ເຝົ້າຮັກສາລີງຂົນຄໍາຢຸນນານ
ເຂດສະຫງວນທຳມະຊາດແຫ່ງຊາດພູຫິມະປາຍມາ ຕັ້ງຢູ່ໃຈກາງຂອງເຂດມໍລະດົກທຳມະຊາດໂລກ “ແມ່ນ້ຳ 3 ສາຍໄຫຼຕາມທິດຽວດກັນ” ແລະ ມີລີງຂົນຄໍາຢຸນນານປະມານ 60% ໄດ້ພັກອາໄສຢູ່ແຫ່ງນີ້. ປັດຈຸບັນ, ມີຜູ້ປ້ອງກັນປ່າໄມ້ ແລະ ນັກຄົ້ນຄວ້າວິທະຍາສາດຊຸດໜຶ່ງໄດ້ເຝົ້າຮັກສາ “ພູຫິມະສັກສິດ” ເຫຼົ່ານີ້. ພວກເພິ່ນ ໄດ້ລາດຕະເວນຕາມພູຫິມະ ເພື່ອເບິ່ງແຍງດູແລ “ພູຫິມະສັກສັດ” ເຫຼົ່ານີ້.
ລີງຂົນຄໍາຢຸນນານ ເປັນລີງທີ່ມີສະເພາະຢູ່ຈີນ, ຊຶ່ງດຳລົງຊີວິດຢູ່ເຂດພູດອຍສູງທີ່ມີອາກາດໜາວ ແລະ ສູງຈາກລະດັບໜ້ານ້ຳທະເລ 3.000 ແມັດຂຶ້ນໄປ ຢູ່ເຂດລະຫວ່າງແຂວງເສສວນ, ແຂວງຢຸນນານ ແລະ ເຂດປົກຄອງຕົນເອງ ຊີຈ້າງ ຂອງຈີນ. ເຂດສຽງກູຈິງ ທີ່ຕັ້ງຢູ່ໃນຂອບເຂດເຂດສະຫງວນທຳມະຊາດແຫ່ງຊາດພູຫິມະປາຍມາຢຸນນານ, ມີລີງຂົນຄໍາຢຸນນານຈຳນວນ 60 ກວ່າໂຕໃນ 10 “ຄອບຄົວ” ດຳລົງຊີວິດຢູ່ແຫ່ງນີ້ ຊຶ່ງເປັນເຂດທີ່ສາມາດໃຫ້ຄົນທັງຫຼາຍ ຕິດຕາມສັງເກດລີງຂົນຄໍາຢຸນນານ ຈາກທາງໃກ້ພຽງແຫ່ງດຽວໃນໂລກເທົ່ານັ້ນ.
ເພາະວ່າໄດ້ພົບກັນທຸກມື້, ເຈົ້າໜ້າທີ່ລາດຕະເວນ ໄດ້ສ້າງສາຍພົວພັນພິເສດກັບລີງຂົນຄໍາຢຸນນານເຫຼົ່ານີ້: ຂໍພຽງແຕ່ເຈົ້າໜ້າທີ່ເຫຼົ່ານີ້ ຮ້ອງໂຮຂຶ້ນມາ, ລີງຂົນຄໍາ ຈຶ່ງປະກົດຕົວອອກຈາກປ່າໄມ້ຕຶບໜາ ເຮັດໃຫ້ນັກທ່ອງທ່ຽວຮູ້ສຶກໜ້າງຶດງໍ້ທີ່ສຸດ. ຕອນຮຸ່ງເຊົ້າ, ທ່ານ ຢູຈ້ຽນຮວາ (Yu Jianhua) ຜູ້ເຝົ້າຮັກສາລີງຂົນຄໍາ ທີ່ມີອາຍຸ 72 ປີ ກໍໄດ້ອອກເດີນທາງເຂົ້າປ່າ ເພື່ອຊອກຫາສະຖານທີ່ຂອງຝູງລີງ, ຕິດຕາມຝູງລີງ ໝົດມື້ ແລ້ວຈຶ່ງກັບເມືອ.
ທ່ານ ຢູຈ້ຽນຮວາ ກ່າວວ່າ: “ພວກເຮົາ ຕື່ນກ່ອນລີງ ແລະ ນອນຫຼັງລີງ”. ໜ່ວຍເຝົ້າຮັກສາລີງເຂດນີ້ແບ່ງເປັນ 2 ຈຸ, ຈຸໜຶ່ງ 10 ຄົນ, ແຕ່ລະຈຸຮັບຜິດຊອບ ເຝົ້າເປັນມື້ໜຶ່ງ ແລະ ຕ້ອງເພີ່ມອາຫານການກິນໃຫ້ແກ່ລີງ. ເມື່ອພົບນັກທ່ອງທ່ຽວ ຫຼື ນັກຄົ້ນຄວ້າວິທະຍາສາດເຂົ້າມາ, ພວກເພິ່ນ ສາມາດນຳພາຄົນທັງຫຼາຍເຂົ້າໄປ ເບິ່ງຝູງລີງໄດ້.
ທ່ານ ຢູຈ້ຽນຮວາ ເປັນຜູ້ເຝົ້າຮັກສາລີງຂອງເຂດສຽງກູຈິງ ໃນເຂດສະຫງວນທຳມະຊາດແຫ່ງຊາດ ພູຫິມະປາຍມາ. ພາຍຫຼັງເຂດສະຫງວນແຫ່ງນີ້ ໄດ້ຮັບການສ້າງຕັ້ງຂຶ້ນເມື່ອປີ 1983, ທ່ານ ກໍໄດ້ເຂົ້າເປັນສະມາຊິກຂອງໜ່ວຍເຝົ້າຮັກສາລີງ.
ເວລາ 6 ໂມງເຊົ້າ ຫາ 8 ໂມງແລງທຸກມື້, ທ່ານ ລ້ວນແຕ່ໄດ້ເຝົ້າຮັກສາຝູງລີງ ໃນເຂດສຽງກູຈິງ. ມາຮອດປັດຈຸບັນ, ທ່ານ ໄດ້ເຝົ້າຮັກສາຝູງລີງເປັນເວລາ 28 ປີແລ້ວ. ທ່ານ ຢູຈ້ຽນຮວາ ທັງຍິ້ມທັງເວົ້າວ່າ: “ປັດຈຸບັນ, ຖ້າຂ້ອຍບໍ່ໄດ້ເບິ່ງຝູງລີງມື້ໜຶ່ງ, ຂ້ອຍກໍຄິດຮອດຫຼາຍ.” ເຈົ້າໜ້າທີ່ເຂດສະຫງວນທຳມະຊາດ ກໍໄດ້ຮັກແພງຝູງລີງຫຼາຍ, ທ່ານ ເຫີຊິນມິງ (He Xinming) ອະດີດຫົວໜ້າສະຖານີຊ່ວຍເຫຼືອສັດປ່າ ເຂດສະຫງວນທຳມະຊາດ ແຫ່ງຊາດພູຫິມະປາຍມາ ໄດ້ຕັ້ງຊື່ໃຫ້ລີງທຸກໂຕ: “ຈິວເກີ່”, “ເມັດເຂົ້າ” “ໜ້າຂາວ” “ແຕ້ມແດງ” ເຫຼົ່ານີ້ເປັນຕົ້ນ. ໂດຍໄດ້ຮັບຜົນສະທ້ອນຈາກ ທ່ານ ຢູຈ້ຽນຮວາ, ທ່ານ ຢູຈົ່ງຮວາ (Yu Zhonghua) ລູກຊາຍຂອງທ່ານ ຢູຈ້ຽນຮວາ ກໍໄດ້ດຳເນີນວຽກງານລາດຕະເວນຢູ່ເຂດສະຫງວນທຳມະຊາດແຫ່ງຊາດພູຫິມະປາຍມາ ເປັນເວລາເກືອບ 17 ປີ ລ້ວນແຕ່ຮູ້ດີກັບວຽກງານປ້ອງກັນລີງຂົນຄໍາເຊັ່ນກັນ.
ລີງຂົນຄໍາຢຸນນານ ທີ່ມີໃບໜ້າຄ້າຍຄືມະນຸດ ເປັນສັດສະຫງວນລະດັບ 1 ລະດັບຊາດຂອງຈີນ ແລະ ກໍເປັນສັດປະເພດໃກ້ຈະສູນພັນ ໃນບັນຊີລາຍຊື່ສີແດງ ຂອງສະຫະພັນປົກປ້ອງທຳມະຊາດໂລກ ຫຼື IUCN. ການສ້າງໜ່ວຍງານ ເຝົ້າຮັກສາລີງຂົນຄໍາຢຸນນານ ແມ່ນໜຶ່ງໃນມາດຕະການໃນການປົກປ້ອງລີງຂົນຄໍາຢຸນນານຂອງເຂດສະຫງວນທຳມະຊາດແຫ່ງຊາດພູຫິມະປາຍມາ.
ຢູ່ເຂດສຽງກູຈິງ, ເຮືອນໄມ້ແບບດັ້ງເດີມຫຼັງໜຶ່ງ ເປັນຫ້ອງຕິດຕາມຄວບຄຸມການສັງເກດລີງ. ທ່ານ ລ້າຍຈ້ຽນຕົ່ງ ຫົວໜ້າສະຖານີຊ່ວຍເຫຼືອສັດປ່າເຂດສະຫງວນທຳມະຊາດ ແຫ່ງຊາດພູຫິມະປາຍມາ ກ່າວວ່າ: ເຂດສະຫງວນທຳມະຊາດແຫ່ງນີ້ ແມ່ນເຂດສະຫງວນທຳມະຊາດ ແຫ່ງຊາດຝູງລີງຂົນຄໍາຢຸນນານ ທີ່ມີເນື້ອທີ່ໃຫຍ່ທີ່ສຸດຂອງຈີນ. ປີ 2019, ແຂວງຢຸນນານ ໄດ້ສ້າງເຄືອຂ່າຍປົກປ້ອງລີງຂົນຄໍາຢຸນນານໃນຂອບເຂດທົ່ວແຂວງຢຸນນານ, ເຂດສະຫງວນທຳມະຊາດແຫ່ງຊາດພູຫິມະປາຍມາ ໄດ້ດຳເນີນວຽກງານຕິດຕາມຝູງລີງຂົນຄໍາຢຸນນານ, ການລາດຕະເວນ, ການບົວລະບັດຮັກສາສະຖານທີ່ພັກເຊົາຂອງລີງ, ການປົກປ້ອງຢູ່ຕາມເຂດຊຸມຊົນ, ການສຶກສາທຳມະຊາດ ແລະ ອື່ນໆ.
ທ່ານ ລ້າຍຈ້ຽນຕົ່ງ (Lai Jiandong) ກ່າວຕື່ມວ່າ: “ພວກເຮົາ ຍັງໄດ້ນຳໃຊ້ກ້ອງຖ່າຍອິນຟຣາເຣດ, ເຮືອບິນບໍ່ມີຄົນຂັບ, ເຕັກນິກບັນຊາທາງໄກ ແລະເຕັກນິກອື່ນໆ ເພື່ອຄຸ້ມຄອງ ປົກປ້ອງລີງຂົນຄໍາຢຸນນານ, ໄດ້ຄົ້ນຄວ້າ ແລະ ນຳໃຊ້ເຕັກນິກຈຳແນກໃບໜ້າຂອງລີງຢ່າງອັດຕະໂນມັດ ແລະ ເຕັກນິກຕິດຕາມລີງຢ່າງອັດຕະໂນມັດ ຊຶ່ງໄດ້ບັນລຸການຕິດຕາມຝູງລີງຂົນຄໍາຢຸນນານ ໃນທຸກເວລາ.”ພາຍໃຕ້ຄວາມພະຍາຍາມຮ່ວມຂອງວົງການຕ່າງໆໃນສັງຄົມ, ເຂດສະຫງວນທຳມະຊາດແຫ່ງຊາດພູຫິມະປາຍມາໄດ້ກາຍເປັນສວນສະໜຸກຂອງລີງຂົນຄໍາຢຸນນານ.
ຕາມສະຖິຕິເບື້ອງຕົ້ນ, ຈຳນວນລີງຂົນຄໍາຢຸນນານ ໃນເຂດສະຫງວນທຳມະຊາດ ແຫ່ງຊາດພູຫິມະປາຍມາ ໄດ້ເພີ່ມຈາກປະມານ 540 ໂຕ ຈໍານວນ 7 ຝູງໃນປີ 1985, ເປັນປະມານ 2.500 ໂຕ ຈໍານວນ 14 ຝູງ ໃນປັດຈຸບັນ ກວມ 65% ຂອງຍອດຈຳນວນລີງຂົນຄໍາຢຸນນານໃນທົ່ວປະເທດຈີນ.
ແຫຼ່ງຂ່າວ: ສໍານັກຂ່າວຊິນຮວາ, ໜັງສືພິມປະຊາຊົນລາຍວັນ ຈີນ ແລະ ອື່ນໆ ບັນນາທິການ: Yang Chunmei