“ລວມເລື່ອງລາວໄວໜຸ່ມຈີນ - ອາຊຽນ” ໄດ້ເລີ່ມບັນຍາຍຢູ່ ສປປ ລາວ

ວັນທີ 24 ເດືອນສິງຫານີ້, ກິດຈະກໍາລວມເລື່ອງລາວໄວໜຸ່ມຈີນ - ອາຊຽນ “I Show ASEAN” ແລະ ກິດຈະກໍາລົງຢ້ຽມ ທັດສະນະສຶກສາໂຄງການຕ່າງປະເທດຂອງລັດວິສາຫະກິດຈີນໄດ້ຈັດຂຶ້ນທີ່ແຂວງຫຼວງພະບາງ ສປປ ລາວ. ກິດຈະກໍາດັ່ງກ່າວລິເລີ່ມໂດຍສູນໂຄສະນາວັດທະນະທໍາຂອງກຸ່ມການສື່ສານສາກົນຈີນ(China International Communications Group, CICG),ຈຸດປະສົງກໍເພື່ອນໍາໃຊ້ການທັດສະນະຢ້ຽມຢາມໜ່ວຍງານ ແລະ ໂຄງການຕ່າງໆ, ເພື່ອລົງເລິກສໍາຫຼວດການປະກອບສ່ວນທີ່ພົ້ນເດັ່ນຂອງລັດວິສາຫະກິດຈີນຕໍ່ການພັດທະນາເສດຖະກິດ - ສັງຄົມໃນທ້ອງຖິ່ນ ແລະ ປຸກລະດົມໃຫ້ໄວໜຸ່ມກະຕືລືລົ້ນເຂົ້າຮ່ວມການແລກປ່ຽນ ແລະ ຖອດຖອນບົດຮຽນດ້ານວັດທະນະທໍາລະຫວ່າງຈີນ - ອາຊຽນ. ໂຄງການໃນ ສປປ ລາວຂອງບໍລິສັດຕາຂ່າຍໄຟຟ້າພາກໃຕ້ຈີນ (CSG) ແມ່ນຈຸດທໍາອິດທີ່ໄປຢ້ຽມຢາມ, ນາງ ເພັດວັນນາ ສີສະໝຸດ ພະນັກງານສັນຊາດລາວ ໄດ້ແບ່ງປັນເລື່ອງລາວ ໃນນາມເປັນຜູ້ຕາງໜ້າໄວໜຸ່ມອາຊຽນ.

ທ່ານ ຢູທ່າວ (Yu Tao) ຮອງຫົວໜ້າກຸ່ມການສື່ສານສາກົນຈີນ (China International Communications Group, CICG) ໄດ້ກ່າວ ປາໄສຜ່ານທາງວິດີໂອ. ທ່ານ ລຽງຕ້າຈົ່ງ (Liang Dazong), ອັກຄະລັດຖະທູດທີ່ປຶກສາປະຈໍາສະຖານທູດແຫ່ງ ສປ ຈີນ ປະຈໍາ ສປປ ລາວ, ທ່ານ ຮວງເວີນກ່າງ (Huang Wengang), ຜູ້ອໍານວຍການໃຫຍ່ ບໍລິສັດສາຍສົ່ງໄຟຟ້າແຫ່ງຊາດລາວ, ທ່ານ ຊອ.ປທ. ສຸວັນນະຫົງ ລັດຕະນະພິມ ຮອງປະທານກຳມະບານຮາກຖານຄະນະວິທະຍາສາດສັງຄົມມະຫາວິທະຍາໄລແຫ່ງຊາດ, ຮອງຫົວໜ້າສູນຄົ້ນຄວ້າແລະ ຝຶກອົບຮົມດ້ານການປະເມີນຜົນກະທົບຕໍ່ສັງຄົມ ແລະ ການຄຸ້ມຄອງການຈັດສັນຍົກຍ້າຍ ໄດ້ໃຫ້ກຽດເຂົ້າຮ່ວມກິດຈະກໍາ.

ທ່ານ ຢູທ່າວ ກ່າວວ່າ, ຈີນ ແລະ ອາຊຽນ ແມ່ນເພື່ອນບ້ານທີ່ດີ ແລະ ເພື່ອນມິດທີ່ດີທີ່ມີຊາຕາກໍາຮ່ວມກັນ, ທັງເປັນເພື່ອນຮ່ວມທາງຂອງປະເທດສະມາຊິກອາຊຽນໃນການຫັນເປັນທັນສະໄໝ ແລະ ເປັນຄູ່ຮ່ວມທີ່ດີໃນຂະບວນການພັດທະນາແບບມີຄຸນນະພາບສູງ. ຕະ ຫຼອດເວລາຍາວນານຜ່ານມາ ລັດວິສາຫະກິດຈີນໄດ້ດໍາເນີນການຮ່ວມມືແບບຕ່າງຝ່າຍຕ່າງໄດ້ຜົນປະໂຫຍດກັບບັນດາປະເທດອາຊຽນໃນດ້ານການກໍ່ສ້າງພື້ນຖານໂຄງລ່າງ, ນະວັດຕະກໍາດ້ານເຕັກໂນໂລຊີ, ການພັດທະນາແບບສີຂຽວ ແລະ ຂົງເຂດອື່ນໆ, ເຊິ່ງໄດ້ຮັບໝາກຜົນອັນອຸດົມສົມບູນ. ໃນຖານະທີ່ເປັນຜູ້ຕາງໜ້າຂອງລັດວິສາຫະກິດຈີນໃນປະເທດອາຊຽນ, ບໍລິສັດຕາຂ່າຍໄຟຟ້າພາກໃຕ້ຈີນ ໄດ້ຊຸກຍູ້ສົ່ງເສີມການເຊື່ອມໂຍງເຊື່ອມຈອດຕາຂ່າຍໄຟຟ້າໃນປະເທດແມ່ນໍ້າລ້ານຊ້າງ-ແມ່ນໍ້າຂອງ ຢ່າງແໜ້ນແຟ້ນ, ພ້ອມທັງສົ່ງເສີມການພັດທະນາເສດຖະກິດ, ສັງຄົມ ແລະ ສິ່ງແວດລ້ອມໃຫ້ດໍາເນີນໄປຢ່າງສອດຄ່ອງກັນ, ນອກນັ້ນຍັງກະຕືລືລົ້ນມີສ່ວນຮ່ວມໃນການແລກປ່ຽນວັດທະນະທໍາ ແລະ ສົ່ງເສີມການສ້າງຄວາມເຂົ້າໃຈກັນລະຫວ່າງປະຊາຊົນ, ເຊິ່ງໄດ້ເກີດເປັນເລື່ອງລາວທີ່ມີສີສັນຈໍານວນຫຼາຍ. ຫວັງວ່າ ໂດຍຜ່ານກິດຈະກໍາຢ້ຽມຢາມສະຖານທີ່ຕົວຈິງ ແລະ ກິດຈະກໍາຮູບແບບອື່ນໆ ຈະສາມາດເຮັດໃຫ້ຈີນ ແລະ ອາຊຽນມີຄວາມເພິ່ງພໍໃຈໃນດ້ານການແລກປ່ຽນວັດທະນະທໍາ, ເສີມຂະຫຍາຍການແລກປ່ຽນທາງວັດທະນະທໍາໃນຮູບແບບໃໝ່, ຮວບຮວມແຮງຂັບເຄື່ອນໃໝ່ໃນການພັດທະນາພາກພື້ນແລະ ຮ່ວມແຮງກັນກໍ່ສ້າງຄູ່ຮ່ວມຊາຕາກໍາຈີນ - ອາຊຽນ ໃຫ້ສະໜິດແໜ້ນຍິ່ງຂຶ້ນ.

 

ທ່ານ ລຽງຕ້າຈົ່ງ  

ທ່ານ ລຽງຕ້າຈົ່ງ ເນັ້ນຢໍ້າວ່າ, ຈີນ ແລະ ປະເທດອາຊຽນມີພູຜາແມ່ນໍ້າຕິດຈອດກັນ, ມີວັດທະນະທໍາຄ້າຍຄືກັນ,ມິດຕະພາບທີ່ມີມູນເຊື້ອຍາວນານ.ລັດວິສາຫະກິດຈີນເປັນກໍາລັງແຮງສໍາຄັນໃນການຈັດຕັ້ງປະຕິບັດນະໂຍບາຍ“ອອກສູ່ພາຍນອກ” ແລະ ການຮ່ວມສ້າງ“ໜຶ່ງແລວໜຶ່ງເສັ້ນທາງ” ຂອງຈີນ, ທັງເປັນປະຕູທີ່ສໍາຄັນໃນການເຮັດໃຫ້ສາກົນເຂົ້າໃຈຈີນ, ຮູ້ຈັກຈີນ ແລະ ຮັບຮູ້ຈີນຫລາຍຂຶ້ນ. ໄວໜຸ່ມອາຊຽນແມ່ນກໍາລັງແຮງສໍາຄັນໃນການຊຸກຍູ້ການພັດທະນາໃນພາກພື້ນອາຊຽນ ແລະ ສ້າງສາອາຊຽນໃຫ້ສວຍງາມ, ພ້ອມທັງເປັນແນວໜ້າໃນການສົ່ງເສີມການແລກປ່ຽນຖອດຖອນບົດຮຽນດ້ານວັດທະນະທໍາລະຫວ່າງຈີນ-ອາຊຽນ. “ລວມເລື່ອງລາວໄວໜຸ່ມຈີນ-ອາຊຽນ” ໄດ້ນໍາເອົາລັດວິສາຫະກິດຈີນ ແລະ ໄວໜຸ່ມອາຊຽນທີ່ເປັນສອງກໍາລັງແຮງສໍາຄັນມາປະສົມປະສານເຂົ້າກັນ, ເຊິ່ງມັນຈະຊ່ວຍສະແດງໃຫ້ເຫັນເຖິງການຮ່ວມມືມິດຕະພາບ, ການຊ່ວຍເຫຼືອເຊິ່ງກັນແລະກັນ, ເລື່ອງລາວອັນສວຍງາມໃນການຮ່ວມກັນສະແຫວງຫາການພັດທະນາລະຫວ່າງຈີນ-ອາຊຽນ, ທັງຈະຊ່ວຍໃຫ້ປະຊາຊົນຈີນ-ອາຊຽນຮູ້ຈັກກັນ, ສະໜິດສະໜົມກັນ ແລະ ກົມກຽວກັນ. ຫວັງວ່າ ໄວໜຸ່ມຈີນ-ອາຊຽນຈະໄຂວ່ຄວ້າໂອກາດ, ຈັບມືຮ່ວມແຮງກັນສ້າງຂົວຕໍ່ທີ່ແຂງແກ່ນໃນການເຊື່ອມສໍາພັນລະຫວ່າງປະຊາຊົນ,ພ້ອມທັງເພີ່ມທະວີການຖອດຖອນບົດຮຽນເຊິ່ງກັນແລະກັນ ໃນລະຫວ່າງການແລກປ່ຽນຂ້າມວັດທະນະທໍາ,ຮ່ວມກັນເຕີບໃຫຍ່ກ້າວໜ້າ, ເພື່ອກໍ່ສ້າງປະຊາຄົມຮ່ວມຊາຕາກໍາຈີນ-ອາຊຽນທີ່ສະໜິດແໜ້ນຍິ່ງຂຶ້ນ, ປະກອບສ່ວນກໍາລັງແຮງຂອງໄວໜຸ່ມເຂົ້າໃນການສ້າງສາປະຊາຄົມຈີນ-ອາຊຽນ ໃຫ້ມີສັນຕິພາບ, ສະຫງົບສຸກ, ຈະເລີນຮຸ່ງເຮືອງ, ສວຍງາມ ແລະ ເປັນມິດ.

 

ທ່ານ ຊອ. ປທ. ສຸວັນນະຫົງ ລັດຕະນະພິມ 

ທ່ານ ຊອ. ປທ. ສຸວັນນະຫົງ ລັດຕະນະພິມ ກ່າວວ່າ ສອງຊາດລາວ-ຈີນ ມີສາຍພູ ແລະ ສາຍນໍ້າທີ່ມາຈາກຕົ້ນກໍາເນີດດຽວກັນ, ຮ່ວມຊາຕາກໍາດຽວກັນ, ມີອະນາຄົດກ່ຽວພັນກັນ. ການແລກປ່ຽນວັດທະນະທໍາບໍ່ພຽງແຕ່ເປັນຂົວຕໍ່ທາງຈິດໃຈລະຫວ່າງຈີນ-ອາຊຽນ, ແຕ່ມັນຍັງແມ່ນຮາກຖານອັນໝັ້ນແກ່ນທີ່ຂ້າມຜ່ານປະຫວັດສາດ ແລະ ມຸ່ງໜ້າສູ່ອະນາຄົດ.ໄວໜຸ່ມແມ່ນອະນາຄົດຂອງຊາດ,ມະຫາວິທະຍາໄລແຫ່ງຊາດລາວເຫັນສໍາຄັນເຖິງການແລກປ່ຽນລະຫວ່າງໄວໜຸ່ມ, ຫວັງວ່າທັງສອງປະເທດຈະສືບຕໍ່ເພີ່ມທະວີການແລກປ່ຽນພົບປະລະຫວ່າງໄວໜຸ່ມໃນຫຼາຍຂົງເຂດ ແລະ ຫຼາຍຮູບແບບ, ເພື່ອສົ່ງເສີມການສ້າງຄວາມເຂົ້າໃຈລະຫວ່າງສອງຊາດລາວ-ຈີນໃຫ້ເລິກເຊິ່ງກວ່າເກົ່າ.

 

ທ່ານ ຮວງເວີນກ່າງ  

ທ່ານ ຮວງເວີນກ່າງ ກ່າວວ່າ, ພະລັງງານໄຟຟ້າທີ່ເປັນພື້ນຖານໂຄງລ່າງແມ່ນໜຶ່ງໃນອຸດສາຫະກໍາສໍາຄັນໃນການກໍ່ສ້າງປະຊາຄົມຮ່ວມຊາຕາກໍາລາວ-ຈີນ. ຫຼາຍປີມານີ້, ມິດຕະພາບລາວ-ຈີນ ນັບມື້ນັບເລິກເຊິ່ງ, ການຮ່ວມມືລະຫວ່າງສອງຝ່າຍກໍນັບມື້ນັບສະໜິດແໜ້ນ, ໂດຍສະເພາະການຮ່ວມມືໃນຂົງເຂດພະລັງງານໄຟຟ້າໄດ້ຮັບໝາກຜົນເປັນຢ່າງດີ. ບໍລິສັດຕາຂ່າຍໄຟຟ້າພາກໃຕ້ຈີນ ໃນຖານະທີ່ເປັນໜຶ່ງໃຫ້ບໍລິສັດຊັ້ນນໍາດ້ານອຸດສາຫະກໍາພະລັງງານໄຟຟ້າຂອງຈີນ, ເວລາໃດກໍສຸມໃສ່ຊຸກຍູ້ການຮ່ວມມືດ້ານພະລັງງານສາກົນ. ຍຶດໝັ້ນຫຼັກການເປີດກວ້າງໂອບອ້ອມ, ຮ່ວມມືແບບຕ່າງຝ່າຍຕ່າງໄດ້ຜົນປະໂຫຍດ, ບໍລິສັດຕາຂ່າຍໄຟຟ້າພາກໃຕ້ຈີນຈະສືບຕໍ່ຮັກສາການຮ່ວມມືກັບຝ່າຍລາວຢ່າງໃກ້ຊິດ, ຈະຮ່ວມກັນຍົກລະດັບພື້ນຖານໂຄງລ່າງດ້ານພະລັງງານໄຟຟ້າ ແລະ ສົ່ງເສີມການພັດທະນາເສດຖະກິດສັງຄົມແບບຍືຍຍົງຂອງສອງປະເທດ.

 

ນາງ ເພັດວັນນາ ສີສະໝຸດ 

ໃນໄລຍະເວລາແບ່ງປັນເລື່ອງລາວ, ໄວໜຸ່ມລາວ 3 ຄົນທີ່ມາຈາກຫຼາຍຂະແໜງການໄດ້ແບ່ງປັນເລື່ອງລາວຄວາມສໍາພັນຂອງຕົນເອງກັບຈີນ. ທ່ານ ພຸດສະດີ ສຸລິຍາມາດ ຜູ້ນໍາທ່ຽວພາສາຈີນ ໄດ້ເລົ່າຄືນປະສົບການຂອງຕົນໃນຕອນທີ່ສຶກສາຢູ່ຈີນ, ພ້ອມທັງໄດ້ກ່າວວ່າ ການເປີດນໍາໃຊ້ທາງລົດໄຟລາວ-ຈີນ ໄດ້ສົ່ງຜົນກະທົບຢ່າງເລິກເຊິ່ງຕໍ່ຂະແໜງການທ່ອງທ່ຽວຂອງລາວ; ນາງ ເພັດວັນນາ ສີສະໝຸດ, ພະນັກງານບໍລິສັດສາຍສົ່ງໄຟຟ້າລາວ ທີ່ເປັນຄົນລາວເຊື້ອສາຍຈີນ, ໄດ້ແບ່ງປັນຄວາມຮູ້ສຶກຂອງຕົນກ່ຽວກັບຄວາມແຕກຕ່າງດ້ານວັດທະນະທໍາລາວ-ຈີນ, ລວມເຖິງປະສົບການສ່ວນຕົນທີ່ມີຄວາມເຊື່ອໝັ້ນ ແລະ ຮ່ວມຕໍ່ສູ້ໄປກັບເພື່ອນຮ່ວມງານຄົນຈີນ; ຈົນແຕ່ງງານມາຢູ່ຈີນ, ຕະຫຼອດເຖິງປະສົບການທີ່ກາຍມາເປັນຜູ້ສ້າງຄອນເທັ້ນໃນສື່ສັງຄົມອອນລາຍ, ລາວຫວັງວ່າວຽກງານ ແລະ ການແບ່ງປັນຂອງຕົນ ຈະສາມາດສ້າງແຮງບັນດານໃຈໃຫ້ໄວໜຸ່ມປະກອບສ່ວນເຫື່ອແຮງເຂົ້າໃນການແລກປ່ຽນ ແລະ ມິດຕະພາບລາວ-ຈີນຫຼາຍຂຶ້ນ.

 

ນາງ Vongthongkham Natkanya

ທ່ານ ພຸດສະດີ ສຸລິຍາມາດ  

ທ່ານ Jared Allon Fa, ບັອກເກີ້ຊາວການາດາ ໄດ້ບອກເລົ່າເຖິງຄວາມສໍາພັນ 30 ປີທີ່ຕັດບໍ່ຂາດລະຫວ່າງຕົນເອງ ແລະ ຈີນ. ທ່ານ Lee John Barrett ບັອກເກີ້ຊາວອັງກິດ ຜ່ານປະສົບການສ່ວນຕົນ ໄດ້ບອກເລົ່າກ່ຽວກັບຄວາມເຂົ້າໃຈຂອງຕົນເອງຕໍ່ປະສົບການ ແລະ ແນວຄິດໃນການກໍ່ສ້າງພື້ນຖານໂຄງລ່າງຊັ້ນນໍາຂອງຈີນ, ລວມເຖິງຄວາມໝາຍຄວາມສໍາຄັນໃນການທີ່ຈີນນໍາເອົາເຕັກໂນໂລຊີທັນສະໄໝ ແລະ ປະສົບການໄປຍັງປະເທດອື່ນ, ເຊິ່ງມັນໄດ້ສົ່ງເສີມການພັດທະນາເສດຖະກິດການຄ້າໃນໃນທ້ອງຖິ່ນ.

 

ທ່ານ Lee John Barrett

ທ່ານ Jared Allon Fa 

ໃນວັນທີ 23 ສິງຫາ, ມື້ກ່ອນກິດຈະກໍາ ນັກຂ່າວຈາກໜັງສືພິມປະຊາຊົນລາວ, ສໍານັກຂ່າວສານປະເທດລາວ, ວິທະຍຸກະຈາຍສຽງແຫ່ງຊາດລາວ, ໜັງສືພິມວຽງຈັນໃໝ່, ວິທະຍຸກະຈາຍສຽງຊາວໜຸ່ມລາວ ແລະ ສື່ມວນຊົນຈາກພາກສ່ວນອື່ນໆຂອງລາວ; ນັກຂ່າວຈາກສໍານັກຂ່າວຊິນຮວາ, ເວັບໄຊປະຊາຊົນຈີນ ແລະ ສື່ມວນຊົນທາງການອື່ນໆຂອງຈີນ; ນັກວິຊາການຈາກຄະນະວິທະຍາສາດສັງຄົມຂອງມະຫາວິທະຍາໄລແຫ່ງຊາດລາວ ແລະ ອື່ນໆ ໄດ້ເດີນທາງໄປຢ້ຽມຢາມສໍາພາດສະຖານີໄຟຟ້າແສນສຸກ 115kV ທີ່ແຂວງຫຼວງພະບາງ.ສະຖານີໄຟຟ້າດັ່ງກ່າວບໍລິຫານງານໂດຍລັດວິສາຫະກິດໄຟຟ້າລາວ, ນອກຈາກຕ້ອງຮັບປະກັນການສະໜອງໄຟຟ້າໃຫ້ແກ່ທາງລົດໄຟລາວ-ຈີນແລ້ວ, ຍັງໄດ້ຕອບສະໜອງການຊົມໃຊ້ໄຟຟ້າປະມານ 1/4 ຂອງນະຄອນຫຼວງພະບາງອີກດ້ວຍ. ທ່ານ ຜ່ານເຫວີຍ (PanWei), ຜູ້ຈັດການຝ່າຍຕິດຕາມຄຸ້ມຄອງຄວາມປອດໄພຂອງ ພະແນກຜະລິດ ແລະ ດໍາເນີນງານ ບໍລິສັດສາຍສົ່ງໄຟຟ້າແຫ່ງຊາດລາວ ທີ່ເປັນບໍລິສັດຮ່ວມທຶນລະຫວ່າງ ບໍລິສັດຕາຂ່າຍໄຟຟ້າພາກໃຕ້ຈີນ ແລະ ລັດວິສາຫະກິດໄຟຟ້າລາວໄດ້ໃຫ້ຂໍ້ມູນກ່ຽວກັບການຮ່ວມມືລາວ-ຈີນໃນການຮັບປະກັນວຽກງານກໍ່ສ້າງພື້ນຖານໂຄງລ່າງດ້ານພະລັງງານໄຟຟ້າຂອງລາວ ຕໍ່ທາງຄະນະຢ້ຽມຢາມ, ພ້ອມທັງໄດ້ຕອບຄໍາຖາມທີ່ຜູ້ເຂົ້າຮ່ວມຍົກຂຶ້ນ.

ທາງລົດໄຟລາວ-ຈີນ ແມ່ນທາງລົດໄຟໄຟຟ້າສາຍທໍາອິດຂອງລາວ, ເຊິ່ງໂຄງການສະໜອງໄຟຟ້າຈາກພາຍນອກໃນສ່ວນຂອງຈີນ ແລະ ລາວນັ້ນລົງທຶນກໍ່ສ້າງ ແລະ ດໍາເນີນງານໂດຍບໍລິສັດຕາຂ່າຍໄຟຟ້າພາກໃຕ້ຈີນສາຂາຢຸນນານ ແລະ ບໍລິສັດລົງທຶນໄຟຟ້າລາວ - ຈີນ(ຮ່ວມທຶນກໍ່ຕັ້ງໂດຍ ບໍລິສັດ ຕາຂ່າຍໄຟຟ້າ ພາກໃຕ້ຈີນ ແມ່ນໍ້າລ້ານຊ້າງ-ແມ່ນໍ້າຂອງ ພະລັງງານ ສາກົນ ຈໍາກັດ ແລະ ລັດວິສາຫະກິດໄຟຟ້າລາວ). ການຮ່ວມມືລາວ - ຈີນ ດ້ານພະລັງງານໄຟຟ້າບໍ່ພຽງແຕ່ສຸມໃສ່ການຍົກລະດັບສະຖຽນລະພາບດ້ານການສະໜອງໄຟຟ້າ ແລະ ການພັດທະນາເສດຖະກິດຂອງລາວເທົ່ານັ້ນ, ຍັງໄດ້ກໍ່ສ້າງບຸກຄະລາກອນດ້ານພະລັງງານໄຟຟ້າໃຫ້ແກ່ລາວ ແລະ ໄດ້ຂັບເຄື່ອນຄວາມກ້າວໜ້າດ້ານເຕັກໂນໂລຊີ ແລະ ເພີ່ມປະສິດທິພາບ ດ້ານການບໍລິຫານຄຸ້ມຄອງ ໃຫ້ແກ່ອຸດສາຫະກໍາ ພະລັງງານໄຟຟ້າຂອງລາວ,ພ້ອມທັງຊຸກຍູ້ປັບປຸງມາດຕະຖານດ້ານພະລັງງານໄຟຟ້າໃຫ້ດີຂຶ້ນອີກດ້ວຍ.