ທ່ານ ສີຈິ້ນຜິງ ພົບປະກັບເຈົ້າຊີວິດແອັດສະປາຍ
ຕອນເຊົ້າວັນທີ 12 ພະຈິກນີ້, ຢູ່ຫໍສະພາປະຊາຊົນທີ່ນະຄອນຫຼວງປັກກິ່ງ, ທ່ານ ສີຈິ້ນຜິງ ປະທານປະເທດຈີນໄດ້ພົບປະກັບກັບ ສົມເດັດ ເຟລິເປທີ 6 ຮານປາໂບລ ອັນໂຟນໂຊ ເຈົ້າຊີວິດແອັດສະປາຍທີ່ເດີນທາງມາຢ້ຽມຢາມຈີນທາງລັດຖະກິດ.
ທ່ານ ສີຈິ້ນຜິງ ໄດ້ສະແດງຄວາມຍິນດີຕ້ອນຮັບຕໍ່ ສົມເດັດ ເຟລິເປທີ 6 ຮານປາໂບລ ອັນໂຟນໂຊ ທີ່ເດີນທາງມາຢ້ຽມຢາມຈີນ ແລະກ່າວວ່າ: ຜະບໍລົມວົງສານຸວົງແອັດສະປາຍໄດ້ປະກອບສ່ວນອັນພົ້ນເດັ່ນເຂົ້າໃນການພັດທະນາສາຍພົວພັນລະຫວ່າງຈີນ-ແອັດສະປາຍ. ຈີນຍິນດີຮ່ວມກັບແອັດສະປາຍເກາະແຂນກັນສ້າງສາຍພົວພັນຄູ່ຮ່ວມຍຸດທະສາດຮອບດ້ານທີ່ມີຄວາມໜຽວແໜ້ນທາງຍຸດທະສາດຫຼາຍກວ່າເກົ່າ, ມີພະລັງຊີວິດດ້ານການພັດທະນາຫຼາຍກວ່າເກົ່າ ແລະມີອິດທິພົນສາກົນສູງກວ່າເກົ່າ, ສ້າງລະບົບຄຸ້ມຄອງທົ່ວໂລກທີ່ຍຸຕິທຳ ແລະສົມເຫດສົມຜົນກວ່າເກົ່າ, ຊຸກຍູ້ການສ້າງປະຊາຄົມຮ່ວມຊາຕາກຳຂອງມວນມະນຸດ.
ສົມເດັດ ເຟລິເປທີ 6 ຮານປາໂບລ ອັນໂຟນໂຊ ກ່າວວ່າ, ຜົນງານການພັດທະນາຂອງຈີນປະຈັກຕາຊາວໂລກ, ໜ້າຍ້ອງຍໍຊົມເຊີຍ. ລັດຖະບານແອັດສະປາຍເດັດດ່ຽວຈັດຕັ້ງປະຕິບັດຫຼັກການປະເທດຈີນດຽວ, ສະໜັບສະໜູນການປົກປັກຮັກສາຜືນແຜ່ນດິນອັນຄົບຖ້ວນຂອງຊາດ, ຍິນດີຮ່ວມກັບຈີນຊຸກຍູ້ໃຫ້ສາຍພົວພັນຄູ່ຮ່ວມຍຸດທະສາດຮອບດ້ານລະຫວ່າງສອງຝ່າຍພັດທະນາກ້າວໄປຂ້າງໜ້າຢ່າງບໍ່ຢຸດຢັ້ງ, ສ້າງຄວາມຜາສຸກຫຼາຍກວ່າເກົ່າໃຫ້ແກ່ປະຊາຊົນສອງປະເທດ, ປະກອບສ່ວນຫຼາຍກວ່າເກົ່າເຂົ້າໃນສັນຕິພາບ ແລະສະຖຽນລະພາບໂລກ.