ສະບາຍດີຕອນເຊົ້າ ຕ້າຫຼີ, ເມືອງທີ່ສາມາດມອງເຫັນພູເຂົາ ແລະ ທະເລ
ເມືອງຕ້າຫຼີຕັ້ງຢູ່ພາກຕາເວັນຕົກຂອງແຂວງຢຸນນານ ແລະ ມີຊື່ສຽງໃນດ້ານທິວທັດທຳມະຊາດທີ່ອຸດົມສົມບູນ ແລະ ປະຫວັດສາດວັດທະນະທຳທີ່ເລິກເຊິ່ງ. ທິວທັດທຳມະຊາດທີ່ເປັນເອກະລັກຂອງເມືອງ ຕ້າຫຼີ ສ້າງເປັນສະເໜ່ອັນພິເສດຂອງມັນ. ພູຊາງຊານເປັນສາຍພູສັນຍະລັກຂອງ ຕ້າຫຼີ, ປະກອບດ້ວຍພູເຂົາ 19 ຈອມ ທີ່ປົກຫຸ້ມໄປດ້ວຍຫິມະຕະຫຼອດທັງປີ ແລະ ມີສາຍນໍ້າໄດ້ໄຫຼຜ່ານຮ່ອມພູເຂົາ, ຈຶ່ງເປັນສະຖານທີ່ດີຢ້ຽມສໍາລັບການປີນພູ ແລະ ການຍ່າງປ່າ. ທະເລສາບເອີໄຮເປັນທະເລສາບທີ່ສວຍງາມທີ່ມີນໍ້າສະອາດ, ຂີ່ລົດຖີບ ຫຼື ຂີ່ເຮືອອ້ອມທະເລສາບ ແມ່ນກິດຈະກໍາທີ່ນັກທ່ອງທ່ຽວມັກໄປເຮັດ.
ເມືອງເກົ່າຕ້າຫຼີເປັນສັກຂີພິຍານຂອງປະຫວັດສາດແລະວັດທະນະທໍາ ທີ່ໄດ້ຮັບການຮັກສາໄວ້ຢ່າງດີໃນກໍາແພງນະຄອນບູຮານ ແລະ ສິ່ງກໍ່ສ້າງບູຮານເຊັ່ນ: 3 ທາດຂອງວັດຊົ່ງເສິງ ແລະ ເມືອງບູຮານຕ້າຫຼີ ເປັນຕົ້ນ, ວັດຖຸບູຮານເຫຼົ່ານີ້ບໍ່ພຽງແຕ່ໄດ້ສະແດງວັດທະນະທໍາປະຫວັດສາດຂອງຕ້າຫຼີ, ຫາກຍັງທໍາໜ້າທີ່ເປັນປ່ອງຢ້ຽມໃຫ້ແກ່ນັກທ່ອງທ່ຽວໄປຮັບຮູ້ເຂົ້າໃຈເຖິງວັດທະນະທໍາຊົນເຜົ່າປາຍອີກດ້ວຍ. ຊົນເຜົ່າປາຍ ແມ່ນຊົນເຜົ່າຫຼັກຂອງເມືອງຕ້າຫຼີ ແລະ ດຶງດູດນັກທ່ອງທ່ຽວດ້ວຍຮູບແບບສະຖາປັດຕະຍະກໍາ, ຊຸດເສື້ອຜ້າອາພອນ ແລະ ງານສະເຫຼີມສະຫຼອງທີ່ເປັນເອກະລັກສະພິເສດຂອງມັນ.
ນອກນີ້, ເມືອງຕ້າຫຼີຍັງເປັນຂົວຂ້າມຂອງຫຼາຍວັດທະນະທໍາທາງປະຫວັດສາດ, ແມ່ນເມືອງຫຼວງຂອງອານາຈັກໜານຈາວ ແລະ ອານາຈັກຕ້າຫຼີຢູ່ໃນປະຫວັດສາດ, ເຊິ່ງໄດ້ຫຼົງເຫຼືອມໍລະດົກວັດທະນະທໍາອັນອຸດົມສົມບູນໃຫ້ແກ່ລຸ້ນຫຼັງ. ຈັງຫວະຊີວິດຢູ່ທີ່ນີ້ແມ່ນສະບາຍ ແລະ ສະພາບອາກາດກໍເໝາະສົມ, ມັນເປັນສະຖານທີ່ທີ່ດີໃນການຜ່ອນຄາຍ ແລະ ສໍາຜັດປະສົບການຈັງຫວະຊີວິດອັນຊ້າໆ.