ຈັດກອງປະຊຸມສຸດຍອດວິສາຫະກິດໄຟຟ້າປະເທດແມ່ນໍ້າລ້ານຊ້າງ-ແມ່ນ້ຳຂອງຄັ້ງທີ 9 - 新闻

ວັນທີ 26 ກັນຍານີ້, ກອງປະຊຸມສຸດຍອດວິສາຫະກິດໄຟຟ້າປະເທດແມ່ນໍ້າລ້ານຊ້າງ-ແມ່ນ້ຳຂອງຄັ້ງທີ 9 ທີ່ຈັດໂດຍບໍລິສັດຕາຂ່າຍໄຟຟ້າພາກໃຕ້ຈີນ (CSG) ແລະ ບໍລິສັດສາຍສົ່ງໄຟຟ້າແຫ່ງຊາດລາວ ໄດ້ຈັດຂຶ້ນຢູ່ນະຄອນຫຼວງວຽງຈັນ ສປປ ລາວ, ເຈົ້າໜ້າທີ່ພາກສ່ວນພະລັງງານໄຟຟ້າທີ່ກ່ຽວຂ້ອງຈາກບັນດາປະເທດ ລວມທັງ ປະເທດລາວ ແລະ ຈີນ ຖືກເຊື້ອເຊີນເຂົ້າຮ່ວມງານ. ກອງປະຊຸມດັ່ງກ່າວມີຫົວຂໍ້ວ່າ “ເພີ່ມທະວີການເຊື່ອມຈອດກັນດ້ານພະລັງງານ ແລະ ຊຸກຍູ້ການຫັນປ່ຽນພະລັງງານໃໝ່ຂອງພາກພື້ນ”, ກອງປະຊຸມດັ່ງກ່າວໄດ້ເຕົ້າໂຮມບັນດາວິສາຫະກິດໄຟຟ້າຈາກປະເທດແມ່ນໍ້າລ້ານຊ້າງ-ແມ່ນໍ້າຂອງ, ຜູ້ຊ່ຽວຊານໃນຂະແໜງການ ແລະ ຜູ້ຕາງໜ້າບັນດາອົງການຈັດຕັ້ງສາກົນຕ່າງໆ ເພື່ອປຶກສາຫາລືກ່ຽວກັບອະນາຄົດແຫ່ງການພັດທະນາ ແລະ ການຫັນເປັນພະລັງງານສີຂຽວ ໃນພາກພື້ນແມ່ນໍ້າລ້ານຊ້າງ-ແມ່ນໍ້າຂອງ.

ກອງປະຊຸມໄດ້ສຸມໃສ່ການວາງແຜນພະລັງງານສີຂຽວ ແລະ ການພັດທະນາການຫັນປ່ຽນພະລັງງານ ໃນພາກພື້ນແມ່ນໍ້າລ້ານຊ້າງ-ແມ່ນໍ້າຂອງ (ປີ 2025-2030). ບັນດາແຂກເຂົ້າຮ່ວມໄດ້ແລກປ່ຽນບົດຮຽນແລະ ການປະຕິບັດທີ່ດີທີ່ສຸດຂອງປະເທດຕົນເອງ, ປຶກສາຫາລືກ່ຽວກັບສິ່ງທ້າທາຍ ແລະ ວິທີການແກ້ໄຂບັນຫາລະບົບໄຟຟ້າ, ຄວາມຈຳເປັນ ແລະ ຄວາມເປັນໄປໄດ້ຂອງນະໂຍບາຍແລະ ມາດຕະຖານ ຂອງພະລັງງານໄຟຟ້າຂອງພາກພື້ນ ທີ່ເກີດຈາກການເຊື່ອມຕໍ່ຂອງຕາໜ່າງພະລັງງານໃໝ່ຂະໜາດໃຫຍ່. ພ້ອມທັງໄດ້ປະກອບຄຳຄິດຄໍາເຫັນທີ່ມີລັກສະນະສ້າງສັນ ໃນການປັບປຸງລະດັບເຊື່ອມຈອດ ດ້ານພະລັງງານ, ຊຸກຍູ້ການພັດທະນາ ແລະ ການປັບປຸງໃຫ້ສອດຄ່ອງດີ ຂອງ ພະລັງງານໃໝ່ ໃນພາກພື້ນ.

ທ່ານ ເຣິນຈິ່ງຕົ່ງ (Ren Jingdong) ຮອງຫົວໜ້າອົງການພະລັງງານແຫ່ງຊາດຈີນ（National Energy Administration）ຊີ້ໃຫ້ເຫັນວ່າ, ພາກພື້ນແມ່ນ້ຳລ້ານຊ້າງ-ແມ່ນໍ້າຂອງບໍ່ພຽງແຕ່ແມ່ນຂົງເຂດສຳຄັນສຳລັບການລົງທຶນດ້ານພະລັງງານຂອງທົ່ວໂລກເທົ່ານັ້ນ, ຫາກຍັງແມ່ນພື້ນທີ່ສຳຄັນສຳລັບການຫັນເປັນພະລັງງານໃໝ່ຂອງທົ່ວໂລກ. ໃນຖານະທີ່ເປັນສະມາຊິກສຳຄັນຂອງແມ່ນ້ຳລ້ານຊ້າງ-ແມ່ນໍ້າຂອງ, ຈີນສືບຕໍ່ຊຸກຍູ້ການຫັນປ່ຽນພະລັງງານຂອງຕົນເອງ, ພ້ອມທັງເປັນຜູ້ປະຕິບັດ, ຜູ້ຊຸກຍູ້ ແລະ ຜູ້ປະກອບສ່ວນຢ່າງຕັ້ງໜ້າເຂົ້າໃນການຫັນປ່ຽນພະລັງງານຂອງໂລກ. ຍຶດໝັ້ນຫຼັກການຮ່ວມກັນປຶກສາຫາລື, ຮ່ວມກັນກໍ່ສ້າງ ແລະ ຮ່ວມກັນຊົມໃຊ້, ເພື່ອສະແຫວງຫາການພັດທະນາແບບຍືນຍົງຂອງພະລັງງານໂລກ. ໂດຍຜ່ານການເພີ່ມທະວີການລົງທຶນໃນການຫັນປ່ຽນພະລັງງານແລະລົງເລິກການຮ່ວມມືໃນການຫັນປ່ຽນພະລັງງານ, ຮ່ວມກັນຕອບໂຕ້ສິ່ງທ້າທາຍຂອງການປ່ຽນແປງສະພາບດິນຟ້າອາກາດຂອງໜ່ວຍໂລກ, ເຮັດໃຫ້ "ສີຂຽວ" ກາຍເປັນສີພື້ນຖານຂອງການຮ່ວມມືດ້ານພະລັງງານຕາມຂໍ້ລິເລີ່ມ "ໜຶ່ງແລວໜຶ່ງເສັ້ນທາງ", ພ້ອມທັງສົ່ງ "ແຮງຂັບເຂື່ອນຂອງຈີນ" ເຂົ້າສູ່ການພັດທະນາສີຂຽວລະດັບໂລກ. ຈີນຖືເປັນສຳຄັນຕໍ່ການຮ່ວມມືດ້ານພະລັງງານຢູ່ພາກພື້ນແມ່ນໍ້າລ້ານຊ້າງ-ແມ່ນ້ຳຂອງ, ຈະຍຶດໝັ້ນແນວຄິດຂອງການສ້າງປະຊາຄົມຮ່ວມຊາຕາກໍາຂອງມວນມະນຸດ, ຊຸກຍູ້ການພັດທະນາພະລັງງານສີຂຽວ ແລະກາກບອນຕ່ຳ, ປະກອບສ່ວນກໍາລັງວັງຊາຈີນເຂົ້າໃນການຊຸກຍຸ້ການສ້າງລະບົບການຄຸ້ມຄອງພະລັງງານຂອງໜ່ວຍໂລກທີ່ທ່ຽງທຳ, ສະເໜີພາບ ແລະ ທົ່ວເຖິງ, ສົມດູນ.

ທ່ານ ນາງ ສັນຕິສຸກ ພິມພະຈັນ ຫົວໜ້າກົມນະໂຍບາຍ ແລະ ວາງແຜນພະລັງງານ, ກະຊວງພະລັງງານ ແລະ ບໍ່ແຮ່ ແຫ່ງ ສປປ ລາວ ກ່າວວ່າ: ໄປຄຽງຄູ່ກັບຂະບວນການໂລກາພິວັດໄດ້ຄ່ອຍໆເລັ່ງໄວ, ການເຊື່ອມໂຍງເຊື່ອມຈອດໄດ້ກາຍເປັນເປົ້າໝາຍສຳຄັນຂອງການຮ່ວມມືໃນພາກພື້ນ. ປະເທດລາວມີຄວາມໄດ້ປຽບທາງດ້ານພູມສາດທີ່ເປັນເອກະລັກ ໂດຍຜ່ານການດໍາເນີນການເຊື່ອມຕໍ່ດ້ານພະລັງງານ ແລະ ການຄົມມະນາຄົມກັບປະເທດເພື່ອນບ້ານ, ປະເທດລາວໄດ້ຫັນປ່ຽນຈາກ “ປະເທດທີ່ບໍ່ມີຊາຍແດນຕິດກັບທະເລ” ມາເປັນ “ປະເທດທີ່ເຊື່ອມໂຍງເຊື່ອມຈອດຂອງພາກພື້ນ”. ທ່ານນາງເນັ້ນໜັກວ່າ, ເມື່ອປະເຊີນໜ້າກັບບັນດາສິ່ງທ້າທາຍໃນການນຳໃຊ້ພະລັງງານທົດແທນ ແລະ ການຫັນປ່ຽນຕາຂ່າຍໄຟຟ້າ, ບັນດາປະເທດໃນພາກພື້ນຕ້ອງເພີ່ມທະວີການຮ່ວມມື ແລະ ປະສານສົມທົບກັນເພື່ອຊອກຫາວິທີແກ້ໄຂ. ທ່ານ ນາງ ສັນຕິສຸກ ພິມພະຈັນ ເຫັນດີເຫັນພ້ອມຕໍ່ກັບກົນໄກກອງປະຊຸມສຸດຍອດວິສາຫະກິດໄຟຟ້າປະເທດແມ່ນໍ້າລ້ານຊ້າງ-ແມ່ນ້ຳຂອງ, ຫວັງວ່າຜ່ານກົນໄກດັ່ງກ່າວ, ບັນດາວິສາຫະກິດພະລັງງານໄຟຟ້າຢູ່ບັນດາປະເທດແມ່ນ້ຳຂອງ-ແມ່ນໍ້າລ້ານຊ້າງຈະເພີ່ມທະວີການແລກປ່ຽນບົດຮຽນດ້ານເຕັກນິກ, ບຳລຸງສ້າງບຸກຄະລະກອນ ແລະ ການຮ່ວມມືໃນໂຄງການ, ແບ່ງປັນປະສົບການ ແລະ ຜົນງານຂອງຕົນ, ຮ່ວມກັນຊຸກຍູ້ ກາພັດທະນາແບບຍືນຍົງຂອງອຸດສາຫະກໍາພະລັງງານໃນພາກພື້ນແມ່ນ້ຳຂອງ-ແມ່ນໍ້າລ້ານຊ້າງ.

ທ່ານ ອູຕູລະໂບ, ຫົວໜ້າກົມຄວບຄຸມລະບົບສາຍສົ່ງ ແລະ ລະບົບໄຟຟ້າ ກະຊວງພະລັງງານໄຟຟ້າ ແຫ່ງ ມຽນມາ ຊີ້ໃຫ້ເຫັນວ່າ: ການຫັນປ່ຽນພະລັງງານໃໝ່ແມ່ນການປ່ຽນແປງທີ່ສຳຄັນຂອງສະພາບການພະລັງງານ. ການຮ່ວມມືລະຫວ່າງປະເທດບ້ານໃກ້ເຮືອນຄຽງໃນດ້ານການແລກປ່ຽນການປະຕິບັດທີ່ດີທີ່ສຸດ, ການຈັດສັນຊັບພະຍາກອນ ແລະ ການວາງແຜນຕອບໂຕ້ສິ່ງທ້າທາຍດ້ານພະລັງງານແມ່ນມີຄວາມສໍາຄັນຫຼາຍ. ໂດຍຜ່ານການເພີ່ມທະວີການເຊື່ອມໂຍງດ້ານພະລັງງານໃນພາກພື້ນ, ພວກເຮົາສາມາດຊຸກຍູ້ການຊົມໃຊ້ຊັບພະຍາກອນຮ່ວມກັນ, ຫຼຸດຜ່ອນຄ່າໃຊ້ຈ່າຍດ້ານພະລັງງານ, ປັບປຸງຄວາມໜ້າເຊື່ອຖືຂອງຕາຂ່າຍໄຟຟ້າ ແລະ ນຳໃຊ້ພະລັງງານທົດແທນຢ່າງມີປະສິດທິຜົນ. ໂດຍຜ່ານການພັດທະນາໂຄງການພະລັງງານຂ້າມຊາຍແດນ, ເພື່ອເພີ່ມທະວີຄວາມໝັ້ນຄົງດ້ານພະລັງງານ, ຊຸກຍູ້ການເຊື່ອມໂຍງດ້ານເສດຖະກິດ ແລະ ການຮ່ວມມືກັນ.

ທ່ານ ຊຽນ ຊາວຢາງ (Qian Chaoyang), ປະທານ ແລະ ຜູ້ອຳນວຍການໃຫຍ່ ບໍລິສັດຕາຂ່າຍໄຟຟ້າພາກໃຕ້ຈີນ ກ່າວວ່າ, ນັບແຕ່ຈີນໄດ້ສະເໜີການຮ່ວມມືແມ່ນໍ້າລ້ານຊ້າງ-ແມ່ນ້ຳຂອງ ເປັນເວລາ10 ປີ ມານີ້, ການຮ່ວມມືແມ່ນໍ້າລ້ານຊ້າງ-ແມ່ນ້ຳຂອງ ໄດ້ກາຍເປັນ "ເວທີຄຳ" ແຫ່ງການຮ່ວມມືໃນພາກພື້ນ, ການຮ່ວມມືດ້ານພະລັງງານໄຟຟ້າໄດ້ກາຍເປັນຕົວແບບທີ່ມີຄວາມຊີວິດຊີວາ ແລະ ສໍາຄັນທີ່ສຸດ, ເປັນສັກຂີພິຍານໃຫ້ເຫັນເຖິງການສ້າງປະຊາຄົມຮ່ວມຊາຕາກໍາຂອງມວນມະນຸດ. ບໍລິສັດຕາຂ່າຍໄຟຟ້າພາກໃຕ້ຈີນ ຫວັງວ່າຈະສືບຕໍ່ຮ່ວມມືກັບທຸກຝ່າຍ, ຍຶດໝັ້ນຫຼັກການຮ່ວມກັນສ້າງ, ສ້າງຕົວແບບການຮ່ວມມືດ້ານພະລັງງານໄຟຟ້າຂ້າມຊາຍແດນ; ອີງຕາມຫຼັກການຮ່ວມກັນປຶກສາຫາລືເປັນພື້ນຖານ ເພື່ອສ້າງຕົວແບບການຮ່ວມມືດ້ານພະລັງງານສີຂຽວ; ອີງໃສ່ຮ່ວມກັນຊົມໃຊ້ເປັນເປົ້າໝາຍ, ສ້າງຕົວແບບການຮ່ວມມືແບບຕ່າງຝ່າຍຕ່າງໄດ້ຮັບຜົນປະໂຫຍດ. ຮ່ວມກັນສ້າງການຮ່ວມມືດ້ານພະລັງງານ ໃຫ້ເປັນ "ຕົວແບບສີຄຳ" ການຮ່ວມມືພາກພື້ນແມ່ນໍ້າລ້ານຊ້າງ-ແມ່ນ້ຳຂອງ, ເພື່ອ ສະໜັບສະໜູນການຫັນປ່ຽນເປັນພະລັງງານໄຟຟ້າສີຂຽວ ແລະ ກາກບອນຕ່ຳ, ພ້ອມທັງຊຸກຍູ້ການພັດທະນາເສດຖະກິດ - ສັງຄົມຢ່າງມີຄຸນນະພາບສູງ.

ທ່ານ ວົງສະກຸນ ຍິ່ງຍົງ, ຜູ້ອໍານວຍການລັດວິສາຫະກິດໄຟຟ້າລາວ ຊີ້ໃຫ້ເຫັນວ່າ: ບັນດາປະເທດແມ່ນໍ້າຂອງ-ແມ່ນໍ້າລ້ານຊ້າງ ມີສາຍພູສາຍນໍ້າຕິດຈອດກັນ ແລະ ມີພື້ນຖານອັນດີ ໃນດ້ານການຊຸກຍູ້ການຮ່ວມມືຫຼາຍຝ່າຍໃນດ້ານການເຊື່ອມຈອດກັນດ້ານພະລັງງານໄຟຟ້າ ແລະ ພະລັງງານສະອາດ, ພ້ອມທັງມີສັກກະຍະພາບໃນການຂະຫຍາຍຕົວທາງດ້ານເສດຖະກິດ ແລະ ການພັດທະນາອຸດສາຫະກໍາພະລັງງານ. ທ່ານຮຽກຮ້ອງໃຫ້ທຸກຝ່າຍສົມທົບກັບສະພາບຕົວຈິງ, ເພີ່ມທະວີການເຊື່ອມຈອດດ້ານແຜນການພັດທະນາພະລັງງານໄຟຟ້າແຫ່ງຊາດ, ຍົກສູງລະດັບການຄຸ້ມຄອງບໍລິຫານຕາຂ່າຍໄຟຟ້າໃຫ້ປອດໄພ ແລະ ເຊື່ອຖືໄດ້, ພ້ອມທັງເພີ່ມທະວີຄວາມສາມາດໃນດ້ານການຈັດສັນຊັບພະຍາກອນພື້ນຖານໂຄງລ່າງຂອງບັນດາປະເທດແມ່ນໍ້າຂອງ-ແມ່ນໍ້າລ້ານຊ້າງ.

ໃນຂອດການປຶກສາຫາລືຂອງກອງປະຊຸມດັ່ງກ່າວ, ທ່ານ ສຸລິຍັນ ວິຈິດຕະການ , ຜູ້ອໍານວຍການບໍລິຫານສະຖາບັນແມ່ນ້ຳຂອງ ພ້ອມດ້ວຍຜູ້ຕາງໜ້າບັນດາວິສາຫະກິດໄຟຟ້າແມ່ນໍ້າລ້ານຊ້າງ-ແມ່ນໍ້າຂອງ ໄດ້ດຳເນີນການແລກປ່ຽນ ແລະ ປຶກສາຫາລືຢ່າງເລິກເຊິ່ງ ກ່ຽວກັບເສັ້ນທາງພັດທະນາການຫັນເປັນພະລັງງານສີຂຽວຂອງພາກພື້ນ.

ນອກຈາກນີ້, ກອງປະຊຸມຍັງໄດ້ເຜີຍແຜ່ "ຂໍ້ລິເລີ່ມກ່ຽວກັບການຄົ້ນຄວ້າກໍ່ສ້າງຕະຫຼາດພະລັງງານໄຟຟ້າຮ່ວມກັນ ຂອງພາກພື້ນແມ່ນໍ້າລ້ານຊ້າງ-ແມ່ນໍ້າຂອງ". ຂໍ້ລິເລີ່ມນີ້ແມ່ນຮ່ວມກັນສະເໜີໂດຍບໍລິສັດຕາຂ່າຍໄຟຟ້າພາກໃຕ້ຈີນ ແລະ ລັດວິສາຫະກິດໄຟຟ້າລາວ, ເພື່ອແນໃສ່ຊຸກຍູ້ການຮ່ວມມືດ້ານພະລັງງານໄຟຟ້າໃຫ້ເຂົ້າສູ່ລວງເລິກ, ດຳເນີນການຄົ້ນຄ້ວາການສ້າງຕະຫຼາດພະລັງງານໄຟຟ້າຂອງພາກພື້ນແມ່ນໍ້າລ້ານຊ້າງ-ແມ່ນໍ້າຂອງຮ່ວມກັນ, ຊຸກຍູ້ຍົກສູງລະດັບຄວາມສາມາດການເຊື່ອມຈອດໃນດ້ານພື້ນຖານໂຄງລ່າງດ້ານພະລັງງານໄຟຟ້າຂ້າມຊາຍແດນ ແລະ ຄວາມປອດໄພການດໍາເນີນງານຂອງຕາຂ່າຍໄຟຟ້າ, ຊຸກຍູ້ການຈັດສັນພະລັງງານໄຟຟ້າໃນພາກພື້ນໃຫ້ປອດໄພ, ປະຢັດ ແລະ ເປັນມິດກັບສິ່ງແວດລ້ອມຫຼາຍຂຶ້ນ ເປັນກ້າວໆ. ຂໍ້ລິເລີ່ມນີ້ຫວັງວ່າຈະຊຸກຍູ້ການສ້າງຕັ້ງທີມງານການ (ຄົ້ນຄວ້າ) ສ້າງຕະຫຼາດພະລັງງານ ໄຟຟ້າຮ່ວມກັນ, ໂດຍຜ່ານການສ້າງຈຸດທົດລອງໃນຂອບເຂດນ້ອຍ ແລະ ແບ່ງສິນຄ້າການຄ້າຂາຍຕາມ ກຳນົດເວລາ, ພ້ອມກັນຄົ້ນຄວ້າເສັ້ນທາງພັດທະນາການຂອງຕະຫຼາດ.

ກົນໄກກອງປະຊຸມສຸດຍອດວິສາຫະກິດໄຟຟ້າປະເທດແມ່ນໍ້າລ້ານຊ້າງ-ແມ່ນ້ຳຂອງໄດ້ລິເລີ່ມຂຶ້ນໂດຍບໍລິສັດຕາຂ່າຍໄຟຟ້າພາກໃຕ້ຈີນ ໃນປີ 2014 ແລະ ໄດ້ຮັບການຕອບສະໜອງຢ່າງຕັ້ງໜ້າ ຈາກກຸ່ມບໍລິສັດໄຟຟ້າຫວຽດນາມ, ລັດວິສາຫະກິດໄຟຟ້າລາວ, ກະຊວງໄຟຟ້າມຽນມາ, ບໍລິສັດໄຟຟ້າກຳປູເຈຍ ແລະ ອົງການຜະລິດໄຟຟ້າແຫ່ງປະເທດໄທ, ເພື່ອສ້າງເວທີແຫ່ງການແບ່ງປັນຂໍ້ມູນຂ່າວສານ, ແລກປ່ຽນປະສົບການ ແລະ ຮັດແໜ້ນການຮ່ວມມືໃຫ້ເລິກເຊິ່ງຍິ່ງຂຶ້ນແກ່ບັນດາອົງການຄຸ້ມຄອງພະລັງງານໄຟຟ້າແຫ່ງຊາດ, ວິສາຫະກິດ, ຜູ້ຊ່ຽວຊານໃນຂະແໜງການ ແລະ ຜູ້ຕາງໜ້າຈາກອົງການຈັດຕັ້ງສາກົນຂອງປະເທດແມ່ນໍ້າລ້ານຊ້າງ-ແມ່ນ້ຳຂອງ.