ໂຮງຮຽນຫຼາຍແຫ່ງໃນຈີນ ປະຕິບັດ "ການນອນພັກຜ່ອນຕອນທ່ຽງ", ບອກລາການນອນຢູ່ເທິງໂຕະ!

ໃນໄລຍະເປີດສົກຮຽນໃໝ່ນີ້, ໂຮງຮຽນຫຼາຍແຫ່ງໃນຈີນໄດ້ປ່ຽນໂຕະ ແລະ ຕັ່ງນັ່ງຂອງຕົນ ເປັນຊຸດທີ່ສາມາດນອນເອນອຽງໄດ້. ໂຮງຮຽນປະຖົມເປີຍເຫີຖັງ ທີ່ນະຄອນຫາງໂຈ່ວ ມີຫ້ອງຮຽນທັງໝົດ 16 ຫ້ອງ, ໃນຫ້ອງໄດ້ວາງໂຕະ ແລະ ຕັ່ງນັ່ງທີ່ໃຊ້ເພື່ອນອນພັກຜ່ອນ ພຽງແຕ່ປະຕິບັດສອງສາມຂັ້ນຕອນງ່າຍໆ, ມັນກໍສາມາດປ່ຽນເປັນ “ຕຽງນ້ອຍ” ສໍາລັບການນອນຫຼັບໄດ້.

ຢູ່ໃນຫ້ອງຮຽນຂອງໂຮງຮຽນເສີນເຈີ້ນ ໃນເຄືອມະຫາວິທະຍາໄລຊຸນຢັດເຊັນ, ໜ້າກໍາແພງທັງ 3 ດ້ານ ກໍໄດ້ວາງຕູ້ໃສ່ເຄື່ອງຍາວໆ, ທຸກວັນ ຫຼັງຈາກນັກຮຽນກິນເຂົ້າທ່ຽງແລ້ວ,​ ທີມງານທີ່ປະຕິບັດໜ້າທີ່​ກໍຈະຍ້າຍຕັ່ງ ແລະ ໂຕະ ໄປວາງຢູ່ສູນກາງຂອງຫ້ອງຮຽນ, ຫຼັງຈາກນັ້ນນັກຮຽນທັງໝົດດຶງຕຽງພັບທີ່ ເຊື່ອງໄວ້ໃນ ຕູ້ໃສ່ເຄື່ອງ ແລະ ວາງເຄື່ອງປູນອນ, ຂະບວນການທັງໝົດໃຊ້ເວລາພຽງແຕ່ 5 ນາທີ.

ກ່ອນການມາເຖິງຂອງຮູບແບບ "ນອນພັກຜ່ອນຕອນທ່ຽງ", ນັກຮຽນຫຼາຍຄົນພຽງແຕ່ສາມາດນອນຂວໍ່າລົງເທິງໂຕະໃນເວລາພັກຜ່ອນຕອນທ່ຽງເທົ່ານັ້ນ. ການນອນຂວໍ່າລົງເທິງໂຕະ ມັນງ່າຍທີ່ຈະເຮັດໃຫ້ເກີດຄວາມດັນໃນລູກຕາຫຼາຍເກີນໄປ, ທໍາໃຫ້ເກີດການໃຄ່ບວມຂອງຕາ ແລະ ອາດເຖິງຂັ້ນສາຍຕາສັ້ນໄດ້. ໃນປັດຈຸບັນ, "ການນອນພັກຜ່ອນຕອນທ່ຽງ" ຮູບແບບໃໝ່ ຊ່ວຍແກ້ໄຂບັນຫາຈໍານວນຫຼາຍທີ່ເກີດຈາກການນອນຂວໍ່າລົງເທິງໂຕະ, ຄຸນນະພາບຂອງການນອນພັກຜ່ອນຕອນທ່ຽງໄດ້ຖືກປັບປຸງຢ່າງເຫັນໄດ້ຊັດແຈ້ງ.

ແຫຼ່ງຂ່າວ: ໜັງສືພິມລາຍວັນຈີນ