ວາລະສານ “ສິວຊື້” ລົງພິມບົດຄວາມສຳຄັນຂອງທ່ານສີຈິ້ນຜິງ ເລຂາທິການໃຫຍ່ຄະນະກຳມະການສູນກາງພັກຄອມມູນິດຈີນ
ວາລະສານ “ສິວຊື້” ສະບັບທີ 13 ທີ່ພິມຈຳໜ່າຍໃນວັນທີ 1 ກໍລະກົດນີ້ ໄດ້ລົງພິມບົດຄວາມສຳຄັນຂອງທ່ານສີຈິ້ນຜິງ ເລຂາທິການໃຫຍ່ຄະນະກຳມະການສູນກາງພັກຄອມມູນິດຈີນ, ປະທານປະເທດຈີນ, ປະທານຄະນະກຳມະການການທະຫານສູນກາງຈີນ ທີ່ໃສ່ຫົວເລື່ອງວ່າ “ຄວາມສາມັກຄີ ແລະ ການສູ້ຊົນ ແມ່ນເສັ້ນທາງທີ່ຕ້ອງເດີນຜ່ານຂອງປະຊາຊົນຈີນ ເພື່ອສ້າງພາລະກິດອັນຍິ່ງໃຫຍ່ຄັ້ງປະຫວັດສາດ”. ເນື້ອໃນບົດຄວາມດັ່ງກ່າວແມ່ນຄັດຈ້ອນມາຈາກບົດບັນລະຍາຍແລະວິເຄາະທີ່ສຳຄັນຂອງທ່ານເລຂາທິການໃຫຍ່ສີຈິ້ນຜິງໃນລະຫວ່າງເດືອນຕຸລາປີ 2016 ຫາ ເດືອນເມສາປີ 2025.
ບົດຄວາມດັ່ງກ່າວຊີ້ອອກວ່າ: ຄວາມສາມັກຄີທີ່ເກີດຂຶ້ນຈາກເປົ້າໝາຍສູ້ຊົນທີ່ຈະແຈ້ງ ຈຶ່ງແມ່ນຄວາມສາມັກຄີທີ່ໜັກແໜ້ນທີ່ສຸດ, ການສູ້ຊົນທີ່ອາໄສຄວາມສາມັກຄີທີ່ໜັກແໜ້ນໃກ້ຊິດ ຈຶ່ງແມ່ນການສູ້ຊົນທີ່ມີພະລັງແຮງທີ່ສຸດ. ໃນຂະບວນການອອກເດີນທາງຄັ້ງໃໝ່, ພວກເຮົາຕ້ອງອາໄສຄວາມທັນສະໄໝແບບຈີນ ເພື່ອເຕົ້າໂຮມຈິດໃຈແລະກຳລັງແຮງຕື່ມອີກ, ສາມັກຄີກັນແລະສູ້ຊົນຮ່ວມກັນ. ການຫັນເປັນທັນສະໄໝແບບຈີນແມ່ນເປົ້າໝາຍຮ່ວມກັນຂອງປະຊາຊົນທຸກຖ້ວນໜ້າ ແລະກໍແມ່ນວຽກງານອັນຍິ່ງໃຫຍ່ທີ່ເຕັມໄປດ້ວຍຄວາມສ່ຽງແລະສິ່ງທ້າທາຍ, ຕ້ອງພະຍາຍາມດ້ວຍຄວາມທໍລະຫົດອົດທົນ, ຕ້ອງຍຶດໝັ້ນໃຫ້ປະຊາຊົນທຸກຖ້ວນໜ້າມີສ່ວນຮ່ວມນຳກັນ, ສ້າງສາຮ່ວມກັນ ແລະ ຊົມໃຊ້ຮ່ວມກັນ, ອາໄສປະຊາຊົນທຸກຖ້ວນໜ້າຢ່າງໜັກແໜ້ນ ເພື່ອຜ່ານຜ່າຄວາມຫຍຸ້ງຍາກ ແລະ ສ້າງພາລະກິດອັນຍິ່ງໃຫຍ່ຮ່ວມກັນ.