ຄູ່ເມືອງກາເຟ
ບຸກຄະລິກກະພາບຂອງເມືອງແມ່ນເຊື່ອງໄວ້ໃນລົດຊາດກາເຟຂອງມັນ. ໃນສະບັບນີ້, ວາລະສານ ຈຳປາ ຂອງສູນການສື່ສານສາກົນພາກພື້ນອາຊີໃຕ້ ອາຊີຕາເວັນອອກສ່ຽງໃຕ້ແຂວງຢຸນນານຈະພາທ່ານຜູ້ອ່ານທັງຫຼາຍໄປຮັບຮູ້ວັດທະນະທຳກາເຟຂອງສາມຕົວເມືອງຈີນ, ມາເບິ່ງວ່າຮ້ານກາເຟທີ່ເປັນຜະລິດຕະພັນທີ່ນຳເຂົ້າມາຈາກຕ່າງປະເທດນີ້ ປະກອບມີບຸກຄະລິກກະພາບຂອງຕົວເມືອງສະເພາະທີ່ມັນຕັ້ງຢູ່ແນວໃດ.
ນະຄອນຊຽງໄຮ: ກາເຟກາຍເປັນພາກສ່ວນໜຶ່ງຂອງວັດທະນະທຳຕົວເມືອງ
ໃນຕົ້ນສະຕະວັດທີ 20, ປະເທດຈີນໄດ້ກ້າວເຂົ້າສູ່ຍຸກສະໄໝລະຫວ່າງຍຸກເກົ່າ ແລະ ຍຸກໃໝ່, ແລະ ການປ່ຽນແປງຫຼາຍຢ່າງໄດ້ເກີດຂຶ້ນໃນດ້ານວັດທະນະທຳສັງຄົມ ແລະ ຄວາມລຶ້ງເຄີຍຂອງການດຳລົງຊີວິດ. ນະຄອນຊຽງໄຮເປັນໜຶ່ງໃນຕົວເມືອງທີ່ສຳຜັດກັບວັດທະນະທຳຕ່າງປະເທດກ່ອນໝູ່ທີ່ສຸດ, ໂດຍເປັນຜະລິດຕະພັນທີ່ນຳເຂົ້າມາຈາກຕ່າງປະເທດ, ກາເຟບໍ່ພຽງແຕ່ໄດ້ປ່ຽນວິຖີການດຳລົງຊີວິດຂອງຄົນເທົ່ານັ້ນ, ແຕ່ຍັງລວມເຂົ້າກັບວັດທະນະທຳອາຫານພື້ນເມືອງຂອງຊຽງໄຮອີກດ້ວຍ, ຈຶ່ງກາຍເປັນວັດທະນະທຳກາເຟທີ່ມີເອກະລັກສະເພາະ. ອີງຕາມສະຖິຕິການບັນທຶກ, ກາເຟໄດ້ປະກົດຢູ່ຊຽງໄຮໃນປີ 1844. ປີ 1886, ຮ້ານກາເຟເຊີງຊາງ(Shengchang)ທີ່ຕັ້ງຢູ່ເຂດຫົງເຂົາ (Hongkou)ນະຄອນຊຽງໄຮ ໄດ້ກາຍເປັນຮ້ານກາເຟທີ່ມີການບັນທຶກອັນດັ້ງເດີມທີ່ສຸດໃນທົ່ວຊຽງໄຮ.
ໃນເບື້ອງຕົ້ນ, ກາເຟໄດ້ຖືກນຳໃຊ້ພຽງແຕ່ເປັນເຄື່ອງດື່ມທີ່ຈຳເປັນໃນການເຕົ້າໂຮມຄົນໃນຄອບຄົວຂອງຊາວຕ່າງປະເທດທີ່ຢູ່ນະຄອນຊຽງໄຮ. ຈົນມາຮອດຕົ້ນສະຕະວັດທີ 20, ກາເຟຈຶ່ງໄດ້ຮັບຄວາມນິຍົມລະຫວ່າງໃນຊາວຈີນ. ຮ້ານກາເຟຊຽງໄຮໃນແຕ່ກ່ອນ ຍັງໄດ້ສັກຂີພິຍານການເກີດຂອງແນວຄິດໃໝ່ ແລະ ຜົນງານໃໝ່ຫຼາຍຢ່າງໃນວົງການວັນນະຄະດີ ແລະ ສິລະປະ. ນັກຂຽນທີ່ມີຊື່ສຽງ, ນັກສິລະປິນໜຸ່ມ, ນັກສະແດງ ແລະອື່ນໆກໍມັກມາຮ້ານກາເຟເລື້ອຍໆຄືກັນ.
ທ່ານ ຫຼູຊຸ້ນ(Lu Xun)ນັກວັນນະຄະດີຈີນເວົ້າວ່າ: "ຂ້ອຍບໍ່ແມ່ນຄົນທີ່ມີພອນສະຫວັນ, ພຽງແຕ່ແມ່ນໃຊ້ເວລາທີ່ຄົນອື່ນໄປດື່ມກາເຟມາເຮັດວຽກເທົ່ານັ້ນ." ປະໂຫຍກນີ້ຍັງຖືກເວົ້າເຖິງໂດຍຄົນຊູ່ມື້ນີ້, ມັນກໍໄດ້ສ່ອງແສງໃຫ້ເຫັນເຖິງຄວາມຮັກຂອງຄົນທີ່ມີຕໍ່ກາເຟໃນເວລານັ້ນ. ນາງ ຕີ່ງຫຼິງ(Ding Ling) ອະດີດຫົວຫນ້າບັນນາທິການຂອງສິ່ງພິມທີ່ມີຊື່ສຽງໃນເວລານັ້ນ, ກໍມັກແປງບົດຄວາມຢູ່ໃນຮ້ານກາເຟເລື້ອຍໆ. ນັກຂຽນທ່ານ ຖຽນຮັ້ນ(Tian Han)ຍັງໄດ້ສ້າງບົດລະຄອນເລື່ອງໜຶ່ງ “ຄໍ່າຄືນໃນຮ້ານກາເຟ” ໃຫ້ແກ່ກາເຟ, ນີ້ກໍແມ່ນຜົນງານທຳອິດທີ່ໄດ້ສະແດງ “ບັນຍາກາດຮ້ານກາເຟ” ຢູ່ໃນວັນນະຄະດີແບບໃໝ່. ບໍ່ພຽງແຕ່ເທົ່ານັ້ນ, ທ່ານ ຖຽນຮັ້ນ ຍັງໄດ້ປະກາດວ່າຈະເປີດຮ້ານກາເຟຢູ່ໃນຮ້ານຂາຍປຶ້ມ, ເຊິ່ງໄດ້ສົ່ງເສີມກະແສນິຍົມຂອງ “ກາເຟວັນນະຄະດີ”.
ຊຽງໄຮໃນທຸກມື້ນີ້, ຮ້ານກາເຟບໍ່ພຽງແຕ່ແມ່ນບ່ອນທີ່ຜູ້ຄົນມາດື່ມ ແລະ ເຕົ້າໂຮມກັນເທົ່ານັ້ນ, ມັນຍັງເປັນບ່ອນເຕົ້າໂຮມແຟຊັນ ແລະ ວັດທະນະທຳອີກດ້ວຍ. ຮ້ານກາເຟຫຼາຍແຫ່ງຍັງສະເໜີອອກອຸປະກອນເສີມທີ່ມີລັກສະນະວັດທະນະທໍາ, ນໍາພາກະແສນິຍົມແຟຊັນຂອງຄົນໜຸ່ມ ແລະ ສົ່ງເສີມການພັດທະນາອຸດສາຫະກໍາຂອງວັດທະນະທໍາ. ຕາມສະຖິຕິ, ໃນປີ 2023 ໃນນະຄອນຊຽງໄຮລວມມີຮ້ານກາເຟທັງໝົດ 9.553 ຮ້ານ, ເຊິ່ງເປັນຕົວເມືອງທີ່ມີຮ້ານກາເຟຫຼາຍທີ່ສຸດໃນໂລກ. ທ່ານດື່ມກາເຟຈອກໜຶ່ງ, ສາມາດປະກອບມີລົດຊາດວັດທະນະທຳອັນເຂັ້ມຂຸ້ນໄດ້.
ນະຄອນຈຽງເໝິນແຂວງກວາງຕຸ້ງ: ຄວາມໂລແມນຕິກ ແລະ ຊີວິດປະຈໍາວັນໃນເຂດທີ່ມີຈີນຕ່າງດ້າວຫຼາຍ
7 ໂມງເຊົ້າ, ຮ້ານເຝີໄສ້(ອາຫານພື້ນເມືອງຂອງແຂວງກວາງຕຸ້ງ ທີ່ມີນົມເຂົ້າເປັນສ່ວນປະກອບຫຼັກ) ທີ່ເຊື່ອງຊ້ອນຢູ່ໃນເຂດຊຸມຊົນເກົ່າກໍເປີດແລ້ວ, ຄົນທີ່ລຸກນອນຕື່ນເຊົ້າເພື່ອໄປເຮັດວຽກກຳລັງເຂົ້າແຖວລໍຖ້າ. ໃນເວລານີ້, ກິ່ນຫອມກາເຟເຂັ້ມຂຸ້ນສົ່ງກິ່ນອອກມາຈາກຮ້ານໃກ້ຄຽງ ແລະ ປະສົມເຂົ້າກັບກິ່ນຫອມເຝີໄສ້.
ນະຄອນຈຽງເໝິນເປັນເຂດທີ່ມີຈີນຕ່າງດ້າວຫຼວງຫຼາຍທີ່ມີຊື່ສຽງຂອງຈີນ, ໃນສະໄໝລາຊະວົງຖາງ (ປີ 618 - ປີ 907) ແລະ ລາຊະວົງຊົ້ງ (ປີ 960 - ປີ 1279) ເປັນຕົ້ນມາ, ເພື່ອການທຳມາຫາກິນ, ມີປະຊາຊົນຍ້າຍຢ້າວຍ້າຍເຮືອນໄປຢູ່ຕ່າງປະເທດຢ່າງຕິດຕໍ່, ໃນຊຸມປີ 1860, ຊາວຈີນຕ່າງດ້າວຈຳນວນຫຼາຍທີ່ບ້ານເກີດດັ້ງເດີມຢູ່ນະຄອນຈຽງເໝິນກັບຄືນບ້ານເກີດຂອງຕົນເພື່ອຮັບໃຊ້ທັງຕອບບຸນແທນຄຸນປະເທດຊາດ. ເຂົາເຈົ້າຍັງໄດ້ນຳເອົາເຄື່ອງເຊັ່ນ: ເມັດກາເຟ, ໝໍ້ກາເຟ, ຈອກກາເຟ, ເຄື່ອງປັ່ນເມັດກາເຟ ແລະອື່ນໆຫຼາຍຢ່າງທີ່ເຂົາເຈົ້າໃຊ້ໃນຊີວິດປະຈຳວັນຢູ່ຕ່າງປະເທດກໍຄື: ອາເມລີກາ, ເມັກຊິໂກ, ເອີຣົບ ແລະ ອາຊີຕາເວັນອອກສ່ຽງໃຕ້ເປັນຕົ້ນ, ປ່ອນໃສ່ໃນກະເປົ໋າຕົນ ແລະ ນໍາກັບຄືນສູ່ນະຄອນຈຽງເໝິນ. ວັດທະນະທໍາກາເຟຂອງນະຄອນນີ້ມີປະຫວັດສາດຫຼາຍກ່ວາ 160 ປີ.
ຫຼັງຈາກປີ 2000, ຍ້ອນວ່າຊາວຈີນຕ່າງດ້າວນັບມື້ນັບຫຼາຍຂຶ້ນໄດ້ກັບຄືນສູ່ບ້ານເກີດຂອງຕົນເພື່ອເລີ່ມຕົ້ນເຮັດທຸລະກິດ, ກະແສນິຍົມກາເຟຄື້ນທີສອງໄດ້ຄ່ອຍໆເກີດຂຶ້ນໃນນະຄອນຈຽງເໝິນ.
ຢູ່ນະຄອນຈຽງເໝິນ, ຫຼາຍຄົນຈະກ່າວເຖິງຮ້ານໜຶ່ງຊື່ວ່າລົດສາມລໍ້ທີ່ເປີດໃນປີ 2016. ມັນໄດ້ເປີດຄັ້ງທຳອິດຢູ່ໃນລົດສາມລໍ້ຢູ່ຕໍ່ໜ້າບາເຫຼົ້າ, ຮ້ານນີ້ກາເຟອາເມລິກາໂນ້ທີ່ຂາຍໃນລາຄາ 8 ຢວນ, ແລະ ກາເຟອາເມລິກາໂນ້ເຢັນເພີ່ມ 1 ຢວນ, ໃນເວລານັ້ນ, ຊາວຈຽງເໝິນເລີ່ມຮູ້ວ່າກາເຟບໍ່ແມ່ນຜະລິດຕະພັນລະດັບສູງ, ເຊິ່ງບໍ່ແມ່ນພຽງແຕ່ທີ່ປະກົດຢູ່ໃນລະຄອນໂທລະພາບ ຫຼື ພາບການເຈລະຈາທຸລະກິດ, ສ່ວນເປັນເຄື່ອງດື່ມປະຈໍາວັນຂອງຄົນຄືດັ່ງກັບນໍ້າເຕົ້າຮູ້ທີ່ຂາຍໃນຮ້ານອາຫານເຊົ້າ.
ກະແສນິຍົມປະດິດສ້າງການງານທີ່ມີຄວາມໂລແມນຕິກໃນເມືອງຈຽງເໝິນເປັນເລື່ອງທຳມະດາທົ່ວໄປ. ກ່ອນທີ່ຈະກາຍເປັນເຈົ້າຂອງຮ້ານກາເຟ, ທ່ານ ເວີນເຊີນ(Wen Sen) ເປັນພະນັກງານສື່ມວນຊົນທີ່ຊຳນານງານຢູ່ໃນຂະແຫນງການລົດຍົນ, ເພາະວ່າບໍ່ຕ້ອງຢູ່ໃນຫ້ອງການທຸກໆມື້, ເວລາເຮັດວຽກລາວມັກເລາະຫຼິ້ນຢູ່ຮ້ານກາເຟຕ່າງໆ. ແທນທີ່ຈະວ່າລາວຕ້ອງການຈອກກາເຟເພື່ອຊ່ວຍເຊີດຊູຈິດໃຈໃຫ້ລາວມີຄວາມຟົດຟື້ນນັ້ນ, ໜ້າຈະເວົ້າວ່າລາວຕ້ອງການສະຖານທີ່ເພື່ອໃຫ້ຄວາມຄິດຂອງລາວທ່ຽວເດີນໄປທຸກແຫ່ງຢ່າງບໍ່ມີເປົ້າໝາຍ, ເຊິ່ງນີ້ເຮັດໃຫ້ລາວເອົາໃຈໃສ່ຄວາມສໍາຄັນອັນໃຫຍ່ຫຼວງຕໍ່ການສ້າງພື້ນທີ່ຫຼັງຈາກເປີດຮ້ານກາເຟ.
“ເດືອນ ພະຈິກ ປີກາຍນີ້, ກ່ອນທີ່ລະດູໃບໄມ້ຫຼົ່ນມາເຖິງ, ທີ່ແຂວງກວາງຕຸ້ງ, ຂ້ອຍກັບແຂກທີ່ຮູ້ຈັກກັນດີຈຳນວນໜຶ່ງໄດ້ຊື້ຕຽງຊາຍຫາດມາວາງໄວ້ນອນຫຼິ້ນຢູ່ໜ້າຮ້ານ, ເມື່ອມີລູກຄ້າມາແລ້ວຈະຕົບຫົວປຸກຂ້ອຍຄ່ອຍໆ, ເພື່ອໃຫ້ຂ້ອຍຕື່ນເຂົ້າມາຮ້ານເຮັດກາເຟໃຫ້.” ທ່ານ ເວີນເຊີນ ເວົ້າວ່າ, ນີ້ແມ່ນສິ່ງທີ່ລາວຄິດວ່າເປັນສະຖານະທີ່ດີທີ່ສຸດຂອງຮ້ານກາເຟ, ບໍ່ມີຄົນດັງໃນອິນເຕີເນັດເຊັກອິນ, ບໍ່ມີລາຄາຕ່ຳເພື່ອດຶງດູດລູກຄ້າເຂົ້າຮ້ານຊົມເບິ່ງ ແລະ ບໍລິໂພກ, ມີພຽງແຕ່ດຶງດູດລູກຄ້າທີ່ມີຈິດໃຈດຽວກັນ.
ນະຄອນຮາປິນ (Harbin) ແຂວງໄຮຫຼົງຈ່ຽງ (Heilongjiang) : ກິ່ນອາຍຊີວິດຂອງ“ຮ້ານປີ້ງຕອນເຊົ້າ”
ກຸ່ມຜູ້ບໍລິໂພກຕົ້ນຕໍຂອງກາເຟຢູ່ຈີນແມ່ນຊາວໜຸ່ມ, ແຕ່ວ່າໃນເຂດຕາເວັນອອກສ່ຽງເໜືອຂອງປະເທດຈີນ, ມີຊາວໜຸ່ມຈຳນວນບໍ່ໜ້ອຍທີ່ຫຼັ່ງໄຫຼໄປທາງນອກ, ໄປເປີດຮ້ານກາເຟຢູ່ນັ້ນ, ທັງຍັງຍຶດໝັ້ນໃນຄຸນນະພາບ, ເປັນຄວາມແຕກຕ່າງໃນການລ່ອງເຮືອທວນກະແສນ້ຳ. ທ່ານ ຢາງຢູຊິນ(Yang Yuxin)ເຈົ້າຂອງຮ້ານກາເຟແຫ່ງໜຶ່ງໃນຮາປິນມັກໄປຮ້ານກາເຟທີ່ຢູ່ພາກໃຕ້ຂອງປະເທດຈີນເລື້ອຍໆ, ລາວຄົ້ນພົບວ່າ, ຮ້ານກາເຟຂອງພາກໃຕ້, ຕອນເຊົ້າພໍແຕ່ເປີດຮ້ານກໍຕ້ອນຮັບກະແສຂອງລູກຄ້າຄື້ນທຳອິດ, ຄື້ນນີ້ແມ່ນກຸ່ມພະນັກງານທີ່ຊື້ກາເຟຢ່າງຮີບດ່ວນແບບໄສ່ຖົງ. ຢູ່ຮາປິ່ນ, ກະແສລູກຄ້າກຸ່ມພະນັກງານແມ່ນບໍ່ມີ. ກະແສລູກຄ້າຂອງຮ້ານກາເຟຮາປິ່ນແມ່ນຕ້ອງຫຼັງຈາກຕອນທ່ຽງຈຶ່ງເລີ່ມເຂົ້າມາ.
ກາເຟຢູ່ຮາປິນຍັງບໍ່ຖືວ່າແມ່ນການບໍລິໂພກປະຈຳວັນ. ຄວາມເປັນຈິງແລ້ວ ນີ້ເຮັດໃຫ້ກາເຟຂອງຮາປິນທີ່ນອກຈາກກຸ່ມຜູ້ບໍລິໂພກແລ້ວ ຍັງມີອຸປະສັກອັນທີສອງກໍຄື ເມັດກາເຟທີ່ດີ. ສຳນັກງານໃຫຍ່ຂອງຫົວໜ່ວຍທຸລະກິດເມັດກາເຟສົດສ່ວຫຼາຍແມ່ນຢູ່ນະຄອນຊຽງໄຮ. ເມັດກາເຟທີ່ດີເມື່ອອອກມາກໍຖືກບັນດານະຄອນໃຫຍ່ໆທີ່ບໍລິໂພກກາເຟເຊັ່ນ: ຊຽງໄຮ, ຫາງໂຈ່ວ(Hangzhou), ຊູໂຈ່ວ(Suzhou),ໜານຈິ່ງ (Nanjing) ຍາດໄປໝົດຢ່າງວ່ອງໄວ. ໃນສະພາບແວດລ້ອມແບບນີ້, ຄົນຮາປິນທີ່ຮັກກາເຟຢ່າງແທ້ຈິງ, ເມື່ອໄດ້ເມັດກາເຟທີ່ດີກໍຄືກັບໄດ້ຂວັນໃຈ, ການຂົ້ວ ແລະ ດື່ມກາເຟລ້ວນແຕ່ຈິງຈັງ, ບໍ່ຢາກເຮັດໃຫ້ກາເຟດີໆຈອກນີ້ຜິດຫວັງ.
ບັນຍາກາດໃນຮ້ານກາເຟຮາປິນ, ກໍບໍ່ຄ່ອຍຄືກັບເຂດອື່ນ. ຕາມຖະໜົນໃຫຍ່ຂອງຮາປິນເຕັມໄປດ້ວຍຮ້ານປີ້ງ, ຕອນຄ່ຳເກືອບວ່າລ້ວນແຕ່ແມ່ນສະຖານທີ່ດື່ມເຫຼົ້າ, ສ່ວນຮ້ານກາເຟທີ່ເປັນພື້ນທີ່ພັກຜ່ອນຜ່ອນຄາຍແບບນີ້, ພັດຄຶກຄື້ນຄືກັບຮ້ານປີ້ງໃນຍາມເຊົ້າ.
ໃນຮ້ານກາເຟຂອງຮາປິນ, ສາມາດສຳຜັດໄດ້ເຖິງການແກ້ໄຂບັນຫາ ແລະ ອາລົມຕະຫຼົກໃນດ້ານດີທີ່ເປັນທຳມະຊາດຂອງຄົນຢູ່ທີ່ນັ້ນ. ຢູ່ຮາປິນ, ເກືອບວ່າບໍ່ມີພະນັກງານຫ້ອງການໃນຕົວເມືອງທີ່ຖືຈອກກາເຟຢ່າງຮີບຮ້ອນຍ່າງໄປຕາມຖະໜົນ, ຄຳອະທິບາຍຂອງຄົນຮາປິນກໍແມ່ນວ່າ “ຕົວເມືອງແຫ່ງນີ້ບໍ່ມີຄວາມກົດດັນຫຼາຍປານນັ້ນ, ຕ້ອງການພຽງແຕ່ຄວາມສຸກຂອງຊານົມຈອກໜຶ່ງເທົ່ານັ້ນ”.