ຮູ້ສຶກເຖິງ "ກິ່ນອາຍຂອງວິທີຊີວິດ" ທີ່ລອຍຂຶ້ນມາໃນເມືອງບູຮານຜິງຢາວ

ເມືອງບູຮານຜິງຢາວ (Pingyao) ແຂວງຊານຊີ (Shanxi) ຕັ້ງຢູ່ພູພຽງດິນເຫຼືອງ, ແມ່ນໜຶ່ງໃນເມືອງບູຮານທີ່ຈີນປົກປັກຮັກສາໄວ້ຢ່າງຄົບຖ້ວນສົມບູນທີ່ສຸດຂອງຈີນ. ຍ່າງຜ່ານປະຫວັດສາດ 2800 ກວ່າປີ, ໃນເມືອງບູຮານທີ່ມີເນື້ອທີ່ 2.25 ກິໂລຕາແມັດ ໄດ້ຮັກສາວັດຖຸບູຮານ 300 ກວ່າລາຍການ, ອາຄານດັ້ງເດີມເກືອບ 4000 ແຫ່ງ. ໃນເມືອງບູຮານທີ່ມີດິນຈີ່ສີເທົາ ກະເບື້ອງສີດຳ, ວັດທະນະທຳດັ້ງເດີມຈຳນວນຫຼາຍ ໄດ້ຖືກສົ່ງຕໍ່ ແລະ ສືບທອດຢ່າງມີຊີວິດຊີວາທ່າມກາງຊີວິດປະຈຳວັນ. ປີ 1997, ມັນໄດ້ເປັນເມືອງທຳອິດຂອງຈີນທີ່ຖືກບັນຈຸໃຫ້ເປັນມໍລະດົກໂລກທາງວັດທະນະທຳໃນທົ່ວຕົວເມືອງ.

ປະຕູເມືອງເກົ່າທີ່ມີຮອຍດ່າງ, ຮອຍລໍ້ລົດທີ່ເລິກໆ, ຝາເມືອງບູຮານທີ່ທັງໜາທັງໜັກ,ການແກະສະຫຼັກທີ່ປານີດ. ໃນພິພິທະພັນປະຫວັດສາດທີ່ສ້າງຂຶ້ນຕາມທຳມະຊາດນີ້, ທຸກບ່ອນລ້ວນແຕ່ແມ່ນບູຮານສະຖານທາງວັດທະນະທຳທີ່ຕ້ອງປົກປັກຮັກສາຢ່າງເອົາໃຈໃສ່.

ປີມໍ່ໆມານີ້, ຝາກຳແພງເມືອງຜິງຢາວ ໄດ້ຮັບການສ້ອມແປງ ແລະ ເສີມໃຫ້ໝັ້ນຄົງຢ່າງທັນເວລາ, ອາຄານປະຫວັດສາດ ຍັງຄົງໄດ້ຮັບການປົກປັກຮັກສາຢ່າງຕໍ່ເນື່ອງ, ໄດ້ສ້າງກົນໄກໃນໄລຍະຍາວ ສຳລັບປົວແປງສິ່ງກໍ່ສ້າງທີ່ຜິດກົດໝາຍໃນເມືອງບູຮານ. ໃນເວລາດຽວກັນນີ້, ມາດຕະການເພື່ອການປັບປຸງຊີວິດການເປັນຢູ່ຂອງປະຊາຊົນແຕ່ລະມາດຕະການໄດ້ຮັບການຊຸກຍູ້ຢ່າງເຂັ້ມແຂງຄື: ສວນສາທາລະນະ, ເດີ່ນຈອດລົດ, ສູນບໍລິການນັກທ່ອງທ່ຽວຖືກສ້າງຂຶ້ນຢູ່ນອກເມືອງ; ຍ້າຍເຕົາເຜົາຖ່ານຫີນຂອງພໍ່ຄ້າໃນເມືອງບູຮານໃຫ້ໝົດ, ສ້າງຫ້ອງນ້ຳເພື່ອການທ່ອງທ່ຽວແບບທັນສະໄໝ, ບັນລຸການເກັບແຍກຂີ້ເຫຍື້ອ; ໂຄງການຍົກລະດັບທໍ່ສົ່ງລວມ ແລະ ປັບປຸງຖະໜົນສຳລັບພະລັງງານໄຟຟ້າ, ການສື່ສານ, ການສະໜອງນ້ຳປະປາ, ນ້ຳຝົນ, ນ້ຳເປື້ອນ ແລະ ອື່ນໆ ກໍຄ່ອຍໆສົມບູນ.

ເມືອງບູຮານຜິງຢາວ ແມ່ນປະຫວັດສາດທີ່ສະສົມມາ, ແມ່ນຄວາມຄິດອາໄລໃນໃຈຂອງຄົນໃນບ້ານເກີດ, ທັງແມ່ນທິວທັດໃນສາຍຕາຂອງຄົນນອກ. ປັດຈຸບັນ, ຢູ່ບ່ອນນີ້ຍັງຄົງຮັກສາສະເໜ່ໃນອະດີດ, ທັງຍັງສະແດງກຳລັງວັງຊາຂອງໄວໜຸ່ມ, ສ່ອງປະກາຍ “ກິ່ນອາຍຂອງວິຖີຊິວິດ” ຂອງເມືອງບູຮານ, ກາຍເປັນ “ເມືອງບູຮານທີ່ມີຊີວິດຊີວາ” ສົມກັບຊື່ສຽງຢ່າງແທ້ຈິງ.