ក្រសួងការបរទេសចិនរំពឹងថា សហរដ្ឋអាមេរិកនឹងធ្វើការជាមួយប្រទេសចិន ដើម្បីអនុវត្តគំនិតឯកភាពរួមដ៏សំខាន់របស់ប្រមុខរដ្ឋនៃប្រទេសទាំងពីរក្នុងកិច្ចសន្ទនាតាមទូរស័ព្ទ
កាលពីថ្ងៃទី១២ខែមិថុនា លោកLin Jianអ្នកនាំពាក្យក្រសួងការបរទេសចិនបានធ្វើជាអធិបតីក្នុងសន្និសីទសារព័ត៌មានជាប្រចាំ។ មានអ្នកសារព័ត៌មានបានសួរសំណួរអំពីកិច្ចប្រជុំនៃយន្តការពិគ្រោះពិភាក្សាខាងសេដ្ឋកិច្ចនិងពាណិជ្ជកម្មចិន-អាមេរិក។
លោកLin Jianបានគូសបញ្ជាក់ថា កិច្ចប្រជុំនេះបានធ្វើឡើងក្រោមការណែនាំជាយុទ្ធសាស្ត្ររបស់ប្រមុខរដ្ឋនៃប្រទេសទាំងពីរ ភាគីទាំងពីរបានមូលមតិជាឯកច្ឆន្ទអំពីការអនុវត្តគំនិតឯកភាពរួមដ៏សំខាន់របស់ប្រមុខរដ្ឋនៃប្រទេសទាំងពីរក្នុងកិច្ចជំនួបតាមទូរស័ព្ទកាលពីថ្ងៃទី៥ខែមិថុនានិងក្របខ័ណ្ឌនៃវិធានការសម្រាប់ពង្រឹងលទ្ធផលជាផ្លែផ្កានៃកិច្ចចរចាសេដ្ឋកិច្ចនិងពាណិជ្ជកម្មនៅទីក្រុងហ្សឺណែវ ដែលទទួលបានការវិវឌ្ឍរីកចម្រើនថ្មីអំពីការដោះស្រាយកង្វល់ផ្នែកសេដ្ឋកិច្ចនិងពាណិជ្ជកម្មរៀងៗខ្លួន។
ជានិច្ចកាល ចិនតែងតែអនុវត្តតាមការសន្យារបស់ខ្លួន ហើយទទួលបានសមិទ្ធផលនៃការអនុវត្ត។ បំណាច់នឹងឈានដល់គំនិតឯកភាពគ្នាហើយ ដូច្នេះភាគីទាំងពីរគួរគោរពប្រតិបត្តិតាម។ ភាគីចិនរំពឹងថា សហរដ្ឋអាមេរិកនឹងធ្វើការជាមួយប្រទេសចិន ដើម្បីអនុវត្តគំនិតឯកភាពរួមដ៏សំខាន់របស់ប្រមុខរដ្ឋនៃប្រទេសទាំងពីរក្នុងកិច្ចសន្ទនាតាមទូរស័ព្ទ ជំរុញឱ្យយន្តការពិគ្រោះពិភាក្សាខាងសេដ្ឋកិច្ចនិងពាណិជ្ជកម្មចិន-អាមេរិកដើរតួនាទីកាន់តែធំ ក៏ដូចជាបង្កើនគំនិតឯកភាពរួម កាត់បន្ថយការយល់ច្រឡំនិងពង្រឹងកិច្ចសហប្រតិបត្តិការតាមរយៈការប្រស្រ័យទាក់ទងនិងកិច្ចសន្ទនា៕