ရှီကျင့်ဖိန် သည် Ho Iat Seng နှင့် တွေ့ဆုံ

ဒီဇင်ဘာလ ၁၈ ရက်နေ့ ညနေပိုင်းတွင် တရုတ်နိုင်ငံသမ္မတ ရှီကျင့်ဖိန် သည် မကာအိုအထူးအုပ်ချုပ်ရေးဒေသ အုပ်ချုပ်ရေးမှူး Ho Iat Seng နှင့် မကာအိုဒေသတွင် တွေ့ဆုံခဲ့ပါသည်။

ထိုသို့တွေ့ဆုံရာတွင် ရှီကျင့်ဖိန် က Ho Iat Seng ဦးဆောင်သော ယခုအကြိမ် မကာအို အထူးအုပ်ချုပ်ရေးဒေသအစိုးရသည် မကာအိုလုပ်ငန်းပေါင်းစုံကို စည်းလုံးညီညွှတ်ပြီး “တိုင်းပြည်တစ်ပြည်၊ စနစ်နှစ်မျိုး” မူဝါဒကို ဘက်စုံမှန်ကန်စွာ ဦးလည်မသုန် ကျင့်သုံးခဲ့ ကြောင်း၊ နိုင်ငံတော်အချုပ်အခြာအာဏာ၊ လုံခြုံရေးနှင့် ဖွံ့ဖြိုးတိုးတက်ရေးအကျိုးစီးပွားကို ပြတ်ပြတ်သားသားကာကွယ်ထိန်းသိမ်းပြီး ကိုဗစ်-၁၉ရောဂါ၏ ပြင်းထန်သော ထိခိုက်မှုနှင့် စိန်ခေါ်မှုများကို ရင်ဆိုင်ကျော်လွှားခဲ့ကြောင်း၊ စီးပွားရေး အသင့်အတင့်ဘက်စုံဖွံ့ဖြိုး တိုးတက်ရေးကို ကြိုးပမ်းတွန်းအားပေးပြီး လုပ်ငန်းအသီးသီးတွင် တိုးတက်မှုအသစ်များ ရရှိကာ စည်ပင်သာယာပြီး တည်ငြိမ်သော အခြေအနေကို ခိုင်မြဲတိုးတက်လာစေခဲ့ ကြောင်း၊ တရုတ်ကွန်မြူနစ်ပါတီဗဟိုကော်မတီအနေဖြင့် Ho Iat Seng နှင့် ယခုအကြိမ် မကာအိုအထူးအုပ်ချုပ်ရေးဒေသအစိုးရတို့၏လုပ်ငန်းဆောင်တာကို အပြည့်အဝတန်ဖိုးထား ချီးကျူးကြောင်း ပြောကြားခဲ့ပါသည်။

Ho Iat Seng က သမ္မတ ရှီကျင့်ဖိန် နှင့် တရုတ်ကွန်မြူနစ်ပါတီဗဟိုကော်မတီ၏ ယုံကြည်မှုနှင့် ထောက်ခံမှုကို ကျေးဇူးတင်ရှိပါကြောင်း၊ တရုတ်ကွန်မြူနစ်ပါတီ ဗဟို ကော်မတီ၏ အားပေးထောက်ခံမှုကြောင့် လွန်ခဲ့သည့် ၅ နှစ်အတွင်းတွင် မကာအို အထူးအုပ်ချုပ်ရေးဒေသအစိုးရသည် မကာအိုလုပ်ငန်းပေါင်းစုံကို စည်းလုံးညီညွှတ်ပြီး ၃ နှစ် ကြာ ကိုဗစ်-၁၉ရောဂါ၏ ထိခိုက်မှုကို ရင်ဆိုင်ကျော်လွှားကာ မကာအိုအထူးအုပ်ချုပ်ရေး ဒေသ၏ တည်ဆောက်ရေးလုပ်ငန်းအသီးသီးတွင် အခန်းကဏ္ဍသစ်သို့ ဘက်စုံဝင်ရောက် ခဲ့ကြောင်း၊ မိမိအနေဖြင့် အသစ်တစ်ကြိမ် မကာအိုအထူးအုပ်ချုပ်ရေးဒေသအစိုးရမှ ဥပဒေနှင့်အညီ စီမံအုပ်ချုပ်ရန် ထောက်ခံမည် ဖြစ်ပြီး မကာအိုဒေသနှင့် အမိနိုင်ငံ၏ ဖွံ့ဖြိုးတိုးတက်ရေးတည်ဆောက်မှုများအတွက် မိမိ၏ အင်အားကို ဆက်လက် အကျိုးပြု စွမ်းဆောင်မည် ဖြစ်ကြောင်း ပြောကြားခဲ့ပါသည်။