ບົດກະວີ ແລະ ທາງໄກ ສໍາລັບ ນັກຮຽນເຂດຫ່າງໄກສອກຫຼີ
ຈາກເຂດຫ່າງໄກສອກຫຼີກແຫ່ງໜຶ່ງຂອງແຂວງຢຸນນານ ໄປຫານະຄອນນິວຢອກຂອງອາເມຣິກາ ຈະໄກຊ່ຳໃດ? ອາດຈະຫ່າງໄກກັນປານບົດກະວີບົດໜຶ່ງເທົ່ານັ້ນ.
“ຂ້າພະເຈົ້າເຊື່ອໝັ້ນຄ່ຳຄືນທີ່ມືດມົນ, ຍ້ອນວ່າມັນສາມາດປົກປິດທຸກສິ່ງທຸກຢ່າງ, ເໝືອນດັ່ງຄວາມຮັກ.” ປີ 2020, ໜ້າຈໍໃຫຍ່ຢູ່ສະໜາມຫຼວງ ນິວຢອກທາມ ໄດ້ເຜີຍແຜ່ບົດກະວີທີ່ພາດຫົວຂໍ້ວ່າ: “ຄ່ຳຄືນທີ່ມືດມົນ” ເປັນອາທິດໜຶ່ງຕິດຕໍ່ກັນ, ຜູ້ຂຽນແມ່ນ ນາງ ຫຼີຫຼິງ (Li Ling) ທີ່ມາຈາກຕາແສງໝາງສຸຍເມືອງຊາງນິງ ນະຄອນປາວຊານແຂວງຢຸນນານ ຈີນ. ນາງ ຫຼີຫຼິງ ແມ່ນໜຶ່ງໃນ “ນັກກະວີໜຸ່ມໝາງສຸຍ”. ຢູ່ຕາແສງໝາງສຸຍທີ່ມີພູອ້ອມທັງສີ່ດ້ານ, ການສຶກສາກ່ຽວກັບກະວີ ໄດ້ດຳເນີນມາເປັນເວລາ 8 ປີແລ້ວ.
ຢູ່ຊົນນະບົດຂອງຈີນ, ການສຶກສາກ່ຽວກັບບົດກະວີ ພວມໄດ້ປ່ຽນແປງຊີວິດການເປັນຢູ່ຂອງເດັກນ້ອຍຊົນນະບົດ ເທື່ອລະກ້າວ. ພວກເຂົາເຈົ້າໄດ້ຄົ້ນພົບຄວາມງາມໃນຊີວິດ ແລະ ສະແດງອາລົມຈິດຂອງຕົນ ດ້ວຍບົດກະວີ ເພື່ອກ້າວໄປສູ່ເວທີທີ່ໃຫຍ່ກວ່າເກົ່າ.
ກຳລັງ ຊຸກຍູ້ການເຕີບໂຕຂອງໝູ່ນັກຮຽນ
“ຖ້າຂ້ອຍເປັນດອກໄມ້ດວງໜຶ່ງ, ເພື່ອນມິດຂ້ອຍຈະຮັກແພງຂ້ອຍ. ພວກເຂົາເຈົ້າ ບໍ່ວ່າເປັນເດັກຊາຍ ຫຼື ເດັກຍິງ,ລ້ວນແຕ່ຮັກແພງຂ້ອຍ. ຖ້າຂ້ອຍເປັນດອກໄມ້ດວງໜຶ່ງ, ກໍເປັນເລື່ອງທີ່ດີພໍສົມຄວນ.” ນີ້ແມ່ນບົດກະວີ ທີ່ພາດຫົວຂໍ້ວ່າ:“ຖ້າຂ້ອຍເປັນດອກໄມ້ດວງໜຶ່ງ” ທີ່ຂຽນໂດຍ: ນາງ ຢູຫຼຽນເຈຍ (Yu Lianjie) ນັກຮຽນອາຍຸ 9 ປີຂອງໂຮງຮຽນປະຖົມສົມບູນບ້ານໝິງຮວາ ຕາແສງໝາງສຸຍ ເມືອງຊາງນິງ (Changning) ນະຄອນປາວຊານ (Baoshan) ແຂວງຢຸນນານ.
ເລີ່ມຕົ້ນສົກຮຽນໃໝ່ ໃນເດືອນກັນຍາຜ່ານມາ, ນາງ ຢູຫຼຽນເຈຍ ແລະ ໝູ່ນັກຮຽນໄດ້ມີຫຼັກສູດໃໝ່ ຄື: ຫຼັກສູດສອນບົດກະວີ. ນາງ ຫຼີຊູຮວາ (Li Shuhua) ຄູສອນ ຫຼັກສູດດັ່ງກ່າວ ໄດ້ນຳພາໝູ່ນັກຮຽນເດີນທາງອອກຈາກຫ້ອງຮຽນ ແລະ ໄປແຕ່ງບົດກະວີ ຢູ່ຕາມທຳມະຊາດ ທີ່ມີທ້ອງຟ້າປອດໂປ່ງສົດໃສ. ນາງ ຢູຫຼຽນເຈຍ ກໍໄດ້ຂຽນບົດກະວີບົດນີ້ ໃນໂມງຮຽນບົດກະວີ. ນາງເວົ້າວ່າ: “ໂມງຮຽນບົດກະວີ ເຮັດໃຫ້ຂ້ອຍຮູ້ສຶກມ່ວນຊື່ນຫຼາຍ, ສາມາດຂຽນຄຳເວົ້າໃນໃຈຂອງຕົນເປັນບົດກະວີ.”
ໃນສາຍຕາຂອງ “ນັກກະວີໜຸ່ມ” ຂອງຕາແສງໝາງສຸຍ, ບົດກະວີ ມີຄວາມໝາຍພິເສດຫຼາຍ. ພວກເຂົາເຈົ້າ ໄດ້ເຕີບໃຫຍ່ຂະຫຍາຍຕົວໃນທ່າມກາງບົດກະວີ, ໄດ້ສຳຜັດກັບຄວາມອົບອຸ່ນ ແລະ ຄວາມສວຍງາມ. ນາງ ວາງຊຸນຫຼິນ (Wang Chunlin) ນັກຮຽນ ປໍ 3 ຂອງໂຮງຮຽນມັດທະຍົມຕົ້ນໝາງສຸຍ, ນາງ ໄດ້ສຳຜັດກັບບົດກະວີ ໃນໄລຍະນາງຮຽນ ປໍ 3, ປັດຈຸບັນ, ນາງ ໄດ້ຂຽນບົດກະວີ 200 ກວ່າບົດແລ້ວ. ນາງເວົ້າວ່າ: “ກະວີ ໄດ້ໃຫ້ການສະໜັບສະໜູນ ດ້ານອາລົມຈິດຫຼາຍຢ່າງໃຫ້ແກ່ຂ້າພະເຈົ້າ, ເຮັດໃຫ້ຈິດໃຈຂອງຂ້າພະເຈົ້າ ມີຄວາມເບີກບານກວ່າເກົ່າ.”
ນາງ ວາງຊິງລູ ນັກຮຽນ ມໍ 3 ຂອງໂຮງຮຽນມັດທະຍົມຕົ້ນໝາງສຸຍ ກ່າວວ່າ: “ພາຍຫຼັງສຳຜັດກັບບົດກະວີແລ້ວ, ຂ້າພະເຈົ້າ ໄດ້ຄົ້ນພົບວິທີລະບາຍອາລົມແບບອ່ອນໂຍນ, ມັນຈະປອບໃຈຂ້າພະເຈົ້າ, ເຮັດໃຫ້ຄວາມໂມໂຫ ແລະ ຄວາມໂສກເສົ້າຂອງຂ້າພະເຈົ້າ ສູນຫາຍໄປ ພ້ອມທັງສາມາດສະແດງໃຫ້ເຫັນຄວາມຮັກຂອງຂ້າພະເຈົ້າ.” ນາງ ກ່າວຕື່ມວ່າ: ການຂຽນບົດກະວີ ເປັນເລື່ອງທຳມະດາສາມັນ, ລາວຍັງໄດ້ຂຽນບົດກະວີເວົ້າຕະຫຼົກໃສ່ໝູ່ເພື່ອນ ແລະ ແລກປ່ຽນກັບໝູ່ເພື່ອນດ້ວຍບົດກະວີ.
ຢູ່ໂຮງຮຽນປາຖະໜາຊູຢູເມືອງຮຸຍຖົງ (Huitong) ນະຄອນຮວຍຮວາ (Huaihua) ແຂວງຫູໜານ ກໍເຊັ່ນດຽວກັນ. ນາງ ລົງເມິງຢາວ (Long Mengyao) ນັກກະວີນ້ອຍໃນ “ຫ້ອງກະວີລູກທົ່ງ” ໂຮງຮຽນປາຖະໜາຊູຢູ ກ່າວວ່າ: ການຂຽນບົດກະວີ ເຮັດໃຫ້ຊີວິດຂອງຂ້າພະເຈົ້າອຸດົມສົມບູນກວ່າເກົ່າ, ຂ້າພະເຈົ້າ ມັກສັງເກດໂລກນີ້ຫຼາຍກວ່າເກົ່າອີກ.” ນາງເວົ້າວ່າ: “ເມື່ອຂ້າພະເຈົ້າໃຫຍ່ຂຶ້ນແລ້ວ, ຢາກເປີດຮ້ານບົດກະວີ ເພື່ອເຮັດທຸລະກິດກ່ຽວກັບເລື່ອງກະວີ.”
ປີ 2017, ທ່ານ ຫຼີໂປລິນ (Li Bolin) ຄູສອນ ທີ່ເກີດຫຼັງປີ 1995 ຂອງໂຮງຮຽນປາຖະໜາຊູຢູ ໄດ້ສ້າງຕັ້ງ “ຫ້ອງກະວີລູກທົ່ງ”. ທ່ານກ່າວວ່າ: ຂ້າພະເຈົ້າ ບໍ່ພຽງແຕ່ສົນໃຈນຳການຂຽນບົດກະວີຂອງເດັກນ້ອຍທັງຫຼາຍເທົ່ານັ້ນ, ຍິ່ງຫວັງວ່າ: ສາມາດກະຕຸກຊຸກຍູ້ຄວາມສາມາດບົ່ມຊ້ອນຂອງພວກເຂົາເຈົ້າ ໂດຍຜ່ານການຂຽນບົດກະວີ.” ທ່ານ ກ່າວຕື່ມອີກວ່າ: ຕົນຫວັງວ່າ ສາມາດຊ່ວຍເດັກນ້ອຍທັງຫຼາຍ ສ້າງຄວາມເຂັ້ມແຂງດ້ວຍຕົນເອງ ໂດຍຜ່ານຈາກກຳລັງຂອງວັນນະຄະດີ.
ເຝົ້າຮັກສາ “ບົດກະວີ ແລະ ທາງໄກ”
ນັກຮຽນທັງຫຼາຍ ໄດ້ສະແດງໃຫ້ເຫັນເຖິງຄວາມອ່ອນໂຍນ ແລະ ຄວາມປານີດໃນບົດກະວີຂອງຕົນ ເຊິ່ງໄດ້ເຮັດໃຫ້ ນາງ ຈ່າງຈືລານ (Zhang Zilan) ຄູສອນໂຮງຮຽນມັດທະຍົມຕົ້ນໝາງສຸຍກະຕຸ້ນໃຈນຳ. ນາງ ເວົ້າວ່າ: ບົດກະວີເປັນຂົວຕໍ່ລະຫວ່າງຕົນກັບນັກຮຽນ. ໂດຍຜ່ານຈາກບົດກະວີ, ນາງ ສາມາດເຂົ້າໃຈຄວາມຄິດຂອງນັກຮຽນທັງຫຼາຍ ແລະ ຮັບຮູ້ເຖິງຄວາມປ່ຽນແປງດ້ານອາລົມຂອງນັກຮຽນ.
ທ່ານ ຢູຊຸນຢຸນ (Yu Chunyun) ເລຂາຄະນະພັກໂຮງຮຽນ ໃຈກາງຕາແສງໝາງສຸຍ ກ່າວວ່າ: “ພວກເຮົາ ໄດ້ຄົ້ນຫາວິທີນຳພາໃຫ້ໝູ່ນັກຮຽນທັງຫຼາຍ ມີຄວາມກະຕືລືລົ້ນໃນດ້ານສູນທອນພົດ ເຊັ່ນ: ການແຕ້ມຮູບ, ດົນຕີ ຫຼື ການຟ້ອນ. ແຕ່ພາຍຫຼັງມາ, ພວກເຮົາເຫັນວ່າ: ການຂຽນບົດກະວີ ຈະເປັນວິທີທີ່ງ່າຍທີ່ສຸດ, ຖ້າທ່ານມີເຈ້ຍມີສໍ, ທ່ານກໍສາມາດຂຽນບົດກະວີໄດ້ແລ້ວ.
ນັບແຕ່ປີ 2016 ເປັນຕົ້ນມາ, ໂຮງຮຽນໃຈກາງຕາແສງໝາງສຸຍ ແລະ ໂຮງຮຽນມັດທະຍົມຕົ້ນໝາງສຸຍ ເລີ່ມການທົດລອງເຂົ້າຮ່ວມການສຶກສາບົດກະວີ. ປີ 2019, ຕາແສງໝາງສຸຍ ໄດ້ເປີດຫຼັກສູດບົດກະວີພາຍໃຕ້ 4 ຫົວຂໍ້ຄື: ແສງສະຫວ່າງໃນລະດູບານໃໝ່, ພາບວິວໃນລະດູຮ້ອນ, ດວງຕາເວັນໃນລະດູໃບໄມ້ຫຼົ່ນ ແລະຕາເວັນອົບອຸ່ນໃນລະດູໜາວ ໃຫ້ແກ່ນັກຮຽນ ປໍ 3 ຫາ ມໍ 7 ທົ່ວຕາແສງ, ຫຼັກສູດໜຶ່ງຈະມີ 3 ຊົ່ວໂມງຮຽນ.
ນາງ ຈ່າງຈືລານ ເຫັນວ່າ: “ໂດຍຜ່ານຈາກບົດກະວີ, ຂ້າພະເຈົ້າ ຈະສາມາດເຂົ້າໃຈນັກຮຽນໄດ້ດີກວ່າເກົ່າ ແລະ ມີຈິດໃຈກວມລວມຫຼາຍກວ່າເກົ່າຕໍ່ພວກເຂົາເຈົ້າ.” ນາງເວົ້າວ່າ: ນັກຮຽນທັງຫຼາຍຈະມີພອນສະຫວັນໃນການຂຽນບົດກະວີ, ພວກເຂົາເຈົ້າ ມີຄວາມຮັກທີ່ອຸດົມສົມບູນທີ່ສຸດ, ຄູສອນວິທີຂຽນໃຫ້ແກ່ພວກເຂົາເຈົ້າ, ພວກເຂົາເຈົ້າ ກໍຈະສາມາດຂຽນບົດກະວີ ທີ່ເຕັມໄປດ້ວຍຄວາມມີຊີວິດຊີວາ. “ການສຶກສາແມ່ນເມກຜືນໜຶ່ງຊຸກດັນເມກອີກຜືນໜຶ່ງ, ຂ້າພະເຈົ້າ ກໍໄດ້ຮັບເອົາກຳລັງຊຸກດັນທີ່ບໍ່ມີວັນສິ້ນສຸດຈາກບົດກະວີຂອງໝູ່ນັກຮຽນທັງຫຼາຍ.”
ເພື່ອປົກປັກຮັກສາ “ບົດກະວີ ແລະ ທາງໄກ” ໃຫ້ແກ່ເດັກນ້ອຍຢູ່ຊົນນະບົດ, ອົງການສາທາລະນະປະໂຫຍດຕ່າງໆຂອງຈີນ ກໍໄດ້ເຮັດກິດຈະກຳຫຼາຍຢ່າງ. ປີ 2018, ສະໂມສອນ “ບົດກະວີຊືກວາງ” ທີ່ເປັນອົງການສາທາລະນະປະໂຫຍດດ້ານການສຶກສາບົດກະວີ ຢູ່ຊົນນະບົດແຫ່ງທຳອິດຂອງຈີນ ໄດ້ສ້າງຕັ້ງຂຶ້ນ ໂດຍໄດ້ສົ່ງເສີມໃຫ້ຖືເອົາບົດກະວີເປັນວິທີຊ່ວຍເດັກນ້ອຍຊົນນະບົດ ສະແດງຄວາມຮັກຂອງຕົນ ແລະ ເປັນເພື່ອນທາງຈິດໃຈໃຫ້ແກ່ເດັກນ້ອຍເຫຼົ່ານີ້.
ທ່ານ ຄາງຢູ (Kang Yu) ໜຶ່ງໃນຜູ້ສ້າງຕັ້ງສະໂມສອນ “ບົດກະວີຊືກວາງ” ກ່າວວ່າ: “ພວກເຮົາສອນເດັກນ້ອຍຂຽນບົດກະວີ ມີແຕ່ຢາກບອກພວກເຂົາເຈົ້າວ່າ: ໃນການເຕີບໃຫຍ່ພຽງເທື່ອດຽວ ໃນຊີວິດຂອງຕົນ, ຄວນຮັກຫອມການຄົ້ນຄວ້າ ແລະ ຮັກສາຄວາມອ່ອນໄຫວ ຕໍ່ການສຳຜັດທຸກສິ່ງຂອງ.” ທ່ານ ກ່າວຕື່ມວ່າ: ນັບແຕ່ສະໂມສອນຕົນສ້າງຕັ້ງຂຶ້ນຈົນເຖິງປີ 2023, ໄດ້ບໍລິການໂຮງຮຽນຊົນນະບົດ 1.700 ກວ່າແຫ່ງ, ໄດ້ສ້າງຜົນປະໂຫຍດໃຫ້ແກ່ເດັກນ້ອຍຊົນນະບົດ 150.000 ກວ່າຄົນ ໃນ 28 ແຂວງ, ເຂດ ແລະ ກຳແພງນະຄອນຂອງຈີນ.
ເດືອນກໍລະກົດປີ 2023, ຫ້ອງສະຕູດີໂອການຂຽນແບບມີຫົວຄິດປະດິດສ້າງຂອງທ່ານ ຫຼີໂປລິນ ໄດ້ສ້າງຕັ້ງຂຶ້ນ ເຊິ່ງໄດ້ດຶງດູດຄູສອນ 10 ທ່ານເຂົ້າຮ່ວມ. ໃນຫ້ອງສະຕູດີໂອດັ່ງກ່າວ, ຄູສອນຄະນິດສາດ ໄດ້ເອົາວິທີ “ບວກ, ລົບ, ຄູນ ແລະ ຫານ” ເຊື່ອມໂຍງເຂົ້າໃນບົດກະວີ, ຄູສອນວິຈິດສິນ ໄດ້ສອນເດັກຮຽນທັງຫຼາຍແຕ້ມບັນຍາກາດບົດກະວີຢູ່ຕາມກ້ອນຫີນ, ຄູສອນດົນຕີ ໄດ້ສອນເດັກຮຽນທັງຫຼາຍຂຽນທຳນອງເພງໃຫ້ແກ່ບົດກະວີຂອງຕົນ ເພື່ອໄປຄົ້ນຄວ້າຄວາມເລິກລັບໃນບົດກະວີ.