ຈີນ ແລະ ລາວ ຮ່ວມກັນປ້ອງກັນ “ສາຍແອວສີຂຽວ”
ວັນທີ 21 ມິຖຸນາຜ່ານມານີ້, ຢູ່ເມືອງຫຼ້າ ກິ່ງແຂວງປົກຄອງຕົນເອງເຜົ່າລື້ ສິບສອງພັນນາ ຕາມເຂດຊາຍແດນ ລາວ-ຈີນ, ທ່ານ ຢາງຢົງຜິງ (Yang Yongping) ຫົວໜ້າສວນພືດສາສາດເຂດຮ້ອນສິບສອງພັນນາ ສະພາບັນດິດວິທະຍາສາດຈີນ ໄດ້ເລົ່າປະຫວັດສາດທີ່ຈີນຄົ້ນພົບປ່າຝົນເຂດຮ້ອນ, ຄວາມສຳຄັນຂອງປ່າຝົນເຂດຮ້ອນ ແລະ ເລື່ອງລາວກ່ຽວກັບສອງປະເທດຈີນແລະ ລາວ ຮ່ວມກັນປ້ອງກັນປ່າຝົນເຂດຮ້ອນ ທີ່ເປັນ “ສາຍແອວສີຂຽວ” ຂອງມວນມະນຸດ.
ທ່ານ ຢາງຢົງຜິງ ກ່າວວ່າ: ປີ 1974, ຕົ້ນຍາງຖືກຄົ້ນພົບຢູ່ເມືອງຫຼ້າ ແຂວງຢຸນນານ,ການຄົ້ນພົບຕົ້ນໄມ້ຊະນິດນີ້ ທີ່ມີຄວາມສູງເຖິງຫຼາຍສິບແມັດໄດ້ສິ້ນສຸດຖ້ອຍຄຳທີ່ວ່າ “ຈີນບໍ່ມີປ່າຝົນເຂດຮ້ອນ” ແລະ ກໍເຮັດໃຫ້ຈີນ ກາຍເປັນປະເທດທີ່ມີປະເພດປ່າໄມ້ທີ່ຄົບຖ້ວນທີ່ສຸດໃນໂລກ.
ປ່າຝົນເຂດຮ້ອນ ເປັນລະບົບນິເວດ ທີ່ມີຊີວະນາໆພັນຫຼາກຫຼາຍທີ່ສຸດ, ສາມາດດູດຊຶມເອົາກາກບອນໄດ້ຢ່າງຫຼວງຫຼາຍ ແລະ ສະໜອງອົກຊີໃຫ້ແກ່ໜ່ວຍໂລກ, ເປັນແຫຼ່ງນ້ຳທີ່ດີ, ບົວລະບັດມົນລະພິດໄດ້ດີ, ຮັກສາດິນ ແລະ ນ້ຳໄດ້ດີ ເຊິ່ງມີບົດບາດສຳຄັນທີ່ສຸດຕໍ່ລະບົບນິເວດທົ່ວໂລກ.
ຈີນ ແລະ ລາວ ມີສາຍພູ ແລະ ແມ່ນ້ຳຕິດຈອດກັນ, ກິ່ງແຂວງສິບສັງພັນນາແຂວງຢຸນນານ ແລະ ປະເທດລາວ ລ້ວນແຕ່ຕັ້ງຢູ່ເຂດຈຸດສຸມດ້ານຊີວະນາໆພັນທົ່ວໂລກ ແລະ ມີຊັບພະຍາກອນສັດ ແລະ ພືດທີ່ມີເອກະລັກພິເສດ.
ທ່ານ ຢາງຢົງຜິງ ກ່າວວ່າ: “ສອງປະເທດຈີນ ແລະ ລາວ ມີປະຫວັດການໄປມາຫາສູ່ດ້ານວັດທະນະທຳມາແຕ່ບູຮານນະການ, ໃນນັ້ນ ກໍມີການແລກປ່ຽນກ່ຽວກັບພືກສາສາດ.”ຍົກຕົວຢ່າງ: ດອກຈຳປາ ເປັນດອກໄມ້ປະຈຳຊາດຂອງລາວ,
ຢູ່ໃນສວນພືດສາສາດເຂດຮ້ອນສິບສອງພັນນາ ສະພາບັນດິດວິທະຍາສາດຈີນ ກໍມີສວນດອກຈຳປາສະເພາະ, ໃນນັ້ນ, ມີດອກຈຳປາທ້ອງຖິ່ນຫຼາກຫຼາຍຊະນິດ ແລະ ກໍມີຫຼາຍຊະນິດ ທີ່ນຳເຂົ້າຈາກປະເທດອື່ນ.
ໃນຊຸມປີຜ່ານມາ, ສວນພືດສາສາດເຂດຮ້ອນສິບສອງພັນນາ ໄດ້ຮັກສາການຮ່ວມມືຢ່າງແໜ້ນແຟ້ນກັບກະຊວງກະສິກຳ ແລະ ປ່າໄມ້ແຫ່ງ ສປປ ລາວ ແລະ ພາກສ່ວນຄົ້ນຄວ້າວິທະຍາສາດອື່ນໆ, ຮ່ວມກັນສຸມໃສ່ການສຳຫຼວດ ແລະປ້ອງກັນຊີວະນາໆພັນເຂດພາກເໜືອລາວ. ທ່ານ ຢາງຢົງຜິງ ຫວັງວ່າ: ຈະສາມາດເພີ່ມທະວີການຮ່ວມມືໃນຂົງເຂດດັ່ງກ່າວ ຢ່າງແໜ້ນແຟ້ນໃນອະນາຄົດ, ຮ່ວມກັນປ້ອງກັນປ່າຝົນເຂດຮ້ອນ, ປ້ອງກັນຄວາມສວຍງາມ ແລະ ປ້ອງກັນຊີວະນາໆພັນ.
ບົດ/ພາບໂດຍ: App ໜັງສືພິມລາຍວັນຢຸນນານ