200 ເບັ້ຍ ມາຈາກເມືອງຫຼິງປາວ ແຂວງເຫີນານ. ລາວຍັງໄດ້ແຕ່ງເພງໜຶ່ງຊື່ວ່າ: “ຊວນທ່ານປູກຕົ້ນໄມ້” ເຊິ່ງມີເນື້ອງຮອງວ່າ: “ຄັນຢາກຮັ່ງມີ ໃຫ້ປູກໄມ້ກ່ອນ, ຕົ້ນໝາກໂປ້ມ, ຕົ້ນຮັ່ງມີ…”
ຕົ້ນໝາກໂປ້ມທີ່ເລີ່ມປູກມາຕັ້ງແຕ່ສະໄໝປະຕິວັດນັ້ນ, ມາເຖິງປັດຈຸບັນໄດ້ກາຍເປັນອຸດສາຫະກຳທ່າແຮງທີ່ສ້າງຄວາມຮັ່ງມີໃຫ້ແກ່ປະຊາຊົນຂອງນະຄອນຢຽນອ່ານ ໂດຍສາມາດສ້າງວຽກເຮັດງານທຳໃຫ້ປະຊາຊົນຫຼາຍກວ່າລ້ານຄົນ, ສ້າງມູນຄ່າຕ່ອງໂສ້ອຸດສາຫະກຳຄົບວົງຈອນຫຼາຍກວ່າ 60 ຕື້ຢວນ.
ເດືອນກຸມພາ ປີ 2015, ທ່ານ ສີຈິ້ນຜິງ ປະທານປະເທດຈີນໄດ້ກັບເມື່ອຮອດບ້ານຫຼຽງເຈ່ຍເຫີ ທາງພາກເໜືອແຂວງສ້ານຊີ ທີ່ຕົນເຄີຍລົງພື້ນຖານໃນຕອນໄວໜຸ່ມ, ເພິ່ນໄດ້ເດີນທາງໄປເບິ່ງສວນໝາກໂປ້ມຢູ່ເທິງເປີ້ນພູດ້ວຍລົດໃຫຍ່ວິບາກ ແລະ ທັງໄດ້ໃຫ້ຄຳຊີ້ນຳວ່າ: “ຕ້ອງພັດທະນາອຸດສາຫະກຳໝາກໂປ້ມຕໍ່ໄປຢ່າງເດັດດ່ຽວ.”
ໃນໂອກາດຢ້ຽມຢາມບ້ານນານໂກ່ວ ເມື່ອປີ 2022, ທ່ານ ສີຈິ້ນຜິງ ໄດ້ເວົ້າກັບບັນດາພີ່ນ້ອງຊາວບ້ານວ່າ: ເພິ່ນໄດ້ດຳລົງຊີວິດຢູ່ພາກເໜືອແຂວງສ້ານຊີເປັນເວລາ 7 ປີ, ຕອນນັ້ນ, ເມື່ອໄດ້ເຫັນຊີວິດການເປັນຢູ່ຂອງພີ່ນ້ອງປະຊາຊົນທັງຫຼາຍທຸກຍາກລຳບາກຫຼາຍ, ຢູ່ໃນໃຈກໍຄິດວ່າ ຈະເຮັດແນວໃດເພື່ອໃຫ້ທຸກຄົນມີຊີວິດການເປັນຢູ່ດີຂຶ້ນ. ເທື່ອນີ້ມາຢຽນອ່ານ, ເມື່ອໄດ້ເຫັນສະພາບການເກັບກ່ຽວທີ່ອຸດົມສົມບູນ, ເງື່ອນໄຂເສັ້ນທາງຄົມມະນາຄົມໄດ້ຮັບການປັບປຸງດີຂຶ້ນຢ່າງຫຼວງຫຼາຍ, ໄດ້ເກີດມີການປ່ຽນແປງແບບໜ້າມືເປັນຫຼັງມື. ເພິ່ນໄດ້ຍົກຍ້ອງຊົມເຊີຍວ່າ: “ພວກສະຫາຍຊອກໄດ້ທິດທາງການພັດທະນາອຸດສາຫະກຳທີ່ເໝາະສົມແລ້ວ.”
ຢູ່ຈີນ, ໝາກໂປ້ມ ມີສົມຍານາມວ່າ ໝາກໄມ້ຂວັນໃຈປະຊາຊົນ. ປະລິມານການຜະລິດ ແລະສົ່ງອອກໝາກໂປ້ມຕໍ່ປີຂອງຈີນໄດ້ຄອງອັນດັບໜຶ່ງຂອງໂລກ, ເຂດຜະລິດໝາກໂປ້ມປົກຄຸມທົ່ວປະເທດແຕ່ເໜືອຮອດໃຕ້, ຊາວກະສິກອນຈຳນວນຫຼວງຫຼາຍໄດ້ຖືຕົ້ນໝາກໂປ້ມເປັນເຄື່ອງປູກຫຼັກ, ເຂົາເຈົ້າອາໄສການປູກໝາກໂປ້ມເພື່ອລ້ຽງຊີບ ແລະ ສ້າງຊີວິດການເປັນຢູ່ທີ່ດີຂຶ້ນ.
ເດືອນກັນຍາ ປີ 2024, ທ່ານ ສີຈິ້ນຜິງ ໄດ້ເດີນທາງໄປຢ້ຽມຢາມຖານຜະລິດໝາກໂປ້ມຮວານິວ ພູນານຊ່ານ ເມືອງມ້າຍຈີ່ ນະຄອນທຽນສຸຍ ແຂວງກ່ານຊູ້, ເພິ່ນກ່າວວ່າ: “ຕ້ອງເພີ່ມທະວີການປົກປັກຮັກສາ ແລະ ບົ່ມເພາະແນວພັນ, ປັບປຸງວີທີການປູກໃຫ້ດີຂຶ້ນ, ປະດິດສ້າງຮູບແບບການຕະຫຼາດ, ພັດທະນາອຸດສາຫະກຳທີ່ມີເອກະລັກພິເສດນີ້ໃຫ້ເຕີບໃຫຍ່ຂະຫຍາຍຕົວຍິ່ງໆຂຶ້ນ.” ເພິ່ນຍັງຊີ້ນຳວ່າ: “ການພັດທະນາຊົນນະບົດໃຫ້ຈະເລີນຮຸ່ງເຮືອງຕ້ອງອາໄສອຸດສາຫະກຳ, ທ້ອງຖິ່ນຕ່າງໆຕ້ອງເສີມຂະຫຍາຍທ່າແຮງຂອງຕົນ, ກ້າວເດີນຕາມເສັ້ນທາງພັດທະນາໃຫ້ຈະເລີນທີ່ສອດຄ່ອງກັບທ້ອງຖິ່ນຕົນ.”
ຊຸມປີຜ່ານມານີ້, ໝາກໂປ້ມສາຍພັນ ຮວານີວ ມີຊື່ສຽງນັບມື້ນັບໂດ່ງດັງຂຶ້ນ, ໄດ້ຖືກສົ່ງອອກໄປຂາຍສູ່ 30 ກວ່າປະເທດ ແລະ ເຂດແຄວ້ນ ເຊັ່ນ: ອິນໂດເນເຊຍ, ມາເລເຊຍ, ມານດິຟ ເປັນຕົ້ນ, ສົມວ່າເປັນ “ໝາກໄມ້ສາກົນ”. ປີ 2024, ເມືອງມ້າຍຈີ່ ໄດ້ຈຳໜ່າຍໝາກໂປ້ມຮວານິວ ເຖິງ 640.000 ໂຕນ, ມູນຄ່າ 2 ຕື້ 560 ລ້ານຢວນ. ໃນເວລາກ່າວຄຳອວຍພອນປີໃໝ່ສາກົນ 2025, ທ່ານ ສີຈິ້ນຜິງ ໄດ້ຍົກຍ້ອງຊົມເຊີຍວ່າ “ໝາກໂປ້ມຮວານິວສຸກທັງແດງທັງໃຫຍ່”.
ກ່ອນບຸນກຸດຈີນ ປີ 2025 ຈະໝູນວຽນມາເຖິງ, ທ່ານ ສີຈິ້ນຜິງ ໄດ້ເດີນທາງໄປຢ້ຽມຢາມພະນັກງານ ແລະ ປະຊາຊົນຂັ້ນຮາກຖານຢູ່ແຂວງຫຼຽວນິງ. ໃນກອງປະຊຸມລາຍງານວຽກງານຄະນະພັກ ແລະ ອົງການປົກຄອງແຂວງ, ຈາກອຸດສາຫະກຳໝາກໂປ້ມຂອງແຂວງຫຼຽວນິງ, ທ່ານ ສີຈິ້ນຜິງ ໄດ້ຄິດພໍ້ເລື່ອງລາວເລື່ອງໜຶ່ງຂຶ້ນມາຄື: ໃນໄລຍະບັ້ນຮົບຫຼຽວເສີນ ເຊິ່ງເປັນໜຶ່ງໃນສາມບັ້ນຮົບໃຫຍ່ແຫ່ງການປົດປ່ອຍຊາດ, ຢູ່ເຂດຊົນນະບົດນະຄອນຈິນໂຈ່ວ, ໝາກໂປ້ມສຸກເຕັມສວນ, ນັກຮົບກອງທັບປົດປ່ອຍປະຊາຊົນຈີນທີ່ເດີນທັບຜ່ານສວນໝາກໂປ້ມ, ເຖິງຈະອຶດຫິວປານໃດກໍຕາມ ແຕ່ກໍບໍ່ໄດ້ເດັດກິນແມ່ນແຕ່ໜ່ວຍດຽວ. ຕໍ່ກັບເລື່ອງນີ້, ສະຫາຍ ເໝົາເຈີຕຸ່ງ ອະດີດຜູ້ນຳພັກຄອມມູນິດຈີນກ່າວວ່າ: “ບໍ່ກິນຖືວ່າມີນ້ຳໃຈສູງສົ່ງ, ຫາກກິນກໍຈະກາຍເປັນເລື່ອງຈັງໄຮຫຼາຍ, ເພາະວ່າ ນີ້ແມ່ນໝາກໂປ້ມຂອງປະຊາຊົນ.” ທ່ານ ສີຈິ້ນຜິງ ໄດ້ເວົ້າດ້ວຍຄວາມດູດດື່ມວ່າ: “ໝາກໂປ້ມແບບນີ້, ເຖິງຈະແມ່ນຍຸກປັດຈຸບັນ ພວກເຮົາກໍບໍ່ຄວນກິນເດັດຂາດ.”
ໝາກໂປ້ມເຖິງຈະເປັນໝາກໄມ້ນ້ອຍໆ, ແຕ່ມັນບໍ່ພຽງແຕ່ເຊື່ອມສານເຄັດລັບແຫ່ງການສ້າງຄວາມຮັ່ງມີ ແລະ ວິທີການພັດທະນາເທົ່ານັ້ນ ຍັງເປັນສັກຂີພິຍານໃຫ້ແກ່ອຸດົມການແຕ່ຫົວທີຂອງພັກຄອມມູນິດຈີນ. ນີ້ຄືຄຸນຄ່າຂອງໝາກໂປ້ມສຳລັບປະຊາຊົນຈີນ.
ແຫຼ່ງຂ່າວຈາກ: CGTN