លោក Xi Jinping ប្រធានរដ្ឋចិនជួបសន្ទនាជាមួយលោក William Ruto ប្រធានាធិបតីកេនយ៉ា
ថ្ងៃទី ២៤ ខែមេសា នៅទីក្រុងប៉េកាំង លោក Xi Jinping ប្រធានរដ្ឋចិនបានជួបសន្ទនាជាមួយលោក William Ruto ប្រធានាធិបតីកេនយ៉ា ដែលអញ្ជើញបំពេញទស្សនកិច្ចផ្លូវរដ្ឋនៅចិន។ ប្រមុខរដ្ឋនៃប្រទេសទាំងពីរបានឯកភាពលើកកម្ពស់ទំនាក់ទំនងទ្វេភាគីជាសហគមន៍រួមវាសនាចិន-កេនយ៉ាក្នុងយុគសម័យថ្មី។
លោក Xi Jinping បានថ្លែងថា ការកសាងសហគមន៍រួមវាសនា ជាមាគ៌ាសច្ចភាពដែលគោរពគ្នា ស្មើភាពគ្នា ផ្តល់ផលប្រយោជន៍ដល់គ្នា និងឈ្នះ-ឈ្នះ។ ចិននិងកេនយ៉ាគួរធ្វើជាអ្នកដើរស្របគ្នានិងមិត្តពិតប្រាកដតាមមាគ៌ាទំនើបកម្ម។ មិនថាសភាពការណ៍អន្តរជាតិមានការប្រែប្រួលយ៉ាងណាក្តី ក៏កម្មវត្ថុដែលសហប្រតិបត្តិការ ឈ្នះ-ឈ្នះ អភិវឌ្ឍរួមគ្នារវាងចិននិងទ្វីបអាហ្រ្វិកគឺមិនកែប្រែនោះទេ។
លោក Xi Jinping បានសង្កត់ធ្ងន់ថា សង្គ្រាមពន្ធគយ និងសង្គ្រាមពាណិជ្ជកម្មគ្មានអ្នកឈ្នះនោះទេ។ ប្រទេសចិនមិនបង្កហេតុ តែក៏មិនខ្លាចការបង្កហេតុដែរ ចិនមានឆន្ទៈធ្វើការជាមួយបណ្តាប្រទេសលើសកលលោក ដើម្បីឆ្លើយតបនឹងបញ្ហាគ្រប់យ៉ាងតាមរយៈការសាមគ្គីនិងកិច្ចសហប្រតិបត្តិការ ដើម្បីគាំពារសិទ្ធិនិងផលប្រយោជន៍ស្របច្បាប់របស់ខ្លួន គាំពារសណ្តាប់ធ្នាប់ពាណិជ្ជកម្មអន្តរជាតិ គាំពារសច្ចយុត្តិធម៌អន្តរជាតិ។
ជាការឆ្លើយតប លោក William Ruto បានថ្លែងថា ភាគីកេនយ៉ាមានឆន្ទៈពួតដៃគ្នាជាមួយចិនដើម្បីកសាងសហគមន៍រួមវាសនា។ កិច្ចសហប្រតិបត្តិការរវាងអាហ្វ្រិកនិងចិនមានអំណោយផលដល់សន្តិភាពនិងវឌ្ឍនភាពនៃអាហ្វ្រិក។ សង្គ្រាមពាណិជ្ជកម្មបានបំផ្លាញច្បាប់និងសណ្តាប់ធ្នាប់អន្តរជាតិដែលមានស្រាប់។ ភាគីកេនយ៉ាសូមកោតសរសើរចំពោះភាគីចិន ដែលបានដើរតួនាទីជាក្បាលម៉ាស៊ឺនរក្សាស្ថិរភាពក្នុងសភាពការណ៍ច្របូកច្របល់នាពេលបច្ចុប្បន្ន ដែលបានគាំពារផលប្រយោជន៍ស្របច្បាប់របស់ប្រទេសសកលខាងត្បូងទាំងមូល៕
