ກ້າວເຂົ້າສູ່ແຂວງຢຸນນານ
ໃນລະດູຮ້ອນປີນີ້, ມີຊາວໜຸ່ມຫຼາຍຄົນ ທີ່ມາຈາກບັນດາປະເທດ ຕາມລ້ອງແມ່ນ້ຳຂອງ ໄດ້ເດີນທາງມາເຖິງ ຮ່ອມໄດໂນເສົາລູເຟີງ ກິ່ງແຂວງປົກຄອງຕົນເອງ ເຜົ່າຢີ ສູສົງ (Chuxiong) ແຂວງຢຸນນານ ເພື່ອເລີ່ມການທ່ອງທ່ຽວອັດສະຈັນທີ່ຄົ້ນພົບ ສະໄໝດຶກດຳບັນ ແລະສະໄໝປັດຈຸບັນ.
“ສະບາຍດີ! ຍິນດີຕ້ອນຮັບທ່ານເຂົ້າສູ່ໂລກໄດໂນເສົາ.” ທ້າວ ວາງເວີຍ ທີ່ມາຈາກມຽນມາ ໄດ້ສົນທະນາກັບຕຸກກະຕາໄດໂນເສົາ ທີ່ສາມາດເວົ້າໄດ້ແບບມ່ວນໆ. ລາວກ່າວວ່າ: ຕົນໄດ້ເຫັນ ຟອດຊິວໄດໂນເສົາເປັນຄັ້ງທຳອິດ, ຮູ້ສຶກວ່າສະເທືອນໃຈທີ່ສຸດ.
ທ້າວ ວາງເວີຍ ໄດ້ເຂົ້າຮ່ວມຄ້າຍຖ່າຍທຳວິດີໂອສັ້ນຊາວໜຸ່ມ ເຊິ່ງເປັນໜຶ່ງໃນກິດຈະກຳໃນສັບປະດາພາບ ແລະ ສຽງ ແມ່ນ້ຳລ້ານຊ້າງ-ແມ່ນ້ຳຂອງ ຄັ້ງທີ 5 ທີ່ຈັດຂຶ້ນຢູ່ແຂວງຢຸນນານ ໃນຫວ່າງມໍ່ໆມານີ້, ງານສັບປະດາພາບ ແລະ ສຽງ ແມ່ນ້ຳລ້ານຊ້າງ-ແມ່ນ້ຳຂອງຄັ້ງນີ້ ເນັ້ນໃສ່ຫົວຂໍ້ “ຖ່າຍທຳທິວທັດພູຜາແມ່ນ້ຳທີ່ສວຍງາມ”ໂດຍມີຜູ້ຕາງໜ້າ 400 ກວ່າຄົນ ຈາກພາກສ່ວນວິທະຍຸໂທລະພາບ ແລະ ອົງການສື່ມວນຊົນທາງການ ຂອງບັນດາປະເທດ ຕາມລ້ອງແມ່ນ້ຳຂອງ ແລະ ອາຊີໃຕ້ເຂົ້າຮ່ວມ.
ທ້າວ ວາງເວີຍ ແລະ ຊາວໜຸ່ມທັງຫຼາຍ ໄດ້ເດີນທາງໄປເຖິງແຫຼ່ງທ່ອງທ່ຽວຜູເຈີເຮີຍຂອງກິ່ງແຂວງປົກຄອງຕົນເອງເຜົ່າຈ້ວງ - ເຜົ່າມົ້ງ ເວີນຊານ,ນ້ຳໜອງທີ່ໃສເຢັນ ເຮັດໃຫ້ພວກເຂົາເຈົ້າຮູ້ສຶກສະຫວາດສະເຫວີຍທີ່ສຸດ.
ຢູ່ສວນດອກກຸຫຼາບຜູເຈີເຮີຍ (Puzhehei) ທີ່ເຕັມໄປດ້ວຍບັນຍາກາດໂລແມນຕິກ, ນາງ ອູສຸຍຊຽນ ທີ່ມາຈາກຫວຽດນາມ ໄດ້ນຸ່ງຊຸດໂອໄຕທີ່ສວຍສົດງົດງາມ ໄດ້ຍ່າງເຂົ້າສວນດອກກຸຫຼາບແດງ, ງາມປານນາງຟ້າ.
ນາງ ອູສຸຍຊຽນ ຮຽນຢູ່ມະຫາວິທະຍາໄລຊົນເຜົ່າຢຸນນານ ແລະ ນາງ ມັກດອກໄມ້ສົດຂອງແຂວງຢຸນນານເປັນພິເສດ. ຍ້ອນແນວນີ້, ເຮັດໃຫ້ນາງ ຮູ້ຈັກກັບໝູ່ເພື່ອນທີ່ດີຢູ່ຕະຫຼາດດອກໄມ້ໂຕໜານນະຄອນຄຸນໝິງ, ນັ້ນກໍຄື ນ້ອງສາວໜຸ່ມຜູ້ໜຶ່ງທີ່ມາຈາກຫວຽດນາມຄືກັນ ແລະ ເຮັດການຄ້າຂາເຂົ້າ-ຂາອອກດອກໄມ້ສົດຢູ່ຕະຫຼາດດອກໄມ້ໂຕໜານ.ໃນຂະນະດຽວກັນ, ຜູ້ຕາງໜ້າທີ່ມາຈາກພາກສ່ວນຖະແຫຼງຂ່າວ ແລະ ອົງການສື່ມວນຊົນບັນດາປະເທດແມ່ນ້ຳລ້ານຊ້າງ-ແມ່ນ້ຳຂອງ ກໍໄດ້ສຳຜັດກັບ “ປະເທດຈີນທີ່ສວຍງາມທີ່ສຸດ - ວິຖີຊີວິດແບບຢຸນນານ” ຢູ່ນະຄອນຄຸນໝິງ ແລະ ນະຄອນຢູ້ຊີແຂວງຢຸນນານ.
ທ່ານ ຊາມິນ ອັບດຸນລາ ຈາເຮີດີ ຮອງບັນນາທິການໃຫຍ່ ໂທລະພາບອິດສະຫຼະບັງກລາເດັດໄດ້ເດີນທາງມາເຖິງແຂວງຢຸນນານ ເປັນຄັ້ງທຳອິດ, ທ່ານກ່າວວ່າ: ຫໍພິພິທະພັນທຳມະຊາດຟອດຊິວເສິງຈ່ຽງ ເຮັດໃຫ້ຄົນທັງຫຼາຍຮູ້ສຶກປະທັບໃຈຫຼາຍ, ຫວັງວ່າ: ສາມາດດຳເນີນການຮ່ວມມືກັບສື່ມວນຊົນແຂວງຢຸນນານ ໃນການຖ່າຍທຳຟີມສາລະຄະດີທຳມະຊາດ ແລະ ພູມສາດ ພ້ອມທັງຮ່ວມກັນຄົ້ນຄວ້າແລະ ບັນທຶກທິວທັດທຳມະຊາດ, ຄວາມຫຼາກຫຼາຍດ້ານລະບົບນິເວດ.
ໃນການທັດສະນະສຶກສາຄັ້ງນີ້, ອຸດສາຫະກຳທີ່ມີເອກະລັກພິເສດຂອງແຂວງຢຸນນານເຊັ່ນ: ດອກໄມ້ສົດ, ແພດແຜນຊີວະຊາດ ແລະ ການແປພາສາດ້ວຍປັນຍາປະດິດ ເປັນຕົ້ນ ພ້ອມທັງໝາກຜົນດ້ານການອະນຸລັກລະບົບນິເວດ ແລະ ໂສມໜ້າໃໝ່ ໃນການສ້າງຄວາມຈະເລີນຢູ່ຊົນນະບົດເປັນຕົ້ນ ລ້ວນແຕ່ໄດ້ສ້າງພາບປະທັບໃຈອັນເລິກເຊິ່ງໃຫ້ແກ່ເພື່ອນມິດປະເທດຕ່າງໆ, ພວກເຂົາເຈົ້າກໍໄດ້ສຳຜັດກັບ “ວິຖີຊີວິດແບບຢຸນນານ” ໂດຍກົງທີ່ສຸດ.
ບົດ/ພາບໂດຍ: ໜັງສືພິມລາຍວັນຢຸນນານ
ເນື້ອໃນເພີ່ມເຕີມ:
ນັບແຕ່ວັນທີ 17 ຫາ 22 ມິຖຸນາຜ່ານມານີ້, ງານສັບປະດາພາບ ແລະ ສຽງ ແມ່ນ້ຳລ້ານຊ້າງ-ແມ່ນ້ຳຂອງ ຄັ້ງທີ 5 ໄດ້ຈັດຂຶ້ນຢູ່ແຂວງຢຸນນານ. ສັບປະດາຄັ້ງນີ້ ໄດ້ຈັດກິດຈະກຳສາຍ ລາຍການພາບ ແລະ ສຽງດີເດັ່ນ, ຄ້າຍຖ່າຍທຳວິດີໂອສັ້ນຊາວໜຸ່ມຄັ້ງທີ 3, ການແລກປ່ຽນ ແລະ ສົນທະນາກ່ຽວກັບພາບ ແລະ ສຽງ, ການທັດສະນະສຶກສາ “ປະເທດຈີນທີ່ສວຍງາມທີ່ສຸດ-ວິຖີຊີວິດແບບຢຸນນານ”, ກິດຈະກຳສາຍລະຄອນໂທລະພາບທີ່ດີເດັ່ນຂອງຈີນຢູ່ຫວຽດນາມ ແລະ ກິດຈະກຳອື່ນໆ.
ແຫຼ່ງຂ່າວ: ໜັງສືພິມລາຍວັນຢຸນນານ