ນາງ ຈາງສຽວຢຽນ ຜູ້ຕາງໜ້າ ສູນທ່ອງທ່ຽວວັດ ທະນະທໍາລາວ ກ່າວ ເຊີນຊວນ ແລະ ຍິນດີຕ້ອນຮັບທ່ານມາທ່ຽວຊົມປະເທດລາວ ທີ່ສວຍສົດງົດງາມ
ລາຍການ “ອູຮາ” (WUHA) ເປັນລາຍການທ່ອງທ່ຽວຂະໜາດໃຫຍ່ ທີ່ໄດ້ຮັບຄວາມນິຍົມຊົມຊອບຫຼາຍຢູ່ຈີນ, ໃນລາຍການພາກທີ 4, ເຂົາເຈົ້າໄດ້ເດີນທາງມາເຖິງປະເທດລາວ ທີ່ຈຸດໝາຍປາຍທາງແຫ່ງໜຶ່ງທີ່ມີທິວທັດທຳມະຊາດທີ່ສວຍສົດງົດງາມ ແລະ ມີວັດທະນະທຳທີ່ຫຼາກຫຼາຍສີສັນ. ທີມງານຖ່າຍທຳໄດ້ຮູ້ສຶກມີຄວາມສົດຊື່ນ ແລະ ໄດ້ພົບເລື່ອງແປກໆມ່ວນໆຫຼາຍເລື່ອງ ໃນເວລາຖ່າຍທຳລາຍການຢູ່ລາວ, ຍັງໄດ້ເປັນສັກຂີພິຍານໃຫ້ເຫັນຄວາມສຸກ ແລະ ໂອກາດທີ່ນໍາມາຈາກການຮ່ວມສ້າງ “ໜຶ່ງແລວ ໜຶ່ງເສັ້ນທາງ”.
ການໄປຖ່າຍທຳລາຍການຢູ່ລາວເທື່ອນີ້ ເປັນໜຶ່ງໃນຜົນງານຂອງສູນທ່ອງທ່ຽວວັດທະນະທໍາ ລາວ ເພື່ອໂຄສະນາຊັບພະຍາກອນການທ່ອງທ່ຽວຂອງປະເທດລາວເຂົ້າສູ່ປະເທດຈີນ, ພວກເຮົາໄດ້ອໍານວຍຄວາມສະດວກຈົນສຸດຄວາມສາມາດຂອງຕົນໃຫ້ແກ່ທີມງານຖ່າຍທຳລາຍການ ແລະ ແຂກທີ່ມາຮ່ວມລາຍການ ຫຼາຍດ້ານ, ເຊັ່ນ: ຂໍໃບອະນຸຍາດການຖ່າຍທຳ, ການເຊື່ອຖືທາງວັດທະນະທໍາ, ການແປພາສາ, ການເດີນທາງ ແລະ ການປະສານງານສະຖານທີ່ ເປັນຕົ້ນ, ພ້ອມດຽວກັນນັ້ນ, ໃນໄລຍະທີ່ທີມງານໄປທັດສະນະສຶກສາ ສະຖານທີ່ຖ່າຍທຳ ໃນໄລຍະຕົ້ນ, ພວກເຮົາໄດ້ສະເໜີລາຍການຕ່າງໆທີ່ມີເອກະລັກພິເສດຂອງປະເທດລາວໃນດ້ານອາຫານການກິນ, ທີ່ພັກເຊົາ, ການເດີນທາງ, ການທ່ອງທ່ຽວ, ການຊື້ສິນຄ້າ ແລະ ການບັນເທີງໃຫ້ແກ່ທີມງານ ເຊິ່ງໄດ້ເພີ່ມເນື້ອໃນຫຼາຍຢ່າງໃຫ້ແກ່ການຖ່າຍທຳລາຍການ, ບໍ່ພຽງແຕ່ເຮັດໃຫ້ບັນດາແຂກທີ່ເຂົ້າຮ່ວມລາຍການສາມາດສໍາຜັດກັບຮີດຄອງປະເພນີຕ່າງໆຂອງປະເທດລາວເທົ່ານັ້ນ, ຍັງເຮັດໃຫ້ຜູ້ຊົມປຽບເໝືອນໄດ້ມາທ່ຽວປະເທດລາວດ້ວຍຕົນເອງ ຜ່ານການຊົມລາຍການ ດັ່ງກ່າວນີ້.
ແຂກທີ່ເຂົ້າຮ່ວມລາຍການໄດ້ເຕົ້າໂຮມຢູ່ສະຖານີລົດໄຟບໍ່ຫານຂອງແຂວງຢຸນນານ ຈີນ, ພາຍຫຼັງມາໄດ້ແຈ້ງອອກເມືອງ, ຂີ່ຂະບວນລົດໄຟໂດຍສານສາກົນຕາມທາງລົດໄຟລາວ-ຈີນ ເດີນທາງອອກຈາກປະເທດຈີນ ຢ່າງສະດວກສະບາຍ, ແລ້ວເດີນທາງໄປຮອດນະຄອນ-ຫຼວງພະບາງທີ່ເປັນເມືອງມໍລະດົກໂລກ. ແຂກທີ່ເຂົ້າຮ່ວມລາຍການໄດ້ຂີ່ລົດຕຸກໆໄປທ່ຽວຫຼິ້ນ, ໄດ້ໄປຍ່າງເລາະຕະຫຼາດກາງຄືນຫຼວງພະບາງ, ຍັງໄດ້ໄປຂີ່ເຮືອຢູ່ຕາມແມ່ນໍ້າຂອງ, ໄປໂດດນໍ້າຢູ່ວັງວຽງ, ໄປເຕະກະຕໍ້ ແລະ ເຂົ້າຮ່ວມລາຍການອື່ນໆທີ່ມີເອກະລັກພິເສດຂອງປະເທດລາວ.
ໃນເວລາເດີນທາງ, ຍັງໄດ້ພົບຫຼາຍເລື່ອງທີ່ລືມຍາກ, ເຊັ່ນ: ບັນດາແຂກໄດ້ເຕັ້ນ “ວິຊາສາມ” ທີ່ເປັນລາຍການເຕັ້ນຕະຫຼົກ ທີ່ໄດ້ຮັບຄວາມນິຍົມຊົມຊອບທີ່ສຸດຢູ່ຕາມທາງອິນເຕີເນັດຢູ່ຕາມເຮືອສຳລານແມ່ນໍ້າຂອງ, ນອກຈາກນີ້, ພວກເຂົາຍັງໄດ້ສອນບັນດານັກຮຽນຂອງໂຮງຮຽນພາສາຈີນທ້ອງຖິ່ນຮ້ອງເພງ “ອະນາຄົດດີງາມກວ່າເກົ່າ” ແລະ ເພງອື່ນໆ ເຊິ່ງເຮັດໃຫ້ຄົນທັງຫຼາຍຮູ້ສຶກຊາບຊື້ງໃຈຫຼາຍ. ໃນການແຂ່ງໂດດນໍ້າທີ່ໜອງບລູລາກູນທີ່ວັງວຽງ, ແຂກທີ່ຮ່ວມລາຍການໄດ້ຊອກຫາ ຫຼື ຈັບຄູ່ “ຄູ່ຮ່ວມກະໂດດນໍ້າ” ຢູ່ກັບບ່ອນນັ້ນ ກໍມີຫຼາຍຄົນຍາດກັນເຂົ້າຮ່ວມ ເຊິ່ງມີບັນຍາກາດຄຶກຄື້ນມ່ວນຊື່ນທີ່ສຸດ.
ປີ 2024 ບໍ່ພຽງແຕ່ເປັນປີທ່ອງທ່ຽວລາວ ເທົ່ານັ້ນ, ຍັງເປັນປີແລກປ່ຽນວັດທະນະທໍາຈີນ-ອາຊຽນ; ເຊື່ອໝັ້ນວ່າ: ພາຍຫຼັງ ລາຍການບັນເທີງ “ອູຮາ” ໄດ້ອອກອາກາດໄປແລ້ວ, ເສັ້ນທາງການທ່ອງທ່ຽວ ແລະ ລາຍການທ່ອງທ່ຽວທີ່ມີເອກະລັກພິເສດ ທີ່ບັນດາແຂກເຄີຍເຂົ້າຮ່ວມນັ້ນ ຈະກາຍເປັນຫົວຂໍ້ຈຸດສຸມ ຫຼື ຫົວຂໍ້ທີ່ສາມາດດຶງດູດ ຜູ້ຊົມໃນປະເທດຈີນ, ເຊິ່ງຈະເຮັດໃຫ້ນັກທ່ອງທ່ຽວຈີນໄປທ່ຽວລາວເພີ່ມຂຶ້ນຢ່າງຫຼວງຫຼາຍ.
ຮຽບຮຽງໂດຍ: Huang Yixian, Yang Chunmei