នាយកប្រតិបត្តិក្រុមហ៊ុន Ford៖ មិនត្រឹមតែប្រកួតប្រជែងជាមួយចិនលើរថយន្តអគ្គិសនីប៉ុណ្ណោះទេ ប្រសិនបើយើងចាញ់ ក្រុមហ៊ុន Ford នឹងគ្មានអនាគតនោះទេ

"យើងស្ថិតក្នុងការប្រកួតប្រជែងជាសកលជាមួយប្រទេសចិន មិនមែនតែរថយន្តអគ្គិសនីនោះទេ។ ប្រសិនបើយើងចាញ់ Fordក៏គ្មានអនាគតនោះដែរ"។ ខណៈដែលក្រុមហ៊ុនផលិតរថយន្តរបស់ចិនកំពុងកើនឡើងយ៉ាងខ្លាំង សម្ដីរបស់លោក Jim Farley នាយកប្រតិបត្តិក្រុមហ៊ុន Ford បានឆ្លុះបញ្ចាំងពីការព្រួយបារម្ភកាន់តែខ្លាំងឡើងនៃក្រុមហ៊ុនផលិតរថយន្តចំណាស់នៅអឺរ៉ុប និងអាមេរិក។

អត្ថបទដែលចុះផ្សាយដោយ «កាសែត New York Times»នៅថ្ងៃទី ២១ខែកក្កដា បានចង្អុលបង្ហាញថា ប្រទេសចិនមិនត្រឹមតែជាប្រទេសដែលមានផលិតកម្ម និងនាំចេញរថយន្តធំជាងគេបំផុតនៅលើពិភពលោកប៉ុណ្ណោះទេ ប៉ុន្តែថែមទាំងគ្របដណ្តប់លើរថយន្តអគ្គិសនី និងខ្សែសង្វាក់ឧស្សាហកម្មទាំងមូលរបស់ពួកគេផងដែរ។ បច្ចេកវិទ្យារថយន្តអគ្គិសនីរបស់ប្រទេសចិនកំពុងឈានមុខគេ ហើយម៉ូដែលមួយចំនួនមានថាមពលអគ្គិសនីដែលអាចប្រៀបធៀបទៅនឹងក្រុមហ៊ុន Tesla ប៉ុន្តែវាមានតម្លៃទាបជាង។ BYD បានបង្កើតបច្ចេកវិទ្យាដែលអាចសាកពេញក្នុងរយៈពេល ៥នាទី។ នេះក៏ពន្យល់ពីមូលហេតុដែលការលក់របស់ក្រុមហ៊ុន Tesla នៅក្នុងប្រទេសចិនមានភាពទន់ខ្សោយ ហើយហេតុអ្វីបានជារដ្ឋបាលលោក Biden និង Trump បានហាមឃាត់រថយន្តចិនម្តងហើយម្តងទៀតមិនឱ្យចូលទៅក្នុងទីផ្សារសហរដ្ឋអាមេរិក។

សម្រាប់ប្រទេសចិន នេះគឺមានន័យថា ការធ្វើឱ្យកាន់តែស៊ីជម្រៅនូវវត្តមានរបស់ខ្លួននៅក្នុងទីផ្សារផ្សេងទៀតជុំវិញពិភពលោក។

ក្រុមហ៊ុនផលិតរថយន្តរបស់ចិនបានសាងសង់ ឬកំពុងដំណើរការសាងសង់រោងចក្រនៅក្នុងប្រទេសហុងគ្រី ឥណ្ឌូនេស៊ី រុស្ស៊ី ថៃ និងតួកគី។ ការដាក់ពង្រាយទាំងនេះ រួមទាំងរោងចក្រប្រេស៊ីលរបស់ Great Wall Motor គឺជាផ្នែកនៃកិច្ចខិតខំប្រឹងប្រែងរបស់ប្រទេសចិនក្នុងការប្រកួតប្រជែងសម្រាប់ចំណែកទីផ្សារនៅក្នុងឧស្សាហកម្មរថយន្តពិភពលោក។ ឧស្សាហកម្មរថយន្តគឺជាប្រភពចំណូល និងការងារដ៏សំខាន់ និងជានិមិត្តរូបនៃកិត្យានុភាពជាតិ។

ការផ្លាស់ប្តូរបច្ចេកវិទ្យានេះគឺជាឱកាសសម្រាប់ប្រទេសចិន។ ខណៈពេលដែលរដ្ឋបាល Trump កំពុងព្យាយាមទប់ស្កាត់ការអភិវឌ្ឍរថយន្តអគ្គិសនីនៅក្នុងសហរដ្ឋអាមេរិក ប្រទេសចិនមើលឃើញថា រថយន្តអគ្គិសនីជាឱកាសដ៏កម្រមួយក្នុងការបំបែកទីផ្សារដែលគ្រប់គ្រងជាយូរមកហើយដោយក្រុមហ៊ុនអាល្លឺម៉ង់ ជប៉ុន កូរ៉េ និងអាមេរិក។

ខណៈពេលដែលសមភាគីលោកខាងលិចដូចជា Toyota, GM និង Volkswagen បានតស៊ូដើម្បីធ្វើជាម្ចាស់លើបច្ចេកវិទ្យារថយន្តអគ្គិសនី ការផ្លាស់ប្តូរឧស្សាហកម្មនេះគឺជាអត្ថប្រយោជន៍សម្រាប់ប្រទេសចិន។ រថយន្តចិនបានជន់លិចចូលទៅក្នុងទីផ្សារភាគច្រើនផ្សេងទៀតនៅជុំវិញពិភពលោក ដែលបានក្លាយជានិមិត្តសញ្ញាដ៏មានឥទ្ធិពលនៃការកើនឡើងនៃសេដ្ឋកិច្ច និងបច្ចេកវិទ្យារបស់ប្រទេសចិន។

ម៉្យាងវិញទៀតក្រុមហ៊ុនរថយន្តយក្សលោកខាងលិចមានការព្រួយបារម្ភអំពីរឿងនេះ។

នៅឆ្នាំ ២០២៤ ម៉ាកយីហោចិនបានកើនឡើងទ្វេដងនៃចំណែកទីផ្សាររបស់ពួកគេនៅអឺរ៉ុបដល់ ៦% និងសូម្បីតែនៅក្នុងវិស័យរថយន្តអគ្គិសនីក៏កើនដល់ ២០% ។ ទោះបីជាប្រឈមនឹងពន្ធខ្ពស់ក៏ដោយ ក៏សាលតាំងបង្ហាញរថយន្តអគ្គិសនីរបស់ចិនបានរីករាលដាលពីទីក្រុង Milan ទៅកាន់ទីក្រុងបុមបៃ។

ឥឡូវនេះ ចិន​កំពុង​ចូល​ទីផ្សារ​អាមេរិក​ឡាទីន។ ក្រុមហ៊ុន Great Wall បានកាន់កាប់រោងចក្រ Mercedes-Benz នៅជិតទីក្រុង Sao Paulo ហើយ BYD ក៏បានទិញរោងចក្ររបស់ Ford ក្នុងប្រទេសប្រេស៊ីលផងដែរ។ ក្រុមហ៊ុន Ford បាននិយាយដោយស្ទាក់ស្ទើរថា នេះគឺជា "ការសម្រេចចិត្តដ៏លំបាក ប៉ុន្តែចាំបាច់"៕

អ្នកបកប្រែ៖Shen Yan(កល្យាណ)