ລາຍການພາສາມື: “ນັກບິນຕິດຊຸດປີກ” ທະຍານເໜືອເມກຕາມສາຍລົມ

ເຂດທ່ອງທ່ຽວຕ້າຊານປາວ (Dashanbao) ຕັ້ງຢູ່ ນະຄອນຈາວທົງ (Zhaotong) ແຂວງຢຸນນານ (Yunnan), ເປັນເຂດສະຫງວນທຳມະຊາດທີ່ກວມລວມອົງປະກອບຫຼາຍຢ່າງເຊັ່ນ: ພູຜາສາຍນ້ຳ, ດິນຊຸ່ມ, ທົ່ງຫຍ້າ, ນົກຫາຍາກ ແລະ ອື່ນໆ, ຢູ່ບ່ອນນີ້ພູສູງເຫວເລິກ, ຮ່ອມພູສັບໄຂ່ວກັນໄປມາ, ໂດຍສະເພາະແມ່ນທະເລໝອກທີ່ໄຮ້ຂອບເຂດ, ໄດ້ດຶງດູດສາຍຕາຂອງນັກທ່ອງທ່ຽວ ແລະ ຜູ້ມັກການຖ່າຍຮູບຈຳນວນນັບບໍ່ຖ້ວນ.

ມື້ມໍ່ໆມານີ້, ກິດຈະກຳໜຶ່ງທີ່ຕື່ນເຕັ້ນອັນຕະລາຍ - ການສະແດງການບິນດ້ວຍຊຸດປີກ (Wingsuit Flying) ຈັດຂຶ້ນຢູ່ຕ້າຊານປາວ, ນັກກິລາທີ່ມາຈາກປະເທດຈີນ, ນອກແວ, ອັງກິດ, ອາເມຣິກາ ແລະ ອື່ນໆ, ໄດ້ນໍາສະເໜີພາບທີ່ຕື່ນຕາຕື່ນໃຈມີສີສັນຢ່າງຫາບ່ອນປຽບບໍ່ໄດ້ ທ່າມກາງຮ່ອມຜາ ແລະ ຍອດພູອັນມະຫັດສະຈັນ.

ການບິນດ້ວຍຊຸດປີກ, ກໍຄື ນັກກິລານຸ່ງຊຸດການບິນທີ່ມີປີກເປັນຄູ່ ແລະ ອຸປະກອນໂດດຈ້ອງ (ຈ້ອງຊູຊີບ), ແລ້ວໂດດລົງຈາກຈຸດສູງໆ ເຊັ່ນ: ຍົນ, ໜ້າຜາ ແລະ ອື່ນໆ, ໃຊ້ຮ່າງກາຍອອກກຳລັງກາຍດ້ວຍການບິນເທິງອາກາດທີ່ບໍ່ມີແຮງເຄື່ອນໄຫວ, ເປັນກິລາທີ່ເກືອບຄືການບິນຂອງສັດປະເພດນົກທີ່ສຸດ. ຈຸດທີ່ສູງຈາກລະດັບໜ້ານ້ຳທະເລທີ່ສຸດຂອງຕ້າຊານປາວແມ່ນ 4041 ແມັດ, ຈຸດທີ່ຕ່ຳຈາກລະດັບໜ້ານ້ຳທະເລທີ່ສຸດແມ່ນ 267 ແມັດ, ເໝາະສົມຫຼາຍຕໍ່ກິລາການບິນດ້ວຍປີກ. ປີ 2014, ຕ້າຊານປາວ ຖືກຮັບຮອງຈາກ ອົງການກິລາການບິນດ້ວຍຊຸດປີກສາກົນ ໃຫ້ເປັນ “ທາງຫຼວງອັນສູງສຸດໃນໂລກທີ່ເປັນສະຖານທີ່ການໂດດຂອງກິລາການບິນດ້ວຍຊຸດປີກ”，ກາຍເປັນສະໜາມແຂ່ງຂັນໃນອຸດົມຄະຕິຂອງບັນດານັກກິລາການບິນດ້ວຍຊຸດປີກ ຈາກແຕ່ລະປະເທດ.

ກ່ອນການແຂ່ງຂັນ, ນັກທ່ອງທ່ຽວ ແລະ ຜູ້ມັກການຖ່າຍຮູບທີ່ມາຈາກສະຖານທີ່ຕ່າງໆທົ່ວໂລກ ກໍໄດ້ລວມໂຕກັນແຕ່ເຊົ້າໆ, ລໍຄອຍງານລ້ຽງທີ່ຕື່ນຕານີ້.

“Ready? Go!” (ກຽມພ້ອມຫຼືຍັງ? ໄປ) ຫຼັງຈາກທີ່ທຸກຢ່າງກຽມພ້ອມແລ້ວ, ບັນດານັກກິລາກໍຍື່ນມືອອກມາຮັບລົມ, ກະໂດດລົງຈາກແທ່ນທີ່ເປັນແກ້ວ, ທັງກາງສອງແຂນ ແລະ ສອງຂາ, ໃຫ້ລົມພັດໃສ່ຊຸດນັກບິນຈົນເຕັມ. ຫຼັງຈາກດິ່ງລົງໄປບໍ່ພໍເທົ່າໃດວິນາທີ, ກໍເງີຍຫົວຂຶ້ນເລັກນ້ອຍ, ຫົດທ້ອງເຂົ້າ, ປັບທ່າທາງການບິນ, ເດີນທາງຜ່ານຮ່ອມພູໃຫຍ່ພາຍໃຕ້ຄວາມໄວ 245 ກິໂລແມັດ/ຊົ່ວໂມງ. ເທົ່າທີ່ຕາສາມາດແນມເຫັນໄດ້, ຫີນຜາທີ່ບໍ່ລຽບສະເໝີກັນ ແລະ ສາຍພູທີ່ຂຽວອຸ່ມທຸ່ມກໍາລັງມຸ່ງໜ້າມາຫາ, ຈົນວ່າ ສາມາດແນມເຫັນຮອຍແຕກເທິງຫີນຜາໄດ້ຢ່າງຈະແຈ້ງ. ຕໍ່ຈາກນັ້ນ, ນັກກິລາກໍກາງຈ້ອງ, ລົງຈອດໃນຈຸດຈອດທີ່ກຳນົດໄວ້ ປະມານ 700 ແມັດຫ່າງຈາກລະດັບໜ້ານ້ຳທະເລ.

ການບິນດ້ວຍຊຸດປີກນີ້ ຢູ່ປະເທດຈີນເລີ່ມຕົ້ນຂຶ້ນໃນປີ 2012, ພາຍໃນເວລາສັ້ນໆສິບກວ່າປີ, ຜູ້ມັກຮັກໃນການໂດດຈ້ອງ ນັບມື້ນັບຫຼາຍຂຶ້ນໄດ້ເຂົ້າຮ່ວມໃນຖັນແຖວກິລາການບິນດ້ວຍຊຸດປີກ, ປາກົດມີຜູ້ຫຼິ້ນກິລາການບິນດ້ວຍຊຸດປີກທີ່ເປັນຊາວໜຸ່ມຈຳນວນຫຼາຍ. ດ້ວຍເງື່ອນໄຂທາງທຳມະຊາດທີ່ໄດ້ຮັບປະໂຫຍດຈາກຄວາມອຸດົມສົມບູນທີ່ເປັນເອກະລັກ ຂອງຕ້າຊານປາວ ນະຄອນຈາວທົງ ໄດ້ກາຍເປັນສະໜາມການບິນທີ່ດີເດັ່ນໃຫ້ແກ່ “ນັກບິນຕິດຊຸດປີກ”. ນອກຈາກນີ້, ທິວທັດທຳມະຊາດຂອງຕ້າຊານປາວກໍງົດງາມ, ນັກທ່ອງທ່ຽວ ນອກຈາກຊົມເບິ່ງກັບການສະແດງການບິນດ້ວຍຊຸດປີກແລ້ວ, ຍັງສາມາດຊື່ນຊົມກັບທິວທັດອັນສວຍສົດງົດງາມ ເຊັ່ນ: ຮ່ອມພູ, ທະເລເມກໝອກ, ດິນຊຸ່ມ, ແສງຕາເວັນຂຶ້ນ ແສງຕາເວັນຕົກດິນ, ຟາມລ້ຽງສັດ ແລະ ອື່ນໆ, ເປັນສະຖານທີ່ອຸດົມຄະຕິຂອງການທ່ອງທ່ຽວ, ການຖ່າຍຮູບ, ການຄົ້ນຫາ, ການສຳຫຼວດທາງວິທະຍາສາດ ແລະ ການພັກຜ່ອນໃນລະດູຮ້ອນ.